21
Soopu nyǝntʋ
1 Ḿpʋ́ɣʋ́ Soopu cɔwɑ sɩ:
2 Ɩ́ ke ŋkpɑŋŋ kɛ teu nɑ ɩ́ nɩɩ mɑ tɔm.
Pǝlɛ pǝ hɛɛsǝɣǝnɑ mɑ lɑŋlɛ.
3 Mɑ kpɑ mǝ yule,
ɩ́ yele nɑ mɑ yɔɣɔtɩ.
Ye mɑ tɛmɑ ɩlɛ mǝ pǝsǝɣɩ nɑ ɩ́ woŋi-m.
4 Anɩ pǝ tɑɣɑ yʋlʋ kɛ mɑ wiikinɑ.
Ɩlɛ pepe tɔɔ kɛ́ mɑ suulu kɑɑ tɛ?
5 Ɩ́ nyǝnɩ mɑ tɔm tɑɑ,
pɩɩ lɑ-mɛɣɛ hɑ, nɑ ɩ́ kpɑ nɔɔsɩ.
6 Ye mɑ mɑɣɑmɑɣɑ mɑ hʋʋ mpi pǝ mɑkǝnɑ-m tɔ
pǝ tɔm, mɑ lɑŋlɛ wɑkǝlǝɣɩ kɛ́ nɑ mɑ́ seliɣi.
7 Pepe tɔɔ kɛ́ Ɩsɔ yeki nɑ ɑsɑɣɑɑ wɛnɑ weesuɣu nɑ toŋ,
hɑlǝnɑ pɑ́ kpɑtǝlǝɣɩ?
8 Pɑ lʋlʋɣʋ nyǝ́mɑ sʋʋkɩ toŋ kɛ pɑ kiŋ
nɑ pɑ sɑɑlǝnɑɑ pɩɩkɩ nɑ pɑ́ nɑɑkɩ.
9 Pǝ cɑɣɑnɑ-wɛɣɛ pɑ tɛɛsɩ tɑɑ kɛ́.
Pɑ tɑ nyɩ sɔɣɔntʋ tɔm.
Pǝyele Ɩsɔ ɩɩ mɑkɩ-wɛɣɛ kpɑ́tʋ́ɣʋ́.
10 Pɑ nɑɑŋ wɛnɑ ɑlɑɑfǝyɑ kɛ́,
nɑ ɩ́ kpɑɑkɩ teu nɑ ɩ́ lʋlǝɣɩ ɩɩ hɔlǝsǝɣɩ.
11 Pɑ yeki pɑ piyɑ kɛ́ nɑ sɩ kpɑkǝɣɩ
ɑsewɑ ɩsɩɩ heeŋ, nɑ sɩ ŋmɑɑlǝɣǝnɑ lɑŋhʋlʋmlɛ.
12 Pɑ yooki yontu nɑ ɑkilimɑnɑɑ,
nɑ sɑŋkʋnɑɑ, nɑ hǝsɩ, nɑ pɑ́ nɩɩkɩ leleŋ.
13 Pɑ yɔɔlǝɣɩ ɑtɛ cǝnɛɣɛ mpʋ,
ɩlɛnɑ pɑ́ tii ɑtɛtǝlɛ tɑɑ nɑ hɛɛsʋɣʋ.
14 Pǝ́cɔ́ pɑ tɔŋɑɣɑ Ɩsɔ kɛ́ sɩ ɩ́ tɛɛ ɩ́ kɑɑsɩ-wɛ.
Mpɛ pɑ pɑɑ fɛɩnɑ ɩ luɣu nyǝntʋ kɛ nyǝm.
15 Hɑlǝnɑ pɑ́ tɔŋ sɩ:
Aweɣe Tomɑ tǝnɑ tʋ,
nɑ tɑ́ɑ́ lɑkɩ-ɩ tǝmlɛ?
Ye tǝ yɑɑ-ɩ, pǝ wɑɑsɩ-tʋɣʋ we?
16 Pǝ tɑɣɑ mpɛ pɑ tǝnnɑ pɑ tɩ cɑɣɑnɑʋ tɔm.
Asɑɣɑɑ lǝmɑɣɑsɛɛ ɩɩ kpǝtǝɣǝnɑ Ɩsɔ.
17 Anɩ sǝm ɩɩ tutiɣi-wɛɣɛ tɑm tɑm.
Pǝyele wɑhɑlɑ ɩɩ wɑkǝlǝɣɩ-wɛ.
Pǝ́cɔ́ Ɩsɔ ɩɩ mʋɣɩ-wɛ nɑ pɑ́ɑ́nɑ́.
18 Yǝlɑɑ kooliɣinɑ-wɛɣɛ ɩsɑɣɑtʋ
sɩ heelim ɩ́ kpɑɣɑ-wɛ ɩsɩɩ nyɩɩtʋ yɑɑ mʋsʋɣʋ kpɛtɛ.
19 Ɩsɔ ɩɩ fɛlǝɣɩ ɩsɑɣɑʋ pǝyɑɣɑ kɛ kɑ cɑɑ ɩsɑɣɑtʋ.
Pǝ tɑɣɑ pǝyɑɣɑ ŋkpɑŋʋɣʋ kɛ
Ɩsɔ kɑ́ hɔ nɑ cɛcɛ nɩɩ pǝ tɑɑ.
20 Pǝ wɛɛ kɛ́ sɩ Tomɑ tǝnɑ tʋ ɩ́ mʋ ɑsɑɣɑɑ mpɛ
nɑ pɑ́ɑ́nɑ́ nɑ pɑ́ nɑ́ pɑ wɑkǝlʋɣʋ.
21 Ye pɑ weesiŋ tɛmɑ cǝnɛ,
pɑ piyɑ tɔm ɩɩ tɑsǝɣɩ-wɛɣɛ nɑʋ tɔtɔ.
22 Pɑ kɑɑ nɔkɩ tǝlɛɣɛ Ɩsɔ kɛ hʋlʋɣʋ.
Mpi tɔ, ɩnɩ ɩ hʋʋkǝnnɑ ɩsɔtɑɑ tillɑɑ mɑɣɑmɑɣɑ.
23-24 Nɔɣɔlʋ ɩlɛ, pǝ cɑɣɑnɑ-ɩ kɛ́
nɑ ɩ́ tɔkɩ teu, ɩ fɛɩnɑ nǝɣǝsɛɛ,
ɩɩ kpɑtǝlǝɣɩ lɔŋ,
nɑ ɩ wɛnɑ tɔnʋɣʋ, hɑlǝnɑ ɩ kɑntǝkɑɣɑ kʋyɑkʋ.
25 Amɑ nɔɣɔlʋ nɑ́ sǝkǝnɑ ɩ nɔɣɔ nɑ kɑ nyɑŋ,
ɩ tɑ yɔɔlǝnɑ kʋpɑntʋ nɑtǝlɩ.
26 Pɑ tǝnɑɣɑ mpʋ mʋsʋɣʋ tɑɑ kɛ́ pɑɑ hǝntɩ
nɑ sonsompee wɑɑsɩ pɑ tɔɔ.
27 Amɑ, mɑ nyǝmɑ́ mǝ tɑɑ lɑɣɑtʋ,
nɑ hʋwɛɛ nnɑ ɩ́ hʋʋkɩ mɑ tɔɔ tɔ.
28 Ɩ́ pɔɔsǝɣɩ sɩ toŋtʋnɑɑ
nɑ ɑsɑɣɑɑ mpɛ pɑ tɛɛsɩ wɛ le?
29 Ɩlɛ ɩ́ tɑ́ pɔɔsɩ mpɑtɔntɑɑ
nɑ ɩ́ cɛkǝnɑ mpi pɑ nɑwɑ nɑ pɑ́ yɔɣɔtɩ tɔ?
30 Pǝ kentiɣi ɩsɑɣɑʋ tɔɔ kɛ́ ɑsɑɑlɑ
kʋyɑkʋ kɛ́, nɑ pǝ́ cɔlɔ-ɩ nɑ Ɩsɔ pɑ́ɑ́nɑ́.
31 Awe kɑ́ pɔɔsǝnɑ-m tɔntɛ nte mɑ tɔŋ tɔ tǝ tɔɔ?
Nɑ ɩ́ lɛɛtɩ-m mɑ ɩsɑɣɑtʋ?
32 Pɑɑ ponɑ-ɩ tǝpinte kɛ́,
nɑ pɑ́ feŋiɣi ɩ pǝlɑɑʋ tɔɔ.
33 Yǝlɑɑ tǝnɑ tʋɣʋnɑ cɑŋɑ nɑ pɑ́ tǝŋǝɣɩ
ɩ wɑɑlɩ, nɑ pɑ́ kooliɣi-ɩ sɩ: Tɛtʋ ɩ́ lɑ-ŋ kɑɑfɑlɑ.
34 Mɛ ɩlɛ, tɔm kpɑɩ nyǝntʋ kɛ ɩ́ hɛɛsǝɣǝnɑ mɑ lɑŋlɛ.
Mǝ kʋcɔcɔtʋ tǝnɑ kɛ́ kʋtʋsʋtʋ kɛ́.