6
Ayubu anamjibu Elifazi
1 Phahi Ayubu wajibu achiamba,
2 “Kala sonono nriyonayo ungepimwa,
na mashaka gangu gosi gangetiywa kpwenye mizani!
3 Gangekala maziho kuriko mtsanga wa pwani,
ndiyo mana maneno gangu ni ga kuropoka.
4 Mana nikalatswa ni iye Mwenye Nguvu Zosi,
roho yangu ikakola yo sumuye
Mlungu akapanga vitishovye chinyume changu.
5 Dze, foro nkurira napho anarya nyasi?
Au ngʼombe nkurira wakati inarisa?
6 Dze, chakurya sicho ladha nkuriwa bila kutiywa munyu?
Na ujinji wa yayi una mtswano wani?
7 Sina hamu ya kuguta vyakurya hivyo,
ni dza vyakurya vinavyonihenda nihererwe ni moyo.
8 Kalapho mavoyo gangu gangekubaliwa,
na Mlungu angenipha nilondago,
9 kalapho Mlungu angekubali kunisaga-saga,
na kurichira mkpwonowe uniolage!
10 Phahi angeniphoza marenda,
ningehererwa kahi ya yo hali ya maumivu
mana sikarema go maneno ga ye ariye mtakatifu.
11 Nina nguvu zani hata nienderere kukugodza?
Kpwa utu wani nivumirire na simanya mwisho wa maisha gangu?
12 Dze, nina nguvu za mawe?
Au mwiri wangu ni wa shaba?
13 Kpwa kpweli siweza kudziterya,
wala sina wa kunitivya.
14 Iye aremaye kumuonera mbazi msenawe,
anaricha kumuogopha iye Mwenye Nguvu Zosi.
15 Enehu taakuluphirika dza vidzuho,
dza vidzuho vifurikavyo na vikanywa.
16 Ambavyo nkufurika
wakati barafu inatsatsamuka.
17 Ela wakati wa kazikazi nkuricha kujera,
kuchikala dzoho, nkuangamika pho viripho.
18 Acharo nkuangamika njira kpwa kuendza madzi,
nkuhangaika jangbwani na kufwerera kuko.
19 Acharo kula Tema nkuendza madzi,
achuuzi a Sheba nkugaendza kpwa kutumaini.
20 Aho avundzika mioyo mana kala ana uhakika wa kuphaha madzi,
ela kufika phapho, achivundzika mioyo.
21 Mwimwi namwi munaonekana tamundaniterya,
munaona vyo niturikavyo, namwi munaogopha.
22 Dze, nákuambirani rini, muniphe zawadi
au, mulavye seemu ya mali yenu kpwa ajili yangu?
23 Nákuambirani rini, munitivye kula mikononi mwa adui
au, munikombole kula mikononi mwa atu ayi?
24 Nifundzani, nami ndanyamala,
nihendani nimanye chiphokosera.
25 Maneno ga kpweli gana nguvu!
Ela kuniamba na makosa kuna mana yani?
26 Munaona munaweza kulavya makosa maneno gangu?
Na kuhenda maneno ga mutu achiyekata tamaa kukala dza phepho?
27 Munaweza kupiga kura ili muhende anachiya akale atumwa,
na kuguza asena enu.
28 Ela vivi kalani razi mnilole,
mana sindagomba handzo mbere zenu.
29 Nakuvoyani mugaluke, msihende uyi.
Galukani, mana sina makosa.
30 Dze, nkagomba utu uyi?
Dze, munaona simanya mai?