16
हाजिरा आरु इश्माएल
1 अब्राम क लाड़ी सारै क कोय ओवलियाद नी होती। ओकी हाजिरा नाव क एक मिसरी दासी होती।
2 सारै ने अब्राम सी कोहि, “देख, योहोवा न तो मारी कुख बोन्द राखली छे, ओतरान कोरिन हांव तार सी विनत कोरो कि मारी दासी क पास जा; सम्भव छे की मारो घोर ओके द्वारा बोस जाय।” सारै क यी वात अब्राम न मान लिदो।
3 ओतरान कोरिन जोत्यार अब्राम क कनान देश मा रोहता दोस साल वित गोया ती ओकी लाड़ी सारै न आपसी मिसरी दासी हाजिरा क लीन आपसा घोरवाळा अब्राम क आपी, की हुयी हेरी लाड़ी होये।
4 हुयो हाजिरा क पास मा गयो, आरु हुयी भारेपाये हुयी, ती हुयी जानी कि हांव भारपाये छे, ती हुयी आपसी स्वामिनी काजे तुच्छ निगाह से देखने बाज गोय।
5 ती सारै न अब्राम सी कोहि, “जो मार पोर झगड़ो करावनो होयो चो तारात मुनका पोर होये। मे ते आपसी दासी क तारी लाड़ी कोर देदी; बाखुन हुयी जानी कि हांव भारपाये छे, ती मेखे वीटोळ जानने लाग गोय; ओतरान कोरिन योहोवा मारे आरु तारे वीच मा नियाव कोरे।”
6 अब्राम न सारै सी कयो, “देख, तारी दासी तारा होको मा छे; जोसो तुखे वारु लागे तोसोत हेरे पुठी कोर।” ती सारै हेनीक वेला आपने वाज गोय, आरु हुयो हेरे सामने सी ढास गोय।
7 ती योहोवा क दुत न ओको जोंगोल मा शुर क वाट्ये पोर पानीन झोरोन चा देखिन कोयो,
8 हे सारै क दासी हाजिरा, तु कां गोथी आवी आरु कां जाय रोय; हुयी कोहि, “हांव मारी स्वामिनी सारै क सामने सी ढासीन आय रोय।”
9 योहोवा क दुत न हेनी सी कयो, “आपसी स्वामिनी क पास म पोछी जा आरु ओका होको मा रोव।”
10 आरु योहोवा क दुत ओको यो वी कयो, “मे तारी ओवलियाद क ओळी वोदाड़ीस, या तोक की घोनसोटा की गिनाये नि सोके।”
11 आरु योहोवा क दुत हेनी सी कयो, देख, तु भारपाये छे, आरु पुर्य होयसे; तु ओको नाव इश्माएल राखजी, काहकी योहोवा न तारा दुख क हाल सोमळी लेदलो छे।
12 आरु हुयो मानुस बनेले गदड़ा क जोसो होयसे, ओको हात सब क विरुद्ध उठसे आरु सब क हात ओका विरुद्ध मा उठसे; आरु हुयो आपसा सब भाई–बोन्या क वीच मा रोहसे।
13 ती हुयो परमेश्वरन नाव जो हेना सी वात कोर्यो हुतो अत्ताएलरोई राखी कयो, “काय मे या वी ओको जातला देखिस आरु देखने क वाद मा जिवतली रोहिस?”
14 ओस कोरिन तेना कुवा क नाव लहेरोई कुवो पोड़्यो; होयो ते कादेश आरु बेरेद क विच मा छे
15 हाजिरा क अब्राम क द्वारा एक पुर्य होयो; आरु अब्राम न आपसा पुर्या क नाव, जो हाजिरा पोयदा कोरी, इश्माएल पाड़्यु। (गला. 4:22)
16 जोत्यार हाजिरा न अब्राम क द्वारा इश्माएल क जोन्म देदी तेन टेमे अब्राम छियासी साल क थो।