3
Dhe waa‑ gɔn ‑a ‑nu ‑kë 'ko "piʋ̈ ‑kɔ ‑dhiang 'ö Piɛdhö ‑ya zë
1 Dhebhɔ ‑nu, kaa ‑dɩ 'pö ‑ka ka ‑gɔ 'dho "sia‑ kaa‑ gɔɔn‑ ‑nu ‑dhɛ, kë "dhʋ̈ kö gɔɔn‑ ‑nu bha‑ mɛ 'dhɛ 'wii 'dhang bho ꞊kö Yesu Klisi "dhiʋ̈ bha ‑wo 'dhang bho‑ "dhiʋ̈ ka "ta ‑kɔ ‑së bha‑ ‑wɔn 'gü kö ‑wo bɔ Yesu 'ka kö 'kii dhiang 'bha zë‑ ‑nu ‑dhɛ.
2 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ kö‑ ‑nu "yan ‑yö ka "ta ‑kɔ ‑së 'ö Atanna ꞊bhlëë ‑ya bha‑ 'gü.
3 'Ka 'dho ka dhi ‑zian mɔɔ‑ ka kwi ‑bha "kpɛnng, ‑gɔ bɔ ‑kɔ ‑nu oo, ‑da "tʋʋ ‑pë "ɛɛn ‑kɔ ‑bha ‑pë ‑sɛngbɔ ‑nu, "ɛɛn ‑dasɔ ‑sɛngbɔ ‑nu ‑da ka ‑bha ‑sü 'ka mɛ ‑nu "yan ‑mɔɔ ka "dhiʋ̈ kian 'ka.
4 "Kɛɛ ‑ka ka dhi ‑zian mɔɔ‑ ka zuëpiʋ̈dhɛ ꞊në‑ 'gü, kö ‑sëdhɛ 'dhɛ 'ö‑ ꞊bhlëë 'dhö 'kpii‑ Atanna wëëdhö, 'ö 'yaa see‑ tongtongdhö 'ö ‑kë ‑kë dhɔngsü ‑sü 'ka, 'ö mɛ zuë" ‑yö ‑kë ‑ta ‑sɛa ‑a 'ka bha ꞊në ‑yö kë ka ‑gɔ.
5 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑dhɔkëdhe ‑nu 'wo gun yi 'bha 'ka bha ‑wo ‑gun wo ‑bha dhi wo sië ‑kɔ bha ꞊në‑ 'gü, ‑gɔ ‑dho wo ‑gɔn ‑nu ‑dhɛ "sia‑ ‑sü 'ka.
6 Saadha ‑gun ö ‑gɔ 'dho sië Ablaamö ‑dhɛ "sia‑ ‑kɔ bha ꞊në‑ 'gü 'yö gun ö ‑gɔn ‑dhɛ sië ö dëmɛ. ꞊Ya kë ꞊dhɛ 'ka 'wɔn ‑së kë ‑kpɛawo kö 'wɔn 'bha ‑wɔn 'bha kë ‑sü "suʋ̈ 'yii kë ka 'gü, kö 'ka kë Saadha bha ꞊në‑ 'dhu ‑nu 'ka bha.
7 ‑Kɔ do bha‑ 'gü gɔɔn‑ ‑nu kaa ‑dɩ 'pö ‑ka "ta ‑kɔ ‑së kë kaa‑ dhebhɔ ‑nu 'ka kö 'ka ka "yaaki ‑ya 'gü, ‑yö kë ka "yaan ꞊dhɛ kɛng‑ ‑nu ka ‑da ‑kɔ 'yaa do, ‑a ‑nu 'gü 'yaa ‑gban ‑sü 'ka kö "sɩ‑ kë‑ ‑nu ‑dhɛ ꞊dhɛ ka 'dhö. ‑A ‑nu ꞊bhlëë ‑yö kë ka ‑gɔ ꞊dhɛ ka "tayɔɔ ‑nu 'ö Atanna 'dhö ‑gasitɛ kë ‑sü 'ka‑ ‑nu ‑dhɛ 'pö ꞊sii 'ö 'yaa yën ‑a ꞊slɔɔ ‑sü 'gü ꞊në‑ 'dhö. ‑Kaa kë "dhʋ̈ kë "dhʋ̈ kö pë 'bha ‑pë 'bha 'ya 'dho ö ‑gɛn ‑da kɛng‑ ‑nu ka ‑bha ‑bhɛa Atanna ‑dhɛ ‑sü ‑gɛn 'gü ('ö 'yaa‑ ‑yɔ bɔ ka ‑gɔ).
8 ‑Ka dɔ "gbɩɩ‑ kö mɛ "pɛpɛ ꞊gban ka ‑wʋ ‑yö kë do, kö ka zuëpiʋ̈wɔn ‑yö kë do, ka ‑dhɔ ‑yö ka 'ko kë ꞊dhɛ dheebhangzë ‑nu 'dhö, ka "klʋ ‑yö dhi ka 'ko ‑nu ‑bha, kö 'ka ka 'ko ‑nu ꞊bhlëë ‑ya.
9 'Ka 'dho 'wɔn yaa "yɔɔ bho 'wɔn yaa 'ka, "ɛɛn 'ka 'dho "si "yɔɔ bho "si 'ka, "kɛɛ 'mɛ 'ö "si bho ka ‑gɔ, ‑ka 'dhuë‑ kë‑ ‑mɛ ‑bha, ‑a ‑gɛn ‑mü ꞊dhɛ ka 'ö 'ka bha 'dhuë‑ ꞊në Atanna ‑ya "plüün bho ka ‑dhɛ ka ‑dhɛ 'ö‑ wo bha‑ 'gü
10 ꞊dhɛ ‑kɔ 'ö‑ ‑wʋ ‑ya pö‑ 'ka‑ 'dhö ꞊dhɛ:
«'Ö mɛ "ʋʋ mɛ 'ö‑ "piʋ̈ ꞊dhɛ 'ö ‑tosɛa ‑së ‑dhɛ yö,
kö 'ö ‑ya ꞊niidadhe "yi ꞊bhaa,
‑a ‑mɛ ‑yö ö ‑dɩ 'kun dhiang yaa zë ‑sü ‑gɔ,
kö ‑yö ö bo ꞊sua kë ‑sü 'ka.
11 ‑A ‑dhɛa ‑bha ꞊dhɛ ‑a ‑mɛ 'ö 'dhö ‑yö "kan 'wɔn yaa ‑bha
kö ‑yö 'wɔn ‑së ꞊në‑ kë ‑kpɛawo,
kö ‑yö mɛ ‑nu ‑dhi 'ko ‑dhɛ ‑dhɛ ꞊në‑ mɔɔ‑ ‑kpɛawo kö ‑yö 'dho‑ 'ka.
12 ‑A 'klɔɔ‑ ‑mü ꞊dhɛ 'mɛ 'ö pö 'aa‑ ‑nu ‑bha bha ꞊në
kwa Dëmɛ ‑yö ö "yan ‑kë ‑nu "dhiʋ̈,
'yö ö "tʋ 'to‑ ‑nu ‑bha bhɛa" ‑wʋ ‑bha,
"kɛɛ 'yaa ö "yan dɔ 'wɔnyaakëmɛ ‑nu ‑zë ‑nu ‑bha» bha‑ 'dhö.
13 ꞊Ya kë ꞊dhɛ 'wɔn ‑së kë ‑pɛng ꞊ya kë ka ‑ta 'ka‑ kë sië, mɛ 'bha 'yii 'dho ꞊mɔɔ‑ ‑bha kö ‑yö 'wɔn yaa kë ka 'ka.
Mɛ ‑wëëdhɛ ‑bho 'wɔn ‑së këwɔn 'gü ‑sü ‑dhiang 'ö Piɛdhö ‑ya zë
14 "Kɛɛ 'kö 'zü ꞊wa 'wɔn wɔ ka ‑ta ‑zianwo 'wɔn ‑së 'ka‑ ‑kë ‑a ‑wɔn 'gü, kö ka ‑bha ‑së. "Sika 'ya 'dho kë ka 'gü 'ö 'ka ‑suʋ̈ mɛ 'bha ‑gɔ.
15 ‑Ka Klisi ꞊në‑ ꞊bhlëë ‑ya ka zuë" "piʋ̈ doseng ꞊dhɛ ka Dëmɛ 'dhö kö 'ka kë baa‑ ‑sü 'ka "tʋ̈ng ꞊gban 'gü kö ꞊wa ka dhɛɛ" 'kpɔ 'wɔn 'ö ka ‑zʋ 'dhö‑ 'gü bha‑ 'ka, kö 'ka‑ ‑gɛn bho‑ ‑mɛ ‑dhɛ 'kpakpadhö. "Kɛɛ 'ka‑ pö 'ka‑ ‑gɛn bho, ‑kaa ‑gɛn bho dhɔngdhɔngsü 'ka "nɛɛnɛɛ 'ka ‑a ‑nu ꞊bhlëë 'gü,
16 "kɛɛ kö ka zuë" 'yaa za dɔ sië ka ‑bha, kë "dhʋ̈ kö 'yiʋ̈‑ dɔ 'mɛ 'wo ka këwɔn ‑së ‑nu ‑dhiang yaa zë ka ‑bha ‑kplü Klisi ‑bha ‑sü ‑wɔn 'gü bha‑ ‑nu ‑bha.
17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë Atanna ‑dhidhɛwɔn 'ka kö ‑wo ka ‑wëëdhɛ bho 'wɔn ‑së kë ‑sü ‑wɔn 'gü, ‑a fië‑ ‑dhö ‑a ‑kë "dhʋ̈ ‑sü 'ö 'wɔn yaa kë ‑sü ‑wɔn 'gü bha‑ ‑bha.
18 ‑A ‑gɛn ‑mü ꞊dhɛ Klisi yöö ꞊dede ‑yö ‑ga ka ꞊në ka ‑wɔn 'gü. Yö 'ö yö ‑zë 'ö "slʋ̈ʋ̈slʋ̈ 'ö ‑dhii 'yaa‑ ‑bha Atanna wëëdhö bha ‑yö kë ga ‑kɔ doseng bha‑ ‑bho "dhʋ̈ 'mɛ 'ö ꞊sɔng 'dhö‑ ‑nu ‑bha bha ꞊në‑ ‑nu ‑wɔn 'gü, kë "dhʋ̈ kö 'ö zian 'ö dho Atanna "piʋ̈ ‑a bho ka 'ka. ‑A ‑dhü ꞊në wo‑ zë 'yö‑ 'nii‑ ‑zë 'ö go ga 'gü Atanna ‑bha 'Nii‑ "slʋ̈ʋ̈slʋ̈ faan 'ka.
19-20 'yö dho Atanna ‑wʋ pö 'mɛ 'wo ‑kaso 'gü ꞊geebɔɔ 'ö 'wo‑ ꞊bhlëë ‑siö yi 'bha 'ka Noe ‑kwɛ ‑ta kö ‑yö ö zuë" kë sië ‑sɛa ‑a ‑nu "piʋ̈ kö Noe ‑yö "yitagɔ ‑pë kë bha‑ ‑nu ‑dhɛ 'Nii‑ "slʋ̈ʋ̈slʋ̈ do bha‑ 'saa‑ 'gü. 'Sa "yitagɔ 'ö Noe ‑ya ‑pë ‑kë "dhʋ̈ bha mɛ ga "kɛɛ 'në bha ꞊në 'wo kë ‑da 'gü 'yö 'wo dha "yi bha‑ ‑gɔ. ‑Wo ‑gun mɛ "saaga.
21-22 ‑A "yi 'ö gun "dhʋ̈ bha ‑yö ‑gun ‑bɔ Yesu 'ka‑ ‑zu 'ka bho sië ꞊dɛɛ ya ꞊në‑ "blɛɛn‑ 'ka. ‑A kë 'wo‑ wo sië "dhʋ̈ ꞊dɛɛ bha 'wii‑ "dhiʋ̈ "wlü ‑dhii ‑bho mɛ kwi ‑bha ‑sü ‑bha, "kɛɛ ‑yö gba 'ö‑ mɛ ‑ya ‑dhɛ Atanna ‑gɔ, kö ‑ya gba zuëwaanusü 'ka ö wëëdhö ꞊në‑ 'ka. ‑Bɔ Atanna 'ka ‑zu bho ‑sü bha ‑yö ka ‑dha Yesu Klisi 'ö ꞊ya 'dho dhang‑ 'gü 'ö ‑ya ‑sü 'ka ‑dhɛ ꞊bhlëësü 'ö Atanna ‑kɔ ‑së 'gü bha‑ 'gü, ‑a ‑bha "kië ‑nu waa‑ ‑kɔ ‑ziö mɛ ‑gɔ ‑pë ‑nu waa‑ 'gügbɩɩdhɛ ‑pë ‑nu 'wo mü ‑a ‑nu ‑gɔ "dhiʋ̈ bha ‑a ‑bha ‑go ga 'gü ‑sü bha ꞊në‑ 'saa‑ 'gü.