10
ގޮއްފުޅަނގި ސޫފީގެ މުސީބާތް
1 މާތްރަސްކަލާނގެ މޫސާގެފާނަށް ވަޙީކުރެއްވިއެވެ. ”އަލުން ފިރުޢައުނު ގާތަށް ގޮސް ކަލޭ ތިޔަ އެދޭ ކަންތައް ހުށަހަޅާ. އަހަރެން މިވަނީ އޭނާއާއި އޭނާގެ ވަޒީރުންގެ ބޯހަރު ކޮށްފަ. އެގޮތުން އަހަރެންގެ މުޢުޖިޒާތްތަކާއި ހެކިތައް އެމީހުންތެރޭގައި ދައްކާލެވޭނެ.
2 އަހަރެން މި މުޢުޖިޒާތްތައް މި ދައްކަނީ ކަލޭގެ ދަރިންނާއި ކަލޭގެ ކާފަ ދަރިންނަށް ތިމަންކަލާނގެ ކުޅަދުންވަންތަ ޢަލާމާތްތަކުގެ ވާހަކަ ބުނެ ދެވޭނެ ގޮތް ވުމަށާއި މިޞްރުގެ މީހުން މޮޔަ ހެއްދުމުގެ ގޮތުން ވެސް މެ. މިގޮތުން ކަލޭމެން އެންމެންނަށް ފެނިގެންދާނެ މާތްރަސްކަލާނގެއަކީ އަހަރެންކަން.“
3 ދެން މޫސާގެފާނާއި ހާރޫނުގެފާނު ފިރުޢައުނުގެ ގާތަށް ވަޑައިގެންފިއެވެ. ”މާތްރަސްކަލާނގެ، ޢިބްރާނީންގެ ވެރި އިލާހު އެންގެވީ މިހެން: ’ކަލޭމެން އަހަންނަށް ބޯނުލަނބައި ތިބޭނީ ކިހާ ދުވަހެއްވަންދެން ހޭ؟ އަހަރެންގެ މީހުން ދިއުމުގެ ހުއްދަ ދެއްވާށޭ. އޭރުން އެމީހުންނަށް ތިމަންކަލާނގެއަށް އަޅުކަން ކުރެވޭނެއޭ.
4 މިފަހަރު ކަލޭމެން އިންކާރު ކޮށްފިނަމަ މާދަމައިން ފެށިގެން ކަލޭމެންގެ މައްޗަށް ގޮއްފުޅަނގީގެ މުސީބާތެއް ފޮނުއްވާނަމޭ.
5 އެއެއްޗެހި އައިސް މުޅި ބިމަށް ފެތުރިގަތުމުން ކަލޭމެންނަށް ބިންވެސް ނުފެންނާނެޔޭ. އަދި ގަނޑުފެނުގެ ތޫފާނަށް ފަހު ސަލާމަތްވި ހުރިހާ ގޮވާމަކާއި ދަނޑުގައި ހުރިއްޔާ ހުރިހާ ގަހެއް، އެއެއްޗެހި އައިސް ކައި ހަފުސް ކޮށްފާނެއޭ.
6 އެއެއްޗެހި އައިސް ރަސްގެފާނާއި ވަޒީރުންގެ ގަނޑުވަރުތަކަށާއި މަނިކުފާނުގެ މީހުންގެ ގޭގެއާއި ތަންތަނަށް ވަދެގަންނާނެޔޭ. މިޞްރުގެ ތާރީޚުގައިވެސް އަދި ކަލޭމެންގެ ކާބަފައިންގެ ތާރީޚުގައިވެސް މިފަދަ ތޫފާނެއް ދެކެފައެއް ނުވާނެޔޭ.‘ “ މިހެން ވިދާޅުވެފައި މޫސާގެފާނު އެނބުރި ވަޑައިގެން ފިރުޢައުނުގެ ގާތުން ވަޑައިގެންފިއެވެ.
7 ފިރުޢައުނުގެ ވަޒީރުން ވަޑައިގެން ދެންނެވިއެވެ. ”މިމީހާ އަޅުގަނޑުމެންނަށް މި އާފާތް މެދުވެރި ކުރާނީ ކިހާ ދުވަހެއް ވަންދެންތޯ؟ އެމީހުންގެ އިލާހު، މާތްރަސްކަލާނގެއަށް އަޅުކަން ކުރުމަށް ފޮނުއްވާދެއްވަންވީ ނޫންތޯ؟ މިޞްރު ފަނާވަމުން ދާތަނެއް މަނިކުފާނަކަށް ފެނި ވަޑައިއެއް ނުގަންނަވާތޯ؟“
8 އެހެންވެ ފިރުޢައުނު ވިދާޅުވެގެން މޫސާގެފާނާއި ހާރޫނުގެފާނު ހާޒިރު ކުރެވިއްޖެއެވެ. ”އެންމެ ރަނގަޅު.“ ފިރުޢައުނު ވިދާޅުވިއެވެ. ”ދޭ ކަލޭމެންގެ އިލާހު، މާތްރަސްކަލާނގެއަށް އަޅުކަން ކުރަން. އެކަމަކު ކަލޭމެން ގެންދާނީ ކޮންބައެއްތަ؟“
9 މޫސާގެފާނު ދެންނެވިއެވެ. ”އަޅުގަނޑުމެން އެންމެން. ޒުވާނުންނާއި މުސްކުޅިންނާއި އަޅުގަނޑުމެންގެ ފިރިހެން ދަރިންނާއި އަންހެން ދަރިންނާއި ގެންގުޅޭ ޖަނަވާރުތައް. އަޅުގަނޑުމެންގެ އެންމެން މާތްރަސްކަލާނގެއަށް އަޅުކަން ކުރުމުގެ ޢީދުގައި ބައިވެރިވާނެ.“
10 ފިރުޢައުނު ކޯފާވެފައި ވިދާޅުވިއެވެ. ”ކަލޭމެންގެ މާތްރަސްކަލާނގެ ގަންދީ މިބުނަނީ، ކަލޭމެންގެ ކުދި ދަރިންނާއި އަންހެނުންތައް އަހަރެން ދިޔަކަ ނުދޭނަން. ކަލޭމެން ތިޔަ އުޅެނީ ކޮންމެވެސް ނުބައެއް ހަދަން ކަން ވަރަށް ސާފުކޮށް އެބަ އެނގޭ.
11 ކަލޭމެން ތިޔަ ކަންތައް ކުރަން އެދޭނަމަ ހުރިހާ ފިރިހެންވެރިން ގޮސް މާތްރަސްކަލާނގެއަށް އަޅުކަން ކުރޭ.“ މިހެން ވިދާޅުވެ ފިރުޢައުނު އެމީހުން ގަނޑުވަރުން ބޭރު ކުރައްވައިފިއެވެ.
12 ދެން މާތްރަސްކަލާނގެ މޫސާގެފާނަށް ވަޙީކުރެއްވިއެވެ. ”ކަލޭގެ އަތް އުފުލައި މިޞްރުގެ ބިމަށް ގޮއްފުޅަނގި އަރުވާ! އޭރުން މިޞްރުގެ ބިމުގައި ގަނޑުފެނުގެ ތޫފާނުން ސަލާމަތްވެފައިވާ ހުރިހާ ގަސްގަހާގެއްސެއް އެއެއްޗެހި ގޮސް ކައި ހުސްކުރާނެ.“
13 ދެން މޫސާގެފާނު މިޞްރުގެ ބިމުގެ މައްޗަށް އެކަލޭގެފާނުގެ އަސާކޮޅު އުފުއްލެވިއެވެ. އެދުވަހުގެ ހެނދުނުން ފެށިގެން މުޅިއެރޭ މިޞްރަށް އިރުމަތިން ވައިޖެހޭނެ ގޮތް މާތްރަސްކަލާނގެ މެދުވެރިކުރެއްވިއެވެ. ހެނދުނުވީ ތަނާ އިރުމަތިން ގޮއްފުޅަނގި ބައިގަނޑު އަތުވެއްޖެއެވެ.
14 އަދި އެ ގޮއްފުޅަނގިތައް މުޅި މިޞްރުގެ ބިމަށް ފެތުރިގެންފިއެވެ. މިޞްރުގެ އެއްފަރާތުން އަނެއް ފަރާތަށް ގޮއްފުޅަނގި ފެތުރި ގަދަކޮށްފިއެވެ. އެއީ މިޞްރުގެ ތާރީޚުގައިވެސް އައިސްފައި ނުވާ ވަރުގެ ބޮޑު ވަބާއެކެވެ. އެފަދަ ގިނަ ގޮއްފުޅަނގިތަކެއް ދުވަހަކުވެސް ފެނިފައެއް ނުވެއެވެ. އަދި ނުވެސް ފެންނާނެއެވެ.
15 ގޮއްފުޅަނގިތައް ފެތުރި މުޅި ރަށުގެ ބިންގަނޑު އަނދިރިވެއްޖެއެވެ. އެއެއްޗެހިތައް މިޞްރުގެ ބިމުގައި ގަނޑުފެނުގެ ތޫފާނުން ސަލާމަތްވިއްޔާ ވެފައި ހުރިހާ ގަސްގަހާ ގެއްސަކާއި ދަނޑުފަނގުތަކާއި ގަސްގަހުގައި ހުރިއްޔާ ހުރިހާ މޭވާއެއް ކައި ހަފުސްކޮށްލައިފިއެވެ. މުޅި މިޞްރުގެ ބިމުގައި ފަތެއްހުރި އެންމެ ގަހެއްވެސް ނެތެވެ.
16 ފިރުޢައުނު އަވަސް އަވަހަށް މޫސާގެފާނާއި ހާރޫނުގެފާނު ގެންނަވައިފިއެވެ. ”އަނެއްފަހަރު ކަލޭމެންނަށާއި ކަލޭމެންގެ އިލާހަށް އަހަރެން ފާފަވެރި ވެއްޖެ.“ ފިރުޢައުނު އިޢުތިރާފު ވެއްޖެއެވެ.
17 ”ކަލޭމެންގެ އިލާހު، މާތްރަސްކަލާނގެއަށް ދަންނަވައިދީ އަހަރެންގެ ފާފަ މިފަހަރު ފުއްސަވައި ދެއްވާށޭ. މި މަރުގެ އަޒާބު އަހަރެންގެ މަތިން ފިއްލަވައި ދެއްވާށޭ.“
18 އެހެންވެ ރަސްގެފާނުގެ ގަނޑުވަރުން ވަޑައިގެން މާތްރަސްކަލާނގެ ކިބަފުޅަށް މޫސާގެފާނު ދުޢާ ދަންނަވައިފިއެވެ.
19 މާތްރަސްކަލާނގެ އެދުޢާ އިޖާބަ ކުރައްވައި ގަދަފަދަ ހުޅަނގު ރޯޅިއެއް ގެންނަވައި ގޮއްފުޅަނގި ބައިގަނޑު ރަތް ކަނޑަށް ގަންބަވާ ލައްވައިފިއެވެ. އެހިނދު މުޅި މިޞްރުގެ ބިމުގައި އެންމެ ގޮއްފުޅަނތްގެއް ވެސް ނެތެވެ.
20 އެކަމަކުވެސް މާތްރަސްކަލާނގެ ފިރުޢައުނުގެ ހިތް ހަރު ކުރައްވައިފިއެވެ. ފިރުޢައުނު އެމީހުން ދިޔަކަ ނުދެއްވިއެވެ.
އަނދިރީގެ އާފާތް
21 ދެން މާތްރަސްކަލާނގެ މޫސާގެފާނަށް ވަޙީކުރެއްވިއެވެ. ”ކަލޭގެ އަތް އުޑާއި ދިމާއަށް އުފުލާ. އޭރުން މިޞްރުގެ ބިމަށް ކަނުއަނދިރިކަން ފެތުރޭނެ. އެ އަނދިރިކަމުގެ ބޯކަމުން އޭގައި އަތްލެވޭހެން ވެސް ހީވާނެ.“
22 ދެން މޫސާގެފާނުގެ އަތްޕުޅު އުޑާދިމާއަށް އުފުއްލެވުމާއެކު މުޅި މިޞްރަށް ވަރުގަދަ އަނދިރިކަމެއް ކުރިމަތި ވެއްޖެއެވެ. މި އަނދިރިކަން ތިން ދުވަސް ވަންދެން ދެމިއޮތެވެ.
23 އެދުވަސްތަކުގައި މީހުންނަކަށް އެކަކު އަނެކަކު އެއްގޮތަކަށްވެސް ނުފެނެއެވެ. އެކަކަށްވެސް އެއްތަނުން އަނެއް ތަނަކަށް ނުދެވުނެވެ. އެކަމަކު އިސްރާއީލުގެ މީހުން ތިބި ހިސާބުގައި އަލިކަން ހުއްޓެވެ.
24 އެންމެފަހުން ފިރުޢައުނު މޫސާގެފާނު ގެންނަވައިފިއެވެ. ފިރުޢައުނު ވިދާޅުވިއެވެ. ”ކަލޭމެން ދޭ މާތްރަސްކަލާނގެއަށް އަޅުކަން ކުރަން. އެކަމަކު ކަލޭމެންގެ ޖަނަވާރުތައް ބައިތިއްބާފައި ދޭ. ކަލޭމެންގެ އަނބި ދަރިން ގެންދިޔަކަސް ހެޔޮ.“
25 ”ނޫން!“ މޫސާގެފާނު ވިދާޅުވިއެވެ. ”އަޅުގަނޑުމެންގެ އިލާހު، މާތްރަސްކަލާނގެއަށް ޤުރުބާނީ އަންދައި ވެދުން ކުރާނެ ޖަނަވާރުތައް ދެއްވަން ޖެހޭނެ.
26 އަޅުގަނޑުމެންގެ ހުރިހާ ޖަނަވާރުތަކެއް ގެންދާނަން. އެންމެ އެއްޗެއްވެސް ބަހައްޓާފައެއް ނުދާނަން. އަޅުގަނޑުމެންގެ އިލާހު، މާތްރަސްކަލާނގެއަށް ޤުރުބާން ކުރާނެ ޖަނަވާރެއް ޚިޔާރު ކުރާނީ އެ އެއްޗެހިތަކުގެ ތެރޭން. އެތަނަށް ދެވުމުގެ ކުރިއަކުން އަޅުގަނޑުމެންގެ އިލާހު، މާތްރަސްކަލާނގެއަށް އަޅުކަން ކުރަން ކަތިލާނެ ޖަނަވާރެއް ނޭނގޭނެ.“
27 އެކަމަކު މާތްރަސްކަލާނގެ ފިރުޢައުނުގެ ހިތް ހަރު ކުރައްވައިފިއެވެ. އެހެންވެ އޭނާ އެމީހުން ދިޔަކަ ނުދެއްވިއެވެ.
28 ”މިތަނުން ދާން އުޅޭ!“ ފިރުޢައުނު ހަޅޭއްފުޅު ލައްވައިގެންފިއެވެ. ”ޚަބަރުދާރު! ދެން މީގެ ފަހުން ކަލޭ މިތަނަށް އައިސްގެން ނުވާނެ! ކަލޭގެ މޫނު ދެން މަށަށް ފެންނަ ދުވަހަކީ ކަލޭ މަރާލާނެ ދުވަސް!“
29 ”އެންމެ ރަނގަޅު.“ މޫސާގެފާނު ދެންނެވިއެވެ. ”އަޅުގަނޑު މަނިކުފާނުގެ މޫނުފުޅުދެކޭކަށް ދެނެއް ނާންނާނަން.“