36
Elihu anatogola unono wa Mlungu
1 Phahi Elihu waenderera kugomba achiamba,
2 “Nivumirirani chidide nami nindakuonyesani,
mana nchere na utu wa kugomba kpwa ajili ya Mlungu.
3 Marifwa gangu ndagalavya kula kure,
na kuonyesa kukala muumba wangu ni wa haki.
4 Mana kpwa kpweli maneno nigombago si ga handzo,
iye ariye mkamilifu kahi za marifwa a phamwenga nawe.
5 Lola, Mlungu ni mwenye uwezo na kabaguwa mutu,
ana uwezo wa kuelewa.
6 Iye karicha atu ayi akakala moyo,
ela anaapha agayao haki yao.
7 Iye kausa matsoge kpwa enye haki,
ela nkuasagika kpwenye vihi vya utawala phamwenga na afalume
na nkuahenda aishimiwe ta kare na kare.
8 Ela atu achifungbwa silisili,
na kufungbwa na nyugbwe za kugaya,
9 Mlungu nkuaonyesa mahendo gao mai
kukala aho ni atu a kudzikarya.
10 Nkuahenda asikire malagizoge,
na kualagiza atubu uyi wao.
11 Achimphundza na kumuhumikira,
nikuongokerwa kahi ya siku zao ziserezo,
na kuhererwa kahi ya miaka yao.
12 Ela asiphophundza, andaangamizwa na upanga
na kufwa bila ya marifwa.
13 Asiomuogopha Mlungu nkukala na tsukizi mwao mioyoni,
hata aafungapho, taarira kulonda msada.
14 Aho nkufwa atsanga,
na maisha gao gasirira na waibu.
15 Iye nkuakombola agayao kula kpwa kugaya kpwao,
Iye nkuahenda amusikize kuhumira mashaka gao.
16 Mlungu wakutuluza tabuni
achikulongoza phatu wazi, phasipho shida,
na kuodzaza mezayo na vyakurya vinono-vinono.
17 Ela vivi unaamulwa dza atu ayi aamulwavyo,
uamuli na haki zikakugbwira.
18 Dzimanyirire sedze ukachengbwa ni utajiri,
au chiasi chikulu cha hongo chikakuhenda ugaluke.
19 Dze, maliyo au mkpwotseo munji
unaweza kukuterya usigaye?
20 Usiaze usiku uinjire,
wakati mataifa gandaangamizwa.
21 Dzimanyirire, usigalukire uyi,
mana uwe ukautsambula kuriko kugaya.
22 Lola, Mlungu nkuhenda makulu kpwa uwezowe,
ni ani awezaye kufundza dza iye?
23 Ni ani ariye mpangira ra kuhenda?
Au ni ani awezaye kumuamba, ‘Ukahenda makosa?’ ”
24 Usiyale kutogola mahendoge,
ambago atu nkugaimba kumtogola.
25 Atu osi aona Mlungu arigohenda,
atu nkugaona kula kure.
26 Mlungu ni mkpwulu sana hata tahuweza kumanya ukuluwe wosi,
miakaye taimanyikana.
27 Mana iye nkuvuta dzulu matone ga madzi,
na kula kpwa guro, mvula ikanya.
28 Nkuhenda maingu garehe mvula,
na ikaapiga atu kpwa unji.
29 Takuna amanyaye atandazavyo maingu,
wala chiguruguru chibandavyo kula kpwakpwe.
30 Lola, atsamusavyo limemere kumzunguluka,
na kubwiningiza vivwa vya bahari.
31 Kpwa kureha mvula, nkuarisa atu
na kuaphahira chakurya chinji.
32 Iye nkugbwiririra limeme mwakpwe mikononi,
na kurihuma kura alondako.
33 Chiguruguru chinatangaza kukala phuto kulu riredza
hata mifugo nkumanya kukala kuredza phuto kali.