4
Ilisee wɑɑsǝɣɩ ɑlʋ leelu
1 Ɩsɔ kʋyɔɣɔtʋtʋ tɛlǝsʋlʋ nɔɣɔlʋ ɩ kɑ́ sǝpǝnɑ nɑ ɩ́ yele leelu. Ḿpʋ́ɣʋ́ kʋyɑkʋ nɑkʋlɩ ɩ polɑ Ilisee kiŋ nɑ ɩ́ tɔmɩ-ɩ sɩ: Tɑ cɑɑ, mɑ pɑɑlʋ kɑ kɛ́ Ɩsɔ tǝmlɛ tʋ kɛ́. Ɩ sǝpɑ, ɩlɛnɑ ɩ kǝmlɛ tʋ kɔɔ sɩ ɩ kpɑkǝɣɩ tɑ piyɑ nɑɑlɛ kɛ yomɑɑ. Ɩlɛ hɑɩ, sǝnɑ-m.
2 Ntɛnɑ Ilisee pɔɔsɩ-ɩ sɩ: Pepeɣe n cɑɑ sɩ mɑ́ lɑ-ŋ? Heeli-m mpi n wɛnɑ tɔ. Alʋ sɩ: Mɑ fɛɩnɑ pʋlʋ cǝcǝkɑ. Nimɑɣɑ kɑɑsǝnɑ-m nyɑnɑɣɑ tɑɑ.
3 Kɛlɛnɑ Ilisee sɩ: Tɔʋ, polo nyɑ́ ɑsǝmɑɑ cɔlɔ nɑ ń kǝntɩ pɑ kiŋ kɛ nyɑnɑsɩ kɛ sɔsɔm.
4 Ɩlɛnɑ nyɑnɑ nyɑ́ piyɑ ɩ́ sʋʋ mǝ nɑŋ tɑɑ, nɑ ɩ́ tǝkɩ mǝ tɔɔ, nɑ ń pǝlǝɣɩ nimɑɣɑ ŋkɛɣɛ nyɑnɑsɩ tɑɑ nɑ pǝ́ suɣi nɑ ń sɩɩkɩ.
5 Ḿpʋ́ɣʋ́ ɑlʋ tɛɛwɑ nɑ ɩ́ polo nɑ ɩ́ nɑ ɩ piyɑ pɑ́ tǝkɩ pɑ tɔɔ. Nɑ ɩ piyɑ cɛlǝɣɩ-ɩ nyɑnɑsɩ, nɑ ɩ́ suuliɣi nim.
6 Pǝ kɛɛsɑɑ, ɩlɛnɑ ɩ́ tɔ́ ɩ pǝyɑɣɑ lɛŋkɑ sɩ: Cɛlɛ-m nyɑnɑɣɑ.
Amɑ nyɑnɑsɩ tǝnɑ suwɑ. Ɩlɛnɑ pǝyɑɣɑ tɔ sɩ: Pǝ tɑ kɑɑsɩ nɑkǝlɩ. Ɩlɛnɑ nim nɑ́ɑ́ yele lɩɩʋ.
7 Ɩlɛnɑ ɑlʋ polo nɑ ɩ́ heeli Ɩsɔ kʋyɔɣɔtʋtʋ tɛlǝsʋlʋ kɛ mpi pǝ lɑpɑ tɔ. Nɑ ɩ́lɛ́ ɩ tɔ sɩ: Polo nɑ ń pɛɛtɩ nim mpɩ nɑ ń fɛlɩ nyɑ́ kǝmɑ. Ye pǝ kɑɑsɑ-ŋ wenɑ, ɩlɛ nyɑnɑ nyɑ́ piyɑ ɩ́ tɔɣɔ.
Ilisee kɛ Sunem ɑlʋ toŋ tʋ tɛ
8 Ḿpʋ́ɣʋ́ wɑɑtʋ nɔɣɔlʋ Ilisee tǝŋnɑ Sunem ɩcɑtɛ tɑɑ. Alʋ toŋ tʋ nɔɣɔlʋ ɩ kɑ wɛ tǝnɑ. Ɩlɛnɑ ɑlʋ ɩnɩ ɩ́ cɑɑlɩ-ɩ sɩ ɩ́ polo ɩ tɛ nɑ ɩ́ nyɔɔ lʋm. Pǝ tɔɔ kɛ́ ye Ilisee ɩ tǝŋnɑ tǝnɑ tɔɔ, ɩ hɛlǝɣɩ ɑlʋ ɩnɩ ɩ tɛ nɑ ɩ́ tɔkɩ.
9 Kɛlɛnɑ kʋyɑkʋ nɑkʋlɩ ɑlʋ ɩnɩ ɩ́ tɔ ɩ pɑɑlʋ sɩ: Mɑ nyǝmɑ́ teu sɩ ɑpɑlʋ wei ɩnɩ ɩ kɔŋ tɑ́ tɛ tɔ, ɩ kɛ́ Ɩsɔ kʋyɔɣɔtʋtʋ tɛlǝsʋlʋ sɔsɔ kɛ́.
10 Tǝ́ ŋmɑ-ɩ kutuluɣu kɛ tɑ nyǝŋkʋ pɑtɑ tɔɔ. Tǝ́ sɩɩ-ɩ kʋhǝntʋɣʋ, nɑ tɑɑpǝlɩ, nɑ kpelɑɣɑ, nɑ fǝtǝlɑ. Ye kʋyɑŋku ɩ́ tɛɛnɑ cǝnɛ, ɩ hɛlɩ nɑ ɩ́ sʋʋ.
11 Ḿpʋ́ɣʋ́ kʋyɑkʋ nɑkʋlɩ Ilisee tɛɛkɑɣɑ nɑ ɩ́ hɛlɩ kutuliyɑ ŋkɛ kɑ tɑɑ nɑ ɩ́ sʋʋ.
12 Ɩlɛnɑ ɩ́ tili ɩ tǝmlɛ tʋ Kehɑsi sɩ: Polo ń yɑɑ ɑlʋ tǝyɑɣɑ tʋ ɩnɩ. Alʋ kɔmɑ nɑ ɩ́ sǝŋ kutuluɣu nɔɣɔ. Ɩlɛnɑ
13 Ilisee tɔ Kehɑsi sɩ tɛlǝsɩ-ɩ sɩ: N lɑpɑ-tʋɣʋ kʋpɑntʋ kɛ sɔsɔm, ɩlɛ pepeɣe tɑɑ lɑ-ŋ? Tǝ yɔɣɔtɩ nyɑ́ tɔm kɛ wulɑʋ yɑɑ yoolɑɑ nyʋɣʋ tʋ kiŋ nɑ? Alʋ sɩ: Mɑ sɑmɑ. Ɩlɛ mɑ tɑ lɑŋ pʋlʋɣʋ mɑ nyǝ́mɑ tɑɑ.
14 Ntɛnɑ Ilisee pɔɔsɩ Kehɑsi sɩ: Pepeɣe tɩɩ lɑpɩ-ɩ? Kehɑsi sɩ: Ɩ fɛɩnɑ ɑpɑlʋpǝyɑɣɑ. Pǝyele ɩ pɑɑlʋ kpɑtǝlɑɑ.
15 Mpʋɣʋlɛ Ilisee sɩ: Tɔʋ, yɑɑ-ɩ.
Alʋ mǝlɑɑ
16 ɩlɛnɑ Ilisee tɔ sɩ: Pǝnɑɣɑ kɑ́ sikiɣi ɩsɩɩ ɩsǝntɔ tɑkɑ teitei tɔ, n kɑ́ nʋkɩ ɑpɑlʋpǝyɑɣɑ.
Ntɛnɑ ɑlʋ mɑ kɑpukɑ sɩ: Hei, Ɩsɔ kʋyɔɣɔtʋtʋ tɛlǝsʋlʋ, tɑɑ puɣusu-m yoo.
17 Ḿpʋ́ɣʋ́ ɑlʋ ɩnɩ ɩ lɑpɑ teu, nɑ ɩ́ lʋlɩ ɑpɑlʋpǝyɑɣɑ, kɛ wɑɑtʋ wei teitei Ilisee kɑ́ kɛɛsɑɑ tɔ.
Sunem ɑlʋ pǝyɑɣɑ fem
18 Ḿpʋ́ɣʋ́ pǝyɑɣɑ ŋkɛ kɑ́ lɑpɑ yʋlʋ. Ɩlɛnɑ kʋyɑkʋ nɑkʋlɩ kɑ́ tǝŋ kɑ cɑɑ wɑɑlɩ kɛ́ tɑɑlɛ kɛ tǝkʋntɛ.
19 Pǝ tɑsɑɑ, ɩlɛ kɑ mɑpɑ kɑpukɑ ntɛ́ sɩ: Wɑɑɩ, pɑɑpɑ, mɑ nyʋɣʋ, mɑ nyʋɣʋ.
Ntɛnɑ cɛcɛ kʋsɩ ɩ tǝmlɛ nyǝ́mɑ tɑɑ nɔɣɔlʋ sɩ: Ponɑ-kɛɣɛ kɑ too kiŋ.
20 Tǝmlɛ tʋ tɑnɑ pǝyɑɣɑ kɛ kɑ too, nɑ toto nʋkɩ-kɛɣɛ ɩ nɔɔhɛɛ tɔɔ. Pǝ kɔmɑ ilim sikuɣu, ɩlɛnɑ kɑ́ hɛɛ.
21 Ɩlɛnɑ ɩ́ kpɑɑnɑ-kɛɣɛ kutuluɣu ŋku kʋ tɑɑ Ilisee kɔŋ nɑ ɩ́ hǝntǝɣɩ tɔ. Nɑ ɩ́ hɩɩsɩ-kɛɣɛ Ilisee kɑto tɔɔ, nɑ ɩ́ tǝkɩ nɔnɔɣɔ. Ɩlɛnɑ ɩ́ kpɑ tɑɑlɛ
22 nɑ ɩ́ tɔ ɩ pɑɑlʋ sɩ: Cɛlɛ-m tǝmlɛ tʋ nɑ kpɑŋɑɣɑ ɑlʋnyǝŋkɑ. Mɑ lɔkɩ mɑ tǝɣɩ Ɩsɔ kʋyɔɣɔtʋtʋ tɛlǝsʋlʋ tɛ, nɑ mɑ́ kɔɔ.
23 Ntɛnɑ ɩ pɑɑlʋ pɔɔsɩ-ɩ sɩ: Alɑɑfǝyɑ kɛlɛ n puki Ɩsɔ kʋyɔɣɔtʋtʋ tɛlǝsʋlʋ tɛɣɛ sɑŋɑ nɑ? Anɩ pǝ tɑɣɑ ɩsɔtʋ kʋfɑlʋ ɑcimɑ, yɑɑ kʋyɑkʋ kʋhɛɛsʋɣʋ. Ntɛnɑ ɑlʋ sɩ: Alɑɑfǝyɑ kɛ́.
24 Ɩlɛnɑ ɑlʋ tɔ́ tǝmlɛ tʋ sɩ: Polo tǝ polo. Ye mɑ tɑ tɔ́ sɩ ń sǝŋ, tɑɑ sǝŋ yoo.
25 Mpʋɣʋlɛ pɑ́ tʋ́ Kɑmɛɛlɩ mpɑɑʋ, nɑ pɑ́ polo Ilisee tɛ́. Wɑɑtʋ wei Ilisee loosɑ-ɩ pooluŋ, ɩlɛnɑ ɩ́ heeli ɩ tǝmlɛ tʋ Kehɑsi sɩ: Alʋ wei ɩ lɑkɩ-tʋɣʋ ɩkɔntʋ kɛ Sunem tɔɣɔlɛ.
26 Sǝŋɩ-ɩ nɑ ń pɔɔsɩ ɩ́ nɑ ɩ pɑɑlʋ, nɑ ɩ pǝyɑɣɑ, pɑ ɑlɑɑfǝyɑ tɔɔ.
Kehɑsi sǝŋɑ-ɩ, ɩlɛnɑ ɑlʋ cɔ-ɩ sɩ: Alɑɑfǝyɑ kɛ́.
27 Alʋ tɑlɑ Ilisee kiŋ kɛ pʋɣʋ tɑɑ, ɩlɛnɑ ɩ́ hoti Ilisee tɛɛ, nɑ ɩ́ kpɑ ɩ nɔɔhɛɛ, nɑ Kehɑsi mɑɣɑsɩ ɩsɩɩ ɩ tɔɣɔnǝɣɩ-ɩ. Ntɛnɑ Ilisee sɩ: Yele-ɩ, ɩ lɑŋlɛ wɑkǝlɑɑ kɛ́. Amɑ Tɑcɑɑ tɑ yele sɩ mɑ nyɩ mpi pǝ tɔɔ tɔ.
28 Mpʋɣʋlɛ ɑlʋ mɑpɑ kɑpukɑ kɛ kpɑkpɑɑ sɩ: Tɑ cɑɑ, ntɔŋ mɑ tɑɑ sǝlǝmɩ-ŋ pǝyɑɣɑ? Hɑlɩ mɑɑ tɩɩ kisɑɑ kɛ́ sɩ ń tɑɑ puɣusu-m.
29 Ntɛnɑ Ilisee tɔ Kehɑsi sɩ: Kpɑɣɑ mɑ kpɑ́tʋ́ɣʋ́ nɑ ń lɔɣɔ nyɑ́ tǝɣɩ Sunem tǝcɑʋ. Tɑɑ sǝŋ mpɑɑʋ tɑɑ sɩ n sɛɛkɩ nɔɣɔlʋ, yɑɑ pʋntʋ sɛɛkɩ-ŋ. Ye n tɑlɑɑ, ɩlɛ n tǝnɩ kpɑ́tʋ́ɣʋ́ kɛ pǝyɑɣɑ ɩsɛntɔɔ.
30 Ḿpʋ́ɣʋ́ pǝyɑɣɑ too tɔmɑ Ilisee sɩ: Mɑ tuukinɑ Tɑcɑɑ sɩ ye n tɑ kʋlɩ, mɑɑ mǝlǝɣɩ mɑ tike.
Ɩlɛnɑ Ilisee kʋlɩ nɑ ɩ́ tǝŋɩ-ɩ.
31 Kehɑsi nɑ́ lɑɑlɑ-wɛ, ɩlɛnɑ ɩ́ tǝnɩ Ilisee kpɑ́tʋ́ɣʋ́ kɛ pǝyɑɣɑ ɩsɛntɔɔ. Amɑ pǝyɑɣɑ tɑ tɩɩ kʋɣʋlɩ kʋɣʋlʋɣʋ mɑɣɑmɑɣɑ. Ḿpʋ́ɣʋ́ Kehɑsi mǝlɑɑ nɑ ɩ́ heeli Ilisee sɩ: Pǝyɑɣɑ tɑ fe.
32-33 Ilisee tɑlɑɑ nɑ ɩ́ sʋʋ kutuluɣu tɑɑ, nɑ ɩ́ mɑɣɑnɑ pɑ hɩɩsɑ-kɛɣɛ ḿpʋ́ɣʋ́ ɩ kɑto tɔɔ nɑ kɑ sǝpɑ. Ɩlɛnɑ ɩ́ tǝkɩ ɩ tɔɔ nɑ ɩ́ sǝlǝmɩ Ɩsɔ.
34 Ɩlɛnɑ ɩ́ pɑpɩ pǝyɑɣɑ tɔɔ, nɑ pɑ nɔɔsɩ nɑ pɑ ɩsɛ nɑ pɑ niŋ kɛ tǝmɑ tɔɔ, nɑ kɑ tɔnʋɣʋ tɑɣɑnɩ hɑŋʋɣʋ.
35 Ɩlɛnɑ Ilisee kʋlɩ nɑ ɩ́ tɔŋ nɑ ɩ́ cɔɔkǝnɑ kutuluɣu, nɑ ɩ́ tɑɣɑnɩ kɑ tɔɔ kɛ́ luŋuɣu. Ḿpʋ́ɣʋ́ pǝyɑɣɑ cimsɑ kpɑkpɑɑ kɛ tɔm nɑɑtosompɔɣɔlɑɣɑ, nɑ kɑ́ kuli ɩsɛ.
36 Tǝnɑɣɑ Ilisee tilɑ Kehɑsi sɩ: Polo ń yɑɑ pǝyɑɣɑ too.
Toto kɔmɑ, ɩlɛnɑ Ilisee tɔmɩ-ɩ sɩ: Kɔɔ ń mʋ nyɑ́ pǝyɑɣɑ.
37 Ḿpʋ́ɣʋ́ ɑlʋ hǝntɑ Ilisee kɛ ɑtɛ. Ɩlɛnɑ ɩ́ kpɑɣɑ ɩ pǝyɑɣɑ nɑ ɩ́ tɛɛ.
Tuusi nsi sɩ fɛɩ tɔɣɔʋ tɔ
38 Ḿpʋ́ɣʋ́ nyɔɣɔsɩ wɑɑtʋ tɑɑ, kʋyɑkʋ nɑkʋlɩ Ilisee kɔmɑ Kilikɑɑ, nɑ ɩ́ koti Ɩsɔ kʋyɔɣɔtʋtʋ tɛlǝsǝlɑɑ kɛ ɩ kiŋ. Ɩlɛnɑ ɩ́ tɔ ɩ tǝmlɛ tʋ sɩ: Tǝsɩ tiyɑɣɑ sɔsɑɣɑ nɑ ń hili-wɛɣɛ tuusi.
39 Ḿpʋ́ɣʋ́ pɑ tɑɑ lɛlʋ yɛlɑ tuusi kɛ hɑlǝm tɑɑ, nɑ ɩ́ mɑɣɑnɑ ɑloolɑɣɑ nɑkǝlɩ, nɑ ɩ́ kooli kɑ pee, nɑ ɩ́ hɔkɔ ɩ toko tɑɑ, nɑ ɩ́ kɔɔ nɑ ɩ́ pɛlɩ-yɛ nɑ ɩ tǝsɩ. Amɑ nɔɣɔlʋ tɑ nyɩ-yɛ.
40 Tuusi pɩɩwɑ nɑ pɑ́ tʋ yǝlɑɑ nɑ pɑ́ tǝŋ. Ɩlɛnɑ pɑ́ mɑ́ kɑpusi sɩ: Hei, Ɩsɔ kʋyɔɣɔtʋtʋ tɛlǝsʋlʋ, tuusi nsɩ sɔtʋ kɛ́.
Nɔɣɔlʋ tɑ pǝsɩ nɑ ɩ́ tɔɣɔ.
41 Ḿpʋ́ɣʋ́ Ilisee tɔmɑ sɩ: Ɩ́ kɔnɑ mʋlʋm. Pɑ kɔnɑɑ, ɩlɛnɑ ɩ́ tʋ́ tuusi nsɩ sɩ tɑɑ nɑ sɩ́ lɑ́ tɔɣɔʋ. Ɩlɛnɑ Ilisee heeli ɩ tǝmlɛ tʋ sɩ: Tʋ yǝlɑɑ.
Tiipile tɑɑ tuusi tɑ kɛ sɔtʋ tɔtɔ.
Ɩsɔ kʋyɔɣɔtʋtʋ tɛlǝsǝlɑɑ nɩɩnʋwɑ (100) cɑlǝsʋɣʋ
42 Ḿpʋ́ɣʋ́ kʋyɑkʋ nɑkʋlɩ, ɑpɑlʋ nɔɣɔlʋ ɩ lɩɩnɑ Pɑɑlɩ-Sɑlisɑ. Nɑ ɩ́ kpɛnnɑ Ɩsɔ kʋyɔɣɔtʋtʋ tɛlǝsʋlʋ kɛ ɩ kʋhɑlǝm kɑlɑɑlɑsɩ. Ɩsɩɩ tɔɣɔnɑɣɑ pee potopotonɑɑ kɛ hiu, nɑ pee kʋtoŋee kɛ huluɣu tɑɑ. Ḿpʋ́ɣʋ́ Ilisee tɔmɑ ɩ tǝmlɛ tʋ sɩ: Tɑlɑ pɑ tǝnɑɣɑ tɔɣɔnɑɣɑ ŋkɛ.
43 Ntɛnɑ tǝmlɛ tʋ sɩ: Mɑ tɑlǝɣɩ kɑnɛ ɩnǝɣɩ yǝlɑɑ nɩɩnʋwɑ (100) nɑ pǝ́ tɑlɑ pɑ le? Ilisee sɩ: Nyɑɑ tɑlɑ-wɛ te. Tɑcɑɑ yɔɣɔtɑɑ kɛ́ sɩ, pɑɑ tɔɣɔ nɑ pɑ́ hɑɣɑ nɑ pǝ́ kɑɑsɩ.
44 Ḿpʋ́ɣʋ́ tǝmlɛ tʋ tɑlɑ tɔɣɔnɑɣɑ ŋkɛɣɛ ɩ tɑɑpɑlɑɑ. Nɑ pɑ́ tɔɣɔ nɑ pɑ́ hɑɣɑ nɑ pǝ́ kɑɑsɩ, ɩsɩɩ Tɑcɑɑ kɑ yɔɣɔtʋɣʋ tɔ.