17
Ayubu anaenderera kudzihehera
1 Nkavundzika moyo, siku zangu zikasira,
mbira i tayari kpwa sababu yangu.
2 Kpwa kpweli afyozi akanizangira,
dzitso rangu rinalola vyo aninyeteravyo.
3 Ee Mlungu, hehera kusakala na lawama kpwangu,
mana takuna mutu ndiyenihehera.
4 Mana ukaziba achili zao zisielewe,
kpwa hivyo kundaaruhusu ashinde.
5 Afyakatsiraye asenae ili aphahe fwaida,
matso ga anae gandafunga jiza.
6 Mlungu akanihenda nikale wa kutsekpwa ni atu,
nikakala mutu wa kutsitsirwa mahe.
7 Matso gangu gakamenya jiza kpwa sonono,
na vilungo vyangu vyosi tavina mkpwotse dza chivurivuri.
8 Vivi atu a haki achiniona anaangalala,
nyo asio na lawama anaona kukala námkosera Mlungu.
9 Ela wa haki andagbwira njiraye,
na ye wa mikono swafi andazidi kuphaha nguvu.
10 Ela mwimwi mosi, uyani,
nami sindaphaha mutu wa ikima hata mmwenga kahi yenu.
11 Siku zangu zikasira, mipango yangu ikavundzika,
vyo moyo wangu umendzavyo, vikakoseka.
12 Asena angu taamanya wakati wa usiku wala wakati wa mutsi;
kuchikala usiku nyo nkuamba ni mutsi;
na jiza richikala rinahanda nyo nkuamba kunangʼala.
13 Kuluphiro rangu ri kuzimu,
ambako ndahandika chitanda changu ko jizani,
14 Ichikala nindaiha mbira, ‘Uwe u baba,’
na kuamba bulu, ‘Uwe u mayo’ au ‘Uwe u mwenehu mchetu,’
15 kuluphiro rangu ri kuphi?
Ni ani ndiyeona kuluphiro rangu?
16 Dze, rindateremuka kuriko na maryango ga kuzimu?
Dze, hundatserera phamwenga mtsangani?”