33
Musa anabariki mbari za Iziraeli
1 Hino ndiyo baraka ambayo Musa, mutu wa Mlungu waatakira Aiziraeli kabila ya chifoche. Wagomba hivi.
2 Mwenyezi Mlungu wakpwedza kula mwango Sinai,
wautsembukira kula mwango Seiri,
achingʼaza kula mwango Parani.
Watsembuka kahi ya maelufu ga malaika,
na moho unaoaka katika mkpwonowe wa kulume.
3 Mwenyezi Mlungu anaamendza atue,
atakatifue osi ni maliye.
Kpwa hivyo anasagala phakpwe maguluni
na kuphaha malagizo kula kpwakpwe.
4 Musa wahuamuru hutii shariya;
ambayo ni mali ya taifa rehu ra atu a chivyazi cha Jakobo.
5 Mwenyezi Mlungu achikala mfalume wa Iziraeli,
wakati vilongozi aho ariphokutana,
na mbari zosi ziriphokusanyika.
6 Musa achigomba kuhusu mbari ya Rubini:
“Rubini na aishi, asifwe,
ela atue naakale achache.”
7 Kuhusu mbari ya Juda achiamba,
“Ee Mwenyezi Mlungu phundza chiriro cha mbari ya Juda;
muuyize tsona kpwa atue.
Pigana kpwa mikonoyo kpwa ajiliye,
uterye mbari ya Juda mbere za maaduige.”
8 Kuhusu mbari ya Lawi achiamba,
“Ee Mwenyezi Mlungu,
aphe nyo aaminifuo, yani atu a chivyazi cha Lawi kumanya ulondavyo,
kuhumira mawe ga kumanyisa ulondavyo.
Aho urioajeza hiko Masa,
na uchishindana nao kpwenye madzi ga Meriba.
9 Alawi apaza avyazi ao,
taayakubali ndugu zao,
taayashuulikiya ana ao,
mana alunga shariyazo,
na kugbwira chilaganecho.
10 Andafundza chivyazi cha Jakobo malagizogo;
na atu a Iziraeli shariyayo.
Aho andaika uvumba mberezo
na sadaka kamili za kuochwa dzulu ya phatupho pha kulavira sadaka.
11 Ee Mwenyezi Mlungu, jaliya maliye,
na ukubali kazi za mikonoye,
vundza nguvu za maaduige,
nguvu za anaomzira ili asiunuke tsona.”
12 Kuhusu mbari ya Benjamini achiamba,
“Hino ni mbari ambayo Mwenyezi Mlungu anaimendza,
nayo inakala salama phephi naye.
Iye anairinda dii yosi,
nayo nkusagala kahi za mafuzige ga mkpwotse.”
13 Kuhusu mbari ya Yusufu achiamba,
“Mwenyezi Mlungu ajaliye tsiiye,
kpwa baraka nono kabisa kula dzulu mlunguni na manena,
na kpwa madzi galago tsini.
14 Ijaliwe na matunda manono ganagoivwa kpwa dzuwa,
na matunda manono ga chila mwezi,
15 kpwa mavuno manono ga myango ya kare,
na mavuno manono ga vidzango vya kare na kare.
16 Tsiye iodzale gosi garigo manono,
ijaliwe razi za iye yekala ndani ya chira chitsaka.
Baraka hizi ziedzere atu a mbari ya Yusufu,
ariye mkpwulu kahi za nduguze.
17 Mkpwotsewe ni dza wa ndzau wa mwandzo,
na pembeze ni dza za nyahi.
Andazihumira kusukuma mataifa;
gosi andagasukuma hadi pembe za dunia.
Pembe hizo ni Efuraimu ariye na elufu kumi
na maelufu ga Manase.”
18 Kuhusu mbari ya Zabuloni achiamba
“Zabuloni na Isakari muongokerwe kpwenye shuuli zenu
na munaphokala kpwenye mahema genu.
19 Andaalika atu kpwenye mwango wao,
na hiko andalavya sadaka zifwahazo.
Mana aho andavweha utajiri wao kula baharini
na hazina zofwitsika kpwenye mtsanga.”
20 Kuhusu mbari ya Gadi achiamba,
“Naatogolwe Mlungu anayemupha Gadi seemu kulu.
Gadi ananyapira dza simba
achiahula mkpwono na zekeya ra chitswa.
21 Wadzitsamburira seemu nono kuriko yosi,
phatu photengbwa kukala seemu ya amiri-jeshi.
Waalongoza atu na kumsikira Mwenyezi Mlungu,
watimiza mpango wa Mlungu kpwa Iziraeli.”
22 Kuhusu mbari ya Dani achiamba hivi,
“Dani ni mwana simba
atinaye kula Bashani.”
23 Kuhusu mbari ya Nafutali achiamba,
“Ee Nafutali yemvuniswa upendeleo,
yeodzala baraka za Mwenyezi Mlungu,
tsiiyo ni hadi kpwenye ziya Galilaya
na uphandewe wa mwakani.”
24 Kuhusu mbari ya Asheri achiamba,
“Asheri na abarikiwe kuriko ana osi a Jakobo,
na amendzwe zaidi ni nduguze osi;
utajiriwe na ukale dza chigulu chichovwikpwa mafuha.
25 Midziyo indakala ya maryango ga chuma na shaba.
Usalamao undadumu maishago gosi!”
26 Musa achimarigiza kpwa kuamba,
“Ee Iziraeli, taphana ariye dza Mlunguo,
hiye atsupaye mlunguni kpwedza kukuterya,
atsupaye na nguvu katika anga.
27 Mlungu wa kare na kare ndiye chimbiriro renu;
na mikonoye ya nguvu inaativya.
Waazola maadui mbere zenu;
waamba, ‘Aangamizeni.’
28 Kpwa hiyo, atu a Iziraeli achisagala salama,
chivyazi cha Jakobo machiyao,
kpwenye tsi yoodzala mtsere na uchi wa zabibu,
tsi ambayo inaphaha manena kula mlunguni.
29 Baha mwimwi Aiziraeli.
Ni ani ariye dza mwimwi,
atu muriotivywa ni Mwenyezi Mlungu,
ambaye ndiye ngao na msada wenu,
na mufyu unaoarehera ushindi!
Maadui genu gandakpwedza gbwa maguluni mbere zenu,
namwi mundagavyoga-vyoga.”