1 ओळी चुखलो जागा क लियन दस परदा बनवाड़जी; हेनको पातळी सुत वाळा आरु नीळ्ळा, रीन्गनिया आरु रातला रंगन छिंदरान होसे, आरु इना मा काहना वारला कारीगर सी करुबियान सात मा बनवाड़जी। 2 एक-एक परदान नाम्बाय वीस ने आठ हात आरु चवड़ाय च्यार हातन हयनो जुळे; सब परदा एकत् मापन हुयनो जुळे। 3 पाँचो परदा एक दिसरा सी जुड़ायला हुयनो जुळे; आरु ओळी जो पाँचो परदा रयसे त्या बी एक दिसरा सी जुड़ायला हुयनो जुळे। 4 आरु जाँ सारी याँ परदा जुड़ायसे वाँ वाळा दुयु छोरो पर निळ्ळी- निळ्ळी फाँदी बनवाड़जी। 5 दुयु छोरो मा पचास-पचास फाँदी असी लगवाड़जी कि त्या आमने-सामने हुयनो जुळे। 6 आरु सोनान पचास हेकड़ा बनवाड़जी; आरु दुय परदान छल्‌लान को हेकड़ान लारे एक दिसरा सी असो जुड़वाड़जी कि निवास जागो मेळीन एकत् हुय जाय। 7 ओळी निवासन ऊपर तम्बुन काम आपने क लियन बकड़ीन झटान गियारा परदा बनवाड़जी। 8 एक-एक परदान नाम्बाय तीस हात आरु चवड़ाय च्यार हातन हुयनो जुळे; गियारा परदा एकत् मापन हुयनो जुळे। 9 आरु पाच परदा अलग आरु छव परदा अलग जुड़वाड़जी, आरु छटवा परदा को तम्बुन सामने मुड़ी देजी। 10 आरु तु पचास आकड़ा उना परदान छोर मा जो बाहर सी मेळाड़से आरु पचासुत् आकड़ा दीसरी तरफ मा जो बाहर सी मेळाड़से असो बनवाड़जी। 11 आरु पीतळन पचास आकड़ान बनावजी, आरु हेकड़ा को परदा मा लगाड़ीन तम्बु को असो जुड़वाड़जी कि त्यो मेळीन एकत् हुय जाय। 12 आरु तम्बुन परदा को टान्गायलो भाग, मतलब कि जो आदला पर रयसे, त्योत् निवास जागान पछली तरफ टान्गायलो रये। 13 आरु तम्बुन परदन नाम्बाय माईन हात भर, उरो, आरु हात भर निवास को ढाकने क लियन हेनकी दुयु तरफ टान्गायलो रये। 14 ओळते तम्बु वाटे रातला रंग सी रंगायली गाडरीन खालन एक पांगरुन आरु उना ऊपर सुइसोन खालोन बी एक पांगरुन बनवाड़जी।

15 ओळते रोहनेन जागा को उबो करीन बाबळीयान लाकड़ान पाटिया बनवाड़जी। 16 एक-एक पाटियान नाम्बाय दस हात आरु चवड़ाय डेढ़ हातन हुयनो जुळे। 17 एक-एक पाटिया मा एक दिसरा सी जुड़ायली दुय-दुय खाचा हुयनो जुळे; निवासन सब पाटिया को इनीये रीतिये सी बनवाड़जी। 18 आरु निवासन लियन जो पाटिया तु बनवाड़ीस उना मा सी वीस पाटिया ते दोखेवरे वाटे हयनो जुळे; 19 आरु वीस पाटियान नेचो चाँदीन चालीस कुड़सीया बनवाड़जी, मतलब एक-एक पाटियान नेचो हेनका खाचान क लियन दुय-दुय कुड़सीया। 20 आरु निवासन दिसरे तरफ, मतलब बोखेवरे वीस पाटिया बनवाड़जी। 21 आरु हेनका लियन चाँदीन चाळीस कुड़ची बनवाड़जी, मतलब एक-एक पाटियान नेचा दुय-दुय कुड़ची हुयनो जुळे। 22 आरु निवासन पछळ, मतलब बुडेवने भेनीन क लियन छव पाटिया बनवाड़जी। 23 आरु पछला जागाम निवासन कुना क लियन दुय पाटिया बनवाड़जी; 24 आरु या नेचा दुय-दुय भागन हुयनो जुळे आरु दुयु भागन ऊपरन मुनका तक एक-एक कड़ीया मेळाड़जी; दुयु पाटियान यो रुप हुयनो जुळे; या ते दुयु कुना क लियन हुयनो जुळे। 25 आरु आठ पाटिया हय; आरु हेनकी चाँदीन सुळा कुड़चीहुयनो जुळे; मतलब एक-एक पाटियान नेचा दुय-दुय कुड़ची हुयनो जुळे

26 ओळी बाबळीयान लाकड़ान डांडा बनवाड़जी, मतलब निवासन एक तरफ पाटिया क लियन पाच, 27 आरु निवासन दिसरे तरफ पाच डांडा, आरु निवासन जो भाग दखेवरे भेनी पछळ्ळा भाग मा हुयसे, हेनका लियन पाच डांडा बनवाड़जी। 28 वीचमावाळा डांडा जो पाटियान वीच मा हुयसे त्यो तम्बुन एक दिसरे छिवनीये तक पुगसे। 29 ओळी पाटियान को सोना सी फाळाड़जी, आरु हेनका डांडा घरन काम देसे हेनको बी सोना सी ढाळाड़जी। 30 आरु निवास क इनीये रीतिये उबो करजी जसो इना बयड़ा पर तुको हांव देखाड़ीयो हुतो।

31 ओळी नीळ्‍ळा, रींगनिया आरु रातला रंगन आरु वाटायली सुळावी सनीवाळा छिंदरान एक वीचमा वाळो परदो बनवाड़जी; त्यो विंदीन काम करीनिया करुबियान को सात मा बननो जुळे। 32 आरु उको सोना सी ढाळायला बाबळीयान च्यार खाम्बा पर लटकाड़जी, ओकी हेकड़ीया सोनान हुयनो उळे, आरु या चाँदीन कुड़ची पर उबो रये। 33 आरु वीचमा वाळा परदान हेकड़ीयान नेचो लटकाड़ीन, ओकी आड़ मा गोवान चिट्ठी सन्दुक माहयतो ली जाजी; अतरान करीन त्यो वीचमा वाळो परदो तुमरे लियन चुखला जागा को चुखामा चुखा जागा सी अलग रये।✡ 34 ओळी चुखाम चुखा जागा मा गोवान चिट्ठी सन्दुकन ऊपर पछतावान ढाकना को राखजी। 35 आरु उना परदान बाहर निवासन दखेवरे भेनी मेज राखजी; आरु ओको बखेवरो भेनी मेजन सामने दीवलियान को राखजी।

36 ओळते ओळी तम्बुन झोपलान लिये निळ्ळो, जामन्यो आरु रातला रंगन आरु सुतीन सुवाळा सनीवाळा छिंदरान उटनेन काम करलो एक परदो बनवाड़जी। 37 एना पोरदा क टांगने क लिय बाबळ्यान लाकड़ान सोना सी घड़ायला पांच खांबा बोनावजु, हेनकी हेकड़िया सोनान होयनो जुवे आरु हेनका लिय पीतळन पांच कुड़चिया बोनावजो