14
मुर्ति पुजनीयाक पोरबुन सोला
1 इसराएलोन थुड़ाक डाहला म्हारे यां आया, आरु त्या मार ओगोळ वात कोरने बोठ गोया।
2 उनात टेमे पोरबु यो बुल मेसे जोड़्यो। पोरबु म्हार सी कयो,
3 ऐ मनुसोन पुर्या, ये मानसे ते आपसीत मुर्ती आपसा मोनोम बोसाड़ लेदा, आरु ये धोरमोन वाटे चालने से पेहेलुत आपसा ओगोळ पाप कोर रोया, ती काय ये ठुकर नी खासे? ये मारी मोरजी जानने कोरीन तारेन चा आवला छे। काय हांव इनुक जोपाप आपीस? कोदी नी।
4 तु इनुक यी वात कोय दे, आरु इनुसी कोव, मालिक पोरबु ओसो कोवे, इसराएली घोरानान जे मानसे आपसा देवोन मुरती आपसा मोनोम बोसाड़से, आरु ओसा धोरोमोन वाटे चालने सी पेहेल आपसा ओगोळ भुनला कामे कोरे, आरु म्हार मोरजी जानने जुगु कागळीयान चां आवसे, ती हेनको हांव म्हारे रीते जोपाप आपीस; त्या आपसी निगिनाये ओतरी मुरतीन सारको बेस डोन जोड़से।
5 जेरेसी इसराएलोन घोरानो, जो आपसी मुरतीन लारे मेसे छुड़ीन छेटा होय गोयला छे, हेनुक हांव तिंदरा मोनोन लारे फोसाड़ीस।
6 ओतरान कोरीन इसराएलोन घोराना सी कोव, मालिक पोरबु ओसु कोवे: इसराएलोन घोराना पोसतावु कोरु। आपसी मुरतीया छुड़ देवु; आरु आपसा भुंनला कामोक छुड़िन। ऐ इसराएलोन घोराना, मारे भेनी आत रोवु।
7 काहकी इसराएलोन घोराना मा सी आरु हेनका विच रोहनेवाळा पारका मा सी वी कुय काहा नी होय, जे मार पोछोळ चालनो चाहाय छुड़ीन आपसी मुरतीयाक आपसा मोनोम बोसाड़ीया कोरे, आरु आपसा पापन ठुकोर आपसा ओगोळ राखे, आरु तोत्यार मार सी आपसी काहानी वात पुछने कोरीन कागळीयान चा आया, ती हेनको हांव योहोवा आपसुत जोपाप आपीस।
8 हांव तिना मानसोन विरुद होयीन हेनको सार दीस, आरु सोहलानी राखीस; आरु हेनको कोहाड़ो चालाड़ीस आरु हेनुक आपसा मानसो मा गोथु नास कोरीस; तोत्यार तुमु मानसे जान लेसु की हांव योहोवा छे।
9 “आरु कागळीया धुकु खायीन काहनलो बुल कोया होय, ती जानु की हांव योहोवा उना कागळीयाक धुकु आपलो छे; आरु हांव आपसो हात हेनका विरुद ओगु कोरीन तिनाक आपसा मानसो इसराएल मा गोथु नास कोरीस।
10 त्या आखा मानसे आपसा आपसा भुंनला कामोन भार हुचलसे, जोसो कागळीया सी पुछनेवाळान भुंनला काम कोहायसे, तोसोत कागळीयान वी पाप कोहायसे।
11 काहाकी इसराएलोन घोराना ओगोळ म्हारे पोछोळ चालनो नी छुड़ु आरु नी आपसा भाति भातिन गुनान लारे ओगा विटोळ बोने; पुन त्या मार लोगहन बोने आरु हां हेनको परमेश्वर कोहायीस, पोरबु योहोवान यो बुल छे।”
नुह, दानियेल, आरु अय्युब
12 योहोवान यो बुल म्हारे यां पुग्यो,
13 हे मानसोन पुर्या, जोत्यार काहनला देसोन लोगहन मार सी धुकु कोरीन पापी होय जाय, आरु हां आपसो हात ओगु कोरीन उना देसन विरुद् उना मा खानेन घोटी कोर दोम, आरु उना देसम काळोन टेम लाय दोम उनाम सी मानसे आरु ढुरोक दुयोक नास कोरो,
14 ती चाहाय उना मा नुह, दानियेल, आरु अय्युब ये तीनु मानसे होय, ती वी आपसा धोरमोन लारे कुदु आपसोत जिव वाचाड़ सोकसे; पोरबु योहोवान यो बुल छे।
15 कोदाम हांव काहनला देसोम जोंगली जोनवारे मुकलो जे हेनको कुसेनतात आरु त्यो उजाड़ नाखे, आरु जीवोनोन कारण काय उनामा होयीन नी जाय,
16 तु चाहाय उनामा त्या तीन मानसे होय, ती वी पोरबु योहोवान यो बुल छे, मारा जिवनोन आन, नी त्या पुर्याक आरु नी पोरायटाक वाचाड़ सोकसे, त्या ते ऐखला वाचसे; पुन देस उजाड़ होय जासे।
17 कोदाम हांव उना देस पोर तलवार हापकीन कोहो, हे तलवार उना देस पोर चाल; आरु ऐने रीते हांव उना मा सी मानसो आरु ढुरोक नास कोरो,
18 ती चाहाय उनामा त्या तीन धरमी मानसे वी होय, ती वी पोरबु योहोवान यो बुल छे, मार जोवनोन आन, नी ते पुर्याक आरु नी पोरायटाक वाचाड़ सोकसे, त्या ते ऐखला वाच जासे।
19 “कोदाम हांव उना देस मा महामारी मुकली सोको। हांव उना लोगहन पोर मारि रीसोन पानी पाड़ीस। हांव आखा मानसो आरु जोनवारीयाक उना देस सी छेटु कोर दिस।
20 ती चाहाय नुह, दानियेल आरु अय्युब वी उनाम होय, तीवी, पोरबु योहोवान यो बुल छे, मारा जिवनोन आन, त्या नी पुर्याक आरु पोरायटाक वाचाड़ सोकसे, आपसा भुंनला कामोन लारे त्या कुय आपसान जीवोक वाचाड़ सोकसे।”
21 “काहाकी पोरबु योहोवा ओसो कोवे: हांव योरुसालेम पोर आपसी च्यारु डोन पुगाड़ीस, तलवार, काळ, भुंनला जीवे आरु महामारी, जेरेसी मानसे आरु ढुरे आखा उनाम नास होये।
22 ती वी उनामा थुड़ाक पुर्या पोरायटा वाचसे जे चां सी निकाळीन तुमरे चां पुगाड़ीस, आरु तुमु हेनको चालचालोन आरु कामोक देखीन हेनी पीड़ान वारा जो हांव योरुसालेम पोर नाखीस, पुन जोतरी पीड़ा हांव उना पोर नाखीस, उना आखान वाराम शांति जोड़से।
23 जोत्यार तुमु हेनको चालचालोन आरु काम देखु, तोत्यार त्या तुमरी शांतिन कारण होयसे; आरु तुमु जान लेसु की हांव योरुसालेम मा जो काहीन कोर्यो, त्यो विगुर कारण नी कोर्य पोरबु योहोवान यो बुल छे।”