35
Ɩlihu kʋyɔɣɔtʋtʋ tɔtɔ
1 Ḿpʋ́ɣʋ́ Ɩlihu tɑsɑɑ sɩ:
2 Soopu, n pǝsǝɣɩ nɑ ń hɑ nyɑ́ tǝɣɩ tɑmpɑnɑ
nɑ ń yɔɣɔtɩ nyɑ́ siɣisuɣu tɔm kɛ Ɩsɔ kiŋ nɑ sikɑ fɛɩ?
3 Mpi tɔ, n tɑsɑɑ sɩ:
Ye mɑ pǝntɑɑ yɑɑ mɑ tɑ pǝntɩ pepeɣe mɑ wɑɑkɩ?
4 Mɑɑ kpɛntɩ nyɑ́ nɑ nyɑ́ tɑɑpɑlɑɑ nɑ mɑ́ cɔ-mɛ.
5 Nyǝnɩ ɩsɔtɔnʋɣʋ, nɑ ń pɑɑsǝnɑ ɩsɔŋmʋntʋ,
tǝ kǝlɑ-ŋ kʋŋkʋlʋmǝŋ.
6 Ye n lɑpɑ ɩsɑɣɑtʋ, weɣe pǝ wɑkǝlǝɣɩ Ɩsɔ?
Yɑɑ n kʋlɑ ɩ tɔɔ kɛ́ tɔm pɑɣɑlɛ,
pɩɩ tokiɣinɑ ɩ́lɛ́.
7 Ye n tǝŋǝɣɩ tɑmpɑnɑ,
ɩlɛ pepeɣelɛ n hɑwɑ Ɩsɔ?
Yɑɑ weɣe Ɩ́sɔ mʋɣɩ nyɑ́ niŋ tɑɑ?
8 Yʋlʋ ɩsɩɩ nyɑɣɑ ɩsɑɣɑtʋ wɑkǝlǝɣɩ,
nɑ siɣisuɣu wɑɑsɩ nyɑ́ tɔɣɔntǝlɛ.
9 Ye ɩsɩɩ ŋmɑkǝllɑɑ kǝlɑ tɔɔʋ, yǝlɑɑ mɑkɩ kɑpusi kɛ́.
Ye mʋsʋŋtʋnɑɑ kǝlɑ pɑɣɑlɛ,
ɩlɛ yǝlɑɑ yɑɑ sɩ pɑ́ wɑɑsɩ-wɛ.
10 Amɑ pɑ tɑɑ nɔɣɔlʋ ɩɩ pɔɔsǝɣɩ Ɩsɔ wei ɩ lɑpɑ-ɩ,
nɑ ɩ́ tʋɣɩ yǝlɑɑ tɑɑ kɛ́ lɑŋhʋlʋmlɛ yontu
nɑ pɑ́ yooki ɑhoo tɔ sɩ: N wɛ le?
11 Ɩnɩ ɩ sɛɣɛsǝɣǝnɑ-tʋ, nɑ pǝ́ kǝlɩ tɑɑlɛ wontu.
Pǝyele ɩ tɑsǝɣɩ-tʋɣʋ lǝmɑɣɑsɛɛ nɑ pǝ́ kǝlɩ sumɑsɩ.
12 Pɑ yɑɑwɑ Ɩsɔ, nɑ ɩ́ kisi cɔʋ
kɛ ɑsɑɣɑɑ kɑlɑmpɑɑnɩ tɔɔ.
13 Pɔpɔtʋ fɛɩ leleŋ,
pɑ koo yem kɛ́ Ɩsɔ ɩɩ nɩɩkɩ.
Tomɑ tǝnɑ tʋ ɩɩ pɑɑsǝɣǝnɑ.
14 Pɑɑ Soopu n tɔŋ sɩ nn nɩɩkɩ Ɩsɔ tɑŋ tɔ
Ɩsɔ nyǝ́mɑ nyɑ́ tɔm tǝnɑɣɑ, nyɑɑ keŋnɑ-ɩ.
15 Ɩɩ tʋɣɩ sɑlǝkɑ nɑ pɑ́ɑ́nɑ́.
Pǝyele ɩɩ pɑɑsǝɣǝnɑ yǝlɑɑ ɩsɑɣɑtʋ.
Ɩlɛ pǝ tɑɣɑ sɩ ɩɩ nɑɑkɩ.
16 Soopu nyɑ́ nɔɣɔ tɑɑ tɔm wɛ yem kɛ́,
nɑ ń lʋlǝsǝɣɩ tɔm nti tǝ tɑɑ fɛɩ lɑɣɑtʋ tɔ.