THESALONIKAHEA
Veia Pawluha Cayuk Akcüknak
Pyenhlüma
Thesalonikah mlüh cun Romah pe Maketawnih khawa mlühnua kyaki. Philipih mlüh käna Thesalonikah sangcim hin Pawluh naw a mdüiha sangcima kyaki. Cunüngpi, ivei am nghjawk se, Judah jumnak üng vanga yängkie Judah am niki khyangea ksunga Pawluh naw thangkdaw a sang hü mkeiki Judahe naw ngtäknak pawh lawkie. Pawluh cun Thesalonikah mlüh ceh ta lü Berea mlüha cit khaia ami sihlingnak. Pawluh cun Korintuh mlüh a pha käna, Thesalonikah Sangcima a mawngma cun ngkhahpüi lü a khüipüi Timotia vei üngkhyüh mthehnaka kca a yah.
Thesalonikah üng Pawluha Kca Yuk Akcüknak hin acua veki khritjane jah mcuhmtheh lü ngjuktha a jah petnak betüa kyaki. Ami jumeinak ja mhläkphyanaka thanga phäh jenak ngthu jah mthehki. Ami hlawnga a ve üng a awmih a jah sümsak. Käna, Khritawa law be vaia mawng sangcim k’uma, “Khritawa am law be ham üng thikia jumeikie hin Ania lawpüi vaia angsäia xünnak yah hnga khawh acun he aw?” tia ngthähnake a jah msang be. Acun käna, Khritaw itia law be khai? Khritaw law be vai äpeinak am mtät lü khut ami bi nglät vaia Pawluh naw jah mthehki.
Amawng Ktawie
Pyenhlüma (1:1)
Jenak mthehnak ja mküieinak (1:2—3:13)
Khritjan awmih mthümhletnak (4:1-12)
Khritawa law be vaia mawng mtheimthangnak (4:13—5:11)
Akpäihnaka mthümhletnak (5:12-22)
Khüpnak (5:23-28)
1
1 Pawluh, Tilah ja Timoti naw,
Thesalonikah mlüha veki Pa Pamhnam ja Bawipa Jesuh Khritawa sakhyangea veia,
Bäkhäknak ja dimdeihnak nami khana pha law se.
Thesalonikahea jumeinak ja xünsak
2 Nangmi phäh alä se Pamhnam je na lü kami ktaiyü naküt üng jenak ka ning jah mtheh petki.
3 Ihlawka nami jumnak nami xünsak üng ngdangki, nami mhläkphyanak naw ihlawka ning jah khüikhawmsaki, ja mi Bawipa Jesuh Khritaw üng ihlawka nami äpeinak ngkhängki ti cun ka ning jah sümki.
4 Kami be ja kami cinae aw, Pamhnam naw ning jah mhläkphya na lü a khyang vaia a ning jah xü päng ti cun kami ksingki.
5 Thangkdaw nami veia kami sang law kcük üng, khyü nglung däk am ni lü Ngmüimkhya Ngcim ja johit am, käna ngkhängceknak üng kümbekia cangnak am kami lawpüiki. Nami hlawnga kami ve üng, nangmia dawnak vaia kami veki ti cun nami ksingki.
6 Nami khamei a dämda üngpi, Ngmüimkhya Ngcim üngkhyüh lawkia jekyainaka ngthu yah lü keimi ja Bawipa üng nami ngcukngkiki.
7 Akaijah hne ja Maketawnih hne üng jumeikiea phäh ami ngcukngkihnak vaia nami kyaki.
8 Bawipaa ngthu cun nangmi üngka naw ngthang hüki, Maketawnih hne ja Akaijah hne däka am ni lü, hnün naküt üng Pamhnam nami jumeinak cun ngthang hüki. Acunüng, keimia pyen vai i pi am hlü.
9 Nami veia kami law üng ihawkba nami jah dokham, xüngseikia Pamhnam kcanga khut bi khaia,
10 thihnak üngka naw tho be lü Pamhnama mlung sonak üngka naw jah küikyankia a Capa Jesuh — khankhaw üngka naw a Capaa law be vai mtätei lü juktuh nghlat ta lü nami ve cun acuna khyang he naw pyen ve u.