30
Soopu tɔm kɑntǝkɑɣɑ nyǝntʋ tɔtɔ
1 Ḿpʋ́ɣʋ́ Soopu tɑsɑɑ sɩ:
Amɑ nɔɔnɔɔ ɩlɛ,
piyɑ woŋiɣinɑ-m.
Pɑɑ nyɑŋnɑ mɑ kpɑtǝlɑɣɑ.
Pǝyele pɑ cɑɑnɑɑ tɑɑ tɑlɑ sɩ,
mɑ́ tʋ-wɛɣɛ hɑsɩ nsi sɩ feŋiɣi mɑ kɑlǝkǝŋ tɔ sɩ tɑɑ.
2 Pepeɣe pɑ toŋ wɑɑsǝɣɩ?
Anɩ pɑ kɑɑ tɩɩ pǝsɩ nɑ pɑ́ kpɑtǝlɩ.
3 Nyɔɣɔsɩ, nɑ lɑŋʋɣʋ pɩɩ-wɛ,
nɑ pɑ́ tɛ tɑɑsɩ, nɑ pɑ́ seeki lonɑ nnɑ pǝ kpiisɑ
too lɔŋ nɑ ɑ wʋlɑɑ tɔ, ɑ tɑɑ.
4 Pɑ kpɛsǝɣɩ tuusi hɑtʋ kɛ hotisi kilɑ.
Pɑ tɔɣɔnɑɣɑ ntɛ́ pɑ tɛ tiikɑsɩ nɑsǝlɩ sɩ lilɑ.
5 Pɑ tɔɣɔnǝɣɩ-wɛɣɛ yǝlɑɑ tɑɑ,
nɑ kokoole, ɩsɩɩ ŋmɩɩlɑɑ.
6 Pɑ tǝcɑɣɑlɛ ntɛ́ tɛtɛkɑ sɔsɔɔnɑ kʋtemiŋ tɛɛ,
nɑ pɛɛ tɛɛ, nɑ kʋkpɑmǝŋ pɔɔŋ tɑɑ.
7 Sɔwɑ hotisi tɛɛ kɛ́ pɑ mɑwɑ tǝtim tǝtim,
nɑ yǝlɑɑ nɩɩkɩ pɑ wulɑ.
8 Pɑ kɛ́ tɛtɛlɑtɑɑ, nɑ nyɔɔŋ fɛɩnɑɑ,
nɑ pɑ́ tɔɣɔnǝɣɩ-wɛɣɛ tɛtʋ tɑɑ.
9 Nɔɔnɔɔ mɑɣɑ pɑ cɑkǝnɑ, nɑ pɑ́ yookinɑ-m yontu.
10 Pɑ tɑɑ kpɑɑkǝnɑ-m nɑ pɑ́ hɑɑkɩ-m siɣile,
hɑlɩ pɑ́ tɔɔkɩ-m ntɑɣɑmɑ.
11 Ɩsɔ pɑsɑ-m nɑ ɩ́ mǝŋnɑ-m ɑtɛ.
Ɩlɛnɑ pɑ́ kpisi pɑ tɩ kpɑʋ, nɑ pɑ́ nyǝnǝɣɩ-m yem.
12 Mɑ ntɔɣɔŋ tɔɔ kɛ́ pɑ kʋlǝɣɩ.
Pɑ tʋɣʋ-m kɑtɔsɩ sɩ pɑ́ pɛtɩ-m nɑ pɑ́ pɛɛkǝɣɩ
mpɑɑʋ sɩ pɑ́ hiki-m nɑ pɑ́ wɑkǝlɩ-m.
13 Pɑ tǝkɑ mɑ mpɑɑʋ nɑ pɑ́ lʋkɩ
mɑ wɑkǝlʋɣʋ. Nɔɣɔlʋ ɩɩ sǝŋnɑ-wɛ.
14 Pɑ tɑpɑɣɑ ɩsɩɩ pʋ́ʋ́ɣʋ́ sɔsɔɔʋ kɛ pɑ sʋʋnɑɑ,
nɑ pɑ́ kpɛtǝlǝɣɩ tǝmɑɣɑ tɑmpɑnɑ tɔɔ.
15 Sɔɣɔntʋ kpɑɑkɩ-m kɛ́ nɑ pǝ́ kpiisi
mɑ teeli ɩsɩɩ heelim.
Mɑ nyʋɣʋ yɑpʋ ńɑ sɑlɑɑ, ɩsɩɩ ɩsɔŋmʋntʋ.
16 Nɔɔnɔɔ mɑ weesuɣu cɑɑkɩ lɩɩʋ kɛ́,
mɑ wɛ wɑhɑlɑ kʋyɛɛŋ tɑɑ.
17 Pǝ sɑ́lǝ́ɣɩ́ mɑ mʋwɑ tɑɑ kɛ́,
pɑɑ ɑhoo mɑ́ɑ́ hɛɛsǝɣɩ wʋsɑsɩ.
18 Ɩsɔ kpɑ mɑ toko tɑɑ nɑ tomɑ,
nɑ ɩ lǝlɑ mɑ cɑpɑ luɣu tɛɛ.
19 Ɩ lɔɣɔ-m ɑfǝlɑ tɑɑ.
Mɑ pǝsɑ tɔlʋmɑ nɑ mʋsʋɣʋ.
20 Ɩsɔ mɑ yɑɑkɩ-ŋ, nn sɑŋ cɔʋ.
Pǝyele n sǝŋɑ mɑ kɔŋkɔŋ tɑɑ,
nn tɩɩ nyǝnǝɣɩ-m.
21 N tʋɣɩ-m kʋnyɔŋ nɑ pǝtɔɔtǝlɛ fɛɩ,
n cɔɔsǝɣɩ-m nɑ nyɑ́ toŋ.
22 N yelɑɑ nɑ heelim sɔsɔɔm kpɑɣɑ-m.
N yelɑɑ nɑ mɑ seliɣi kɑcuculɑɣɑ sɔsɑɣɑ tɑɑ.
23 Mɑ nyǝmɑ́ teu sɩ sǝm tɛɣɛ ń pukinɑ-m.
Weesiŋ nyǝ́mɑ tǝpote ntɛ́.
24 Ye yʋlʋ cɑɑkɩ lepu, ɩɩ tɛkǝɣɩ niŋ?
Wei ɩ wɛ wɑhɑlɑ tɑɑ tɔ,
ɩɩ wiiki nɑ ɩ́ yɑɑ sɩ pɑ́ sǝnɑ-ɩ?
25 Mɑ wiikɑɣɑ wɑhɑlɑ nyǝ́mɑ tɔɔ kɛ́,
nɑ mɑ́ wɛnɑ kʋnyɔntʋnɑɑ pǝtɔɔtǝlɛ.
26 Tǝcɑɣɑnɑʋ, nɑ nyɑɑlǝm kɛ mɑɑ tɑŋɑɑ.
Ɩlɛnɑ sǝkpɛtʋɣʋ nɑ wɑhɑlɑ nɑ́ɑ́ mɑɣɑnɑ-m.
27 Wɑhɑlɑ kʋyɛɛŋ tutuɣu-m kɛ́,
nɑ mɑ lɑɑkɑlɩ pǝsǝɣɩ kʋtɑmsɑ.
28 Ye mɑ tɔŋ sǝkpɛtʋɣʋ, nɔɣɔlʋ ɩɩ hɛɛsǝɣɩ mɑ lɑŋlɛ.
Ye mɑ sǝŋɑ sɑmɑɑ tɑɑ wulɑ kɛ́.
29 Mɑ pǝsɑ ɩsɩɩ tɑɑlɛ hɑsɩ tɑɑpɑlʋ kɛ́,
yɑɑ tɑɑtɑɑnɑɑ cɑmnɑ.
30 Mɑ tɔnʋɣʋ piliɣi kɛ́,
nɑ kʋ́ litiɣi. Pǝ sɑ́lǝ́ɣɩ mɑ mʋwɑ tɑɑ, nɑ ɑ́ wʋlǝɣɩ.
31 Mɑ sɑŋkʋ pǝsɑ sǝm nyǝŋ kɛ́,
nɑ mɑ hǝlɑɣɑ nɑ́ɑ́ hʋlǝɣɩ sǝm yontu.