7
Mɛɛsisedɛkö bha‑ ‑dhiang 'wo‑ zë
1 ‑A Mɛɛsisedɛkö 'ö "dhʋ̈ bha ‑yö ‑gun Atanna "yaandhe 'ö dhang‑ 'gü bha ꞊në‑ ‑bha "saabhomɛ 'ka, 'yö gun ‑gblüdë 'ka 'pödhɛ 'wo‑ Sadhɛmö ‑dhɛ ‑kë bha‑ 'gü. ꞊Dhɛ 'ö Ablaamö gun 'go sië ‑gblü 'ö‑ ꞊gɔɔn yi 'bha 'ka ‑gblüdë ‑nu 'ka, 'ö‑ ‑kɔ ‑yö ‑ziö ‑nu ‑gɔ bha‑ gɔɔndhɛ 'gü, 'yö Mɛɛsisedɛkö bha 'ö nu‑ ‑gɔ zian‑, 'yö 'dhuë‑ ‑kë ‑bha.
2 ꞊Dhɛ 'ö ꞊ya kë "dhʋ̈ 'yö Ablaamö ‑yö pë "pɛpɛ 'ö gun‑ ‑gɔ ꞊dhɛ ꞊naɔ 'dhö bha‑ ‑pɛ 'gü ‑kaɔng do, 'yö‑ ‑kaɔng do ‑naa nu‑ ‑dhɛ ꞊dhɛ ö ꞊slɔɔpë bha‑ 'nii‑ 'dhö. ‑A Mɛɛsisedɛkö ‑tɔ bha waa‑ pö "dhʋ̈ kö ‑wa ‑pö «‑gblüdë 'ö pö 'aa‑ këwɔn ‑bha», 'yö 'pö‑ 'ö gun‑ 'gü ‑gblüdë 'ka bha‑ 'tɔ 'wo‑ Sadhɛmö ‑kë bha, ꞊waa‑ pö "dhʋ̈ kö ‑wa ‑pö: «‑ya ‑dɩ 'flëë‑ 'gü ‑sü».
3 Mɛ 'bha 'yii‑ Mɛɛsisedɛkö bha‑ dë dɔ, mɛ 'bha 'yii‑ dhe dɔ kö yöö to‑ "bhɛma ‑nu ꞊në‑ bha. Mɛ 'bha 'yii‑ bhɔ ‑yi dɔ, mɛ 'bha 'yii‑ ga ‑yi dɔ. ‑Yö ꞊dhɛ Atanna ‑bha 'në ꞊në‑ 'dhö. ‑A ‑bha ‑kë "saabhomɛ 'kpii‑ 'ka ‑sü zü bho ‑yi 'yaa 'dhö, ‑a "dhiʋ̈ ‑ya ‑dhɛ 'yaa 'dhö.
4 Kaa ꞊dede ‑ka Mɛɛsisedɛkö bha‑ ꞊bhlëë ‑kë 'kpii‑ ‑kɔ ‑ga bha. 'Mɛ 'ö kwa 'ziʋ̈‑ Ablaamö ‑zë 'ö 'pë 'ö ‑yö ‑gblü "piʋ̈ ‑a 'nii‑ bho sië‑ ‑dhɛ bha ‑yö ka 'gü ꞊dhɛ kö mɛ 'dɛdɛ ꞊në bha ‑ee?
5 Dhevi bhang ‑nu 'ö Atanna ‑ya ‑nu ‑ya Izraɛdhö ‑mɛ ‑nu ‑bha "saabhomɛ 'ka ö ‑dhɛ bha, ‑yö ‑bɛn zë ‑sü 'ka‑ ‑bha 'tɔng‑ ‑nu 'gü ꞊dhɛ Izraɛdhö ‑mɛ ‑nu ꞊gban "pɛpɛ ‑wo wo ꞊slɔɔpë ‑nu 'nii‑ bho wo ꞊në‑ ‑nu ‑dhɛ. 'Sa ꞊ya kë "dhʋ̈ kö ‑wa bho sië wo dheebhang ‑nu 'ö wɛng‑ ‑nu 'wo Ablaamö suu 'gü ‑në ‑nu 'ka bha ꞊në‑ ‑nu ‑dhɛ "dhʋ̈ bha.
6 "Kɛɛ Mɛɛsisedɛkö 'kö Ablaamö ‑yö ö ꞊slɔɔ ‑pë ‑nu 'nii‑ bho‑ ‑dhɛ 'ö 'dhuë‑ ‑kë ‑bha "dhʋ̈ bha wɛng‑ ‑nu ‑a ‑nu suu ‑zian 'yaa gun do. 'Sa 'ö gun "dhʋ̈ kö Atanna ꞊ya "plüün ‑së bha‑ bho 'nu Ablaamö ‑zë ‑dhɛ.
7 "Kɛɛ 'sa ka‑ 'wɔn ‑dɔ 'kpakpadhö ꞊dhɛ 'mɛ 'kö‑ ‑duɛ 'yaa 'kpii‑ 'mɛ 'ö‑ ‑gɔ, 'yaa ꞊mɔɔ‑ ‑bha kö ‑yö 'dhuë‑ kë‑ ‑mɛ ‑bha.
8 ꞊Ya kë ꞊dhɛ kö 'kwa kwa "yan kpɔ 'wɔn bha‑ "piʋ̈ ‑së ꞊dede 'ka, Dhevi suu 'gü ‑në ‑nu 'wo "saabhomɛ ‑nu 'ka ꞊dɛɛ Izraɛdhö ‑sɛ 'gü, 'ö Izraɛdhö ‑mɛ ‑nu 'wo wo ꞊slɔɔpë ‑nu 'nii‑ bho sië‑ ‑nu ‑dhɛ bha ‑wo ‑ga. "Kɛɛ Ablaamö ‑bha ‑zë 'ö‑ bho 'mɛ 'ö‑ ‑dhɛ bha ‑yö ‑bɛn zë ‑sü 'ka ‑a ‑bu 'gü Atanna ‑wʋ 'gü ꞊dhɛ yö ‑zë 'yaa ga.
9 ꞊Ya kë "dhʋ̈ kö Dhevi 'ö‑ 'gü ‑në ‑nu 'wo pë 'nii‑ 'kun sië ꞊dɛɛ Izraɛdhö ‑mɛ ‑nu ‑gɔ bha ‑yö kë ö ꞊slɔɔpë ‑nu 'nii‑ ‑bho 'pö Mɛɛsisedɛkö ‑dhɛ yi 'ö nu‑ 'ka Ablaamö ‑gɔ zian‑ yi 'bha 'ka 'ö ö ꞊slɔɔpë ‑nu 'nii‑ bho‑ 'ka‑ ‑dhɛ bha‑ 'ka ꞊naa bha.
10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kö 'zü Ablaamö ꞊yaa‑ bho kö Dhevi 'yii bhɔ ꞊kö, "kɛɛ 'ö gun "dhʋ̈ kö ‑yö Ablaamö 'gü. ꞊Ya kë "dhʋ̈ kö ‑ya ‑bho ‑a ‑nu ꞊gban ꞊në‑ ‑bha bho 'gü bha.
11 'Sa Atanna ‑bha 'tɔng‑ ‑nu 'ö‑ dɔ Izraɛdhö ‑mɛ ‑nu ‑dhɛ bha‑ zü ‑yö ‑bho Dhevi waa‑ ö bhang ‑nu ‑a ‑nu ‑ya 'ö‑ wo "saabhomɛ 'ka ö ‑gɔ 'kɔɔ dho bha ꞊në‑ ‑ta. ‑A ‑kë "dhʋ̈ ‑sü bha‑ 'gü, ꞊ya kë 'nu ꞊dhɛ Dhevi waa‑ ö gbö Aadhɔn ‑nu ‑a ‑nu ‑bha "saa‑ bho ‑sü 'ö Atanna ‑gɔ 'kɔɔdhö bha ‑yö mɛbhɩɩdhe ‑kë ꞊dhɛ ‑kɔ 'ö Atanna "piʋ̈ ꞊dhɛ ‑yö kë‑ 'ka ‑a 'dhö 'nu, kö pö 'a 'dho kë‑ ‑bha, kö "saabhomɛ ‑dee 'ö (Klisi) 'ka 'ö ꞊dhɛ Mɛɛsisedɛkö 'dhö bha‑ nu ‑wɔn 'yii 'dho kë. "Kɛɛ yö ꞊në 'yii kë "dhʋ̈ 'yö "saabhomɛ ‑dee ‑wɔn 'dhö ‑da.
12 'Sa "saabhomɛ ‑dee 'bha ‑zë ꞊ya nu 'pö, ‑kaa pö kö 'tɔng‑ ‑nu 'wo 'wɔn bha‑ 'gü bha woo slëë‑ ꞊naa bha.
13 ‑A ‑kë "dhʋ̈ ‑sü bha‑ 'gü, kwa Dëmɛ 'wo‑ zaɔn ‑zɔn Mɛɛsisedɛkö 'ka "dhʋ̈ bha ‑yö ‑gun 'kɔdhi "wɛɛ 'bha 'ö 'gü ‑në do ‑zian 'yii "saa‑ ‑blɛɛsü bho 'nu ꞊kö ‑gwë "klʋ 'wo "saa‑ bho‑ ‑ta Atanna ‑gɔ 'kɔɔdhö bha‑ ‑ta do ꞊në‑ 'ka.
14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ ꞊gban ‑mɛ ꞊gban ‑wa 'wɔn dɔ ꞊dhɛ ‑yö ‑bhɔ Zuda suu ꞊në‑ 'gü. 'Sa 'mɛ 'kö 'wo bha ‑dhɛ 'bha 'kö mɛ yöö‑ yö 'sëëdhɛ 'ö Moizö ‑ya ‑bɛn zë bha‑ 'gü ꞊dhɛ ‑wo ‑gun "saabhomɛ 'ka 'yaa 'dhö.
15 'Wɔn 'ö dho 'wɔn bha‑ ‑ta "pʋ kwa ‑dhɛ 'zü 'kpakpadhö 'ö 'kwa‑ 'gü ma 'yö ‑mü "saabhomɛ ‑dee 'bha 'ö ꞊dhɛ Mɛɛsisedɛkö 'dhö ‑a ‑ya ‑sü bha ꞊në‑ 'ka.
16 ‑A ‑bha ‑ya ‑sü bha 'yii kë mɛ "bhɩɩ‑ ‑nu 'wo ga bha‑ ‑nu ‑bha 'tɔng‑ faan 'ka, ‑yö ‑kë "saabhomɛ 'kpii‑ 'ka "dhʋ̈ 'gügbɩɩdhɛ 'ö ꞊sii 'ö 'yaa yën 'ö gun‑ 'gü bha‑ 'gü bha ꞊në‑ 'saa‑ 'gü.
17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑wʋ ‑ya ‑pö ‑a ‑bu 'gü 'ö‑ pö ꞊dhɛ:
«I ‑dho kë "saabhomɛ 'ka "sɛ 'tuʋ̈‑ 'ka
꞊dhɛ Mɛɛsisedɛkö 'dhö.»
18 ꞊Ya kë "dhʋ̈ kö 'tɔng‑ ‑blɛɛsü 'ö ‑gban "saabhomɛ ‑nu ‑bha 'ö gun bha ‑yö ‑bho ‑bha "sɩ 'ö 'yii kë‑ ‑dhɛ, 'ö‑ ‑zun "dhiʋ̈ ‑bhlɔɔ 'yii kë bha ꞊në‑ ‑wɔn 'gü.
19 ‑A ‑gɛn ‑mü ꞊dhɛ Moizö ‑bha 'tɔng‑ ‑nu bha 'wii ka Atanna dhɔɔbhaa kë ‑sü bha‑ ‑gɔ ‑da 'plöö. "Kɛɛ ‑zʋgɔndhɛwɔn ‑dee 'bha 'ö‑ fië‑ 'dhö 'dhö Moizö ‑bha 'tɔng‑ ‑nu ‑bha bha ꞊në ꞊ya zun kwa ‑dhɛ zang ‑ta ꞊dɛɛ. Yö ‑mü Yesu Klisi ꞊në‑ 'ka. ‑Gasitɛ yö ꞊në‑ ‑bha 'yö 'kwa ꞊yɔɔn sië Atanna "sɔɔ, kwa ‑zʋ ‑ya yö ꞊në‑ 'gü.
20 ꞊Ya 'go mü 'zü, ‑sö 'ö Atanna ‑ya ‑bhö bha ‑yö mü. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ ‑kpɛa ‑nu ‑bha ‑zë mɛ 'bha 'yii ‑sö ‑bhö ‑a ‑nu ‑ya ‑sü 'gü.
21 "Kɛɛ Yesu ‑zë ‑ya "saabhomɛ 'ka ‑sü ‑zë Atanna ‑yö ‑sö ‑bhö 'ö‑ pö‑ ‑dhɛ:
«Mang Atanna ‑mɛ ma ꞊në 'a ‑sö ‑bhö bha,
'mii 'dho 'go n ‑wʋ ‑ta tongtongdhö.
A‑ ‑pö ꞊dhɛ i ‑dho 'to "saabhomɛ 'ka "dhʋ̈ "sɛ 'tuʋ̈‑ 'ka.»
22 ‑Sö 'ö Atanna ‑ya ‑bhö "dhʋ̈ bha‑ ‑wɔn 'gü, Yesu bha ꞊në ‑mlɛɛ ꞊bhlëësü 'dhɛ 'ö ‑da Atanna waa‑ mɛ "bhɩɩ‑ ‑nu ‑a ‑nu ꞊zinng 'gü bha 'ö ꞊slɔɔ‑ 'saa‑ 'gü.
23 'Ö go mü 'zü, "saabhomɛ ‑nu bha‑ mɛ ‑blɛɛsü ‑nu bha, gun 'wo‑ wo 'gbɛ bha‑ 'klɔɔ‑ ‑mü ꞊dhɛ wo ‑zë ‑wo ‑gun ga sië, 'ö‑ ‑wɔn 'gü 'waa ꞊mɔɔ‑ ‑bha kö ‑wo 'dho woo‑ "saa‑ bho ‑yë bha‑ 'ka "dhiʋ̈ ‑kpɛawo.
24 "Kɛɛ Yesu Klisi ‑bha ‑zë 'yaa "dhʋ̈. Yö ‑zë 'yaa ga, ‑a ‑wɔn 'gü ‑a ‑bha ‑kë "saabhomɛ 'ka ‑sü bha 'waa ꞊mɔɔ‑ ‑bha kö ‑wo mɛ ‑dee dɔ‑ "gblʋʋ 'gü.
25 'Wɔn 'ö‑ ‑wɔn 'gü, 'yö mɛ "ʋʋ mɛ 'ö ꞊yɔɔn Atanna "sɔɔ ‑a 'saa‑ 'gü 'ö ꞊mɔɔ‑ ‑bha 'ö‑ ‑nu dha "pɛɛpɛdhö, 'ö‑ ‑bha ‑a ‑nu dha ‑sü "dhiʋ̈todhɛ 'yaa 'dhö bha 'yö bha. ‑A ‑gɛn ‑mü ꞊dhɛ ‑yö "yaan "tʋ̈ng ꞊gban 'gü, ‑yö ‑bhɛa Atanna ‑dhɛ ‑a ‑nu ‑wɔn 'gü ‑kpɛawo.
26 ‑A ‑kë "dhʋ̈ ‑sü bha‑ 'gü, kö Yesu ꞊në "saabhomɛ 'kpii‑ 'ö kwa ‑mawɔn ‑yö gun‑ ‑bha, 'ö "slʋ̈ʋ̈slʋ̈, 'ö pö 'aa‑ ‑bha, 'ö 'yii 'wɔn yaa kë tongtongdhö, 'ö Atanna ‑ya ‑kan 'wɔnyaakëmɛ ‑nu ‑bha, 'ö‑ sü 'ö‑ ‑ya ‑dhɛ ꞊bhlëësü 'ö dhang‑ ‑ta "dhʋ̈ng 'gü bha‑ 'gü bha‑ 'ka.
27 ‑A ‑gɛn ‑mü ꞊dhɛ yö ꞊në 'yaa ꞊dhɛ "saabhomɛ 'kpii‑ ‑kpɛa 'wo to ‑a ‑nu 'dhö kö ‑wo wo ‑dɩ ‑bha 'wɔn yaa ꞊në‑ ‑bha "saa‑ bho ꞊kö ‑blɛɛsü yi ꞊gban 'ka kö ‑wo gun ‑na "sɛgümɛ ‑nu ‑bha bho. "Kɛɛ ‑a ‑bha ‑zë "saa‑ do 'ö‑ bho "dhʋ̈ 'yi bha‑ 'ka ö ‑dɩ nu ‑sü 'ka bha ꞊në to‑ ‑bha.
28 ‑A pö 'a‑ wo 'zü "dhʋ̈ bha‑ 'klɔɔ‑ ‑mü ꞊dhɛ mɛ "pɛpɛ 'kö 'wo ‑kë "saabhomɛ 'kpii‑ 'ka Moizö ‑bha 'tɔng‑ "gblʋʋ "piʋ̈ bha‑ 'bha këwɔn ‑nu 'wii Atanna ‑zʋ 'kun ‑së 'ka, "kɛɛ Yesu 'ö ‑kë Atanna Gbö 'ka, 'ö ‑sö ‑bhö ‑a ‑ya ‑sü 'gü kö ꞊ya bo 'tɔng‑ ‑zë dɔ ‑sü 'ka 'nu bha ꞊në pö 'aa‑ ‑bha ‑a wëëdhö. Yö ꞊në dho 'to "slʋ̈ʋ̈slʋ̈ 'ka "dhʋ̈ "sɛ 'tuʋ̈‑ 'ka.