8
1 Ɩsɔ tɑ́ sɔɔ Nowee nɑ wontunɑɑ mpɑ pɑɑ wɛ ɩ kiŋ kɛ ɑtɑkɑɑ pɔɣɔlʋɣʋ tɑɑ tɔ pɑ tɔɔ. Ɩlɛnɑ ɩ́ yele nɑ heelim mɑ́ nɑ lʋm nyɔɔ.
2 Nɑ ɑtɛ sɛɛlɑɑ tǝkɩ nɑ ɩsɔtɔnʋɣʋ nyɑlɑ nɑ tɛʋ fɛɛ kʋ tɑ tɑsɑ nɩɩʋ.
3 Ɩlɛnɑ lʋm nyɔɔ tɛtʋ tɔɔ. Kʋyɛɛŋ nɩɩnʋwɑ nɑ nɩɩlɛ nɑ nɑɑnʋwɑ (150) tɑɑ kɛ́ lʋm cɑɑlɑ pɑsʋɣʋ.
4 Ḿpʋ́ɣʋ́ ɑtɑkɑɑ pɔɣɔlʋɣʋ polɑɑ nɑ kʋ́ cɑɣɑ Alɑlɑɑ pʋɣʋ nyʋɣʋ tɑɑ kɛ́ ɩsɔtʋ nɑɑtosompɔɣɔlɑɣɑ nyǝŋ kʋyɛɛŋ nɑɑnʋwɑ nɑ nɑɑtosompɔɣɔlɑɣɑ nyǝŋkʋ wule.
5 Nɑ lʋm pɑsǝɣɩ mpʋ, hɑlǝnɑ ɩsɔtʋ nɑɑnʋwɑ nyǝŋ kʋyɑkʋ kɑncɑɑlɑɣɑ nyǝŋkʋ wule nte pǝ nyɩɩ pɔɔŋ nyɔɔŋ tɔ.
6 Kʋyɛɛŋ nɩɩlɛ tɛɛwɑ ɩlɛnɑ Nowee tʋlɩ ɑtɑkɑɑ pɔɣɔlʋɣʋ pǝtote
7 nɑ ɩ́ lǝsɩ kɑtǝkɑtʋɣʋ nɑ kʋ́ cɔɔkɩ ɩsɔtɑɑ kɛ́ yem, hɑlǝnɑ lʋm nyɔɔ tɛtʋ tɔɔ.
8 Ɩlɛnɑ ɩ́ lǝsɩ ɑlukuku sɩ ɩ nɑɑ sɩ lʋm pɑsɑ tɛtʋ tɔɔ yɑ́ɑ́ ɩsǝnɑ.
9 Amɑ ɑlukuku lɑŋɑ timpi ɩ́ tɩɩ sopi sopuɣu mɑɣɑmɑɣɑ tɔ, ɩlɛnɑ ɩ́ mǝlǝnɑ Nowee tɔɔ. Mpi tɔ, lʋm kɑ́ wɑɑsɑ tɛtʋ tǝnɑ tɔɔ kɛ́. Nɑ Nowee siisi nɑ ɩ́ kpɑ ɑlukuku nɑ ɩ́ mǝlǝnɑ-ɩ ɩ kiŋ.
10 Nowee tɑsɑ tɑŋʋɣʋ tɔtɔɣɔ kʋyɛɛŋ nɑɑtosompɔɣɔlɑɣɑ ɩlɛnɑ ɩ́ lǝsɩ ɑlukuku kɛ tɔm nɑɑlɛ nyǝm.
11 Tɑɑnɑɣɑ tɑɑnɑɑ ɩlɛnɑ ɩ́lɛ́ ɩ mǝlǝnɑ Nowee tɔɔ nɑ tʋɣʋ hɑtʋ kʋnɛɣɛtǝtʋ tʋʋnɑ ɩ nɔɣɔ. Tǝnɑɣɑlɛ Nowee cɛkǝnɑɑ sɩ lʋm pɑsɑ tɛtʋ tɔɔ.
12 Nowee tɑsɑ tɑŋʋɣʋ kɛ kʋyɛɛŋ nɑɑtosompɔɣɔlɑɣɑ tɔtɔ, ɩlɛnɑ ɩ́ tɑsɑ ɑlukuku kɛ lǝsʋɣʋ kɛ tɔm tooso nyǝm. Amɑ ɑlukuku tɑ tɑsɑ mǝlʋɣʋ.
13 Pǝnɑɣɑ nɑsǝtoso nɑ kʋlʋmɑɣɑ nyǝŋkɑ ɩsɔtʋ kɑncɑɑlɑɣɑ nyǝŋ kʋyɑkʋ kɑncɑɑlɑɣɑ nyǝŋkʋ kɛ lʋm nyɔɔwɑ tɛtʋ tɔɔ. Nowee kɔɔlɑ ɑtɑkɑɑ pɔɣɔlʋɣʋ lɔpʋtʋ ɩlɛnɑ ɩ́ nɑ́ sɩ tɛtʋ wʋlɑɑ.
14 Ɩsɔtʋ nɑɑlɛ nyǝŋ kʋyɑkʋ hiu wule kɛ tɛtʋ tɔɔ wʋlɑɑ tǝwɑɣɑwɑɣɑ.
15 Mpʋɣʋlɛ Ɩsɔ tɔmɑ Nowee sɩ:
16 Nyɑnɑ nyɑ́ ɑlʋ nɑ nyɑ́ pǝyɑlɑɑ nɑ nyɑ́ poolɑɑ ɩ́ lɩɩ ɑtɑkɑɑ pɔɣɔlʋɣʋ tɑɑ.
17 Nɑ ń kpɛnnɑ wontunɑɑ ntɩ tǝ tǝnɑ. Pǝ kpɑɣɑʋ tɔlɑ nɑ sumɑsɩ nɑ ɑtɛ nyɑmɑnyɑmɑnɑɑ tǝnɑ tɔ, tǝ́ lʋlɩ nɑ tǝ́ huki nɑ tǝ́ yɑ́ tɛtʋ tɔɔ.
18-19 Ɩlɛnɑ Nowee-wɛ nɑ wontu tǝnɑ pɑ́ lɩɩ ɑtɑkɑɑ pɔɣɔlʋɣʋ tɑɑ.
20 Ḿpʋ́ɣʋ́ Nowee ŋmɑ́ Tɑcɑɑ kɛ kɔtɑɣɑ tǝlɑtɛ, ɩlɛnɑ ɩ́ lǝsɩ wontu tǝnɑ nti tǝ mʋnɑ kɔtɑɣɑ lɑpʋ tɔ nɑ sumɑsɩ nsi sɩ mʋnɑ kɔtɑɣɑ lɑpʋ tɔ sɩ tǝnɑ sɩ tɑɑ kɛ́ kʋlʋm kʋlʋm ɩsɩɩ tǝ piitimnɑɑ wɛɛ tɔ nɑ ɩ́ lɑ́ Tɑcɑɑ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ.
21 Tɑcɑɑ nɩɩ kɔtɑɣɑ ŋkɛ kɑ sɔɔsʋŋ nɑ ɩ lɑŋlɛ hɛɛ nɑ ɩ́ tɔ́ sɩ: Mɑ kɑɑ tɑsɑ tɛtʋ kɛ mpusi tǝŋsʋɣʋ kɛ yʋlʋ ɩsɑɣɑtʋ tɔɔ ɩsɩɩ mɑɑ lɑpʋ tɔ, nɑ mɑ kɑɑ tɑsɑ weesuɣu nyǝm tǝnɑɣɑ wɑkǝlʋɣʋ. Mpi tɔ, yʋlʋ lǝmɑɣɑsǝlɛ kɛ́ ɩsɑɣɑlɛ kɛ hɑtoo ɩ hɔɔʋ tɛɛ kɛ́.
22 Tuutu nɑ kʋmtʋ, wɑtʋ nɑ hɑŋɑɣɑ, lʋŋlɛ nɑ yolumɑ,
ilim nɑ ɑhoo pǝ kɑɑ yele lɑpʋ hɑlǝnɑ ɑntulinyɑ polo nɑ ɩ́ kʋlɩ.