6
Noah
Genesis 6.9-22
9-10 Dhuwaṉḏja dhäwu Noahwalaŋuwuy. Noah-w gäthu'mirriŋu ḻurrkun', yäku dhuwalawurr gam', Shem, Ham ga Japheth. Noah-wnydja ŋula nhä gämurru djarrpi' bäyŋu; ŋayi pi waŋgany gan nhinan ŋamakurrnydja yolŋu, ga bäyŋun ganha wiripuwurrnydja ŋamakurr yolŋu walal nhinanha dhiyal munatha'ŋur. Maṉḏa gan lakaranhaminany God ga Noah bala-räli'yunminany, dhunupa ga baḻanydjarratjarra, ŋula nhämiriw.
11 Wiripuwurrnydja yolŋu walal gan walŋa nhinan yätjkurr maŋutjiŋur Godkal, ga bunhamirrnydja rom ga ŋoy-ŋapuny' walalaŋgalnydja gan ŋorran yan bawalamirriwal yolŋuwal walalaŋgal.
12 Ga Godthuny nhäŋal wäŋanhany, bala ŋayi nhäŋalnha yätjkurrunhany, bili walal gan yolŋuny walal walŋany nhinan yätjkurr yan.
13 Bala ŋayi Godtja bitjarrnha waŋan Noahwalnydja, “Bilin dhuwal ŋarrapiny ḻiya-ŋamaŋamayunminan bay, buwayakkunharawnha, ŋarra dhu buwayakkuman warrpam'thunna yolŋunhany walalany wäŋa-manapanna. Ŋarra walalany dhu buwayakkuman dhawar'maraman, bili dhiyaŋiyi ga bunhamirriy romdhu wäŋanhany miḏikuman.
14 “Gatjuy dhuḻ'yurra nhuŋuwuy nhe mar-thaŋay'nhany manymakthun yan dharpaynydja, ga djäman mungurrnydja malany. ga bidi'yurr minyay marthaŋay'nhany djinawa ga warraŋul.
15 Djäma nhe dhu mirithirr weyin nambany 450, ga djakany 75, ga 45-tja mirithirr garrwar.
16 Djäma bukuny, ga yaka gunguŋ galiny'. Bala'palany ŋorranhawuynydja djäma ḻurrkun', yurr mirithirra weyinkurrnha, waŋganydja ŋoylil, ga waŋganydja gaṉḏarrlil, ga waŋganydja garrwarlilnha. Ga dhurrwarany djäma gali'lila.
17 Ŋarrany dhu dhuwal buku-ḻupmaraman warrpam'thunna dhuwaṉḏja munatha'nhany wäŋany, buwayakkuman ŋarra dhu dhuwaṉḏja ŋunhi ŋula nhä mala ga walŋa nhina. Ŋula nhä mala dhu dhiyal munatha'ŋur dhiŋgaman warrpam'thunna,
18 yurr ŋarra dhu dhuwal romdja nhirrpanna bay nhokalnha bunanhaminyawuynydja litjalaŋ. Gatjuy gärrin walal marthaŋay'lila, nhepi ga nhuŋu miyalk ga djamarrkuḻi nhuŋu ga miyalkkurruwurr walalaŋ.
19-20 Gäŋun walalany nhokiyingalnha nhe marthaŋaylil warrakan'nhany malaŋuny; yurr waŋga'waŋganynha miyalktja märraŋ warrakan'nhany ga waŋga'-waŋganydhi yan dirramunhany warrakan'nha märraŋ. Nhä dhuwali ga barrkuwatj mala warrakan nhina, marrtjinyamirr ga buṯthunamirr; nhe dhu wapmaraman walalany, märr walal dhu ga nhina walŋa.
21 Märraŋ nhä malany ŋatha barrkuwatj nhumalaŋguwuy nhuma yolŋuw, ga warrakan'ku malaŋuw.” Ga bitjarr ŋayi gan Godthu waŋanany Noah-ny.
22 Bala gan Noah-ny malthurra ŋuriki bili yan dhärukkuny ŋunhi nhä mala ŋayi gan lakaraŋal nhanukal Godthu.