9
Soopu nyǝntʋ
1 Ḿpʋ́ɣʋ́ Soopu cɔwɑ sɩ:
2 Pɔpɔtʋ fɛɩ leleŋ,
mɑ nyǝmɑ́ teu sɩ ḿpʋ́ɣʋ́ pǝ wɛɛ.
Ɩsǝnɑɣɑ yʋlʋ kɑ́ lɑ nɑ ɩ́ wɛɛ Ɩsɔ kɛ́ teu?
3 Ye n cɑɑkɩ-ɩ nɑ yoou, ɩ pɔɔsɩ-ŋ tɔmnɑɑ iyɑɣɑ.
Amɑ n kɑɑ cɔ pɑɑ kʋlʋmʋɣʋ.
4 Ɩ kɛ́ toŋ tɑɑ toŋ tʋ kɛ́,
nɑ lǝmɑɣɑsɛɛ tǝnɑ tʋ.
Nɔɣɔlʋ kɑɑ kpɑɑsɩ ɩ tǝɣɩ ɩ tɔɔ, nɑ pʋntʋ lɩɩ tǝsoolii.
5 Ɩ́ lɑɣɑsǝɣɩ pɔ́ɔ́ŋ́ kɛ lonɑ kɛ́,
pɔ́ɔ́ŋ́ ɩɩ nyǝŋ.
Nɑ ɩ́ pǝsǝɣɩ-ɩ kpɛntǝlɑsɩ nɑ pɑ́ɑ́nɑ́.
6 Ɩ ciɣitiɣi tɛtʋ kɛ
hɑtoo tǝ kite tɛɛ, nɑ tǝ ɑkelenɑɑ seliɣi.
7 Ye ɩ yɔɣɔtǝnɑ ilim pɩɩ lɩɩkɩ.
Ɩ tɑɑlǝɣɩ ɩsɔtʋlʋŋɑsɩ tɔɔ kɛ́.
8 Ɩ tike ɩ hɛtǝɣǝnɑ ɩsɔtɔnʋɣʋ
nɑ ɩ́ tɔŋ teŋku holɑ tɔɔ.
9 Nɑ ɩ́ lɑ ɩsɔtʋlʋŋɑsɩ nsi tǝ yɑɑkɩ sɩ,
ɩsɔtʋ ɩ́ sɩ nɑ mɑ́ tɔɣɔ tǝyɑɣɑ tɔ,
nɑ hɑɣɑ nɑ kpɑcɑ nɑ yʋlʋ.
Nɑ kɑntuɣu nɑ kʋ piyɑ nɑ lɛnsɩ tɔtɔ*fɑ*. nsi Lǝkpɑ nyǝ́mɑ nyǝmɑ́ tɔ.
10 Ɩ kʋlɑpǝm kɛ sɔsɔɔm kɛ́ pǝ fɛɩ cɛkǝnɑʋ,
pǝ́cɔ́ ɩ piti tǝmɑ fɛɩ kɑlʋɣʋ.
11 Pɑɑ ɩ tɛɛnɑ mɑ cɔlɔ mɑ kɑɑ nɑ-ɩ,
pǝ́cɔ́ mɑ kɑɑ nyɩ ɩ tɛɛʋ.
12 Ye ɩnɩ ɩ kpɑɣɑnɑ ɑweɣelɛ lɛɛkǝlʋ?
Yɑɑ ɑwe kɑ́ tɔnɑ sɩ: Kɑɩ?
13 Ye Ɩsɔ mʋ pɑ́ɑ́nɑ́ ɑ hɛɛsǝlʋ fɛɩ.
Pǝ kpɛŋnɑ teŋku tɑɑ tɔɣɔlʋɣʋ sɔsɔɔʋ
Lɑhɑpɩ*fɑ* nɑ kʋ wɑɑlɩ nyǝ́mɑ tǝnɑɣɑ,
nɑ pɑ́ hǝntǝɣɩ-ɩ ɑtɛ.
14 Nɑ tɔm ntiɣi mɑɑ
cɔ-ɩ yɑɑsi ɩnɛ ɩ tɑɑ?
15 Pɑɑ mɑɑ tɩɩ wɛnɑ tɑmpɑnɑ, mɑɑ cɔɔkɩ.
Pɛɛlɛɛ kɛ pǝ wɛɛ sɩ mɑ́ sǝlǝmɩ mɑ hʋʋnlʋ.
16 Pɑɑ mɑ yɑɑ-ɩ kɛ́ nɑ ɩ́ cɔ-m,
mɑ tɑ sɑ sɩ ɩ nɩɩwɑ mɑ nɔɣɔ.
17 Ɩ heelim sɔsɔɔm pɛtɑ-m ɑtɛ,
nɑ ɩ́ fetili-m hiŋ hiŋ kɛ yem.
18 Ɩ wɑkǝlǝɣɩ mɑ lɑŋlɛ kɛ́.
Ɩɩ yeki-m sɩ mɑ́ feesi.
19 Ye toŋ kɛ mɑ tɛɛlǝɣɩ,
Ɩsɔ kɛlɛ toŋ tʋ.
Yɑɑ mɑ cɑɑ mɑ hʋ́lɩ́ mɑ tɑmpɑnɑ,
ɑwe kɑ́ tɩɩ hɑ-m-yɛ?
20 Pɑɑ mɑɑ wɛɛnɑ tɑmpɑnɑ,
mɑ nɔɣɔ kɑ́ kʋnɑ mɑ tɔm.
Yɑɑ mɑ tewɑ teu, ŋkɛ kɑɑ kʋnɑ-tɩ.
21 Ɩlɛ mɑ tɩɩ tewɑ teu nɑ?
Mɑ mɑɣɑmɑɣɑ mɑ tɑ nyɩ.
Mɑ weesuɣu lɩɩ-m sɔŋ kɛ́.
22 Pǝ tǝnɑ pǝ wɛ-m teitei kɛ́.
Pǝ tɑɣɑ pʋlʋ,
Ɩsɔ kʋɣɩ yʋlʋpɑŋ nɑ ɩsɑɣɑʋ kɛ́.
23 Wɑhɑlɑ ɩ́ kɔmɑ kpɑkpɑɑ, nɑ ɩ́ kʋ́ telɑɑ,
Ɩsɔ nɑ́ woŋiɣi pɑ lɑŋwɑkǝllɛ tǝnɑɣɑ.
24 Ɩsɔ tʋnɑ tɛtʋ kɛ ɩsɑɣɑʋ niŋ tɑɑ.
Ɩlɛnɑ ɩ́ tɑkɩ hʋʋlɑɑ ɩsɛntɔɔ.
Ye pǝ tɑɣɑ ɩnɩ ɑwe kɑ́ lɑnɑ mpʋ?
25 Mɑ pɩɩsɩ tɛɛkɩ lɛʋlɛʋ kɛ́ ɩsɩɩ selu.
Sɩ mʋkɑ yem kɛ́, mɑ tɑ nɩɩ leleŋ.
26 Sɩ tɛɛwɑɣɑ tǝlɩɩɩ, ɩsɩɩ sǝsǝncɑɑsɩ kpɩɩlʋɣʋ,
yɑɑ ɩsɩɩ hɛkǝlɛ tiluɣuu ɩ tɔɣɔnɑɣɑ wɑɑlɩ tɔ.
27 Ye mɑ tʋ́ mɑ tɑɑ sɩ mɑɑ sɔɔ
mɑ tɑɑ pɑ́ɑ́nɑ́ tɔɔ, nɑ mɑ́ yele
lɑŋwɑkǝllɛ nɑ mɑ ɩsɛntɑɑ hɛtɩ,
28 ɩlɛ mɑ lɑŋlɛ cɛkǝnɑ mɑ wɑhɑlɑ tǝnɑɣɑ.
Mɑ nyǝmɑ́ teu sɩ, Ɩsɔ kɑɑ hɑ-m tɑmpɑnɑ.
29 Mɑ tɔm kɑ́ sǝnɑ.
Ɩlɛ pepe tɔɔ kɛ́ mɑɑ nɔkɩ nɑ mɑ́ cɑɑlɩ mɑ tɩ?
30 Pɑɑ mɑɑ sɔnɑ kpɑlǝkpɑm, nɑ mɑ́ kilisinɑ tɛʋ lʋm.
31 Ɩ tɑɣɑnǝɣɩ-m ɑfǝlɑ tɑɑ kɛ́ pɛtʋɣʋ kɛ́,
nɑ mɑ wontu mɑɣɑmɑɣɑ pǝsɩ-m kʋsɔɣɔtʋ pʋlʋpʋ.
32 Ɩsɔ tɑ́ kɛ́ yʋlʋ ɩsɩɩ mɑ́ sɩ ɩ kɑ́ cɔ-m,
yɑɑ mɑ́ yɑɑ-ɩ nɔnɔɣɔ.
33 Nɔɣɔlʋ fɛɩ sɩ ɩ kɑ́ sʋʋ mɑ́ nɑ-ɩ
tɑ́ hɛkʋ tɑɑ, nɑ ɩ́ loli-tʋ.
34 Ɩsɔ sɩɩ kpɑ́tʋ́ɣʋ́ ŋku n mɑkǝnɑ-m tɔ,
nɑ nyɑ́ sɔɣɔntʋ hɛɛsɩ-m cɔɔsʋɣʋ.
35 Ɩlɛ mɑɑ yɔɣɔtǝnɑ-ŋ mɑ kɑɑ nyɑ́.
Amɑ pǝ tɑɣɑ mpʋɣʋlɔ.
Mɑɑ pǝsǝɣɩ pʋlʋ.