4
'Wɔn 'ö ‑gban gbaɔdhe ꞊bhlësü 'ö Atanna ‑ya kë kwa ‑gɔ bha ‑a ‑kë "sɛgbɔ 'gü ‑sü ‑bha ‑a ‑dhiang 'ö Pɔdhö ‑ya zë
1 Yë 'ö Atanna ‑ya dɔ yi ‑kɔ 'ka 'ö 'yi‑ kë sië ya ‑ya kë "dhʋ̈ 'ö ‑bha "klʋsëdhɛ ꞊në‑ ‑wɔn 'gü. 'Wɔn 'ö‑ ‑wɔn 'gü 'yö yi 'gü 'yaa ga ‑a kë ‑sü 'ka 'pö bha 'yö bha.
2 'Wɔn 'ö‑ ‑wɔn 'gü 'pö 'yö 'yaa "wɩ‑ ‑bha kö yi ‑kɔ ‑yö ‑da 'yiʋ̈‑ ‑wɔn ‑nu 'wo‑ ‑kë ‑nu wo ‑bin 'gü ‑bin 'gü bha‑ 'gü, 'ö 'yaa "wɩ‑ ‑bha kö 'yi "kpënng‑ kë mɛ ‑nu ‑gɔ, kö 'yi Atanna ‑wʋ "glaa‑ ‑ta ‑nu wo, 'ö ‑kɔ 'ö yi ‑zë 'yi dho‑ kë 'ka ‑zianwo kö mɛ ꞊gban "pɛpɛ ‑wo tɛanwɔn bha ꞊në‑ 'gü ma 'kpakpadhö, kë "dhʋ̈ kö ‑wo 'dhang bho yi "dhiʋ̈ ꞊dhɛ Atanna ‑bha yëkëmɛ ‑mü yi 'ka bha 'yö bha.
3 "Kɛɛ yö ‑zë ꞊gban 'gü, Atanna ‑bha 'wɔntaɔngsë 'yi‑ pö sië bha‑ 'gü ‑yö tii mɛ 'bha ‑nu 'gü. "Kɛɛ 'mɛ 'wo 'gü see‑ ‑mɛ ‑nu 'ka bha ꞊në‑ 'gü 'dhö tii ‑a ‑nu 'gü.
4 'Dhang 'ö 'waa‑ bho Klisi ‑wɔn "dhiʋ̈ bha‑ 'klɔɔ‑ ‑mü ꞊dhɛ Sɔtraan 'ö "kpʋng ꞊taa yö bha ꞊në wo ‑zë ‑a ‑nu ‑bha ‑zlan 'ka, 'yö ꞊yaa‑ ‑nu "gblüdhö ‑yan ꞊gban 'wü "pɛɛpɛdhö, kë "dhʋ̈ kö 'wa 'dho Atanna ‑bha naɔ ‑së 'yi‑ dɔ sië, 'ö yö ꞊në ꞊dhɛ ‑dhangbha 'dhö ‑dhɛtiidhɛ 'gü bha‑ yö. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔntaɔngsë bha ꞊në 'mɛ ꞊ya 'dhang bho‑ "dhiʋ̈ 'yö‑ ‑mɛ ‑ta ‑yö ‑pʋ, 'yö Atanna ‑bha mɛdhɛ bha‑ 'bhü yö Klisi 'ö Atanna "blɛɛn‑ 'ka bha‑ ‑bha.
5 Yi ‑zë ziö "pɛpɛ 'yi‑ wo bha 'yaa yi ‑dɩ ‑dhiang zë mɛ 'bha ‑dhɛ, Yesu Klisi 'ö kwa Dëmɛ 'ka bha ꞊në 'yi‑ ‑dhiang zë. Yi yi ‑dɩ ‑sü ꞊dhɛ kaa‑ gwëëzë ‑nu 'dhö Yesu bha ꞊në‑ ‑wɔn 'gü.
6 ‑A 'klɔɔ‑ ‑mü ꞊dhɛ Atanna do 'ö‑ pö yi 'bha 'ka ꞊dhɛ:
«‑Dhɛ 'gü‑ ‑dho "pʋ ‑dhɛtiidhɛ 'gü bha»
yöö do bha ꞊në ‑dhɛ ‑pʋ kwa zuë" "piʋ̈ "tʋ̈ng 'kwa dɔ‑ 'ka ya‑ 'gü kë "dhʋ̈ kö‑ ‑bha mɛdhɛ 'bhü 'ö Klisi ‑bha bha 'kwa‑ dɔ.
7 "Kɛɛ yi ‑dhü 'ö pë ꞊bhlëbhlësü 'ö‑ "sima 'yaa 'dhö bha 'ö ‑ya ‑sü 'ka‑ 'gü bha ‑yö "wlaasü 'ka ꞊dhɛ "sɛgbɔ 'dhö, kë "dhʋ̈ kö ‑wa 'wɔn dɔ ꞊dhɛ 'gü gbɩɩdhɛ ‑ziisü 'ö yi 'gü bha Atanna ꞊në‑ ‑bha 'dhö ‑mü, yi ‑dɩ ‑bha 'yaa ‑mü.
8 ‑A ‑kë "dhʋ̈ ‑sü bha‑ 'gü, 'wɔn "gbɩɩ‑ ꞊gban "pɛpɛ suu 'do 'do ‑yö wɔ sië yi ‑ta, "kɛɛ 'ö ꞊dhɛ ꞊kwɛɛ 'dhö kö 'yii yi "yɛ ‑zë bho. "Sika ‑yö yi ‑bha "kɛɛ 'yii yi ‑din ‑zë yën.
9 ‑Wo yi ‑wëëkë "dhiʋ̈ ‑bho, "kɛɛ Atanna ‑zë 'yaa ‑kɔ "kan yi "dhiʋ̈. ‑Wo yi 'pɔn ‑sü 'ka "kɛɛ yi 'gü ‑zë 'yii see‑.
10 Sëë do 'ö Yesu ‑ya bho 'ö dho 'ö zun‑ 'ka‑ ga ‑sü ‑bha bha ꞊në 'yi‑ bho sië 'pö ꞊dhɛ‑ 'dhö, kë "dhʋ̈ kö ꞊sii gɔɔ ꞊gblɛɛn 'ö‑ 'gü bha ‑yö ‑kë yi 'gü 'pö.
11 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "yaandhe ‑zian 'yi‑ 'ka 'ö 'yii ga ꞊kö ya, "kɛɛ ‑wo yi "dhiʋ̈ ‑zë ‑dɔ ga ‑dhɛ ‑kpɛawo Yesu ‑wɔn 'gü. "Kɛɛ ‑yö ‑kë yi 'ka "dhʋ̈ kë "dhʋ̈ kö ꞊sii gɔɔ ꞊gblɛɛn 'ö Yesu 'gü bha ꞊në‑ "dhiʋ̈ ‑yö ‑wo kwi 'ö yi ‑bha 'ö "bu ‑pë 'ka ya‑ 'gü.
12 ‑A ‑kë "dhʋ̈ ‑sü bha‑ 'gü, ga ‑yö ꞊gbaɔn sië yi ‑zë yi ‑ta (naɔ ‑së 'yi‑ dɔ sië bha‑ ‑wɔn 'gü), 'yö ꞊sii ‑da sië ka ‑zë ka 'gü.
13 'Yö ꞊dhɛ 'ö ‑kë ꞊dhɛ ‑yö ‑bɛn zë ‑sü 'ka Atanna ‑bha 'tɔng‑ 'sëëdhɛ 'gü ꞊dhɛ:
«'Dhang ꞊në 'a‑ ‑bho ‑a "dhiʋ̈ 'yö 'a‑ pö»,
"kɛɛ kö yii ‑dɩ 'pö 'dhang ‑bho ‑a "dhiʋ̈ zuë" ‑yö yi "gblʋ̈ʋ̈‑ bha ꞊në‑ ‑wɔn 'gü 'yö 'yaa dɔ 'pö yi "dhi "tung.
14 ‑A ‑gɛn ‑mü ꞊dhɛ yi 'dhang bho ‑sü ‑ya "dhiʋ̈ 'kpakpadhö ꞊dhɛ 'mɛ 'ö kwa Dëmɛ Yesu ‑bö 'ö go ga 'gü bha ‑yö ‑dho yi ꞊nëng ‑bha 'ö yi ‑bö 'pö. 'Yö kwɛng‑ ‑nu ꞊gban kwa ꞊loo 'ko ‑ta 'ö ‑kuu "dhiʋ̈.
15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn "pɛpɛ bha‑ ꞊gban‑ ‑kë "dhʋ̈ ka ꞊në ka ‑wɔn 'gü, kë "dhʋ̈ kö 'mɛ 'ö Atanna dho ‑gasitɛ kë‑ ‑nu ‑dhɛ bha ‑wo pa ꞊në‑ wo do ‑wo 'dho‑ 'ka, kë "dhʋ̈ kö‑ nuɛ" bho ‑mɛ ‑nu ‑wo kë 'gbɛ 'ka yuudhö kö‑ 'tɔ ‑yö bhɔ.
'Wɔn 'ö ‑gban ‑tosɛa ‑kë ‑zʋ ‑yö Atanna ‑dhɛ ‑sü 'ka ‑sü ‑bha
16 'Wɔn 'ö‑ ‑wɔn 'gü 'yö yi 'gü 'yaa ga bha 'yö bha. ‑A ‑gɛn ‑mü ꞊dhɛ 'kö 'zü yi ‑dhü ‑zë 'bha 'dhö "kan sië‑ "dhiʋ̈ ‑slëëslëëdhö 'ö dho‑ 'ka, "kɛɛ yi 'nii‑ kö yi 'gü bha faan ‑sɛa ꞊në Atanna ‑ya ‑da 'gü ‑kpɛakpɛawo 'pö 'ö dho‑ 'ka.
17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yi ‑wëëdhɛ 'në ‑nu 'wo bho sië 'ö‑ 'gü 'yaa ꞊gwëë bha ꞊në yi zü ‑gban 'gü 'ka ‑dhɛ 'bha ꞊kpaɔyi ‑bha, yi ‑wëëdhɛ 'ö bho sië bha waa‑ mɛdhɛ 'yi dho ‑da 'gü bha 'waa ‑zɔn "kwëë ‑pë ‑zian ꞊në‑ 'ka. ‑A ‑gɛn ‑mü ꞊dhɛ mɛdhɛ 'yi dho‑ kë "dhʋ̈ bha‑ ‑bha ‑kë 'kpii‑ ‑sü ‑dhiang 'yaa zë, yöö do bha 'yaa yën tongtongdhö.
18 'Wɔn 'ö‑ ‑wɔn 'gü 'yö yi ‑wëëdhɛ 'ö bho sië bha 'ö dho "gla yi ‑gɔ mɛdhɛ 'gü bha‑ 'klɔɔ‑ ‑mü ꞊dhɛ yi ‑zʋ 'gɔn ‑sü 'yaa pë 'dhɛ 'kö mɛ ‑ya yö mɛ "yanga 'ka bha‑ ‑dhɛ. Yi ‑zʋ 'gɔn ‑sü ‑ya 'dhɛ 'ö mɛ "yan 'yaa‑ yö bha ꞊në‑ ‑dhɛ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë 'dhɛ 'kö mɛ "yan ‑ya yö bha‑ 'bha 'yaa ꞊gwëë ‑A 'dhɛ 'ö mɛ "yan 'yaa‑ yö 'ö Atanna "piʋ̈ bha ꞊në‑ ‑bha ꞊gwëë ‑sü "dhiʋ̈todhɛ ‑zian 'yaa 'dhö.