16
योरुसालेम नोगरोन भुंनला विचार
1 ओळी पोरबु योहोवान यो बुल मारेन चां पुग्यो,
2 ऐ मानसोन ओवलियाद, योरुसालेमोक हेरा आखा भुंनला कामोक देखाड़, जे हुये कोरला छे।
3 तु उनासी यो कोव: ए योरुसालेम पोरबु योहोवा ओसो कोवे की: तारी पोयदावारी आरु तारी उपजोन कनानी जातिन देस मा होयली छे। तारो बास एमोरी राज्यान हुतो आरु आयीस हित्ती राज्यान हुती।
4 काय तु आपसी पोयदावारीन वारा यो जाने? जेने दाहड़े तु पोयदा होयलु, तेने दाहड़े नी तारी नाल काट्या, आरु नी तुखे चुखु कोरने कोरीन पानी सी उंगवाड़ीया। सोमोळ, तेने दाहड़े तारा डीलो पोर नोन नी चुपड़ीया, आरु नी तुसे छिदरा मा वेटाया।
5 तार पोर कुदु गिन नी कोर्यो, आरु नी तारे जुगु गिन कोरीन कुदु तारी नाल काट्यो।
6 जोत्यार हांव तारे धोड़े गोथु निकयु, तोत्यार हांव तुसेक लुहुय सी सोनायलु देख्यु। हांव तारेसी कोयो, ऐ लुहुय मा सोनायला! जिवतलो रोहे,
7 आरु खेतोन तोरा सारको वोद! ऐने तु वोद आरु वोदता वोदता जुवान होय गोय। तु घाटाळी होय गोय। तारा मुनकान झोटा पायोन पाटलीयाक छिमायने लाग्या। ते वी, ऐ योरुसालेम, तु उगाड़ली होती! तारा डिलो पोर काहनलो छिंदरो नी हुतो।
8 हांव ओळी तारे धोड़े सी निकळ्यो, आरु तारे पोर निंगा कोर्यो, ती देख्यु की तारु उमोर मोंग कोरनेन जुगु होय गोयली छे। हांव तारा डील पोर आपसो चादरो नांख देदो, आरु यो तारों नांगरा काजे ढांक देदु। हांव ओन खायीन तुसेक बुल आप्यो, आरु तारे पुठी वायदा बांद्यो, आरु ओस कोरीन तु मारी लाड़ी बोन गोय, पोरबु योहोवान यो बुल छे।
9 तोत्यार हांव तुसेक पानी सी उंगवाड़ीयो आरु तारा डिलो सी लुहुय धुयु। हांव तारा डीलो पोर तेल लागाड़्यु।
10 हांव तुसे साड़ी पेहरायो, जेरे पोर बेल-बुटे लागाड़ला हुआ। हांव तारा पायोम चाटीया पेहरायो। आरु हांव तुसे सुंदर रेशोमोन आरु मोंगलो छिंदरो बुरको पेहरायु।
11 हांव तुसे गोयना सी सोजाय देदु। तारा हातोम बाजीबोन आरु गोवाम हार पेहरायु।
12 हांव तारा नाकोम कुचू पेहरायु, कानटाम टुकरीया पेहरायु, आरु मुनका पोर मुकुट मेक्यु।
13 हांव तुसे सोना चाँदीन गोयना सी सोजाड़ देदु। तारा छिंदरा सुतीन सुवावा आरु रेशोमोन हुताम जेरे पोर कसीदा लागाड़लो हुतो। तु मेदान रुटू, ऐने भावरोन रोस आरु तेल मा चुड़लो खानो खाती हुती। तु बेसकी घाटाळी आरु रानी बोनने लायक होय गोय।
14 तु आपसी घाटाळी हुती कोरीन नावसादाय होती। यो आखो काहीन ओतरान कोरीन होयो काहाकि हांव मुलुक ओतरो जादा घाटाळो बोनायप! पोरबु योहोवान यो बुल छे।
15 पुन तु मारे पोर भुरसु नी कोरीन आपसी घाटाळो होयने पोर भुरसु कोरी। तु आपसा रुपोन नावसादाय होयने सी भुनला विचार कोरने लागी। तु वाट चालती मानसोक धोरीन उनासी छिनावो काम कोरावतली।
16 तु आपसा छिंदरा लीन रोंग बिरेंगा उचा जागा बोनाय लेदी, आरु उना पोर भुनला काम कोरी, ओसा भुंनला काम कोरी जे नी कोदी होया आरु नी होयसे।
17 जो सोनो चाँदीन घाटाळा गोयना हांव तुसे आप्यो हुतो, उना सी मानसोन मुरतिया बोनाय लेदी, आरु उना सी वी भुनला काम कोरने लागी;
18 आरु आपसा बेल हाथो कोरीन विंजला छिंदरा निकाळीन तेनुक ढांक देदी, आरु मार जेतुन क तेल आरु गोंदायनियो धूप तेल तेनुक ओगोळ चोड़ावी।
19 हांव तुमुक रुटा, मधु, आरु तेल आप्यु। पुन तुमु जो खानो देव मुरतियाक आप्या। तुमु ते तेना आपसा झुटा देवताक खुश कोरने जुगु गंदायन्यो कोरीन भेट कोर्या। तुमु तेनु झुटा देवताओं पुठी छिनावाय सारका रोया! पोरबु योहोवान यो बुल छे। जो ओसो हुयो।
20 तुमु ते मारे जुगु पुर्या आरु पोरायटा पोयदा कोरला हुता। तु ऐनु पुर्या पोरायटान बादा चोड़ाय दे काहकी छे मुरतिया हेनुक खाय लेय तोसे। काय ये तारा छिनावान काम नानली वात छे?
21 तु आगठान बादाम चोड़ावने जुगु मार पुर्याक मारी, आरु हेनुक आगठा मा चुयनी देदी।
योरुसालेम क जीवन एक वेश्या क समान
22 तु मेसेक छुड़ी आरु यो छिनावो काम कोरी आरु तु आपसो चो टेम कोटी फोम नी कोरी जोत्यार तु नानली पोराय हुती। तु फोम नी कोरी, कि जोत्यार हांव तुसेक खुवे लेदु ती तु उगाड़ली हुती आरु लुहुय मा सोनायली हुती,
23 तारा हेनु आखा भुंनला कामो पोछोळ काय हुयो? हाय, तार पोर हाय! पोरबु योहोवान यो बुल छे।
24 तु ते एक टिलो बोनाय लेदी, आरु आखा एक जागाम एक उचो जागो बोनाय लेदी;
25 आरु एक एक वाटोम मुंडास्या पोर वी तु आपसो उचो जागो बोनावीन आपसी घाटाळी कोरीन छिनावो काम कोराय देदी, आरु होरीक सोवारीक बुलावीन भुंनलो काम कोरावीन मोटली छिनावाय होय गोय।
26 तु ते आपसा धोड़े वावा मिसरी मानसो सी वी, जे आरेगला ने जोबरा छे, छिनावो कोरी आरु मेसे रीस देवाड़ने कोरीन आपसो छिनावो जादा कोरती गोय।
27 ओतरान कोरीन हांव तुसेक डोन आप्यु। हांव तुसे तारा निज वाटा सी छेटो कोर देदु, तुसेक तारा देस सी निकाय देदु, आरु तुसे तारा भुकला दुश्मन पोलिस्ती बायरान हातोम कोर देदु। यो तारो मोटलो पाप देखीन लाजवायती होती।
28 ऐ योरुसालेम, ती ओस्सुर पुठी छिनावो कोरने लाग गोय। पुन तुसे पुरी नी पोड़ सोके। तारी कोदी होर नी भागे।
29 वेपारी जातीन कोसदि सी वी तु छिनावो कोरी। ओळी वी तारी होर नी भागी आरु यो तु आपसा छिनावाक जादा कोरती गोय।
30 पोरबु योहोवान यो बुल छे, कि तारो काळजो ओतरो काहा लालची छे! तु विनलाजाय छिनावान काम कोरे।
31 तु होरीक सोड़कोन छिंडा पोर आपसो टिलो आरु होरीक जागाम आपसो उचो जागो बोनावली छे, काय ऐना मा तु छिनावाय नी कोहाये? काहकी तु ओसी कोमाय पोर हासे।
32 तु छिनावाय लाड़ी छे। तु पारका मानसोक आपसा धेनीन बोदलो तेंदरे पुठी सुवे।
33 मानसे छिनावाय काजे तेरी किमोत आपे। पुन तु ते पारका मानसोक, आपसा पोर हासनीया दुसतीदार काजे लुभावने कोरीन आपसाक पोस्या आपे की त्या आखा जागा सी तारें चा आवे आरु तार पुठी छिनाळो कोरे।
34 इने रीते तारो छिनावो दिसरा छिनाया सी ओंदो छे। तारे पोछोळ कुदु छिनायो नी चालतो, आरु तु कुदा सी किमोत वी नी लेये, पुन तु आपे; इने रीते तु ओंदी कोहाये।
योरुसालेम काजे परमेश्वरन डोन जोड़नो
35 ओतरान कोरीन, ऐ छिनावाय, योहोवान बुल सोमोळ,
36 पोरबु योहोवा ओसु कोवे: तु ते छिनावा मा बेस विनलाजाय होयीन, आपसो डील आपसे वाये लागनियाक देखाड़े, आरु आपसी मुरतियो पुठी भुंनलो कार कोरी, आरु आपसा पुर्यान लुहुय उहवाड़ीन हेनुक बादा चोड़ावली छे,
37 एने रीते देख, हांव तारा आखा तारे वाये लाग रोहला छे, आरु जोतरा सी तु मोंग लागाड़ली, आरु जोतरा सी तु घाड़ाय राख रोय, उना आखाक च्यारु मेर सी तारे विरुद एकठा कोरीन हेनको तारा डील उगाड़लो कोरीन देखाड़िस, आरु त्या तारो डील देखसे।
38 तोत्यार हांव तुसेक डोन आपीस, जोसो छिनायाक आरु मारनीया बायराक आपे; आरु रीस आरु घाड़ाय सी तारो लुहुय उहवाड़ीस।
39 इने रीते हांव तुसे हेनका होकोम कोर दिस; आरु त्या तारा आसरान किला काजे उदार देसे, आरु तारा उचा जागाक तुड़ देसे, त्या तारा आखा छिंदराक निकाळसे, आरु तारा आखा घाटाळा गोयनाक हापकी लेसे, आरु तुसे उगाड़लो कोरीन छुड़से।
40 तोत्यार तारे विरुद् एक सोवटा मानसोक कोरीन त्या तारे पोर दोगड़ाटसे, आरु आपसी तोलवार सी चुर्या चुर्या कोर देसे।
41 त्या तारा घोरोम आगठो लागाड़ीन धोपाड़ देसे, आरु तुसे आड़काट मानसोन देखतात डोन आपसे; आरु हांव तारो छिनावो बोंद कोरावीस, आरु तु ओळी छिनावा जुगु किमोत नी आपे।
42 जोत्यार हांव तारे पोर रीसोन आगठो हुगो नी होयसे, तोत्यार तारे पोर ओळी नी किचवायो पुन हुगु होय जाइस, ओळी नी रिसवायो।
43 तु जो आपसा नानला होतो तेनु दाहड़ान फोम नी राखे, पुन ऐनी आखी वातोन लारे मेसे वायकेड़ा उड़ाय, ओतरान कोरीन हांव तारो चालचालोन तारा मुनका पोर नाखीस आरु तु आपसा आखा पोछला घाड़ायीन कामो सी आरु जादा माहापाप नी कोरसे, पोरबु योहोवान यो बुल छे।
जोसी आईस तोसी पोराय
44 देख, आखा कोहाड़ु कोहनिवाळा तारा वाराम यु कोहाड़ो कोहसे, जोसी आईस तोसी पोराय।
45 तारी आईस जी आपसा धेनी आरु पुर्या सी घाड़ाय कोरती हुती, तु वी तोसीत तेरीन पोराय कोहायी; आरु तारी बोहोनस्या जे आपना आपना धेनी आरु पुर्या सी घाड़ाय कोरती होती, तु वी तोसीत तेंदरी बोहनीस निकळी। तारी आईस हित्ती राजोन आरु बास एमोरी राजोन हुतो।
46 तारी मोटली बोहनीस सोमरोन छे, ची आपसा पोरायटा पुठी तारे डाखरीये ओख्ये रोहे, आरु तारी नानली बोहनीस, ची तारे जेवड़्ये ओख्ये रोहे त्या पोरायटा भेळ सोदोम छे।
47 ऐ योरुसालेम, तु पेहलेन तिंदरे सारको घाड़ायीन काम नी कोर्यो नी ते तिंदरे जोसो सारको भुंनलो वेवहार नी कोर्यो। पुन थुड़ाक टेम मा भुंनला काम कोरनेम तु तेनुक पोछोव कोर देदु; तु तेनुसी जादा बिगड़ी गोयु।
48 ऐ योरुसालेम, हांव पोरबु योहोवान यो बुल छे, मार जीवनोन आन, तारी बोहनीस सोदोम आपसा पोरायटा भेळ तारे आरु तारा पोरायटा सारको काम नी कोर्या।
49 देख, तारी बोहनीस सोदोम आरु हेरा पोरायटा पापी हुता। तिंदरे जु जोरुरोत सी जादा खानोन होतो आरु हेनका पास बेसको जादा टेम हुतो। त्या विखावाळा खाने नी होतो तेनु मानसोन मोदोत नी कोरतेला।
50 सोदोम आरु हेरा पोरायटा आड़काट घाड़च्या होय गोया आरु मारे ओगोळ बेसका पाप कोरने लाग्या। जोत्या हांव हेनुक हेंदरो कामोन कोरता देख्यु ति हांव डोन आप्यो।
51 ओळतेन सोमरोन तारा पापोन आदा वी पाप नी कोर्या, तु ते तेरेसी वोदीन घाड़ायन काम कोर्यो, आरु आपसो बेस घाड़ाइन कामोन लारे आपसी बोहनीस तारे गोथी कोम गुनाकी कोवायी।
52 ओतरान कोरीन तुमु लाजवायनो जुवे। तुमु आपसी बोहनीसुन सी आपसा सी वारु लागनेवाली बोनावला छे। तुमु बेसका पाप कोरला छे ऐने तुमुक लाज आवनो जुवे।
सोदोम आरु सोमरोन सोहरोक पोछा बोनावनो
53 जोत्यार हांव पोरायटा भेळ सोदोम आरु सोमरोन काजे बंदुवाय सी छुड़ाय लावीस, तोत्यार हेंदरे विच तारा बांदायलाक वी पोछा ली आवीस,
54 जेरेसी तुसे लाज आवे, आरु आपसा आखा कामोक देखीन लाज आवनो जुवे, काहकी तु हेंदरी शान्तिन कारण होयली छे।
55 तारी बोहनीस सोदोम आरु सोमरोन आपसा आपसा पोरायटा पुठी आपसी पेहलुन टेम होती चां पुग जासे, आरु तु वी आपसा पोरायटा पुटी आपसी पेहली टेम होती तोसा ओळी पुगसु।
56 वित्या दाहड़ाम तु घाड़साय होती आरु आपसी बोहनीस सोदोमोन वायकेड़ा कोरतेली। पुन तुमु तोसा ओळी कोर सोकसु।
57 तुमु यो डोन जोड़ने सी पेहेल आपसा धोड़ेवाळा सी वायकेड़ा कोरने सी पेहेल कोरला हुता। एदोमोन पुर्या ऐने पोलिस्ती हेमी तुमरा वायकेड़ा उड़ावसे।
58 पुन हेमी तुसेक आपना मोटला पाप आरु घाड़ायीन कामोन भार आपसुत् हुचलनो पोड़लो छे, योहोवा भोगवानोन यो बुल छे।
एक वाचा जी जोलोम जुगु कोवायसे
59 पोरबु योहोवा ओसो कोवे: हांव तारे पुठी ओसो वेवहार कोरीस जोसो तु कोरलो छे, काहकी तु ते वायदाक तुड़ीन आन काजे उदुड़ जानलो छे।
60 ते वी हांव तारा नानला होता तेनु दाहड़ान आपसा वायदाक फोम कोरावीस, आरु तारे पुटी जोलेमकु वायदु बांदीस।
61 जोत्यार तु आपसी बोहनीस काजे आपसी मोटली आरु नानली बोहनीस काजे खुवे लेये, तोत्यार तु आपसो चाल चालोन फोम कोरीन लाजे पोड़नो पोड़से; आरु हांव हेनुक तारा पोरायटा कोहाड़ीस; पुन यो तारा वायदान ओनसारे नी कोरीस।
62 हांव तारे पुठी आपसा वायदाक एक जागे कोरीस, आरु तोत्यार तु जान लीस की हांव योहोवा छे।
63 जेरेसी तु फोम कोरीन लाजे पोड़े, आरु लाजे मोरीन ओळी कोदी मुय नि उगाड़े। यो तेने टेमे होयसे, जोत्यार हांव तारा आखा कामोक ढांक लीस, पोरबु योहोवान यो बुल छे।