Baluwa jhubhele jha
Petile
Ulongolelo
Baluwa jhubhele jha Petile ilonge ijhandikwe na ntenga Petile, nambo akachomi twe bha ngohe bhajheketela jhe gheniya. Pange iwecha kubhehe mundo jhonge akanyandikile Petile baluwa jhenje. Jwajhandika ilonge jwenio akamwene Yecho kwa miho ghake patamita pannema pano achwa Yecho paghalambwika kumiho jhake, mu chula 1:17-18. Anda Petile ndi jwajhandika baluwa jhenje ibhonekana ajhandika pakibha ku Loma pakate jha muchaka cha makome nhwano ade makome chita na ticha kubhoke mu kubhelukwa kwa Yecho Kilichitu kabula Petile nakuwejhe. Kabhele Petile haikema baluwa jhenje, baluwa jhake jha ubhele, mu chula jha 3:1. Mana jhake ikajhandikwe badala jha baluwa jha kutumbula. Akaitehi baluwa jhenje imanyikane kwa bhando bhoha bhibhannyeketii Kilichitu.
Chikinkangita Petile kujhandika baluwa jhenje kwaleke mwojho bhibhannyeketii Kilichitu bhatame maha na kwakelebhuya bhakoto kukengama akabhola bhuwange, mu chula jha 2. Bhangajhokanikiya bhando bhibhalonge Yecho abhii na kiyoto kubhujha. Nambo bhannyokanikiya kubhehe Chapanga akwetejhe kiyoto nambo apala kila mundo aghombokoke, mu chula jha 3:8-9. Naha ndi chibhapala bhando bhatame kwa kunhalilalicha Chapanga, mu chula jha 3:14.
Ghughabhii mukitabo
Petile ikichimulila jwenio kwa akachomi bhake, mu chula jha 1:1-2.
Kabhele abhakombochela bhando bhatame kwa kunhalalicha Chapanga nhwalo Chapanga atutei tutame yenio, mu chula jha 1:3-21.
Kubhoke peniya kwakelebhuha bhando bhabha miho na akabhola bhuwange na ilonge ipakwakolela akabhola bhuwange puupakupehekela nnema, mu chula jha 2:1-22.
Kabhele Petile ijhomolela kwaleke mwojho bhoha bhibhannyeketii Kilichitu bhatame kwa kunhalalicha Chapanga na kukilenganikiya kubhujha kabhele kwa Yecho Kilichitu, mu chula jha 3:1-17.
1
1 Ne Simone Petile, natumiche na ntenga jwa Kilichitu.
Ninyandikila mangota mukwete kihobholelo chambone hake ngita chitukwete twenga kwa ndela jha Chapanga na Nkombola Yecho Kilichitu.
2 Ninnyopelangana umbone na uteeke twe mu kummanya Chapanga na Yecho Bhambo gwito.
Nkemitwe na kuhaghulilwa na Chapanga
3 Kwa uhotolo gwake gwa kichapanga, Chapanga atupii ilebhe yoha itupala tutame kunhobholela kwa kummanya jwenio ndi jwatukemite tubhehe pamo mu ng'alicho na umbone gwake jwenio.
4 Kwa ndela jhene atupii lilaghano likolongwa na lyambone, ndi yatulaghila na kubhoke mu hupo yenie tuijhepe njwe tama mbajha ibhii mu nnema na kulombana na luhomo lwake lwa kichapanga.
5 Kwa nhwalo gwenio, nkangamale hake kwa kila ndela kujhonjekeya kihobholelo chino kwa umbone: Na umbone gwino nnyonjekeye kumanya;
6 mu kumanya kwino kujhonjekehe kukilongocha na kulongocha kwino nnyonjekehe luhimba na mu luhimba lwino nnyonjekeya kunnyinamii Chapanga;
7 na mu kinyinamila Chapanga nnyonjekeya upalo gwa kilongo na muupalo gwa kilongo nnyonjekeya upalo kwa bhando bhoha.
8 Anda mmi na ulombo gwenio ghoha gwamahele, naintenda kubhehe nkangamale na kujhambulila mu kumanya Bhambo gwito Yecho Kilichitu.
9 Nambo mundo anda akwete jhe na chipwa jhenie, umanya atochikine miho ahoto jhe kulola kutale na alibhalile kubhehe ajhelewilwe uhakaho gwake gwa makacho.
10 Kwa yenio akalongo bhango, nkangamale hake kukemwa na kuhaghulilwa kwino na Chapanga, kubhehe kilebhe chakutamikii ughome gwino. Anda ntamingine yenie nagwengane ng'o mu kihobholelo chino.
11 Kwa kuhenga yenio napokelelwa maha hake kujhingii muunahota nkolongwa gwa machiko ghoha ghangapeta gwa Bhambo na Nkomboche gwito Yecho Kilichitu.
12 Yene nanyendelela kunkombochela machiko ghoha ilebhe yenio, pamo na kubhehe mwiimanye na nkwimingine mu uchakaka ghumpokiline.
13 Ne mwene kilebhe chamaha, kunnekela mwojho na kunkombochela ilebhe henge kwa kipinde choha namela pannema.
14 Manyite kubhehe mandikii kuwe na kwileka yegha jhenje, anda Bhambo gwito Yecho Kilichitu chanongilila hotuhotu.
15 Yene mbaha ngangamale mbapa kuwegha ntole kughakombokela mambu ghanga machiko ghoha.
Tuwene ung'alicho gwa Yecho
16 Kipinde putummolita mangota malobhe gha makakala na kuhika kwake Bhambo gwito Yecho Kilichitu, tukakengimii jhe homo itungitwa na bhando bhibhakalamwike nambo twenga tukauwene ung'alicho gwa unahota nkolongwa gwake kwa miho ghito tabhete.
17 Nhwalo twenga tukibha pampila gheniya Chapanga Tate na ichima na ung'alicho. Lilobhe pilijhokanikika kubhoka kwa jwenio jwabhii na Ung'alicho Nkolongwa kulonge: “Jhonjo ndi Mwanango jhunimpahile, jwahanganichwe nako.”
18 Kabhele twe twabhete ngatujhoina lilobhe lyenio kubhoka kunane kwa Chapanga patakibha pamo na jwenio panane jha kitombe cha nyahinyahi.
19 Kabhele lilobhe lya akalondole bha Chapanga libhii na uchakaka hake mu malobhe gha akalondole bha Chapanga kubhehe, mihenga maha anda mulikamwii maha na kulihenge lihengo, nhwalo lilobhe lyenio lilandana ngita kolobohi jhilangala palubhendo ade lichiko lela pupakuchegha na lulanga lwa lundondwa lwa lukela pulupakung'ala mu miojho jhino.
20 Kupeta kwa gheniya, mipalwa kumanya naha, abhii jhe mundo jwahoto kulonge ulondole ghubhii mu Majhandiko gha Chapanga ngita chapala.
21 Nhwalo ghabhii jhe malobhe gha ulondole ghighatendika kwa kupala mundo, nambo bhando ngabhapiita ulondole kubhoka kwa Chapanga kone bhalongwichwa na Uhuke gwa Chapanga.