22
चढ़ावान पवित्रता
1 पछु योहोवा मूसा सी कया,
2 हारून आरू ओकान पोर्या सी कया कि इस्राएलियाक पवित्रन होई चीज सी जेका चो मार करता पवित्र करता छे अलग रया, आरू मारा पवित्र नावन विटुळ नी करे; हाव योहोवा छे।
3 आरू उना सी कय कि तुमरी पीढ़ी पीढ़ी मा तुमरे सब वंश मा सी जो कुई आपनी अशुद्धता कि दशा मा उना पवित्र होई चीजक जु जाए, जेका इस्राएली योहोवाक पवित्र करता छे, चो प्राणी मार सामने सी नाश कर्या जासे; हाव योहोवा छे।
4 हारूनक वंश मा सी कुई काह नी होसे जो कोढ़ी होसे, या ओकान सफेदपाणी होसे, चो मानुस जव तक शुद्ध नी होसे जाए तव तक पवित्र होई चीज मा सी काहय नी खाए। जो लोथक कारण अशुद्ध होसे, या जेका वीर्य स्खलित होयो होसे, ओसो मानुसक जो कुई हाथ लागाड़े,
5 आरू जो कुई काहनी ओसो रेंगनेहारे जन्तुक हाथ लागाड़े जेका सी लोगहन अशुद्ध होय सकता छे, या काहना ओसा मनुस क हाथ लागाड़े जेका मा काहना प्रकारन अशुद्धता होसे जो ओकाह भी लाग सकती छे
6 ते चो प्राणी जो इनामा सी काहनाक हाथ लागाड़े सांजु तक अशुद्ध ठरल रवे, आरू जव तक जल सी स्नान नी करले तव तक पवित्र चीज मा सी काहय नी खाए।
7 तव दाहड़ो बुडनेक होयने पर चो शुद्ध ठरसे; आरू तव चो पवित्र चीज मा सी खाय सक छे, काहकी ओकान खानो चो छे।
8 जो जनावर आपने आपसु सी मरलो होसे या हिंसक पशु सी फावड़ो गयो होसे उका खाईन चो आपने आपसुक अशुद्ध नी करे; हाव योहोवा छे।
9 एरकरता याजक लोगहन म्हारा आपला नियमनमन पालन करे, ओसो नी होय कि चा उनाक विटुळ करीन पापन भार उठायो, आरू ओका कारण मर भी जाए; हाव ओकान पवित्र करनेवाळु योहोवा छे।
10 “पराया कुलक जन काहना पवित्र चीजक नी खानु जुवे, चाहे चु याजक क पाहनत्रो होसे या मजदुर होसे, तौभी चा कुई पवित्र चीज नी खाए।
11 कदाम याजक काहना प्राणी ओकामा सी खाय सकता छे; आरू जु याजकक घर मा पयदा होये होसे चा भी ओकान खाना मा सी खाए।
12 कदाम याजकक पोराय पराया कुलक काहना मानसो सी हियाव वाळी होसे, ते ची भेंटक होई पवित्र चीज मा सी नी खाए।
13 कदाम याजकक पोराय विधवा या त्यागी होई होसे, आरू ओकान सन्तान नी होसे, आरू ची आपनी बाल्यावस्थाक रीतीक अनसारे आपना बासक घर मा रयती होसे, ते ची आपना बासन खाना मा सी खाए; पुन पराया कुलक एकदो ओकामा सी नी खाय नी सके।
14 आरू कदाम एकदो मानुस काहना पवित्र चीज मा सी कहाय विसरीन काय जासे, ते चो ओकान पाचवो भाग बढ़ावीन उका याजक क भर दे।
15 चा इस्राएलियाक पवित्र करली होई चीजक, जेका चा योहोवाक करता चढ़ाया, विटुळ नी करे।
16 चा ओका आपनी पवित्र चीज मा सी खावाढ़ीन ओका सी अपराधक दोष नी उठाड्या; हाव ओकान पवित्र करनेवाळु योहोवा छे।”
17 पछु योहोवा मूसा सी कयो,
18 “हारून आरू ओकान पोर्या सी आरू इस्राएलिया सी समझाळीन कया कि इस्राएलक घराना या इस्राएल मा रयनेवाळा परदशिया मा सी एकदो काह नी होए जु मन्नत या स्वेच्छाबलि करनेक करता योहोवाक कुई होमबलि चढ़ाया,
19 ते आपना निमित्त ग्रहणयोग्य ठरनेक करता बुयल या गाडरा या बुकड़ा मा सी निर्दोष नर चढ़ायो जासे।
20 जेका मा कुई भी दोष होय हेको नी चढ़ावनो; काहकी त्यो तुमरे जुगू मानने सारको नी रयसे।
21 आरू जु कुई बुयल या गाडरा-बुकड़ा मा सी स्वेच्छाबलिन करता योहोवाक मेलबलि चढ़ाया, ते ग्रहण होयनेन करता पाको छे कि चो निर्दोष होय, ओकामा कुई भी दोष नी होय।
22 जु आंधवो या डिलन टुटलो या लुल्लो होसे, अथवा ओकमा रसौली या खवड़ा या खुजली होसे, ओसाक योहोवाक करता नी चढ़ावनु, ओकाक वेदी पर योहोवान करता हव्य नी चढ़ावनु।
23 जेका काहनो बुयल या गाडराक कुई डिल जास्ती या कम मोटलो होसे ओकाह स्वेच्छाबलिन करता चढ़ाव सकता छे, पुन मन्नत पूरी करनेन करता चो ग्रहण नी होयसे।
24 जेका आंडा दाबायला या कुचनाया या टूटला या काटला गया होसे ओका योहोवाक करता नी चढ़ावनु, आरू आपना देश मा भी ओसो काम नी करनु।
25 इकामा सी काहनाक तुमु आपनो परमेश्वरन खानो जानीन एकदा परदेशी सी लीन नी चढ़ावु; काहकी ओकामा ओकान दोष छे, ओकामा दोष छे, एरकरता चो तुमरे निमित्त ग्रहण नी होसे।”
26 पछु योहोवा मूसा सी कयो,
27 “जव केवढ़ाक या गाडराक या बुकड़ान बच्चा सी पयदा होय, ते चो सात दाहड़े तक आपनी आयाक साथे रये; पछा आठवे दाहड़े सी ओगव चो योहोवाक हव्यन करता ग्रहणयोग्य ठरसे।
28 चाहे केवढ़ी, चाहे गाडरा या बुकड़ा होये, ओकाक आरू बच्चाक एकुज दाहड़ा मा बलि नी करनु।
29 आरू जव तुमु योहोवान करता धन्यवादन मेलबलि चढ़ावु, ते उनी रीति सी करनु जेका सी चो ग्रहणयोग्य ठरसे।
30 चा ओके दाहड़े खाये जासे, ओकामा सी काहय भी सोंदारे तक रयनु नी जुवे; हाव योहोवा छे।
31 “एरकरता तुमु मारी हुकुमोन माननु आरू ओकान पालन करनु; हाव योहोवा छे।
32 आरू मारा पवित्र नाव विटुळ नी ठरनु, काहकी हाव इस्राएलियाक वीच मा पाको पवित्र माने जासे; काहकी हाव तुमरो पवित्र करनेवाळु योहोवा छे,
33 जा तुमुक मिस्र देश सी निकाळ लाया, जेका सी तुमरो परमेश्वर बवनु रवे; हाव योहोवा छे।”