16
Soopu nyǝntʋ
1 Ḿpʋ́ɣʋ́ Soopu cɔwɑ sɩ:
2 Tɑm kɛ́ mɑ nɩɩkɩ tɔmnɑɑ pɑnɛwɛ.
Mǝ tǝnɑ ɩ́ kɛ́ lɑŋɑ hɛɛsǝlɑɑ
mpɑ pɑ kɔŋnɑ wɑhɑlɑ tɔɣɔ.
3 Pǝlee kɛ́ tɔm kpɛtɛ
nyǝntʋ ntɩ tɩɩ sɩɩ tǝnɑɣɑ?
Pepe tɔɔ kɛ́ pɑ́ɑ́nɑ́ sitɑ nyɑ́ kʋcɔcɔtʋ tɑɑ?
4 Ye mɑɑ wɛnnɑ ɩsɩɩ mɛ,
mɑ pǝsǝɣɩ mɑ́ yɔɣɔtɩ mpʋ tɔtɔɣɔ, hɑlɩ pǝ́ tɛɛ mpʋ.
Mǝ tɔm lɑpɑ-m pǝtɔɔtǝlɛ, nɑ mɑ́ kpɛɛtɩ nyʋɣʋ.
5 Hɑlɩ mɑɑ kpɑɑsɑ mǝ ɑpɑlʋtʋ,
nɑ mɑ kʋyɔɣɔtʋtʋ nɑ pǝ́ hɛɛsɩ mǝ lɑŋɑ.
6 Pɑɑ mɑɑ yɔɣɔtɩ yɑɑ mɑ sumɑ,
mɑ wɑhɑlɑnɑɑ kɑɑ sɩɩ tǝnɑɣɑ, yɑɑ pɑ́ tɩɩ pɑsʋ.
7 Hɑɩ Ɩsɔ, tɔʋ,
nɔɔnɔɔ n yɔkɑ mɑ tomɑ nɑ ń kpiisi mɑ tǝyɑɣɑ tǝnɑ.
8 Mɑ cɔlɔ nyǝ́mɑ cɑɑlǝɣɩ-m kɛ́.
Nɑ wei ɩ yɑsǝɣɩ mɑ ɩsɑɣɑtʋ tɔ,
ɩ́ pǝsɩ mɑ ɑseetɑ tʋ nɑ ɩ́ kʋlǝɣɩ mɑ tɔɔ,
nɑ ɩ́ kɑlǝɣǝnɑ-m mɑ ɩsɛntɑɑ.
9 Mɑ kolontu cɩɩlǝɣɩ-m ɩsɛ, nɑ ɩ́ kpɑsǝɣɩ mpee,
nɑ ɩ́ tiiki mɑ tɔɔ nɑ pɑ́ɑ́nɑ́, nɑ ɩ́ cǝlǝɣɩ-m.
10 Yǝlɑɑ hɑɑwɑ nɔɔsɩ tǝcɑɑɑ, nɑ mɑ tɔɔ,
nɑ pɑ́ tʋʋkɩ-m nɑ pɑ́ mɑkɩ mɑ lǝkpɑɑsɩ.
Pɑ pɛɛlɑ nɔɣɔ kɛ mɑ tɔɔ.
11 Ɩsɔ tʋ-m kʋtɑkɛɛsǝŋ kɛ́
nɑ ɩ́ pɛtɩ-m ɑsɑɣɑɑ niŋ tɑɑ.
12 Mɑɑ wɛ hɛɛsʋɣʋ tɑɑ kɛ́ nɑ ń pǝsɩ mɑ lɑŋlɛ.
N kpɑ mɑ lumɑɣɑ kɛ́ nɑ ń pɛlɩ-m,
nɑ ń kɛɛsǝɣǝnɑ-m nɑ ń tɔɔkɩ nyɑ́ nyǝmɑ́.
13 Nyɑ́ nyǝmɑ́ ɑnɩ ɑ tɑmɑ-m kotɑɣɑ kɛ́
nɑ ɑ́ tʋlɩ mɑ lotu nɑ pǝtɔɔtǝlɛ fɛɩ,
hɑlɩ mɑ kɑncǝlɑɣɑ kpe ɑtɛ.
14 A tiiki mɑ tɔɔ kɛ́ ɩsɩɩ
yoolu nɑ ɑ́ tʋlǝɣɩ-m pɔɔŋ.
15 Mɑ suu fɔlǝtɔ tɑkɑnɑɑ mpɑ pɑ kɛ́ lǝyɑɣɑ wontu tɔɣɔ,
nɑ mɑ́ pilimiɣi ɑtɛ.
16 Wulɑ sɛɛsɑ mɑ ɩsɛ kɛ́ nɑ ɑ́ mʋlɩ,
nɑ ɑtɛtǝlɛ sǝkpɛtʋɣʋ tɑkɩ mɑ ɩsǝhutu tɔɔ.
17 Anɩ mɑ tɑ lɑ mʋsʋŋ,
pǝ́cɔ́ mɑ tɑ sǝlǝmǝnɑ mǝnɑɑfikitʋ.
18 Hɑɩ, tɛtʋ, tɑɑ pi-m.
Yele nɑ mɑ kɑkiisɑɣɑ nɩɩkɩ tɑm.
19 Pǝ kpɑɣɑʋ nɔɔnɔɔ tɔ,
ɩsɔtɔnʋɣʋ tɑɑ kɛ́ mɑ ɑseetɑ tʋ wɛɛ.
Wei ɩ cɔɔkɩ-m tɔ hɑtoo ɩsɔtɑɑ kɛ́ ɩ wɛɛ.
20 Mɑ tɑɑpɑlɑɑ nɑ́ pɑɑkǝnɑ-m kɛ́.
Amɑ Ɩsɔ kɛ́ mɑ tekiɣinɑ ɩsǝlʋm.
21 Mɑ cɑɑ sɩ nɔɣɔlʋ ɩ́ sɛɛnɑ mɑ tɔɔ,
nɑ Ɩsɔ nɑɑkɩ ɩsɩɩ yʋlʋ lɑkʋɣʋ ɩ tɑɑpɑlʋ tɔ.
22 Mpi pǝ tɔɔ tɔ, pɑ kɑlɑ mɑ weesuɣu pɩɩsɩ.
Mɑɑ tǝŋ mpɑɑʋ ŋku nɑ mɑ tɛɛ tɔ, kʋmǝlʋɣʋ fɛɩ.