38
1 Ḿpʋ́ɣʋ́ Tɑcɑɑ cɔwɑ Soopu kɛ kɑcuculɑɣɑ tɑɑ sɩ:
2 Aweɣelɛ pʋntʋ wei ɩnɩ ɩ kɔŋnɑ sǝkpɛtʋɣʋ
kɛ nti mɑ sɩɩwɑ nɑ mɑ́ lɑkɩ tɔ tǝ tɑɑ,
nɑ tɔmnɑɑ mpɑ pɑ fɛɩnɑ hʋwɛɛ tɔ?
3 Tɔʋ, tɔkɩ nyɑ́ tɩ ɩsɩɩ ɑpɑlʋ.
Mɑɑ pɔɔsɩ-ŋ tɔm nɑ ń cɔ-m.
Ɩsɔ kɛ́ ɑntulinyɑ tɑɑ nyǝm mpi pɩɩ yɔɣɔtǝɣɩ tɔ pǝ tʋ
4 Leɣe n kɑ wɛ wɑɑtʋ wei mɑ sɩɩkɑɣɑ
ɑntulinyɑ kite tɔ.
Ye n nyǝmɑ́ tɑmpɑnɑ n cɔ-m.
5 Awe pɩɩwɑ ɑntulinyɑ ɩnɩ ɩ tǝnɑsɩ?
N nyǝmɑ́ pʋntʋ nɑ?
Yɑɑ ɑwe mɑɣɑsǝnɑ-ɩ nɑ ŋmǝnɑɣɑ?
6 Awe cɑɑlǝnɑ kite tɛɛ pǝlɛ kɛ sɩɩʋ?
Yɑɑ pepe tɔɔ kɛ́ kite ńtɛ́ tǝ sǝŋɑɑ?
7 Wɑɑtʋ ɩnǝɣɩ tɑnɑŋ ɩsɔtʋlʋŋɑsɩ yookɑɣɑ yontu,
nɑ ɩsɔtɑɑ yǝlɑɑ nɑ́ɑ́ wilitiɣinɑ lɑŋhʋlʋmlɛ.
8 Awe tǝkɑ teŋku lʋm nɑ kɑmpʋnɑɑ
kɛ sɑɑ wei pǝ lɩɩ tɛtʋ tɛɛ nɑ pǝ ŋmɑɑ tɔ?
9 Wɑɑtʋ wei mɑ suu-wǝɣɩ ɩsɔŋmʋntʋ kɛ toko,
nɑ mɑ́ tɑkɩ-wǝɣɩ ɩhunte tɔ.
10 Nɑ mɑ́ pɩɩ-wǝɣɩ tǝnɑɣɑ,
nɑ mɑ́ tʋ kʋtǝkʋɣʋ nɑ kʋkɑlǝsʋɣʋ.
11 Nɑ mɑ́ hʋlɩ-wɩ sɩ pǝ́ sǝŋ tǝnɑ, pǝ́ tɑɑ tuusi,
tǝnɑɣɑ pǝ holɑ kɑlɑmpɑɑnɩ kɑ́ sɩɩnɑ.
12 Too n wɛʋ tɔ, n tɛmɑ tɑnɑŋ kɛ ŋmɑkǝlʋɣʋ,
yɑɑ ń hʋlɩ tefemle kɛ tǝ lonte nɑ?
13 Yɑɑ tefemle ńtɛ́ tǝ kpɑ tɛtʋ ntompee
nɑ tǝ́ ciɣiti ɑsɑɣɑɑ kɛ teu nɑ?
14 Ɩlɛnɑ tɛtʋ lɑɣɑsɩ wɛɛtʋ ɩsɩɩ
pɑ yʋsʋɣʋ cʋɣʋ tɔɔ tɔ,
nɑ pǝ tǝnɑ pǝ́ wɛɛ kɑcɔkɑ ɩsɩɩ pʋʋɣʋ tɔɔ?
15 Tefemle nyɑɑlǝm kɔŋ,
ɩlɛnɑ ɑsɑɣɑɑ kʋlɑpʋtʋ fiɣini nɑ pǝ́ pɛlɩ pɑ niŋ.
16 Too tɔ, n tɛmɑ teŋku tɑɑ kɛ́ tiiu
hɑlǝnɑ ń tɑlɑ ɩ sɛɛlɑɑ tɑɑ?
Yɑɑ n cɔɔwɑ ɩ lumɑŋ sɔsɔɔŋ tɑɑ?
17 Pɑ tɛmɑ-ŋ sǝm nɔnɔɔsɩ kɛ hʋlʋɣʋ nɑ?
Yɑɑ n nɑwɑ ɑtɛtǝlɛ nɔnɔɔsɩ?
18 Yɑɑ n tɛmɑ mɑɣɑsʋɣʋ kɛ tɛtʋ wɑŋ tɔm nɑ?
Ye n nyǝmɑ́ pǝ tǝnɑɣɑ mpʋ n kɛɛsɩ-m.
19 N nyǝmɑ́ nyɑɑlǝm tǝcɑɣɑlɛ mpɑɑʋ nɑ?
Nɑ leɣe sǝkpɛtʋɣʋ nɑ́ wɛɛ?
20 N pǝsǝɣɩ nɑ ń ponɑ-wǝɣɩ pǝ lonte tɑɑ.
Yɑɑ ń tɑnɑ-wǝɣɩ timpi pǝ wɛɛ tɔ?
21 N nyǝmɑ́. Mpi tɔ,
wɑɑtʋ ɩnɩ ɩ tɑɑ pɑ tɛmɑ-ŋ lʋlʋɣʋ.
Pǝ́cɔ́ nyɑ́ pɩɩsɩ tɔɔwɑ.
22 N tɛmɑ pote nɑ n nɑ́ tɛʋ tɔmpɛɛ
nɑ ɑ kpɑɑkpɑɑcɑʋ tǝcɑɣɑlɛ nɑ?
23 Lɑŋwɑkǝllɛ wɑɑtʋ, nɑ yoou kʋyɛɛŋ tɔɔ
kɛ́ mɑ sɩɩ-yɛɣɛ mpʋ.
24 N nyǝmɑ́ mpɑɑʋ ŋku nyɑɑlǝm tǝŋǝɣɩ tɔ?
N nyǝmɑ́ timpi tɔɔ ilim tǝlɩɩlɛ
heelim mɑkǝnɑ tɛtʋ tɔɔ tɔ?
25 N nyǝmɑ́ wei ɩ hɛɛwɑ tɛʋ kɛ kʋ mpɑɑʋ tɔ?
Nɑ wei ɩ hɛɛ tɛʋ ŋmɛlǝsʋɣʋ
nɑ kʋ cɑlɑnɑɑ kɛ pɑ nyǝŋkʋ tɔ?
26 N nyǝmɑ́ wei ɩ yeki nɑ tɛʋ nɩɩkɩ
wʋlɑɣɑ tɛtʋ nti tǝ tɑɑ nɔɣɔlʋ fɛɩ tɔ?
Yɑɑ wei ɩ kɔŋnɑ tɛʋ kɛ wʋlɑɣɑ tɛtʋ nti tǝ tɑɑ yǝlɑɑ fɛɩ tɔ?
27 Nɑ wei ɩ yeki nɑ lʋm hɑɣɑ wʋlɑɣɑ tɛtʋ,
nɑ nyɩɩtʋ nɑ kʋnyɔnyɔm mpi pǝ wɛ
tǝlɛkʋlɛkʋ tɔ pǝ́ nyɔ tǝ tɔɔ tɔ?
28 Tɛʋ wɛnɑ cɑɑ kɛ?
Yɑɑ ɑwe lʋlǝɣǝnɑ ɑŋkpǝlɛɛ?
29 Lʋm tɔmpɛɛ*fɑ* yɑɑ cɔlɔʋ nyǝnɑ wɛnɑ too kɛ? nɑ pǝ́ niɣitɑɑ tɔ tɛtʋnɑɑ mpɑ pɑ tɑɑ wɛ wɑtʋ kɛ teu tɔ ɑŋkpǝlɛɛ mɑɣɑmɑɣɑ kiiki ḿpʋ́ɣʋ́.
30 Mpɩ pǝ pǝsǝɣǝnɑ pɔɣɔ lʋm ɩsɩɩ pǝlɛ,
nɑ pǝ́ kii teŋku tɔɔ nyǝm tǝkpɑŋɑsɑŋ.
31 N pǝsǝɣɩ nɑ ń hɔkɔ ɩsɔtʋlʋŋɑsɩ*fɑ*
nsi pɑ yɑɑ sɩ kɑntuɣu nɑ kʋ piyɑ tɔ. Yɑɑ ń hɛtɩ nsi
pɑ yɑɑ sɩ hɑɣɑ nɑ kpɑcɑ nɑ yʋlʋ tɔ.
32 Nyɑ́ lǝsǝɣǝnɑ tʋlʋmɑlʋɣʋ kɛ kʋ wɑɑtʋ?
Yɑɑ n tiikiɣi ɩsɔtʋlʋŋɑsɩ nsi
pɑ yɑɑ sɩ ɩsɔtʋ ɩ́ sɩ nɑ mɑ́ tɔɣɔ tǝyɑɣɑ tɔ?
33 N nyǝmɑ́ kiiŋ wei ɩsɔtɔnʋɣʋ tǝŋǝɣɩ tɔ?
Nɑ ɩsǝnɑ tɛtʋ wɛɛ nɑ pǝ́ tɔŋ tǝ tɑɑ tɔ?
34 Yɑɑ n yɔɣɔtǝɣǝnɑ ɩsɔŋmʋntʋ
nɑ tɛʋ nɩɩ kɑtɑtǝlɑɣɑ nɑ?
35 Nyɑ́ yɑɑkǝnɑ tɛʋ ŋmɛlǝsʋɣʋ
nɑ pǝ́ cɔɔkɩ-ŋ sɩ mpǝɣǝlɔ,
nɑ ń tiliɣi-wɩ?
36 Awe tʋnɑ lǝmɑɣɑsɛɛ kɛ hɑtoo yʋlʋ lotu tɑɑ?
Nɑ ɑwe tʋnɑ lɑɣɑtʋ kɛ lǝmɑɣɑsɛɛ tɑɑ*fɑ*? nɩɩʋ wɛ kɑtɛ kɛ́, lɛlɑɑ nɑ́ hʋʋkɩ sɩ tɔlɑ nɑɑlɛ kɛ pɑ yɔɣɔtǝɣɩ mpʋ. Ɩsɩɩ kɑmpɑɑʋ nɑ Icipiti tɛtʋ tɑɑ sumɑɣɑ ŋkɑ pɑ yɑɑ sɩ ipii tɔ.
37 Awe kɑlǝɣɩ ɩsɔŋmʋntʋ nɑ ɩ lǝmɑɣɑsɛɛ?
Yɑɑ ɩ́ huti ɩsɔtɔnʋɣʋ tɑɑ lʋm huluŋ
38 kɛ wɑɑtʋ wei tɛtʋ kiiwɑ ɩsɩɩ nyǝɣǝlʋɣʋ
nɑ tɑmpɑɣɑ nyɔkǝlǝnɑ tǝmɑ tɔ?
Ɩsɔ kɛlɛ tǝyɑɣɑ wontu nɑ tɑɑlɛ nyǝntʋ pǝ tʋ
39 Nyɑ́ kpɑɑkǝnɑ tɔɣɔlɑɣɑ ɑlʋ nyǝŋkɑ kɛ kɑ tɔɣɔnɑɣɑ,
yɑɑ ń cɑlɩ tɔɣɔlɑsɩ piyɑ, nɑ sɩ́ hɑɣɑ?
40 Wɑɑtʋ wei sɩ sopɑ sɩ lonɑ tɑɑ,
yɑɑ sɩ pɑpɑ nyɩɩtʋ tɛɛ tɔ?
41 Awe cɑlǝɣǝnɑ kɑtǝkɑtǝŋ kɛ wɑɑtʋ wei ɩ piiŋ
lɑŋǝɣɩ tɔɣɔnɑɣɑ nɑ ɩ́ wiikinɑ-m nɑ ɩ́ yɛlǝmǝɣɩ tɔ?