20
परमेश्वरन मोरजी आरु मानसोक चोकचोया कोरनो
1 सातवे वोरीसोन पाचवे मोहनेन दोसवे दाहड़े इसराएलोन थुड़ाक डाहडा योहोवा सी सोवाल कोरने कोरीन आया, आरु मारे ओगोळ बोठ गोया।
2 तोत्यार योहोवान यो बुल मारे यां पुग्यो:
3 हे मानसोन ओवलियाद, इसराएलोन डाहडा सी ओसु कोव, पोरबु योहोवा ओसु कोवे, काय तुमु मारे सी सोवाल कोरने आवला छे? पोरबु योहोवान यो बुल छे की मार जीवायीन आन, तुमु मार सी सोवाल पुछनेक आया।
4 हे मानसोन ओवलियाद, काय तु हेनको नियाव नी कोरीस? काय रु हेनको नियाव नी कोरे? हेनका डाहडान भुंनला कामोक हेनुक देखाड़ दे,
5 आरु हेनुसी कोव, पोरबु योहोवा ओसु कोवे: जेने दाहड़े हांव इसराएल काजे नेवाड़ लीस, आरु याकुबोन घोरानान आन खादो, आरु मिसर देस मा आपसाक तेनु पोर देखाड़ो, आरु हुयो आन खायीन कोयो, हांव तुमरो परमेश्वर योहोवा छे,
6 तेने दाहड़े हांव तुमरा मिसर देस सी खोयड़े लावनेन वायदो कोरलो हुतो आरु हांव तुमुक हेना पोरदेस मा लायो जिनाक हांव तुमुक आप रोयु होतु। चो एक वारलो देस हुतो जो बार भातीन वारली चिजो सी भोरायलो हुतो। यो आखा देसो सी जादा घाटाळो हतो। तिनाम दुध आरु माहव उहुवे।
7 हांव हेनुसी यो वी कोहलो हुतो, मिसर देसन घाड़ायीन मुरतीया पोर तुमरा डुळा लागला छे। तुमु एनु मुरतिया काजे नांख देवु, आरु एनु मुरतिया सी आपसाक विटोळ मा कोरु; हांवुत तुमरो परमेश्वर योहोवा छे।
8 पुन चे मारी एक वी वात नी सोमळ्या आरु जादा बिगड़ी गोया; कुदु वी मिसर देसन घाड़ायीन मुरती काजे आपसा सी छेटा नी कोर्या। त्या तेनुसी सी थाबायीन रोया, आरु तेनुक नी छुड़्या; काहकी हेनु पोर हेन्दरा डुळा लागला हुता। तेनुक कुदु नी नाख्या, आरु नी मिसरोन मुरतियाक छुड़्या। तोत्यार हांव कोयो, हांव यो, मिसर देसोन इचमा तुमरे पोर आरु रिस भोड़कावीस आरु पुरी रीस देखाड़ीस।
9 पुन हांव हेनुक नास की कोर्यु। हांव मानसो सी जां त्या रोय रोया हुता पेहलुत कोहलो हुतो की हांव आपसा मानसोक मिसर सी खोयड़े ली जायीस। हांव आपसा वारला नावोनक विटोळ नी कोरनो चाहतेलु, ओतरान कोरीन हांव हेनु मनख्या ओगोळ इसराएल काजे नास नी कोर्यु।
10 हांव हेनुक मिसर देस सी निकाळीन जोंगोल मा ली आयु।
11 चां हांव हेनुक आपसो कानुक देखाड़्यो आरु नेम वी देखाड़्यु कि जे मानसे इनुक माने, चे आपसात कारण सी जिवतेला रोहसे।
12 ओळी हांव हेंदरे जुगु आपसो आरामोन दाहड़ो टाक्यु जु मारे आरु हेंदरे इचमा सोहलानी कोहाये; कि चे जाने कि हांव योहोवा हेंदरो चुखो कोरनेवालो छे।
13 ते वी इसराएलोन घोरानो जोंगोल मा मारे सी लोड़ाय कोर्या; चे मारा कायदा पोर नी चाल्या, आरु मारा नेम काजे ओसोत जान्या, जेनुक कोदाम मानसे माने ती चे हेनुन कोरता जिवतेला रोहसे; आरु चे मारा आरामोन दाहड़ाक बेस विटोळ कोर्या। तोत्यार हांव कोयो, हांव जोंगोल मा एनु काजे डोन आपीन, आपसी रिसोन आगठा सी नास कोर नाखो।
14 पुन हांव हेनुक नास नी कोर्यो। दिसरा देस मेसे इसराएल काजे मिसर देस सी खोयड़े लावतेला देख्या। हांव आपसा वारला नाव काजे तेनु देस वावा ओगोळ विटोळ नी कोरनो चाहतेलु, ओतरान कोरीन हांव हेनु देसो ओगोळ इसराएल काजे नास नी कोर्यु।
15 हांव जोंगोल मा हेनुसी आन खादु की जो देस हांव हेनुक आप्यु, आरु जो आखा देसम वारु देस छे, जेरेम दुद आरु माहवोन नोंदी उहवे, जेरेम नी पुगाड़ो,
16 काहकी हुये मारा नेम काजे ओसोत जाने आरु मारा नेम पोर नी चाले, आरु मार आरामोन दाहड़ाक विटोळ कोरला होता; ओतरान कोरीन की हेंदरो मोन हेनु मुरतीया भेनी लागलो रोयो।
17 तेवी हांव हेनु पोर गीनोन निंगा कोर्यु, आरु हेनुक नास नी कोर्यु, आरु नी जोंगोल मा आखी वातो सी हेनुक नास नी कोर्यु।
18 ओळी हांव जोंगोल मा हेंदरी ओवलियाद सी कोयु, आपसा डाहडान कायदा पोर मा चालु, नी हेंदरी रितीक मानु आरु नी हेंदरी मुरतीक पुजीन आपसाक विटोळ कोरु।
19 हांव तुमरो परमेश्वर योहोवा छे, मारा कायदा पोर चालु, आरु मारा नेम काजे माननेम चोकचोया रोहु,
20 आरु मारा आरामोन दाहड़ाक चुखलो मानु की चे मारा आरु तुमरे विच मा सोहलानी कोवाये, आरु जेरेसी तुमु जानु की हांव तुमरो परमेश्वर योहोवा छे।
21 पुन हेंदरी ओवलियाद वी मारे सी लोड़ाय कोर्या; चे मारा कायदा पोर नी चाल्या, नी मारा नेम काजे माननेम चोकचोया रोया; कायदाक आरु नेम काजे कोदाम मानसे माने ती चे तेरे कारण सी जिवतेला रोहसे; मारा आरामोन दाहड़ाक विटोळ कोर्या।
तोत्यार हांव कोयो, हांव जोंगोल मा हेनु पोर मारी रिसोन आगठा सी हेनुक मार नाखो।
22 बाखुन हांव आपसाक रुक लेदु। दिसरा देसोम वावा इसराएल काजे मिसर देस सी खोयड़े लावतेला देखला छे। जेरेसी मारो नाव विटोळ नी होये। ओतरान कोरीन हांव हेनुक दिसरा देसो ओगोळ इसराएल काजे नास नी कोर्यु।
23 ओळी हांव जोंगोल मा हेनुसी आन खादो, कि हांव तुमुक जाति जाति मा रिवन्या तिवन्या कोरीस, आरु देस देस मा खोव्वी दिस।
24 काहकी हुये मारा नेम काजे नी मान्या, मारा कायदाक ओसात जान्या, मारा आरामोन दाहड़ाक विटोळ कोर्या, आरु आपसा डाहडान मुरतिया भेनी हेंदरा डुळा लागाड़ला राख्या।
25 ओळी हांव हेंदरे जुगु ओसा ओसा कायदा आप्यु जे वारु नी हुता आरु ओसी ओसी रितीया जेरेन कोरता हुये जिवतेला नी रोय सोक्या;
26 हांव हेनुक आपसी भेटो सी आपसु आपसाक भुंडा बोनाय देदा। हुये आपसा पेहला पुर्यान लोगुन बादा चोढ़ावने शुरु कोर देदा। ऐने रीते हांव हेनु मानसोक नास कोरने चाहाय रोहलु। ती हुये जाने की हांव परमेश्वर योहोवा छे।
27 हे मानसोन ओवलियाद, तु इसराएलोन घोराना सी कोव, पोरबु योहोवा ओसु कोवे: तुमरा डाहडा ऐरेम वी मारी निंदा कोर्या कि हुये मारे सी धुकु कोर्या।
28 जोत्यार हांव हेनुक तेना देस मा ली आयो जेना देसोक आपने हांव वायदो कोरलु होतु, तोत्यार हुये जां कांखेर बोयड़ान चोटी देखा पोड़े आरु जां कांखेर हेनुक निळ्ळा झाड़े देखाये, चां हुये बादा चोड़ावने लाग्या, पुजा कोरने लाग्या, आरु आपसी बादा आरु पुजा कोरीन मारो मोजाक बोनाया। चां हुये गंदायन्या धुपोन तेल धोपाड़ता हुता, आरु आपसो पीनेन पानी उथलावता हुता।
29 तोत्यार हांव हेनुसी पुछ्यु, जेना उंचा जागाम तुमु जावु, हुयो काय छे? ऐरेसी हेरो नाव आज लोगुन बामा कोहाये।
30 ओतरान कोरीन इसराएलोन घोराना सी कोव, पोरबु योहोवा तुमरे सी यो पुछे, काय तुमु वी आसा डाहडान रीती पोर चालीन विटोळ होयीन, आरु हेंदरा भुंनला कामोन ओनसारे व्यभाचारिणीन सारको काम कोरे?
31 आज लोगुन जोत्यार जोत्यार आपसी भेट चोढ़ावे आरु आपसा बाळ बोच्चाक होम बादा कोरीन आगठाम चोड़ावु, तोत्यार तोत्यार तुमु आपसी मुरतियान कोरता विटोळ कोहायु। हे इसराएलोन घोराना, काय तुमु मारे सी पुछसु? पोरबु योहोवान यो बुल छे, मारा जिवनोन आन तुमुक मारे सी नी पुछाये।
32 जी वात तुमरा मोनोम आवे, हामु लाकड़ा आरु दोगड़ाक पुजन्या होयिन जाति जाति आरु देस देसन कुलोन सारका होय जासु, गुयो काहने वी रीते पुरो नी होये।
परमेश्वर डोन वी आपे आरु माप वी कोरे
33 पोरबु योहोवा ओसु कोवे, मारा जिवनोन आन हांव आपसी ताकोक सी आपसो हात ओगु कोरीन आरु तुमुक गुलाम बोनावने वाळा देसो पोर आपसी रीस काजे उथलावीन तुमरो छुटकारो कोरीस, आरु हांव तुमरो राजा होयिस।
34 हांव तुमरा देसोन विच मा सी निकळीस। जेना देसोम तुमु रिवन्या तिवन्या होय गोया, होंया सी हांव आपसी ताकोत वावा होतो सी, आरु छुटकारो जुगु वोदाड़ला हातो सी तुमुक निकाळीस, आरु हेनु पोर आपसी रिसोन आगठाक पाड़ीस।
35 होंया सी निकाळीन हांव तुमु जोंगोल वावा देसोम लावीस, आरु होंया हांव आंबो सांबो तुमरो नियाव कोरीस।
36 जोसो हांव मिसर देसोन जोंगोल मा तुमरा डाहडान कोरतो हुतो, आरु हेनुक डोन आपतो हुतो तोसोत हांव तुमरे पोर वी मुकेदमो चालाड़ीस, आरु डोन आपीस। पोरबु योहोवान यो बुल छे।
37 हांव गुवायो जोसो तुमुक नेवाड़ने आरु गिनने जुगु तुमुक लाकड़ा तोवे सी निकावीस, आरु तुमुक वायदान बांदाय मा बांदीस।
38 हांव तेनु आखा मानसोक छेटा कोरीस जे मारे विरुद उबा होया आरु जोतरा मारे विरुद्ध मा पाप कोर्या। हांव हेनु लोगहन को तुमरा जागाम सी छेटो कोर दिस। हुये इसराएल देस मा ओळी कोदी नी पोछा आवे। तोत्यार तुमु जान जासु की हांव परमेश्वर योहोवा छे।
39 हे इसराएलोन घोराना तुमु काजे ते पोरबु योहोवा ओसु कोवे: जायीन आपसी आपसी मुरतिक विनता कोरु; आरु कोदाम तुमु मारी नी सोमेळसु; पुन मारा चुखला नावोक आपसी भेटोम आरु मुरतियान लारे ओळी विटोळ झुणी कोरता।
40 काहकी पोरबु योहोवान यो बुल छे की इसराएलोन आखो घोरानो आपसा देसम मारा चुखला बोयड़ा पोर, इसराएलोन उचला बोयड़ा पोर, आखा की आखा मारी विनता कोरसे; चांत हांव हेनुसी खुश होयिस, आरु होंया हांव तुमरी चोड़ावली भेट आरु चोड़ावली वारु वारु चिजोक, आरु तुमरी आखी चुखी कोरली चिजोक तुमरे सी मांग लिस।
41 जोत्यार हांव तुमुक देस देसन मानसो सी आंगे कोरो आरु तेना देसो सी जिनाम तुमु रिवन्या तिवन्या हो रोया, एकठा कोरो, तोत्यार तुमुक वारु गंदायन्यो जानीन आवरी लीस, आरु दिसरी जातिक ओगोळ तुमरे लारे चुखो कोहायसे।
42 जोत्यार हांव तुमुक इसराएल देस मा लावीस, जिनाक आपनेन वायदु हांव तुमरा डाहडा सी कोरलो हुतो, तोत्यार तुमुक पोतु होयसे की हांव तुमरु परमेश्वर योहोवा छे।
43 होंया तुमु आपसी चालचालोन आरु आखा आपसा कामोक जेनुक कोरने सी तुमु विटोळ होयला छे फोम कोरसु, आरु आपसा आखा भुंडला कामोन कारण आपसी निंगा मा भुंडला कोहासु।
44 हे इसराएलोन घोराना, जोत्यार हांव तुमरे पुठी तुमरा भुंनला चालचालोन आरु बिगेड़ला कामोन ओनसारे नी, पुन आपसा नावोन वारलो वेवहार कोरो, ती तुमु जान लेसु की हांव योहोवा छे, परमेश्वर योहोवान बुल यो छे।
दोखेवरो आगठो
45 पोरबुन यो बुल मारे यां पुग्यो:
46 हे मानसोन ओवलियाद, आपसो मुय दोखेवरे भेनी कोर, दोखेवरे भेनी बुल सोमळ्यो, आरु दोखेवरा भेनी देसोन जोंगोलोन वाराम भोगवानो वोगे गोथी वात कोर;
47 आरु दोखेवरा देसोन रोहनेवाळा सी कोव; योहोवान यो बुल सोमळु: पोरबु योहोवा ओसु कोवे, हांव तुमरेम आगठो लागाड़िस, आरु तुमरेम काय निळ्ळो, काय सुकलो, जोतरा झाड़का छे, आखा हुये रुखड़ु कोरीस; हेरेम हुवाड़ु दिन आगठो धोपसे नी उलवाये, आरु हेरेन कोरता दोखेवरे गोथो बोखेवरे लोगुन आखान मुय चुयनाय जासे।
48 तोत्यार आखा जिवे जान लेसे की यो आगठो हांव पोरबु योहोवा लागाड़लो छे, आरु यो कोदी नी उलवाये।
49 हांव कोयो, हे मालीक पोरबु, ये मानसे कोवे कि हांव नोवली नोवली वात बोनावीन कोवने वावो नी होय।