11
Sofɑɑ nyǝntʋ
1 Ḿpʋ́ɣʋ́ Nɑɑmɑ tʋ Sofɑɑ cɔwɑ Soopu sɩ:
2 Nyɑ́ yɔɣɔtɑɣɑ kɛkɛkɛ tɔɔ, pǝ wɛɛ sɩ mɑ́ cɔ.
Pǝ tɑɣɑ yɔɣɔtɑɣɑ nyǝm kɛ yʋlʋ tɔm teekinɑ.
3 Nyɑ́ nɔɔleleŋ ɩɩ tǝkǝɣɩ yǝlɑɑ nɔɔsɩ.
N kɑɑ pǝsɩ ń woŋ nɔɣɔlʋ nɑ pɑ́ tɑ́ tʋ-ŋ fɛɛlɛ.
4 Hɑlɩ n tɩɩ yɔɣɔtɑɑ sɩ nyɑ́ tɔm tewɑ,
sɩ n tɑ wɑkǝlǝnɑ Ɩsɔ.
5 Hɑɩ, ye ɩsɩɩ Ɩsɔ kɑ kulɑɣɑɑ
nɔɣɔ nɑ ɩ́ tɩɩ yɔɣɔtɩ.
6 Hɑlɩ ɩ kɑ hʋlɑ-ŋ ɩ nyǝmtʋ tete.
Tǝ tɛɛ yʋlʋ lɑɣɑtʋ tɔɔ.
Tǝnɑɣɑ n kɑ nɑwɑ sɩ Ɩsɔ ɩɩ
pɔɔsǝɣɩ nyɑ́ ɩsɑɣɑtʋ tǝnɑ tɔɔ.
7 N pǝsǝɣɩ nɑ ń mɑɣɑsɩ Ɩsɔ lotu tɑɑ tɔm
nɑ ń cɛkǝnɑ Tomɑ tǝnɑ tʋ ɩnɩ ɩ sɔsɔɔntʋ nɑ?
8 Tǝ kǝlɑ ɩsɔtɔnʋɣʋ kɛ kʋŋkʋlʋmǝŋ.
Yʋlʋ kɑɑ keesi tǝ tǝnɑɣɑ,
tǝ tɛɛ ɑtɛtǝlɛ kɛ lumɑŋ.
Yʋlʋ kɑɑ cɛkǝnɑ tǝ tɔm kɛ sɔsɔm.
9 Ɩsɔ sɔsɔɔntʋ ntɩ tǝ kǝlɑ tɛtʋ
kɛ tɔɔʋ, nɑ tǝ́ kǝlɩ teŋku kɛ́ wɑŋ.
10 Ye Ɩsɔ kpɑ tɑsǝkǝlɛ tʋ
yɑɑ ɩ yɑɑ-ɩ nɔnɔɣɔ, ɑwe kpesiɣinɑ?
11 Pǝ tɑɣɑ pʋlʋ, Ɩsɔ nyǝmɑ́ yʋlʋyemnɑɑ kɛ́.
Pǝyele pǝ fɛɩ-ɩ kɑtɛ sɩ ɩ́ nɑ́ pɑ kɑwɑlɑɣɑ.
12 Mpi lǝmɑɣɑsɛɛ fɛɩ tʋ kɑ́ hiiki lɑɣɑtʋ tɔ,
tɑɑlɛ kpɑŋɑɣɑ lʋlɑ tǝyɑɣɑ nyǝŋkɑ.
13 Amɑ pǝ kɑɑsʋɣʋ Soopu nyɑ́ tɔ,
kɛɛsǝnɑ Ɩsɔ tɔɔ, nɑ ń tɛɣɛ-ɩ niŋ.
14 Hɑtǝlǝnɑ mpi pǝ tɑ siɣisi tɔ.
Tɑɑ yele nɑ ɩsɑɣɑtʋ wɛɛ nyɑ́ tǝyɑɣɑ tɑɑ.
15 Wɑɑtʋ ɩnǝɣɩ n kɑ́ tɔŋ nɑ ń kʋsɑ nyʋɣʋ.
Pʋlʋpʋ kɑɑ kɛɛ-ŋ, yɑɑ pǝ́ lɑ-ŋ sɔɣɔntʋ.
16 Ɩlɛnɑ ń sɔɔ nyɑ́ wɑhɑlɑ tɔɔ, ɩsɩɩ lʋm kpemnɑ.
17 Wɑɑtʋ ɩnǝɣɩ nyɑ́ weesuɣu kʋyɛɛŋ
kɑ́ wɛɛ tǝcɛɩcɛɩ, ɩsɩɩ ilim sikuɣu.
Nɑ nyɑ́ sǝkpɛtʋɣʋ cɛ́ ɩsɩɩ pǝ nyɑɑlʋɣʋ tɔ.
18 Ɩlɛnɑ ń cɑɣɑnɑ nyɑ́ tɩ nɑ ń tɛɛlǝɣɩ tɔtɔ.
N kɑɑ wɛɛnɑ fɛɛlɛ nɑtǝlɩ, nɑ ń tooki teu.
19 Nɔɣɔlʋ kɑɑ wɑkǝlɩ nyɑ́ tom.
Hɑlɩ yǝlɑɑ pɑɣɑlɛ kɑ́ pɛɛkɩ sɩ ń sǝnɑ-wɛ.
20 Amɑ ɑsɑɣɑɑ ɩsɛ kɑ́ nyǝŋ kɛ́.
Pɑ hɛɛsʋɣʋ kɑ́ sɩɩ tǝnɑɣɑ, nɑ pɑ́ tɑŋɑ sǝm tike.