5
Dhidhɛ ‑da Atanna waa‑ mɛ "bhɩɩ‑ ‑nu ‑a ‑nu ꞊zinng 'gü ‑kɔ ‑dhiang 'ö Pɔdhö ‑ya zë
1 ‑A ‑kë "dhʋ̈ ‑sü 'gü, ꞊dhɛ 'ö ‑kë ꞊dhɛ 'kwa 'dhang bho Yesu Klisi ‑wɔn "dhiʋ̈, kwa ‑bha 'dhang ‑bho ‑a ‑wɔn "dhiʋ̈ ‑sü bha‑ ‑wɔn 'gü, Atanna ꞊ya kwa kë 'mɛ 'ö pö 'aa‑ ‑bha ‑a 'ka ö wëëdhö, 'yö 'kwa ‑ya kwa 'flëë‑ 'gü ꞊taamasü ya‑ 'gü kwa Dëmɛ Yesu Klisi 'saa‑ 'gü.
2 Atanna ‑bha ‑gasitɛ 'kwa ‑ya ‑a "yi ꞊bhaa ꞊dɛɛ bha kwa‑ ‑slɔɔ 'dhang 'kwa‑ bho Yesu ‑wɔn "dhiʋ̈ bha ꞊në‑ "gblʋ̈ "piʋ̈, Yesu bha ꞊në 'kwa bɔ‑ ‑ta, kwa ‑bha 'dhang ‑bho ‑a "dhiʋ̈ ‑sü ‑wɔn 'gü, 'yö 'kwa ꞊yɔɔn Atanna "sɔɔ. ‑A ‑kë "dhʋ̈ ‑sü 'gü, kwa ꞊nii ‑da ‑gɛn ‑mü ꞊dhɛ kwa ‑kë Atanna ‑bha 'tɔbhɔdhe 'gü ‑mɛ 'ka ‑wɔn ‑yö ‑dhö. Yö ꞊në kwa ‑zʋ 'dhö‑ 'gü
3 Yö ꞊në‑ ‑wɔn 'gü, 'yö kwa ꞊nii 'dhö ‑da saan" ‑zian 'gü, ‑a ‑gɛn ‑mü ꞊dhɛ kwa‑ 'wɔn ‑dɔ ꞊dhɛ saan" ꞊në mɛ ꞊yaa‑ wo 'yö mɛ zuë" 'dhö ‑kë ‑sɛa,
4 'yö zuësɛadhɛ ‑yö 'wɔn ꞊gban 'kun bho mɛ 'gü, 'yö mɛ 'gü 'yaa ga ‑zʋ ‑yö Atanna ‑dhɛ ‑sü 'ka.
5 'Sa 'mɛ 'ö ö "yan to Atanna ‑bha mɛ ‑dhɛ bha‑ ‑gɔ, 'yiʋ̈‑ 'yaa dɔ‑ ‑bha. ‑A 'klɔɔ‑ ‑mü ꞊dhɛ ꞊ya ö ‑bha 'Nii‑ "slʋ̈ʋ̈slʋ̈ ꞊gbaɔ kwa ‑gɔ. ‑A ‑bha 'Nii‑ 'ö "dhʋ̈ bha ꞊në kwa pa ‑a ‑dhɔ 'ka.
6 ‑A 'klɔɔ‑ ‑mü ꞊dhɛ 'ö gun kö‑ dhɔɔbhaawɔn kë "sɩ 'yii kë kwa ‑dhɛ ꞊kö, 'yö Yesu Klisi ‑yö ga 'wɔnyaakëmɛ ‑nu bha kwa ‑wɔn 'gü, yi 'ö Atanna ‑ya ‑ya ö ‑zʋ "piʋ̈ ‑a ‑kë "dhʋ̈ ‑yi 'ka bha‑ 'ka.
7 'Sa ‑yö kë ka "yaan ꞊dhɛ ‑ga 'wɔnsëkëmɛ ‑zian ‑wɔn 'gü ‑dhɛ ‑yö 'ya‑. ‑Ɛɛ, 'kö mɛ ‑zian ꞊ya ꞊slɔɔ 'zü kö ‑yö ga mɛ ‑wɔn 'gü, "kɛɛ kö‑ ga ‑gɛn ‑yö ‑dho kë 'mɛ 'ö ga‑ ‑wɔn 'gü bha‑ këwɔn ‑së ꞊në‑ 'ka. "Kɛɛ yö ‑zë ꞊gban 'gü ‑a ‑dhɛ 'yaa ‑së.
8 "Kɛɛ Klisi ‑bha ga ‑zë ‑ya ‑wo kö kwa ‑tun kö 'wɔnyaakëmɛ 'ka. Kë "dhʋ̈ kö 'kwa‑ 'wɔn dɔ ꞊dhɛ kwa ‑dhɔ 'ö Atanna ‑kë ‑a "sinma "yɔɔ 'yaa 'dhö.
9 Ga 'ö‑ wo "dhʋ̈ bha ꞊në‑ ‑wɔn 'gü, 'yö Atanna ‑ya pö kwa ‑bha ꞊dɛɛ ꞊dhɛ 'bɔn 'yaa kwa ‑bha. 'Wɔn 'ö‑ ‑wɔn 'gü 'pö 'yö 'kwa dho dha 'wɔn 'ö Atanna dho‑ wɔ mɛ "bhɩɩ‑ ‑nu ‑ta ‑dhɛ 'bha ꞊kpaɔ ‑yi ‑bha bha‑ ‑gɔ bha 'yö bha.
10 ‑A ‑gɛn ‑mü ꞊dhɛ 'ö gun kö‑ Gbö bha 'yii ga ꞊kö kwa ‑wɔn 'gü, kwɛng‑ ‑nu kwa ‑gun 'yaɔdhɛ ꞊në‑ 'gü. Ga 'ö‑ wo "dhʋ̈ bha 'yö kwa wü 'koo. 'Yö "sanni 'mɛ 'ö 'kwa gun Atanna 'yaɔ‑ 'ka ‑yö "wɩ‑ ‑bha kö ‑yö kwa 'wü 'koo bha ‑oo, 'yö 'kwa bo 'wü ‑sü ‑zë 'ka 'koo ꞊wɛ? ‑Më ꞊në Atanna dho‑ fië‑ bho kwa ‑bha ꞊taamasü ya‑ 'gü kö 'kwa kë‑ "taɔngdë ‑nu 'ka, kö‑ ‑bha ꞊sii ‑yö kwa 'gü.
11 ꞊Ya 'to‑ 'dhɛ 'kö bha‑ ‑bha ‑zianwo 'nu, mɛ‑ ‑mɔɔ ‑bha 'ö mɛ ‑ya 'bha pö‑ 'gü, "kɛɛ 'ö ‑ya mü 'zü, "yi 'ö kwa Dëmɛ Yesu Klisi ‑ya kpɔ kwaa‑ Atanna ‑nu kwa ꞊zinng 'gü bha‑ 'saa‑ 'gü, kwa ‑mɔɔ ‑bha 'kwa kwa "dhia bho, dhi 'ö kwɛng‑ ‑nu 'kwa‑ wo bha‑ ‑wɔn 'gü, 'ö kwa ꞊nii 'dhö ‑da ꞊dedewo.
12 ‑A ‑gɛn ‑mü ꞊dhɛ mɛ doseng ꞊në 'wɔn yaa ‑yö bɔ‑ ‑ta 'yö ‑da "kpʋngtaamɛ ꞊gban "pɛpɛ ꞊yɔɔn 'gü, 'yö ga ‑yö bɔ‑ ‑ta 'pö 'yö ‑da "kpʋng ꞊taa. 'Wɔn 'ö‑ ‑wɔn 'gü 'yö ga 'yaa mɛ 'bha ‑mɛ 'bha 'to bha 'yö bha. ‑A 'klɔɔ‑ ‑mü ꞊dhɛ mɛ ꞊gban "pɛpɛ ‑wo 'wɔnyaakëmɛ 'ka 'mɛ bha ꞊në 'wo‑ ‑dhɛ Adan.
13 'Ö gun kö Atanna ‑bha 'tɔng‑ ‑zian 'ö Moizö ‑ya ‑bɛn zë bha 'yii‑ ‑bɛn zë ꞊kö, kö 'wɔn yaa kë ‑sü ‑zë ‑yö ‑dhö. "Kɛɛ gun 'ö‑ wo "dhʋ̈ kö 'yii 'tɔng‑ dɔ ꞊kö bha‑ "tʋ 'yaa gun‑ ‑bha.
14 Adan ‑zë ꞊tɔn ‑yö Atanna ‑wʋ ꞊në bho ö "tʋʋ, 'yö ‑kë ‑a 'wɔn yaa kë 'klɔɔ‑ 'ka, "kɛɛ mɛ "pɛpɛ ‑zian 'ö 'wii‑ ‑wʋ bho wo "tʋʋ ꞊dhɛ Adan ‑bha bha‑ 'dhö, ga ‑kɔ ‑gun ziö ‑sü 'ka‑ ‑nu ꞊gban ‑gɔ yö ‑zë ꞊gban 'gü, 'ö dho 'ö zun‑ 'ka Atanna ‑bha 'tɔng‑ 'ö Moizö ‑ya dɔ bha‑ dɔ ‑yi ‑bha, ‑a ‑gɛn ‑mü ꞊dhɛ kö 'wɔn yaa ‑ya ‑nu ‑bha 'pö, 'sa Klisi 'ö nu kwa dɔ ‑kɔ ya‑ 'gü bha‑ ‑zɔn 'ka ꞊në gun Adan bha‑ 'ka.
15 "Kɛɛ ‑gasitɛ 'ö Atanna ‑ya ‑kë kwa ‑dhɛ bha‑ ꞊bhlëë ‑yö 'kpii‑ 'ö ‑ziö 'wɔn yaa 'ö Adan ‑ya ‑kë bha‑ ‑ta ꞊gblɛɛn. ‑Yö "dhʋ̈ tɛan‑ 'ka ꞊dhɛ mɛ 'gbɛ ꞊dede ‑wo kë ‑ga mɛ dosengseng bha 'ö 'wɔn yaa 'ö‑ ‑kë bha‑ ‑wɔn 'gü, "kɛɛ ‑gasitɛ 'ö Atanna ‑ya ‑kë 'pö kwa ‑dhɛ 'ö Yesu Klisi bɔ bha‑ ꞊bhlëë ‑yö 'kpii‑ ‑ziisü, ‑a ‑gɛn ‑mü ꞊dhɛ mɛ 'gbɛ ‑wo ‑bɔ 'pö yö ꞊në‑ ‑ta 'yö 'wo dha "wɛɛwɛɛ (Adan ‑kë Klisi ‑zɔn 'ka 'ka 'klɔɔ‑ ꞊në bha).
16 ꞊Ya 'go mü 'zü, Atanna ‑bha gbaɔdhe bha‑ ꞊bhlëë 'ö ‑kë 'kpiisü 'ö ‑ziö 'wɔn yaa 'ö mɛ do ‑ya kë bha‑ ‑ta bha, ‑a 'klɔɔ‑ 'bha 'ö mü 'zü yö ‑mü ꞊dhɛ 'wɔn yaa 'ö mɛ doseng ‑ya ‑kë bha ꞊në ‑kë mɛ ꞊gban "pɛpɛ ‑gɔ ‑to ‑bha ‑wɔn 'ka, "kɛɛ Yesu Klisi ‑bha nu ‑sü kö ‑yö kwaa‑ Atanna ‑nu kwa ‑kɔ 'wü 'koo bha‑ ‑wɔn 'gü, Atanna ꞊ya kwa dha, 'sa kö 'kwa 'wɔn yaa "sinma ‑sinma bha‑ kë 'nu.
17 Mɛ do ꞊në 'wɔn yaa ‑kë 'yö ga ‑kɔ ‑yö ꞊mɔɔ mɛ ꞊gban "pɛpɛ ‑bha, yöö do ‑a ‑bha 'wɔn yaa 'ö‑ ‑kë bha‑ ‑wɔn 'gü "dhʋ̈ tɛan‑ 'ka, "kɛɛ 'wɔn 'dhɛ 'kö ‑kë kwa ‑dhɛ 'pö Yesu Klisi 'saa‑ 'gü bha ‑yö ‑ziö ‑a 'dhɛ 'kö bha‑ ‑ta pongpongdhö. ‑A ‑gɛn ‑mü ꞊dhɛ mɛ "ʋʋ mɛ 'ö ꞊ya 'dhang bho yöö Yesu Klisi bha ꞊në‑ "dhiʋ̈, 'yö Atanna ‑ya ‑mɛ sü ꞊dhɛ 'mɛ 'ö 'bɔn 'bha 'yaa‑ ‑bha 'zü ‑a 'dhö. 'Yö‑ ‑mɛ ‑yö ‑ya ‑a ‑bha ‑gasitɛ bha‑ "yi ꞊bhaa Klisi bha‑ 'saa‑ 'gü, 'yö mɛdhɛ ‑kë ‑a "piʋ̈.
18 ‑A ‑kë "dhʋ̈ ‑sü bha‑ 'gü, ‑kɔ do 'ö Atanna ‑bha za ‑yö bɔ‑ 'ka Adan yöö do‑ ‑bha 'wɔn yaa kë ‑sü ‑ta 'ö mɛ ꞊gban "pɛpɛ zë‑ 'ka bha, Atanna ‑yö ‑bɔ 'wɔn ‑së 'ö Yesu Klisi 'ö ꞊sɔng 'bha 'yaa‑ ‑bha 'ö‑ ‑kë bha ꞊në‑ ‑ta ‑kɔ do bha‑ 'gü 'pö, 'yö 'bɔn bho‑ 'ka mɛ ꞊gban "pɛpɛ ‑bha, 'yö ꞊sii ‑da ‑a ‑nu 'gü.
19 Mɛ dosengseng ‑bha ‑da Atanna "dhiʋ̈ ‑sü ꞊në pö ‑ya mɛ 'gbɛ ‑bha ‑a wëëdhö. ‑Kɔ do bha‑ 'gü 'pö Yesu Klisi yöö doseng ‑a ‑bha Atanna ꞊bhlëë 'ö‑ ‑ya bha ꞊në dho mɛ 'gbɛ dha, 'yö ꞊sɔng bho‑ ‑nu ‑bha Atanna wëëdhö.
20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑yö ö ‑bha 'tɔng‑ ‑nu ‑nu mɛ "bhɩɩ‑ ‑dhɛ kö ‑wa ‑bho 'koo ꞊në dɔ ꞊dhɛ ‑a "sɩ 'yaa mɛ "bhɩɩ‑ bha ‑dhɛ kö ‑ya ‑bha 'tɔng‑ 'kun 'kpakpadhö kö ‑yö kë ‑a dha ‑gɛn 'ka. Kë "dhʋ̈ kö ꞊waa‑ 'wɔn dɔ, kö ‑wa ‑bha ‑gasitɛ bha‑ ꞊bhlëë dɔ, kö ‑wa 'wɔn dɔ ꞊dhɛ "tʋ̈ng 'ö mɛ "bhɩɩ‑ ‑bha 'wɔn yaa ‑yö ‑da 'ka 'kpii‑ 'gü bha, 'yö Atanna ‑bha ‑gasitɛ ‑yö ‑ziö 'ka ‑gbaɔ 'gü 'pö.
21 Kë "dhʋ̈ kö ‑wa 'wɔn dɔ ꞊dhɛ ‑kɔ do 'ö 'wɔn yaa ‑yö ‑ya 'ka "sɛ "dhiʋ̈ 'ö ga ‑yö bɔ‑ ‑ta 'ö‑ ‑kɔ ‑yö ꞊mɔɔ‑ 'ka mɛ "bhɩɩ‑ ‑bha bha, Atanna ‑dɩ 'pö ‑yö ‑gasitɛ ‑kë kwa ‑dhɛ ‑kɔ do bha ꞊në‑ 'gü, 'yö 'kwa bɔ kwa Dëmɛ Yesu Klisi 'ka, 'yö‑ pö kwa ‑bha ꞊dhɛ 'bɔn 'yaa kwa ‑bha, 'yö ꞊sii 'ö 'yaa yën ‑a ‑da kwa 'gü.