3
Kutama kwa kunkengama Kilichitu
1 Mwakombocha bhando bhakitembekeya kwa ilongoche na bhando bhibhabhii na ukindendeke, kwajhokanikiya na kulenganikiya kuhenga ghambone.
2 Mwalongolela bhangang'wenya jhe mundo jhojhoha, nambo bhatama kwa uteeke na kupalana, bhawachila bhando bhange na bhabhaha bhanuu kwa bhando bhoha.
3 Nhwalo makacho twenga tukibha jhe na malango, bhina lighoho na twanganandela. Tukibha akabhanda bha tama mbajha na kupala kila kilebhe. Tutamita mubhoho na wiho na bhando ngabhatuchimwita na twabhete helahela ngatuchimwina.
4 Nambo umbone na upalo gwa Chapanga, Nkomboche gwito puyekulilwa kwito,
5 ngatughombwila twenga chi kwa kilebhe chambone chituteila, nambo nhwalo akatukolii kiya. Kwa ndela jha Uhuke gwa Chapanga jwatutenda tubhelekwe uhyono na kutupe ughome nhyono kwa kutugholola kwa mache.
6 Chapanga ngatupila Uhuke gwa Chapanga lombilombi kwa ndela jha Yecho Kilichitu, Nkomboche gwito,
7 kupala kwa umbone gwake tujheketilwe palonge jha Chapanga kubhehe twaumbone kwa kutupeke ughome gwa machiko ghoha ghangapeta ghutuhobholela.
8 Kilebhe chinilongela ndi uchakaka.
Mbala nnongele kilebhe chenje kwa makakala bhala bhibhahobholela Chapanga bhabha na kilolo machiko ghoha kuhenga ghambone. Ilebhe yenio maha na ghatangatii bhando.
9 Nambo mibhambale mitaho jha undindilima na omo ya mahina gha akahoko kutaungana kwa nhwalo gwa Lilaghalikilo. Ilebhe yenio kibhii jhe chukujhambulila na kitangatii jhe mundo.
10 Mundo jwaileta mpechengano mukelebhuwa patumbula na mala jhuubhele, na kubhoke peniya muneke.
11 Umanye kubhehe mundo ngita jwenio atei kubhoghanwa na uhakaho gwake ulangii abhii na malemo.
Malaghilo gha kujhomolela
12 Pinituma kwino mwenga Atemii amu Tikiko, nkachane kuhika kwa nenga kongo ku kilambo cha Nikapole, nhwalo amwii kutama kwenio machiko gha kipupwe.
13 Nghaghe kuntangatila Zena mundo jwalimanyii lilaghalikilo na Apolu kupala bhahotolo kutumbula mwanja gwabhe na nnole kila kilebhe bhakwete.
14 Bhando bhito bhipalwa bhakibhole kila kipinde kuhenga ghambone kupala kwatangatii bhando bhibhapalwa kutangatilwa, na kutama kwino kukoto kubhonekana kwanganandela.
15 Bhando bhoha bhibhabhii pamo na nenga bhinyambucha. Mwajhambuche bhando bhibhannyeketii Yecho.
Mabhoha ninnyope umbone gwa Chapanga.