17
Ɩsɛɣɛlɩ wulɑʋ Osee tɔm nɑ Sɑmɑlii lɛɛkʋɣʋ
1 Yutɑ wulɑʋ Ahɑsɩ kɑwulɑɣɑ pǝnɑɣɑ nɑɑnʋwɑ nɑ nɑɑlɛ nyǝŋkɑ tɑɑ kɛ́, Ɩlɑ pǝyɑlʋ Osee pǝsɑ Ɩsɛɣɛlɩ wulɑʋ kɛ Sɑmɑlii tɑɑ. Ɩlɛnɑ ɩ́ tɔɣɔ pɩɩsɩ pɔɣɔlɑɣɑfɛɩ nɑɑnʋwɑ.
2 Ḿpʋ́ɣʋ́ ɩ lɑpɑ mpi pǝ tɑ mɑɣɑ Tɑcɑɑ tɔ. Amɑ ɩ nyǝntʋ tɑ tɑlɑ Ɩsɛɣɛlɩ ɑwulɑɑ mpɑ pɑ lɑɑlɑ-ɩ tɔ.
3 Wɑɑtʋ nɔɣɔlʋ Asilii wulɑʋ Sɑlǝmɑnɑsɑɑ yoonɑ-ɩ nɑ ɩ́ kpili-ɩ, nɑ ɩ́ fɛlǝɣɩ-ɩ lɑmpuu kɛ pɑɑ pǝnɑɣɑ ŋkɑ.
4 Amɑ pǝ kɛɛsɑɑ, ɩlɛnɑ ɩ́ kʋlɩ Asilii wulɑʋ tɔɔ, nɑ ɩ́ kisi-ɩ lɑmpuu fɛlʋɣʋ. Ɩlɛnɑ ɩ tili Icipiti wulɑʋ kiŋ kɛ Sɑyii sɩ ɩ́lɛ́ ɩ́ sǝnɑ-ɩ. Pǝ kɔmɑ nɑ Sɑlǝmɑnɑsɑɑ cɛkǝnɑ mpʋ, ɩlɛnɑ ɩ́ kpɑ Osee nɑ ɩ́ tʋ́ sɑlǝkɑ.
5 Pǝ wɑɑlɩ kɛ́ ɩ nɑ ɩ yoolɑɑ pɑ wɑtɑ Sɑmɑlii, nɑ pɑ́ tɑmɩ-ɩ kotɑɣɑ kɛ pɩɩsɩ tooso.
6 Osee kɑwulɑɣɑ pǝnɑɣɑ pɔɣɔlɑɣɑfɛɩ nɑɑnʋwɑ nyǝŋkɑ tɑɑ kɛ́ Asilii wulɑʋ lɛɛkɑ Sɑmɑlii. Nɑ ɩ́ ponɑ Ɩsɛɣɛlɩ nyǝ́mɑ kɛ ɩ tɛ, nɑ ɩ́ sɩɩ-wɛɣɛ Hɑlɑ nɑ Kosɑŋ pɑ hɔɣɔlǝŋ tɑɑ kɛ́ Hɑpɔɔ pɔɣɔ nɔɣɔ, nɑ Metii ɑcɑlɛɛ tɑɑ.
Mpi pǝ wɑkǝlɑ Ɩsɛɣɛlɩ kɑwulɑɣɑ tɔ
7 Ɩsɛɣɛlɩ nyǝ́mɑ pǝntǝnɑ Ɩsɔ Tɑcɑɑ wei ɩ wɑɑsɑ-wɛɣɛ Icipiti wulɑʋ niŋ tɑɑ, nɑ ɩ́ lǝsɩ-wɛɣɛ ɩ tɛtʋ tɑɑ tɔɣɔ, nɑ pɑ́ lɑɑ tɩɩŋ.
8 Pɑ mʋ piitimnɑɑ mpɑ Tɑcɑɑ tɔɣɔnɑɑ nɑ pǝ fɛɛ-wɛ tɔ pɑ kʋlɑpǝlɛ, nɑ yɑɑsinɑɑ ɑsɑɣɑɑ mpɑ Ɩsɛɣɛlɩ ɑwulɑɑ kpɑɣɑɑ tɔ.
9 Ɩsɩɩ nti nti pɑ Ɩsɔ kisɑɑ tɔ tǝ yɔɣɔtʋɣʋ. Hɑlɩ pɑ ŋmɑ́ pɑ tǝkɔtǝlɛnɑɑ kɛ pɑɑ timpiɣi. Pǝ kpɑɣɑʋ ɑcɑlisi tɑɑ, nɑ pɑ koloosi ɑcɑlɛɛ sɔsɔɔnɑ tɑɑ tɔ.
10 Pɑ sikɑ pɛɛ nɑ tesikɑsɩ kʋlɑlɑɑsɩ kɛ pulɑsɩ nyɔɔŋ tɑɑ hɔtʋ tɛɛ.
11 Nɑ pɑ́ lɑɑkɩ tɩɩŋ kɛ teitei ɩsɩɩ piitimnɑɑ mpɑ Tɑcɑɑ tɔɣɔnɑɑ nɑ pǝ́ fɛɛ mpɛ tɔ. Ɩsɑɣɑtʋ ntǝɣɩ pɑ́ lɑpɑ, ɩlɛnɑ pɑ́ɑ́nɑ́ kpɑ Ɩsɔ.
12 Pɑɑ nɑ ɩ kɑ́ kisinɑ-wɛɣɛ tɩɩŋ lɑɑʋ tɔ pɑ tɑ nɩɩ tǝlɛ.
13 Pǝyele Tɑcɑɑ kɑ kpɑɑlɑ Ɩsɛɣɛlɩ nɑ Yutɑ nyǝ́mɑ nɑ Ɩsɔ kʋyɔɣɔtʋtʋ tɛlǝsǝlɑɑ wɑɑnɩ wɑɑnɩ nɔɔsɩ kɛ sɩ: Pɑ́ yele pɑ ɩsɑɣɑtʋ mpɑɑŋ nɑ pɑ́ mʋ ɩ kʋsǝsɩɩtʋ nɑ nti nti ɩ tʋ-wɛɣɛ ɩ Tɔm tɑɑ tɔ. Ntǝɣɩ ɩ kɑ cɛlɑ ɩ kʋyɔɣɔtʋtʋ tɛlǝsǝlɑɑ nɑ pɑ́ heeli pɑ lɔŋcɛnɑɑ.
14 Pɑɑ nɑ mpʋ Ɩsɛɣɛlɩ nyǝ́mɑ kisɑ nti Ɩsɔ kʋyɔɣɔtʋtʋ tɛlǝsǝlɑɑ heelɑ-wɛ tɔɣɔ nɩɩʋ, nɑ pɑ́ lɑ́ lɑŋkpɩɩsǝŋ kɛ teitei, ɩsɩɩ pɑ lɔŋcɛnɑɑ kɑ kisuɣu pɑ Ɩsɔ Tɑcɑɑ kɛ nɑɑni tʋɣʋ tɔ.
15 Pɑ lɔ Ɩsɔ kiiŋ nɑ nɔɣɔ ŋkɑ ɩ nɑ pɑ cɔsɔnɑɑ pɑɑ pɛɛlɑɑ tɔ, nɑ kpɑɑlʋɣʋ mpi ɩ kɑ kpɑɑlɑ-wɛ tɔ. Ɩsɛɣɛlɩ nyǝ́mɑ mɑtǝnɑ kpɑɩ nyǝ́mɑ tɩɩŋ, nɑ pɑ mɑɣɑmɑɣɑ pɑ́ pǝsɩ kpɑɩ nyǝ́mɑ. Nɑ pɑ́ tǝŋ piitimnɑɑ mpɑ Ɩsɔ kɑ kisinɑ-wɛ tɔ pɑ ɩkpɑtɛ.
16 Pɑ lɑpɑ ɑwusɑ kɛ pɑ Ɩsɔ Tɑcɑɑ kiiŋ, nɑ pɑ́ lú nɑwee nɑɑlɛ lɛɛsǝŋ, nɑ pɑ́ siki tesikɑ kʋlɑlɑɑɣɑ, nɑ pɑ́ luŋiɣi ɩsɔtʋlʋŋɑsɩ, nɑ tʋɣʋ Pɑɑlɩ.
17 Hɑlǝnɑ pɑ́ lɑɑ pɑ piyɑ kɛ tɩɩŋ, nɑ pɑ́ lɑkɩ topotopo tǝmɑ, nɑ pɑ́ hɑ pɑ tǝɣɩ mpi pǝ tɑ mɑɣɑ Tɑcɑɑ tɔ pǝ tɑɑ, nɑ pǝ́ kpɑɑsɩ ɩ́lɛ́ ɩ pɑ́ɑ́nɑ́.
18 Pǝ tɔɔ kɛ́ Tɑcɑɑ tɑɑ huunɑ Ɩsɛɣɛlɩ yǝlɑɑ. Ɩ tɑ sɔɔlɩ sɩ ɩ́ tɑsɑ-wɛɣɛ nɑʋ kɛ ɩ ɩsɛntɑɑ. Ɩlɛnɑ pǝ́ yele Yutɑ kpekǝle tike.
19 Amɑ Yutɑ nyǝ́mɑ nɑ́ kisɑ pɑ Cɑɑ Ɩsɔ kiiŋ nɑ pɑ́ kpɑɣɑ Ɩsɛɣɛlɩ nyǝ́mɑ yɑɑsi.
20 Pǝ tɔɔ kɛ́ Ɩsɔ kpɛntɑ Ɩsɛɣɛlɩ nyǝ́mɑ tǝnɑ nɑ ɩ́ lɔ, nɑ ɩ́ tʋ-wɛɣɛ kolontunɑɑ niŋ tɑɑ, nɑ pɛlɛ pɑ́ kuu-wɛ nɑ pɑ́ hɑtǝlǝnɑ-ɩ.
21 Wɑɑtʋ wei Tɑcɑɑ kɑ fɑɣɑ Yutɑ nyǝ́mɑ nɑ Ɩsɛɣɛlɩ nyǝ́mɑ tɔ Solopʋwɑm kɛ pɑ kpɑwɑ Ɩsɛɣɛlɩ nyǝ́mɑ wulɑʋ. Ɩlɛnɑ Solopʋwɑm kisi Tɑcɑɑ, nɑ ɩ́ tusi-wɛɣɛ ɩsɑɣɑtʋ sɔsɔɔntʋ tɑɑ.
22 Pǝ kpɑɣɑʋ wɑɑtʋ ɩnɩ tɔɣɔ pɑ sʋʋ Solopʋwɑm ɩsɑɣɑtʋ kɛ kɛɛnɑʋ.
23 Pǝ tɔɔ kɛ́ Tɑcɑɑ tɑ sɔɔlɩ sɩ ɩ́ tɑsɑ-wɛɣɛ nɑʋ. Ɩlɛnɑ ɩ́ yele nɑ Asilii nyǝ́mɑ kuu-wɛ nɑ pɑ́ wɛ tǝnɑ. Ɩlɛnɑ pǝ lɑ teitei ɩsɩɩ Ɩsɔ kʋyɔɣɔtʋtʋ tɛlǝsǝlɑɑ kɑ yɔɣɔtʋɣʋ tɔ.
Sɑmɑlii cɑɣɑlɑɑ tɔm
24 Ḿpʋ́ɣʋ́ Asilii wulɑʋ kɔnɑ Pɑpiloni, nɑ Kutɑ, nɑ Afɑ, nɑ Hɑmɑtɩ, nɑ Sefɑfɑyim pǝ yǝlɑɑ, nɑ ɩ́ sɩɩ-wɛɣɛ Ɩsɛɣɛlɩ nyǝ́mɑ lonte kɛ Sɑmɑlii, nɑ pɛlɛ pɑ́ cɑɣɑ.
25 Wɑɑtʋ wei yǝlɑɑ mpɛ pɑ sʋʋ tǝnɑ tɔ, pɑɑ sɛɛkɩ Tɑcɑɑ. Ɩlɛnɑ Tɑcɑɑ ponɑ tɔɣɔlɑsɩ nɑ sɩ́ kʋ́ pɑ tɑɑ yǝlɑɑ pɑɣɑlɛ.
26 Ḿpʋ́ɣʋ́ pɑ heelɑ Asilii wulɑʋ sɩ: Yǝlɑɑ mpɑ n ponɑ Sɑmɑlii tɔ, pɑ tɑ nyɩ tɛtʋ ntɩ tǝ Ɩsɔ kɛ sɛɛʋ. Ɩlɛnɑ Ɩsɔ ponɑ tɔɣɔlɑsɩ nɑ sɩ́ kʋ-wɛ.
27 Ntɛnɑ wulɑʋ sɩ: Ɩ́ mǝŋnɑ Ɩsɛɣɛlɩ kɔtǝlɑɑ tɑɑ nɔɣɔlʋɣʋ Sɑmɑlii, nɑ ɩ́ hʋ́lɩ́ yǝlɑɑ mpɛɣɛ Ɩsɔ sɛɛʋ.
28 Kɛnɑ Sɑmɑlii kɔtʋlʋ nɔɣɔlʋ ɩ́ mǝlɩ Petɛɛlɩ, nɑ ɩ́ sɛɣɛsɩ tǝnɑ yǝlɑɑ kɛ Tɑcɑɑ sɛɛʋ.
29 Ḿpʋ́ɣʋ́ Sɑmɑlii tɑɑ cɑɣɑlɑɑ mpɛ, pɑɑ wei ɩ lupɑ ɩ tɛ tʋɣʋ, nɑ pɑ́ sɩɩ ɑcɑlɛɛ wenɑ ɑ tɑɑ pɑɑ cɑɣɑɑ tɔ ɑ tǝkɔtǝlɛnɑɑ mpɑ Ɩsɛɣɛlɩ nyǝ́mɑ kɑ́ ŋmɑwɑ tɔ pɑ tɑɑ.
30 Pɑpiloni nyǝ́mɑ nɑ́ Sɑɑkɑ pɑ tʋɣʋ Sukɔtɩ-Penoti lɛɛsʋɣʋ, nɑ Kutɑ nyǝ́mɑ kɛ pɛlɛ pɑ nyǝŋkʋ Nɛɛkɑɑlɩ, nɑ Hɑmɑtɩ nyǝ́mɑ kɛ pɑ nyǝŋkʋ Asimɑ.
31 Afɑ nyǝ́mɑ kɛ pɑ nyǝŋkʋ Nipɑsɩ nɑ Tɑɑtɑkɩ. Hɑlǝnɑ Sefɑfɑyim nyǝ́mɑ nɑ́ɑ́ lɑɑ pɑ piyɑ kɛ pɑ tɩɩŋ Atǝlɑmelɛkɩ, nɑ Anɑmelɛkɩ.
32 Pǝyele Tɑcɑɑ sɛɛlɑɑ ntɛ́. Ɩlɛnɑ pɑ́ kpɑ pɑ tɑɑ lɛlɑɑ kɛ pɑ tɩɩŋ kɔtǝlɑɑ nɑ pɑ́ pɑɑsǝɣǝnɑ pɑ kɔtɑsɩ.
33 Kʋlʋmɑɑ mpɛɣɛlɛ Ɩsɔ sɛɛlɑɑ. Pǝyele pɑɑ wei ɩ tɔŋnɑ ɩ tɛ tʋɣʋ kɛ lɑɑʋ.
34 Hɑlǝnɑ sɑŋɑ ɩsǝntɔ, lɑɑtʋ ntǝɣɩ pɛlɛ pɑ tɔkɑɑ, pɑɑ sɛɛkɩ Tɑcɑɑ. Pǝyele pɑɑ tǝŋǝɣɩ ɩ kiiŋ, yɑɑ ɩ kʋsǝsɩɩtʋ nti nti ɩ kɑ́ tʋwɑ Yɑkɔpʋ wei ɩ cuɣusɑɑ sɩ Ɩsɛɣɛlɩ tɔ, ɩ lʋlʋɣʋ nyǝ́mɑ tɔ.
35 Pɑɑ nɑ mpʋ tɔ, Tɑcɑɑ nɑ Yɑkɔpʋ lʋlʋɣʋ nyǝ́mɑ pɑ pɛɛlɑ nɔɣɔ kɛ́. Nɑ ɩ́ sɩɩ-wɛɣɛ kiiŋ sɩ pɑ́ tɑɑ lɑɑ tɩɩŋ. Pǝyele pɑ tɑɑ luŋ ɩ tɛɛ. Pɑ́ tɑɑ lɑpɩ-ɩ tǝmlɛ nɑtǝlɩ.
36 Tɑcɑɑ mɑ wei mɑ lǝsɑ-mɛɣɛ Icipiti tɑɑ, nɑ mɑ toŋ sɔsɔɔŋ tɔ, mɑ tike kɛ ɩ́ kɑ́ sɛɛ nɑ ɩ́ lɑkɩ kɔtɑsɩ.
37-38 Pɑɑ ɩfemle nteɣe ɩ́ kɑ́ tɔkǝɣɩ mɑ kʋsǝsɩɩtʋ, nɑ mɑ kʋtʋtʋtʋ, nɑ mɑ kiiŋ wei mɑ ŋmɑɑ-mɛ tɔ. Ɩ́ tɑɑ sɔɔ nɔɣɔ ŋkɑ mɑ́ nɑ mɛ tǝ pɛɛlɑɑ tɔ. Nɑ pǝ́ tɩɩ kǝlǝnɑ tɩɩŋ lɑɑʋ tɔm.
39 Mǝ Ɩsɔ Tɑcɑɑ mɑ́ mɑ tike kɛ ɩ́ kɑ́ sɛɛ. Mpi tɔ, mɑ tike mɑ pǝsǝɣǝnɑ nɑ mɑ́ wɑɑsɩ-mɛɣɛ mǝ kolontunɑɑ niŋ tɑɑ.
40 Amɑ yǝlɑɑ mpɛ pɑ́ kisɑ nɩɩʋ, nɑ pɑ́ lɑkɩ ɩsɩɩ too pɑɑ lɑkɑɣɑ tɔ.
41 Ḿpʋ́ɣʋ́ pɑ kpǝkɑɣɑ Ɩsɔ nɑ tɩɩŋ lɑɑʋ, nɑ pɑ piyɑ tǝnɑ nɑ́ɑ́ wɛ pǝ tɑɑ kɛ́ hɑlǝnɑ sɑŋɑ.