3
Djäga nhuŋguway nhunu yängum malaŋuwu garrundawum
Warning about the tongue
Djayim 3.1-12
1 Wäwa ga yapa warra nyäku, ŋangawul ŋalma ŋarru gayŋa banha bukmak bitjuwayiŋ djälmiyi marŋgikunhawum ḻinygu marŋgikunhamiwum yolŋuwu warrawu gayŋa dhaŋu dhä-gir'yunda ŋoya murrukay marimi
2 Ga waripum ŋali bayiŋ bukmakthu yolŋuyu warrayu baḏatjtjun bitjuwayiŋ, bala ŋali bayiŋ gälkin. Ga bayiŋ nhan ŋarru ŋunhuŋ yol yolŋu gulunmaranhami ; ŋatjil nhanapinya nhan ŋäṉarr dhaŋu, ga ŋangawul nhan ŋarru garrun ŋunhuŋ waŋgany barrakiny yän ga banhayam nhan yolŋu rom-dhunupan ḻinygun; ga bitjanya ḻinygu nhan ŋarru banha bukmak yana nhanapinyay nhan rumbalma ḏaḏawyumanmi barrakinyŋurum mala.
3 Ga nhäŋa ŋatjil dhaŋu yän gam'. Banha nhan bayiŋ ŋarra yolŋu ŋalthun yarraman'ŋa, ŋurruŋum ŋatjil nhan ŋarru bayiŋuyam yolŋuyu nhinathuŋgan yutjuwaḻ djimuku' dhurrwaraḻi baykuḻ yarraman'kuḻ. Ga banha nhan ŋarru gayŋa gutjparrun banhaya yarraman'nha dhurrwara-bayikumiyuyam girri'miny, nhanmam ŋarru ŋarra bayiŋuya yutjuwaḻyum girri'yu ŋanydja'-ŋanydjaḻayuman banhaya yarraman'nha, nhäḻi nhan ŋarru banha yolŋu djälmiyi ŋarranhawu nhangu bayikuya yarraman'ku.
4 Guyaŋiya ŋatjil marthaŋaynha bilanyaya ḻinygu murrukay marimi. Banha bayiŋ gayŋa watayu murrukayyu nhanany gutjparrun bala räli ŋarru bilanyayu bili yana yutjuwaḻyu girri'yu yäkuyu goliyu nhan bayiŋ yolŋuyu marthaŋay-gutjparrundamiyu ŋarra bilu'biluman banhayany marthaŋaynha, banha nhäḻi nhan bayiŋ gayŋa yolŋu bitjuwayiŋ djälmiyi ŋarranharawu.
5 Ga bilanyaya ḻinygu banha yolŋuwum ŋäṉarr dhaŋu; yutjuwaḻ marimi nhan rumbalma, ŋarru ganydjarrmin. Nhanmam bayiŋ gayŋa banha bayiŋuyam ŋäṉarryuny djämam murrukaynha mariminan yänma bulwata-nhinathuŋgana bayiŋ ŋarra.
Gatjuy guyaŋiya ŋatjil warra. Banha nhan bayiŋ yutjuwaḻma ŋorrtja ŋäṉarrma guwarun birrŋ'thuna ga guwarunma nhan bayiŋ banha gunguyuyumana warrpam'thuna dhika, bawalamin darpam malany.
6 Yo. Ga yolŋuwum dhaŋu ŋäṉarr dhaŋu ŋupandayŋu yana bitjuwayiŋ banhaya ŋorrtja. Yo, yolŋuwum dhuwal rumbal guḻku marimi marimi, bilanya bitjuwayiŋ maŋutji, ŋurru, ga buthuru ga dhikan nhän malany. Ŋarru ŋäṉarrma dhaŋu marimin yana barrakinynha; djinaŋuyan bayiŋ gayŋa banha bukmaknhan rumbalnham barrakinydjumana, ga bayiŋuyan bitjuwayiŋ bayiŋ gayŋa banha baḏuwaḏuyunma bawalamin, ḻinygu banhayam barrakinyma yän ŋorrtjayinyaram bayiŋ gayŋa banha walmam dhawaṯthun bewaḻin yana dhä-gir'yundamiŋurun waŋgalaŋaŋuru.
7 Yo, yolŋum dhaŋu marŋgi nhalpiyan nhan ŋarru maŋutji-wuṯtji'yuman wäyinnha mala ŋarranharaminy ga buṯthundaminy ga gaḻundaminy, ga ŋunha banha ŋarirriny malaŋuny ga miyapununy; yolŋuyu gayŋa ganydjarr ŋayathan mä nhan ŋarru gayŋa yal'yuman nhä malany
8 Ŋarru ŋangawulnha nhan gayŋi ŋunhuŋ yolthu waŋganydhu ŋayathu ganydjarr gulyumanda bayikuya nhanguwaywuru nhan ŋäṉarrwum. Yolŋum dhaŋu ŋäṉarr barrakiny yana marimi, bilanya bitjuwayiŋ banha girri' walŋa-wulk botjin'; ŋangawul nhan ŋarru gulumaranhami garrundaŋuru barrakinyŋuru.
9-10 Yo, ḻundu warra marrkapmi warra, djinaŋ mu banha ŋäṉarryum ŋalmaliŋguḻ ŋalma bayiŋ ga garrun wokthun ga märr-yiŋgatji ŋalmaliŋguru Garraywun ga God-Waŋarrwun Moriwun. Ga djinaŋuya bili yana ŋäṉarryu ŋalma bayiŋ gayŋa banha dhä-yarrkthun nyamir'yun ŋunha waripuny yolŋuny, banha nhan bilanyaya mu ḻinygu yana dharaŋanda birrimbirrmi bitjuwayiŋ nhanbay yana God-Waŋarrnha, ga dhuwaniyam ŋangawulnha ŋuwakurru.
11 Nhäyiny nhunu bayiŋ banha maŋutjiŋurum garmak maḻŋ'thuman waluyu rarranhdharrwirriyum? Raypiny wo dhäkay-murrkthunda?
12 Yo, ga ŋunhuŋ nhunu bayiŋ wuḻuymuŋ'ku dhakal warraṯthun bewaḻi munydjutjŋuru ḏarpaŋuru? Ga ŋunhuŋ nhunu bayiŋ raypinyma garmak warraṯthun, bewaḻi moṉukŋuru garmakŋuru?
Dhaŋum gayŋa rakaram God-Waŋarrwuŋun marŋgi-guŋunda
The wisdom which comes from God
Djayim 3.13-18
13 Ŋunhuŋ gayŋa yol yolŋu nyena djinal nhumaliŋgura malaŋa banha nhan marŋgi marimi ḻiya-djambatjnha wal'ŋu Godkurum romgu? Gatjuy maŋutji-wuŋan dhuwaniya romnham banha nhunu ŋarru gayŋa nyenam ga djämam ŋuwatjuman yana ga dhuṉḏaynha, ŋayaŋuyum nyilŋ'thumandamiyun ga djambatjthun guyaŋinyarayu.
14 Ga bayiŋ nhuŋguḻ gayŋa banha ŋayaŋuŋa ŋoya maŋutji-ḏiy'ma yana gayŋa ŋanak-barrakinydjuman yana nhunu ŋarru gayŋa nyena, ga guyaŋinyami nhunu ŋarru gayŋa nhunapinya nhunu, ŋangawulnha gayŋi djängumam rakaraŋ guḻu'-guḻukthunmiyam yana gayŋi ŋapa-dhurrthurryum banha gulitjnham romnha.
15 Ga bilanyayam banha djambatj-guyaŋinyara ŋangawulnha God-Waŋarrwuŋum, bili bilanyayam banha batjiwarr ga rom djinakuwuy bayma yana munatha'wuy, dhawaṯthun bayiŋ gayŋa yolŋuwuŋun guyaŋinyara, ŋurukuŋun banha buŋgawawuŋun, Waŋawuŋun guŋanda.
16 Ga bayiŋ gayŋa banha nhuŋguḻ maŋutji-ḏiy'ma ŋoya ga galŋa-wanyuyinyaramim rom, bala ŋarru gayŋa banha ŋayaŋuŋurum nhuŋguḻ walma marin, bala ŋarru gayŋa banha yolŋum warra guwatharanhamin bärrkuwaḻyumanmin ga gurruṯunharrayin.
17 Ga nhangum banha God-Waŋarrwum djambatjma-guyaŋinyara bewaḻi djiwarr'ŋurum, nhan ŋarru gayŋa gutjparrun ŋalmaliny ḏarrtjalkkuman yana ŋunhuŋ nhänharrayumana, ga mägayan ga mä-yolŋumin ga ŋayaŋum gurrum'nha ga guŋga'yundamin, ga gulitjnha yana.
18 Yo, ga banhayam yolŋu warra banha dhanal bayiŋ gayŋa djälmiyi waripuwu yolŋuwu dhanaliŋgu dhanal ŋarru gayŋa nyena mäwayaŋan/betjŋan yana, bilanyayun ŋarru gayŋa banha yolŋuyu warra djäma ŋuwaḻyumana yana. Ga bayiŋuyam djämayu dhanaliŋguru ŋarru banha yolŋum warra dhuwurr-dhunupayin.