11
Pɑpɛɛlɩ ɑtɛ nɑ ɩsɔ kutuluɣu ɑnɑɑm ŋmɑʋ
1 Wɑɑtʋ ɩnɩ ɩ tɑɑ yǝlɑɑ tǝnɑ yɔɣɔtɑɣɑ nsǝmlɛ kʋlʋmtǝlɛ.
2 Ɩlɛnɑ pɑ́ lɩɩ ilim tǝlɩɩlɛ tɔɔ nɑ pɑ́ tɑlɑ Pɑpiloni tɛtɛkǝlɛ sɔsɔɔlɛ tɑɑ nɑ pɑ́ siki tǝnɑ.
3 Mpʋɣʋlɛ pɑ heelɑ tǝmɑ sɩ: Ɩ́ kɔɔ nɑ tǝ́ loo pilikinɑɑ nɑ tǝ́ wɔ-wɛɣɛ kɔkɔ. Ɩlɛnɑ pɑ́ lɑnɑ pilikinɑɑ kɛ pɛɛ lonte nɑ pɑ́ lɑnɑ kɑɑloo kɛ́ somtu lonte.
4 Nɑ pɑ́ tɑsɑ yɔɣɔtʋɣʋ sɩ: Ɩ́ kɔɔ nɑ tǝ́ ŋmɑ́ ɑtɛ nɑ ɩsɔ kutuluɣu ɑnɑɑm nɑ kʋ́ yoosinɑ ɩsɔtɔnʋɣʋ nɑ tɑ́ hǝtɛ yɑɑ. Ɩlɛ tǝ kɑɑ tɑsɑ yɑʋ kɛ yem kɛ́ tɛtʋ tǝnɑ tɑɑ.
5 Mpʋɣʋlɛ Tɑcɑɑ tiiwɑ sɩ ɩ nɑɑkɩ ɩcɑtɛ nɑ ɑtɛ nɑ ɩsɔ kutuluɣu ŋku yǝlɑɑ piyɑ ŋmɑwɑ tɔ.
6 Ɩlɛnɑ Tɑcɑɑ tɔ́ sɩ: Ɩ́ nɑwɑ, pɑ tǝnɑ ɩsǝntɔ pɑ kɛ́ yǝlɑɑ kʋlʋmɑɑ kɛ́, nɑ pɑ kɑɑ nsǝmlɛ kʋlʋmtǝlɛ. Pɑ cɑɑlʋɣʋ ɩsǝntɔ tɔ pʋlʋpʋ kɑɑ kɑɣɑtɩ-wɛɣɛ mpi pɑɑ hɔkɔ sɩ pɑ lɑkɩ tɔ pǝ tɑɑ.
7 Ɩlɛ mɑɑ tii nɑ mɑ liɣiti pɑ nsǝmlɛ nɑ pɑ́ tɑɑ nɩɩkɩ tǝmɑ kʋyɔɣɔtʋtʋ.
8 Ntɛnɑ Tɑcɑɑ yɑsɩ-wɛɣɛ ɑntulinyɑ tǝnɑ tɑɑ nɑ pɑ́ yele pɑ ɩcɑtɛ ŋmɑʋ.
9 Mpʋ pǝ yelinɑ nɑ pɑ́ hɑ ɩcɑtɛ ntɛɣɛ hǝtɛ sɩ Pɑpɛɛlɩ. Mpi tɔ, tǝnɑɣɑ Tɑcɑɑ liɣitɑ yǝlɑɑ nsǝmlɛ, nɑ ɩ́ yɑsɩ-wɛɣɛ ɑntulinyɑ tǝnɑ tɑɑ.
Sem lʋlʋɣʋ nyǝ́mɑ
10 Sem lʋlʋɣʋ nyǝ́mɑ hǝlɑ ntɔ cǝnɛ. Ɩ lʋlʋɣʋ pɩɩsɩ nɩɩnʋwɑ (100) nyǝŋkɑ tɑɑ, lʋm wɑɑsʋɣʋ wɑɑlɩ pǝnɑɣɑ nɑɑlɛ nyǝŋkɑ tɑɑ kɛ́ ɩ lʋlɑ Alǝpɑsɑtɩ.
11 Alǝpɑsɑtɩ lʋlʋɣʋ wɑɑlɩ ɩ tɔɣɔ pɩɩsɩ nɑsǝlɛ nɑ nɩɩnʋwɑ (500) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
12 Alǝpɑsɑtɩ pɩɩsɩ lɑpɑ hiu nɑ nɑɑnʋwɑ nɑ kɑkpɑsɩ ɩlɛnɑ ɩ́ lʋlɩ Selɑ.
13 Selɑ lʋlʋɣʋ wɑɑlɩ ɩ tɔɣɔ pɩɩsɩ nɑsǝlɛ nɑ tooso (403) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
14 Selɑ pɩɩsɩ lɑpɑ hiu nɑ nɑɑnʋwɑ ɩlɛnɑ ɩ́ lʋlɩ Ɩpɛɛ.
15 Ɩpɛɛ lʋlʋɣʋ wɑɑlɩ ɩ tɔɣɔ pɩɩsɩ nɑsǝlɛ nɑ tooso (403) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
16 Ɩpɛɛ pɩɩsɩ lɑpɑ hiu nɑ nɑɑnʋwɑ nɑ liɣiti ɩlɛnɑ ɩ́ lʋlɩ Pelɛkɩ.
17 Pelɛkɩ lʋlʋɣʋ wɑɑlɩ Ɩpɛɛ tɔɣɔ pɩɩsɩ nɑsǝlɛ nɑ hiu nɑ nɑɑnʋwɑ (430) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
18 Pelɛkɩ pɩɩsɩ lɑpɑ hiu nɑ nɑɑnʋwɑ kɛ́ ɩlɛnɑ ɩ́ lʋlɩ Leu.
19 Leu lʋlʋɣʋ wɑɑlɩ ɩ tɔɣɔ pɩɩsɩ pɔɣɔlɑɣɑfɛɩ ŋmʋnʋɣʋ nɑ nɑɑnʋwɑ (209) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
20 Leu pɩɩsɩ lɑpɑ hiu nɑ nɑɑnʋwɑ nɑ nɑɑlɛ kɛ́ ɩlɛnɑ ɩ́ lʋlɩ Selu.
21 Selu lʋlʋɣʋ wɑɑlɩ Leu tɔɣɔ pɩɩsɩ ŋmʋnʋɣʋ nɑ nɑɑtosompɔɣɔlɑɣɑ (207) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
22 Selu pɩɩsɩ lɑpɑ hiu nɑ nɑɑnʋwɑ ɩlɛnɑ ɩ́ lʋlɩ Nɑhoo.
23 Nɑhoo lʋlʋɣʋ wɑɑlɩ ɩ tɔɣɔ pɩɩsɩ ŋmʋnʋɣʋ (200) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
24 Nɑhoo pɩɩsɩ lɑpɑ pɔɣɔlɑɣɑfɛɩ hiu nɑ nɑɑnʋwɑ kɛ́ ɩlɛnɑ ɩ́ lʋlɩ Telɑ.
25 Telɑ lʋlʋɣʋ wɑɑlɩ Nɑhoo tɔɣɔ pɩɩsɩ pɔɣɔlɑɣɑfɛɩ nɩɩnʋwɑ nɑ hiu (119) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.
26 Telɑ pɩɩsɩ lɑpɑ nɩɩtoso nɑ nɑɑnʋwɑ kɛ́ ɩlɛnɑ ɩ́ lʋlɩ Apǝlɑm nɑ Nɑhoo nɑ Hɑlɑŋ.
27 Telɑ lʋlʋɣʋ nyǝ́mɑ hǝlɑ ntɔ cǝnɛ. Ɩ lʋlɑ Apǝlɑm, nɑ Nɑhoo, nɑ Hɑlɑŋ. Ɩlɛnɑ Hɑlɑŋ nɑ́ɑ́ lʋlɩ Lɔɔtɩ.
28 Amɑ Hɑlɑŋ nɑ́ sǝpɑ Uu ɩcɑtɛ tɑɑ timpi pɑ lʋlɑ-ɩ tɔɣɔ Pɑpiloni tɛtʋ tɑɑ nɑ ɩ cɑɑ Telɑ tɑ sǝtɑ.
29 Ɩlɛnɑ Apǝlɑm nɑ́ɑ́ kpɑɣɑ Sɑlɑɩ, nɑ Nɑhoo nɑ́ɑ́ kpɑɣɑ Ɩsikɑ cɑɑ Hɑlɑŋ pɛɛlɔ Milikɑ.
30 Sɑlɑɩ ɩ́lɛ́ ɩ́ kɑ kɛ́ kɑɑlʋlɑɣɑ kɛ́ ɩ fɛɩ pǝyɑɣɑ.
31 Ḿpʋ́ɣʋ́ Telɑ kpɑɣɑ ɩ pǝyɑlʋ Apǝlɑm nɑ ɩ sɑɑlɩ Lɔɔtɩ nɑ ɩ poolu Sɑlɑɩ nɑ pɑ́ lɩɩ Uu kɛ Pɑpiloni sɩ pɑ puki Kɑnɑɑŋ tɛtʋ tɑɑ. Pɑ tɑlɑ Hɑlɑŋ ɩcɑtɛ tɑɑ ɩlɛnɑ pɑ́ cɑɣɑ tǝnɑ.
32 Telɑ pɩɩsɩ tǝnɑ yoosɑ ŋmʋnʋɣʋ nɑ kɑkpɑsɩ (205) ɩlɛnɑ ɩ́ sɩ́ tǝnɑ.
APƎLAHAM TƆM