9
दानियेल न आपना लोगहन वाटे प्रार्थना करनो
1 मादी क्षयर्ष न पोर्यो दारा, जो कसदियान देश पर राजा टहरायो गयलो हुतो।
2 हेका राज न पेहला साल मा हांव दानियेल शास्तुर न लारे समझी लेदो कि यरुशलेम न उजड़ली दशा योहोवा न उना वचन नलारे जो यिर्मयाह कागळीया न पास पुगलो हुतो, थुड़ांक सालन वितने पर सत्तर साल बाद मा पुरी हुय जासे।
3 तव हांव म्हार मुय परमेश्वर भेणी करीन विनता करने लागियो, आरु उपास करीन, गन्टो पांगरीन, रुखड़ा मा बठीन सोत मांगणे लागीयो।
4 हांव पोरबु परमेश्वर सी इनीये रीतिये प्रार्थना करीयो आरु म्हार पाप मानीन पछतावो करीयो, ए पोरबु तु मोटो आरु बीक माने हसो छे, जो लोगहन थार सी मोंग करे, आरु थारा हुकुमन पाळन करे, हेनु पर तु दया करे, आरु हेनका साथ मा तु थारा वाचा क पुरो करे।
5 हामु ते पाप करीया, आरु थार विरुद मा भुण्डलो काम करीया। थारा हुकुम आरु नियमन नी मानीन लड़ाय झगड़ा करीया।
6 हामु थारा चाकरीया कागळीया न खबर को नी समळीया। जे हामरा राजाओं, आदिकारीया, आरु हामरा डाहडान को थारा नाव सी खबर समळाड़ीया।
7 ए मालिक तुत् न्यायी छे, आरु हामरो माथो शरम सी झुकलो छे। आज बी हामु, यहुदा परदेश न निवासी यरुशलेम मा रयणे वाळा, इसराएल जिनुक तु उना धुका क कारण जे थार सात मा करला हुता, देश- देश मा तितर बितर कर दिदो, हेनु सबन को लाजवायनो पड़ीयो।
8 ए योहोवा हामु लोगहन हामरा राजा, आदिकारीया आरु डाहडान क सात मा थार विरुद पाप करला, छे इना कारण सी हामुक लाजवायणो पड़े।
9 ए मालिक हामरा परमेश्वर, तुत् दयाळो आरु माफी आपण्यो छे। हामु थारे विरुद मा गलत काम करीया।
10 आरु थारा परमेश्वर न नियम- कानुनन अनसारे नी चाल्ला हुता, जो तु थारा चाकरीया कागळीयान लारे हामरे सामने मकलो हुतो। पोरबु इनिये रीतिये हामु हामरा मालिक परमेश्वरन बुल को नी समळीया।
11 सारी इसराएली लोग थारा बुल को समळने सी मना करीया। त्या थारा नियमन पाळन नी करीया आरु हेको मानने सी मुय फेरवी लीदा; आरु जो शराप थारा चाकरीया परमेश्वरन दास मुसा न नियम मा लिखला छे, त्या हामरे उपर आवणे लागीयो; काहकी हामु थार विरुद मा पाप करीया
12 ए परमेश्वर, जो वचन तु हामरे साते आरु हामरे पर हक करने वाळा आदिकारीयान करता कयलो हुतो, हेनको तु पुरो करीयो। तु हामरे पर घण मोटी पीड़ा न्हाकीयो। जसी पीपा यरुशलेम पर न्हाकलो तसी आखा आकाश आरु नेचो धरती पर आर काह बी नी पड़ी।
13 मुसा न नियम मा लिखली आखी पीड़ा हामरे उपर पड़ी, ते बी हामु हामरा पोरबु परमेश्वर न दया न नजर हात करनेन कुशीत नी करीया आरु नी हामु हामरा पापन काम को छुड़ीन थारा खोरा वचन को समळने तियार हुया।
14 ए पोरबु तु हामरे वाटे पीड़ा तीयार करीन राखीयो आरु हामरे उपर रेड़ दिदो; काहकी हामरो पोरबु परमेश्वर आपसा हर एक कामो मा धरमी छे, हेको सारो काम नियाव सी पुरो छे। हामु हेका बुल को नी समळला हुता; अतरान करीन यी पीड़ा आवी।
15 ए मालिक हामरा परमेश्वर, तुते थारा ताकत वाळा हाथो सी आपसा लोगहन को मिसर देशन गुलामी मा सी छुड़ावलो हुतो आरु इनिये रीते आपसा नाव को मोटो बनावलो हुतो, जसो त्यो आज बी छे। हे पोरबु हामु पाप करला छे। हामु भुण्डला काम करलो से।
16 ए मालिक थारा धरमी काम करीन थारी रीस आरु किचवन यरुशलेम सी छेटो करले। पोरब यरुशलेम नगर ते थारोत् चुखलो बयड़ो छे। हामरा डाहडान पाप आरु हामरात् अधरमी कामो न कारण सी यरुशलेम नगर थारा लोगहन आड़े धड़े न मुलुक मा बदनाम हुय गीया।
17 ए हामरा परमेश्वर, थारा इना चाकरीया न प्रार्थना को समळ। ए मालिओक, उजाड़ीया पड़ला चुखला जागा पर थारी बड़ाय वाटे थारा मुंय विजाळो चमकाड़।
18 हे म्हारा परमेश्वर, म्हारी प्रार्थना भेणी कान्टा लगाड़ आरु हेको समळीन आपसा ढुळान को उगाड़ आरु हामरा विनाश पर नजर न्हाक। जो नगर थारा नाव सी बुलायो जाय, हेको देख। पोरबु थारी धारमीकता न कारण ते नी पुण थारी मोटी दया पर भुरसो राखीन हामु यी प्रार्थना, यी विनता थारे सामने मेल रीया।
19 ए मालिक हामरी प्रार्थना को समळ। ए मालिक हामरा अपराद क माफ कर। ए मालिक, हामरे पर धियान दे आरु हामुक छुड़ाव। ए म्हारा परमेश्वर, थारी बड़ाय वाटे मुड़ो मा करे, काहकी थारा नगर आरु थारा निज लोगहन थारात् नाव सी नावलाये।
जिब्राएलन भविष्यवाणीक समझाड़नो
20 इनीये रीतिये जव हांव बोलीत् रीयो हुतो, हांव म्हारा आरु म्हारी इसराएल लोग वाटे पाप मानने लागरीयो हुतो। जव हांव महारा पोरबु परमेश्वर क सामने हेका चुखला बयड़ान नगर वाटे विनता कर रीयो हुतो।
21 जव हांव प्रार्थना न बुल बोलीत् रीयो हुतो, तव त्या गबरीयल सोरगदुत उतवाळीयो म्हारे पास मा आयो, जेनाक हांव पेहला दर्शन मा देखलो हुतो। सांतोन टेमन टेम हुती।
22 त्यो मखे समझाड़तो जाईन यो कयो, दानियेल, हांव तुको ओकल आरु समझ आपने करीन आवलो छे।
23 तु यी विनता करनो शुरु करलो हुतो कि मखे हुकुम जड़ गयलो। हांव तको वय वात देखाड़ने आवलो छे, काहकी तु परमेश्वर न घण मंगळो छे। हाय तु म्हारा बुलक धियान सी समळ आरु आपसा दर्शन क समझ।
24 थारा मानसे थारा चुखला नगर न वाटे सालन सत्तर हापता नेवाड़ला छे। इनु साल न वितने मा आखे भातीयेन गुणा खतम हुय जासे, पाप खतम हुय जासे, धरमन काम देखाय पड़ने लागसे, दर्शन आरु हुयने वाळी वातोन पाको पुरावो हुयसे आरु परम चुखला जागा न अभिषेक हुयसे।
25 दानियेल हतरान करीन तु यी वात जान ले आरु समझ कि जिना टेम पर यरुशलेम नगर को पछो बनावने आरु हेको पछो बसाड़नेन हुकुम निकाळसे, उना टेम सी लगाड़ीन नेवाड़ला अभिषिक्त जो नेतो बी छे, हेको आवनेन टेमे तक सालोन सात हापता हुयसे। तव सालोन साठ ने दुय हापता तक काठली टेम आवसे। इनी काठली टेम मा नगर को फिर सी बनावसे। हेका चोक पछा बनसे आरु खाय पछी खुदायसे।
26 साठ ने दुय हापता न बाद एकदिसरो अभिषिक्त होयसे। त्यो मनुस क काट देसे आरु हेको पास मा काहय बी रये। एक अगळवानीयो आवसे। हेकी सेना नगर आरु चुखला जागान को सुनलाझुळा बनाय देसे। आरु हेको नास मोटोपानी आवने सी हुयसे, आरु आखरी तक लड़ाय हुयती रयसे। विनाश हुयनो टाकयलो छे।
27 “त्यो अगुवो घण सवटान क सात मा वातन वायदु कोरसे। इनी पाकी वातन टेम सालन एक हापतान हयसे आरु इनु सालन आदा हापता तक मेल बादा आरु ओनोन बादा चढ़ावनो बन्द कराय देसे। तव भुंनली मुरती पुजा जादा हुयने सी त्यो अगुवो पाको गुणाहगार हुयसे। त्यो उना टेम पर नाश करतो रयसे इव तक हेको नास न टाकली टेम नी आय जाय।”