4
1 Ninaghalikii palonge jha Chapanga na palonge jha Kilichitu Yecho jwapakwahadabuu bhando bhubhabhii ghome na bhubhawile, nhwalo ihika kulongocha abhii Munahota Nkolongwa.
2 Mwatangachila bhando lilobhe lya Chapanga, mpanganike kutangacha kwa kipinde chambone amu kipinde chambone jhe na mwapwatalila na mwakelebhuwe na kwaleke bhando mwojho makabhola kukuhimbilila kwoha.
3 Nalihika lichiko bhando nabhajhokonikiya jhe mabholo gha uchakaka, nambo nabhakengama chibhakipala bhene na kukipalakiya akabhola twe nabhalongolela ghala ghighapala kujhoha mu machikilo ghabhe.
4 Nabhakana kujhokanikiya uchakaka, nabhaighalambukila omo yuwange.
5 Nambo mwenga mukichunge mu kila kilebhe, nhimbalila malagho nhwenge lihengo lya kwatangachii bhando Lilobhe lya Mbone na nnenganikiya maha lihengo lino.
6 Nhwalo nenga mmii pahina na kupiwa ngita litambiko lya kujhakana na kipinde chango chukuwe kibhandikile.
7 Ngomine ngondo maha, nnyomwii mwanja gwango na kihobholelo nikikamulii njelembo.
8 Ngohe nilende kupata ndweko jha kubhehe naumbone palonge jha Chapanga. Bhambo jwahadabula chiipalwa nambela ndweko jhene lichiko lyenie, ne tujhe nambo bhala bhoha bhibhalole kwa kilolo kubhujha kwake.
Pauli innaghii Timocheyo
9 Nkangamale kuhika kwa ne kajhombe.
10 Nhwalo Dema apahi ilebhe ya pannema pano nganekita nu kujhenda ku Tesolonike, ku Kelesike ajhahwii ku Galatiya na Titu ajhahwii ku Dalematiya.
11 Luka tugha ndi jwabhii pamba pamo na nenga. Muntole Maluku uhike nako pamba, kwa nhwalo nahotola kundangatila mu lihengo lyango.
12 Tikiko nintumite ku kilambo chuku Epecho.
13 Pampala kuhika ung'eghela likote lyango linekita kwa Kipulo ku kilambo chuku Tiloya, helahela unnetela itabo, achwa hela itengenichwe kwa limbendela.
14 Jhola punde kuyana Alekichanda andendi ghanganandela twe, Bhambo nannepa kwa ghala ghandendile.
15 Na mwe mukichunge na jwenio nhwalo akakanite lilobhe lito.
16 Pundumbwila kukengelela akibha jhe mundo jwajhemite upande gwango, bhoha ngabhanekita. Chapanga akoto kwabhalangila ulemo gwenio!
17 Nambo Bhambo ngatamita pamonga na nenga, ngambila makakala, ade nganhotwila kwatangachila bhando bhoha, kwa bhando bha ilambo henge bhajhohe, kabhele ngangombolilwa mu luhadabulo lwa kuwe ngita kunkombola munnomo gwa lihimba.
18 Bhambo nang'ombola na ghanganandela ghoha na kumbeleka njelembo ade munahota nkolongwa gwake jwa kunane kwa Chapanga. Ung'alicho ubhaha kwa jwenio kwa machiko ghoha ghangapeta! Amina.
Nyambuchilo jha kujhomolela
19 Majhambuche Pilichila na Akula, pamonga na bhando bhubhabhii ukajha kwa Onesifolo.
20 Elasito ngahighalika ku Kolintu, na jwenio Tilofimo nganinekita ku Mileto, nhwalo atehila kulwalwa.
21 Nnyombihane kuhika kabula jha kipepo kinahika jhe.
Ebulo na Pude na Lino na Kilaudiyo na akalongo bhange bhibhannyeketii Kilichitu bhinnyambucha.
22 Bhambo atame na mwenga.
Ninnyope mabhoha umbone gwa Chapanga.