Johana Veia
MALAM MDANNAK
Pyenhlüma
Johana veia Malamdanak cun Khritjan he naw Jesuh Khritaw cun ami Bawipa kba ami jumeinaka phäha ami jah mkhuimkha kcün üng yuka kyaki. Khehki he naw ngak’uhnak la mlung üpnak ami taknak vai la khuikhanak la mkhuimkhanaka kcün üng sitih ksehlen u lü ami khängceknak vaia cak’yu naw a yuka kyaki.
Cauk aktung bawk üng mdanak la mhmuhmthehnak cun msuimcäpnaka ngthu am yuka kyase, acuna kcün üng Khritjan he naw ksing thei u sepi akce he naw am ksing thei u. Ahina mawng cun hmuhmthehnak amjü mjü am län län be u lü mdana kyaki. Ahina cauk pyenak ngkhai akce kcea ngaikyunak awm sepi amawng ktung cun: anghnu säiha Pamhnam naw Bawipa Khritaw üng a ye avan la Khawyam jah näng lü ahina ngnängnak akümbe law üng a khyang sitih he cun Khawmdek kthai la Khankhaw kthai am a jah kheng lawnak vaia mawnga kyaki.
Amawng Ktawi he
Pyenhlüma (1:1-8)
Mdannak akcük la Sangcim khyüh hea veia cayuk (1:9—3:22)
Msingnak khyüh la Caktawmca (4:1—8:1)
Kpun khyüh (8:2—11:19)
Mnaka la sakyung nghngih (12:1—13:18)
Mdannak amjü mjü (14:1—15:8)
Pamhnama mlungsonaka khawt khyüh (16:1-21)
Babalunga pyehnak, sakyung nängnak, am sahma kcang la Khawyai (17:1—20:10)
Ngthumkhyahnak anghnu säih (20:11-15)
Khankhaw kthai, Khawmdek kthai, Jerusalem kthai (21:1—22:5)
Khüpnak (22:6-21)
1
1 Hina cauk cun Jesuh Khritaw naw malama kya law khai he a mdanak yuknaka kyaki. Pamhnam naw säng säng se kya law khaia mdanak cun a m'ya hea veia a jah mhmuh vaia Johan üng a peta kyaki. Khritaw naw hina mawngma he cun a m'ya Johana veia a khankhawngsä tüi law lü mdan se;
2 Johan naw a hmuh naküt cun a pyena kyaki. Hin cun Pamhnama ngthu la Jesuh Khritawa ngthu kcang, Jesuh Khritaw naw a mdan a yuk bea kyaki.
3 Ahin avana pha lawnak vai akcün ng’et lawkia kyase, hina cauk khehki ta a josen ve. Ahina malam mdanak cauk ngai lü a k’uma ng’yuki he jah läklamki he ta ami jo sen ve.
Sangcim khyüh he jah Hnuksetnak
4 Asah khawa awmkia Sangcim khyüh hea veia kei Johan naw ka ning jah yuk law ta:
ajana awm pängki, atuh awm k’umki la tuha awm law khaia Pamhnama vei üngka la bawingawhnaka ma awmkia ngmüimkhya khyüha vei üngka,
5 thihnak üngka naw tho law be kcük lü, khawmdek sangpuxang jah uki, sitikia saksi Jesuh Khritaw üngka dim’yenak la bäkhäknak cen nami khana awm se.
Jah jawng'eng na lü a thihnak am mi katnak he üngka naw jah lät saki.
6 A Pamhnam la a Pa mi khüih khaia ktaiyü mjüa jah pyangkia Jesuh Khritawa veia hlüngtainak la johit angläta awm se! Amen.
7 Teng u, Khawngmei üng kyum law khai! Khyang naküt naw hmu khai he, sunki he ye ye naw pi hmu khai he. Khawmdek khana khyang naküt kyap law khai he. Acukba kya law khai.
8 Ahmäi khyaih lü awm pängki, awm k’umki la awm law khaia Bawipa Pamhnam naw, “Kei cun akcük la anghnu säiha ka kyaki” a ti.
Khritawa Ngdangnak
9 Kei cun nami bena Johana ka kyaki ni. Amäta Khaw ham na khaia khyang hea khana pha law khaia khuikhanak cun mlung saünak am ka jah khamei püiki. Jesuha hnukläka ka kyaki. Jesuha mdan Pamhnama Ngthu la Ngthungtak ka sanga phäha Patmos k'kawnga ami na tak.
10 Bawipa khawmhmüp üng Ngmüimkhya am awm ni se ka hnua kpuna ng’yüna mäiha angsanga ngthuheikia kthaih ka ngjak.
11 Acun naw, “Na hmuh he cen cauk üng jah yu lü mlüh khyüh üng awmkia Sangcim he Ephet mlüh, Samunah mlüh, Perakamun mlüh, Thutirah mlüh, Sadih mlüh, Philadephih mlüh la Lodikih mlüh üng jah kbi kawpi” a ti.
12 Na ngthuheipüikia kthai cun ka hmu khaia ka mang hüki naw xüi meiim taknak khyüh ka hmuh;
13 meiim khyüha ksunga nghngicim khyang am tängki mat ka hmuh. Acun naw a khaw cäpa saüki jihnu sui lü a mkyang üng xüi ksawmyüi vawp se ka hmuh.
14 A lusam cun toa mu la kdama bawka mäiha bawki, a mik he cun meikdäia mäiha caki;
15 a khaw cun mei üng msawia mthia mäiha caki. A kthai pi tuiksawia nghmüma mäiha nghmümki.
16 A kut kpat da aisi khyüh kpawmki. A mka üng hnuma kxata mäih mthikcim lut lawki. A hmai pi khawnghngi nglinga mäiha caki.
17 Acun ka hmuh üng akthia mäiha a khaw kunga ka kyuki. Acunüng ani naw a kut kpat lam ka khana mtaih lü, “Ä kyüha; kei akcük säih la anghnu säiha ka kyaki ni.
18 Kei akxünga ka kyaki ni! Ka thi pängki acunsepi angläta ka xüngki. Thihnak la thihnak khaw jah nängnaka ana ka taki.
19 “Acunakyase na hmuh päng he la awm k’umki he la tuha awm law khai hea ngthu cen jah yua;
20 ka kut kpat lam üng aisi khyüh na jah hmuh he la xüi meiim taknak khyüh hea suilam cun hinkba kyaki. Meiim khyüh he cun sangcim khyüha kya u lü, aisi khyüh he cun sangcim khyüh mceimcangkia khankhawngsä khyüha kyaki he ni” a ti.