8
Buwayakkunhaŋurnydja gapu nyimdhurra (The End of the Flood)
Genesis 8.1,6-12,15-19
1 Godthu Noahnhany bäyŋu monha, ga ŋunhi warrakan'nha malaŋuny ŋunhi walal gan malthurr nhanŋu marthaŋayyu: ŋayiny djäma wäŋi galkirrinya-maraŋal. bala gapuny ŋurru-yirr'yurra nyimdhurra marrtjin.
6 Dhäŋur 40 walu djuḻkthurr, bala ŋayi Noah-ynydja windany ḻapmaraŋalnha
7 bala ŋayi djuy'yurrnha warrakan'nhan yäkuny ravennha, balanyaranhan rumbalnha nhakun wäknha, yurr ŋunhiyi warrakan'tja yaka roŋiyinya, ŋuliwitjarra banydjin gan gapukurra yan buṯthurr, wirwiryurra gan yan ga yan bili ga wäŋa baŋdanydhin.
8 Ga ŋuriŋiyi bili yan waluy Noah-y djuy'yurr murryilnhan, ŋuriki gapuw nhänharaw nhaltjarra ŋunhi gapuny, baṉḏanydhinan, mak badak yan gan ŋapa-ŋäkirrin wäŋanhany gapuynydja.
9 Yurr gapuynydja gan badak yan ŋapa-dhurrthurryurr wäŋanhany, yurr bäyŋu ŋula murryilyu wäŋanhany maḻŋ'maranha nhinanharaw-nydja. Bala ŋayi roŋiyinan buṯthurr marthaŋaylila, bala Noah-ynydja ŋanya märraŋalnha marthaŋaylila.
10 Ga yänayi Noah-ny galkurr 7 munha, ga buluyi ŋayi djuy'yurr ŋunhiyi linygu murryilnha.
11 Ga walu-gärrinyaraynha bala ŋayi murryilnydja gumurr-roŋiyinan, yurr dhä-man'tjarrmirra, ga yäkuny ŋunhi dharpany olive. Bala Noah-ny marŋgithinan ŋunhi gapuny warrpam'nha banḏanydhin.
12 Ga bulu ŋayi Noah galkurr 7 munha, ga buluyi nhakun ŋayi djuy'yurryi ŋunhiyi bili warrakan'nha murryilnha, ga ŋuriŋiyiny waluy ŋayi ŋunhiyi warrakan yakan roŋiyinya.
15 Bala Godtja waŋanan Noahwal bitjarrnha,
16 “Gatjuy dhawaṯthurra walal marthaŋayŋurnydja, nhepi ga miyalk nhuŋu ga djamarrkuli nhuŋu ga nhokalaŋaw djamarrkuḻiw' miyalkkurruwurr.
17 Gäŋun dhuwali warrakan'nhan malaŋuny marrtjinyamirriny ga buṯthunamirriny, märr walal dhu mala-buman ḻatjuwarr'maraman wäŋalila malaŋulil.”
18 Bala walal dhawayawaṯthurra Noah ga nhanŋu miyalk ga djamarrkuḻi nhanŋu ga djamarrkuḻiw' nhanukalaŋaw miyalkkurruwurr.
19 Bala gan ŋunhi warrakan'tja mala dhawa'ṯthurra buṯthunamirrnydja ga marrtjinya-mirrnydja, yurr malakurra malakurra walal gan marrtjinany.
Noah-y gurrupar warrakan bathanawuy Godku mundhurr (Noah Offers a Sacrifice)
Genesis 8.20-22
20 Noah-y dhuḻ'yurr guŋda warrakan'ku mundhurrwu bathanaraw, Garraywu gurrupanaraw. Ga wiripuny mala warrakan buṯthunamirr ga marrtjinyamirr garrkuḻuk Godkal maŋutjiŋur gurrupanaraw mundhurrwu, ga wiripuny mala warrakan bäyŋu garrkuḻuk bathanaraw, Godku gurrupanaraw mundhurrwu. Ga Noah-ynydja gan bumar ŋunhi nhä malany waŋga'waŋgany warrakan barrkuwatj garrkuḻuk, ga waŋgapunuŋalnydja ŋayi gan dhorru yan mundhurrnydja Godkuny gurrupanaraw. Ŋayi gan batharnydja ŋunhiliyi gundaŋur buku-weyinŋur.
21 Bala ŋayi Godthu nhumarnha ŋunhiyi warrakan'tja buŋgan, bala ŋayi goŋmirriyinan Garraynydja, ga waŋanhamin ŋanyapinya ŋayi bitjanmin, “Yakan ŋarra dhu bitjaṉḏhi buluny nyerawunum yätjkurruw maḻŋ'thunaraw dhiyakuny munatbawny'tja yolŋuwalnydja walalaŋgal yätjkurru-ŋur. Ŋarrany marŋgi nhanŋu yolŋuwnydja; beŋur waluŋur yutaŋur nhanŋu guyaŋanhawuynydja djarrpi' yan. Yakan ŋarra dhu buluny buwayakkum ŋunhi nhä malany ga nhina dhiyaŋ bala walŋa, nhakun dhiyaŋ bala waluy ŋarra buwayakkuŋal.
22 Dhipuŋurnydja dhurrwaraŋur ga yan bili ga dhä-dhawar'yunamirriy, wäŋany dhu ga dhuwal dhärran yan, ga ŋunhiyi dhu ga maḻŋ'thunna waluny mala dhunupan ŋathaw ḻämu-nhirrpanaraw ga gulkthuna-raw. Ga bitjanna bfli dhu ga guyiŋarryirra ga gorrmur'yirra, waltjaṉmirriyirra ga dharratharra-mirriyirra, walupuy ga munhawu.”