7
Soopu kʋyɔɣɔtʋtʋ tɔtɔ
1 Yʋlʋ wɛɛʋ kɛ ɑtɛ cǝnɛ wɛɛ kɛ́ ɩsɩɩ yoolu.
Ɩlɛnɑ ɩ kʋyɛɛŋ nɑ́ɑ́ wɛ ɩsɩɩ
wei ɩ lɑkɩ tǝmlɛ nɑ pɑ́ fɛlǝɣɩ-ɩ tɔ.
2 Ɩ wɛ teitei kɛ́ ɩsɩɩ yom pɛɛkʋɣʋ ɩsotom sɩ ɩ́ hɛɛsɩ,
yɑɑ tǝmlɛ tʋ kʋnyɔntʋ tɑŋʋɣʋ ɩ kʋfɛlʋɣʋ tɔ.
3 Mpʋ ɩnɩ tɔtɔɣɔ mɑ kpɑncoou ntɛ́ wʋsɑsɩ ɩsɔtʋnɑɑ.
Ahoo wɑhɑlɑ nyǝnɑ kɛ pǝ cɛlɑ-m mɑ pɑɑ tete.
4 Ye mɑ hǝntɑɑ, mɑ pɔɔsǝɣɩ mɑ tǝɣɩ sɩ,
pǝlee kɛ́ mɑɑ kʋlɩ?
Ye pǝ tɑ fe lɔŋ ɩlɛ
hʋwɛɛ kpɑɩ nyǝnɑ cɔɔsǝɣɩ-m kɛ́, hɑlǝnɑ pǝ́ nyɑɑlɩ.
5 Hiŋ tɔlɑsɩ nɑ sonsompee wɑɑsɑ mɑ tǝnɑ.
Mɑ tɔnʋɣʋ yɑ́ pɔɣɔlɛɛ nɑ lʋm kpeŋ.
6 Mɑ weesuɣu ɩɩ lɑɑ tɛm,
ɩsɩɩ sɑɣɑtɑ lʋʋlʋ kpoŋkpoloku.
Ye kʋ kpoŋkpontuɣu ɩ́ tɛmɑ kʋ tǝnɑɣɑ ntɛ́.
7 Hɑɩ, Ɩsɔ tɑɑ sɔɔ sɩ mɑ weesuɣu kɛ́ heelim.
Mɑ ɩsɛ kɑɑ nɑ kʋpɑntʋ tɔtɔ.
8 Ɩsɔ wei ɩ feŋiɣi mɑ tɔɔ tɔ,
pǝ kɑɑsɑ pǝcɔ ɩ kɑɑ tɑsɑ-m nɑʋ.
Mɑɑ sɑɑlɩ yem nɑ ɩ́ pɛɛkɩ-m nɑ ɩ́ wɩɩ.
9 Ɩsɩɩ ɩsɔŋmʋntʋɣʋ yɑɑkʋɣʋ nɑ kʋ sɑɑlɩ yem tɔ.
Ḿpʋ́ɣʋ́ yʋlʋ tiiki ɑtɛtǝlɛ tɑɑ, ɩɩ tɑsǝɣɩ
kpɑʋ.
10 Pǝ́cɔ́ ɩɩ mǝlǝɣɩ ɩ tǝyɑɣɑ tɑɑ.
Ɩlɛ kɛlɛ kɑɑ tɑsǝɣɩ-ɩ nyǝm.
11 Pǝ tɔɔ kɛ́ mɑ kɑɑ su.
Mɑ lɑɑkɑlɩ pǝsɑɑ kɛ́.
Pǝ wɛɛ sɩ mɑ́ yɔɣɔtɩ.
Mɑ lɑŋlɛ kǝlɑ wɑkǝlʋɣʋ,
mɑɑ hʋlɩ-tɛɣɛ.
12 Mɑɣɑ teŋku,
yɑɑ ɩ tɑɑ tʋm sɔsɔ,
nɑ Ɩsɔ ń feŋiɣi mɑ tɔɔ kɛ́ mpʋ?
13 Ye mɑ tɔmɑ sɩ mɑ kɑto kɑ́ hɛɛsɩ mɑ lɑŋlɛ,
nɑ mɑ kʋhǝntʋɣʋ nɑ́ɑ́ kʋ́ mɑ pɑ́ɑ́nɑ́.
14 Ɩlɛ n nyɑɑsɩ-m nɑ toosee ɑsɑɣɛɛ.
N hʋlɑ-m yɑɑsinɑɑ, nɑ sɔɣɔntʋ sɔsɔɔntʋ kpɑ-m.
15 Hɑɩ, ye n kɑ lǝlɑ mɑ luɣu tɛɛ, pɩɩ kǝlɑ-m teu.
Sǝm lɑpɑ-m sɑnɑ, nɑ tɑɑsɩ tɛm kɑtɑtǝlɑɣɑ pǝnɛ.
16 Pǝ nɩɩ-m, mɑ kɑɑ tɩɩ wɛɛ tɑm.
Mɑ weesuɣu tɑ kɛ pʋlʋ, yele-m tǝhɛɛ.
17 Yʋlʋ kɛ́ we nɑ ń tʋɣʋnɑ-ɩ mpʋ pǝ tɑkɑ?
Nɑ ń keŋnɑ-ɩ mpʋ suwe?
18 N cɔɔkɩ ɩ tɔɔ kɛ́ pɑɑ tɑnɑŋ ŋku.
Nɑ ń mɑɣɑsǝɣɩ-ɩ pɑɑ wɑɑtʋ wei?
19 Pǝlee kɛ́ n kɑ́ kʋsɩ nyɑ́ ɩsǝlɛ kɛ mɑ tɔɔ?
Nɑ mɑ tɩɩ lipu ntɑɣɑmǝtɛ mɑɣɑmɑɣɑ?
20 Yǝlɑɑ tɔɔ cɔɔlʋ,
ye mɑ pǝntɑɑ weɣe mɑ wɑkǝlǝnɑ-ŋ?
Pepe tɔɔ kɛ́ n siɣisinɑ mɑ tɔɔ kɛ́ nyɑ́ nyǝmɑ́?
Nɑ mɑ́ pǝsɩ-ŋ ɩsɩɩ sǝɣǝlɑ?
21 Pepe tɔɔ kɛ́ n kɑɑ yele mɑ ɩsɑɣɑtʋ tɔm?
Nɑ ń tɛɛ mɑ kʋpǝntʋɣʋ tɔɔ?
Pǝ tɑɣɑ pʋlʋ,
mɑɑ hǝntɩ nɔɔnɔɔ kɛ́ tɛtʋ tɑɑ.
N kɑ́ pɛɛkɩ-m n kɑɑ nɑ-m.