28
Lǝmɑɣɑsɛɛ kɛ́ Ɩsɔ kʋcɔɔʋ
1 Tǝ́ nyǝmɑ́ liɣitee nyǝɣǝtʋ tǝhulle,
nɑ timpi pɑ nyɑɑlǝɣɩ wʋlɑ tɔ.
2 Tɛtʋ tɛɛ kɛ́ pɑ́ lǝsǝɣɩ nyǝɣǝlʋɣʋ.
Ɩlɛnɑ pɑ́ lǝsɩ kʋsɛɛmʋɣʋ kɛ pǝlɛ tɑɑ.
3 Nyǝɣǝtʋ hullɑɑ pukinɑ fǝtǝlɑ kɛ́
nɑ pɑ́ pɛɛkɩ timpi timpi kǝlɑ
lumɑŋ tɔɣɔ pɛɛ wenɑ ɑ ŋmɛlɑ ɑtɛtǝlɛ tɑɑ tɔ.
4 Pɑ huliɣi pʋ́ʋ́ɣʋ́ kɛ́ nɑ pɑ́ hɑtǝlǝnɑ yǝlɑɑ tǝcɑɣɑlɛ.
Nɔɔhɛɛ kpisiɣi sǝnɑʋ,
ɩlɛnɑ pǝ́ susi-wɛɣɛ yem tɑɑ, nɑ pǝ́ fiisiɣi-wɛ.
5 Tɛtʋ nti tǝ tɔɔ pɑ hɑlǝɣɩ tɔɣɔnɑɣɑ tɔ
pǝ cɑɣɑ kɛ́ ɩsɩɩ kɔkɔ pǝsɑ-tǝɣɩ kpɛntǝlɑsɩ
kɛ tǝ kite tɛɛ.
6 Timpi tɛtʋ ntɩ tǝ pɛɛ wɛɛ tɔɣɔ pɑ hikiɣi
liɣitee pǝlɛ nte tǝ wɛ pooku tǝlɛ tɔ, nɑ wʋlɑ mʋlʋm.
7 Cɔ́lɔ́ʋ tɑ nyɩ pʋ́ʋ́ɣʋ́ ŋkʋ kʋ mpɑɑʋ.
Pǝyele yepeleku tɑ́ loosi-kʋ́.
8 Tɑɑlɛ wontuɣu ɑkɑ nɔɣɔlʋ,
yɑɑ tɔɣɔlɑɣɑ tɑ tǝŋtɑ-kʋ.
9 Yʋlʋ pɑɑsi tʋnɑ kʋkpɑmʋɣʋ kɛ niŋ,
hɑlǝnɑ ɩ́ kpɛsǝɣɩ pɔɔŋ nɑ ɩ kilɑ tɛɛ,
nɑ ɩ́ pǝsǝɣɩ-ɩ kpɛntǝlɑsɩ.
10 Nɑ ɩ́ huliɣi kʋkpɑmʋɣʋ tɑɑ kɛ́ pɔɔŋ,
nɑ ɩ́ nɑɑkɩ kʋ tɑɑ kʋpɑmpɑm nɑ ɩ ɩsǝpǝle.
11 Nɑ ɩ́ tɔɔkɩ lʋm tǝkpentenɑɑ kɛ́ ɑkɔlɑ,
nɑ ɩ́ pukinɑ mpi pǝ ŋmɛlɑɑ tɔɣɔ nyɑɑlǝm tɑɑ.
12 Ɩlɛ leɣe lǝmɑɣɑsɛɛ nɑ́ wɛɛ?
Nyǝm tǝcɑɣɑlɛ kɛ le?
13 Yʋlʋ nɑ́ tɑ́ nyɩ pǝ teu.
Pǝyele pǝ tɩɩ fɛɩ yǝlɑɑ tɛtʋ tɑɑ.
14 Pʋ́ʋ́ɣʋ́ ɑnɑɑm sɩ: Lǝmɑɣɑsɛɛ fɛɩ mɑ tɑɑ.
Teŋku sɩ: Lǝmɑɣɑsɛɛ fɛɩ mɑ cɔlɔ.
15 Pɑɑ yɑkɩ-yɛ nɑ wʋlɑ yɑɑ liɣitee.
16 Pǝyele pɑɑ lɑɣɑsǝɣǝnɑ-yɛ
nɑ Ofii tɛtʋ wʋlɑ, yɑɑ liɣitee pɛɛ
kʋkpɛɛtɛɛ nɑ pooku nyǝnɑ.
17 Pɑ kɑɑ kɛɛsǝnɑ-yɛ nɑ kpɑlǝpɑ yɑɑ wʋlɑ.
Pǝyele pɑ kɑɑ pǝsɩ nɑ pɑ́ lɑɣɑsɩ-yɛ
nɑ wʋlɑ kʋpɑmpɑŋ hǝyɑɣɑ.
18 Pɑɑ kɛɛsǝɣǝnɑ lǝmɑɣɑsɛɛ kɛ
pɔɣɔlɑsɩ, yɑɑ kpɑlǝpɑ nyininyini.
A kǝlɑ teu kɛ lɩɩtʋ pee nnɑ ɑ wɛ liɣitee tɔ.
19 Ɩtiyopii liɣitee pǝlɛ nte tǝ wɛ
Kɑsɑsɑŋɑ tɔ tǝ tɑ hɑŋnɑ-yɛ.
Pǝyele wʋlɑ kʋpɑmpɑŋ mɑɣɑmɑɣɑ ɩɩ kɛɛsǝɣǝnɑ-yɛ.
20 Ɩlɛ leɣe lǝmɑɣɑsɛɛ nɑ́ lɩɩkǝnɑ?
Yɑɑ nyǝm tǝcɑɣɑlɛ kɛ le?
21 Lǝmɑɣɑsɛɛ ŋmɛlɑ weesuɣu nyǝm tǝnɑɣɑ,
sumɑsɩ ɩɩ loosiɣi-yɛ.
22 Sǝm nɑ pʋ́ʋ́ɣʋ́ sɔsɔɔŋkʋ pɑ tɔŋ sɩ:
Tǝ nɩɩ pɑ yɔɣɔtǝɣɩ ɑ tɔm kɛ kʋnɩɩ kɛ́.
23 Ɩsɔ tike nyǝmnɑ ɑ mpɑɑʋ nɑ ɑ tǝcɑɣɑlɛ.
24 Mpi tɔ, ɩ nɑɑkɩ kɛ́ nɑ pǝ́ tɑlɑ tɛtʋ tǝnɑɣɑ.
Pǝyele ɩ cɛkǝnɑ pǝ tǝnɑ mpi pǝ wɛɛ tɔ.
25 Wɑɑtʋ wei ɩ tʋwɑ heelim kɛ
toŋ, nɑ ɩ́ pɩɩ teŋku tǝnɑsɩ tɔ.
26 Ɩ sɩɩ tɛʋ kɛ kʋ wɑɑtʋnɑɑ nɑ kʋ lonɑ,
nɑ ɩ́ hɛɛ mpɑɑʋ kɛ tɛʋ nyǝɣǝsʋɣʋ nɑ kʋ cɑlɑnɑɑ.
27 Wɑɑtʋ ɩnǝɣɩ ɩ nɑwɑ lǝmɑɣɑsɛɛ nɑ ɩ́ mɑɣɑsɩ-yɛ,
nɑ ɩ́ sɩɩ ɑ kite nɑ ɩ́ sɑ-yɛ.
28 Tǝnɑɣɑ ɩ sɩɩwɑ yǝlɑɑ sɩ:
Lǝmɑɣɑsɛɛ ntɛ́ Tɑcɑɑ Ɩsɔ nyɑmnɑʋ,
nɑ ɩsɑɣɑtʋ yepu ntɛ́ nyǝm.