9
Pɑ kpɑ Yehu kɛ kɑwulɑɣɑ
1 Ḿpʋ́ɣʋ́ kʋyɑkʋ nɑkʋlɩ, Ilisee yɑɑ Ɩsɔ kʋyɔɣɔtʋtʋ tɛlǝsǝlɑɑ tɑɑ sǝkpelu nɔɣɔlʋ, nɑ ɩ́ tɔmɩ-ɩ sɩ: Mʋ nim kɑtɛ nyǝm pǝnɛ, nɑ ń lɔɣɔ nyɑ́ tɩ tǝcɑʋ kɛ Lɑmɔtɩ kɛ Kɑlɑɑtɩ tɛtʋ tɑɑ.
2 Nɑ ń mɑɣɑnɑ Sosɑfɑtɩ pǝyɑlʋ Yehu, ɩnɩ ɩ kɛnɑ Nimsi sɑɑlɩ. Ye n tɑlɑɑ ɩlɛ n yɑɑ-ɩ ɩ tike kɛ nɑŋ nɑkʋlɩ kʋ tɑɑ.
3 Ɩlɛnɑ ń pǝlɩ nim kɛ ɩ nyʋɣʋ tɑɑ. Ɩlɛnɑ ń heeli-ɩ sɩ: Mɑ kpɑ-ŋ Ɩsɛɣɛlɩ wulɑʋ. Ń tɛmɑ mpʋ, n tʋlɩ nɔnɔɣɔ nɑ ń se kpɑkpɑɑ.
4 Ḿpʋ́ɣʋ́ Ɩsɔ kʋyɔɣɔtʋtʋ tɛlǝsʋlʋ sǝkpelu ɩnɩ ɩ tɛɛwɑ Lɑmɔtɩ kɛ Kɑlɑɑtɩ tɛtʋ tɑɑ.
5 Ɩ tɑlɑ tǝnɑ, ɩlɛnɑ ɩ́ mɑɣɑnɑ Ɩsɛɣɛlɩ yoolɑɑ nyʋɣʋ nyǝ́mɑ kotɑɑ. Ntɛnɑ ɩ́ tɔ́ sɩ: Tɑ cɑɑ, mɑ cɑɑ mɑ nɑ-ŋ tɔm. Ɩlɛnɑ Yehu sɩ: Tɑ tɑɑ ɑwe? Ɩsɔ kʋyɔɣɔtʋtʋ tɛlǝsʋlʋ sɩ: Nyɑ́ mɑɣɑmɑɣɑ.
6 Ḿpʋ́ɣʋ́ Yehu kʋlɑɑ nɑ ɩ́ ponɑ-ɩ tǝyɑɣɑ, nɑ Ɩsɔ kʋyɔɣɔtʋtʋ tɛlǝsʋlʋ pǝlɩ ɩ nyʋɣʋ tɑɑ kɛ́ nim. Nɑ ɩ́ tɔmɩ-ɩ sɩ: Ɩsɛɣɛlɩ Ɩsɔ Tɑcɑɑ yɔɣɔtɑɑ sɩ, mɑ́ kpɑnɑ-ŋ sɩ ń pǝsɩ mɑ yǝlɑɑ Ɩsɛɣɛlɩ nyǝ́mɑ wulɑʋ.
7 Nɑ ń kʋ́ nyɑ́ cɑɑ kʋpǝŋ Akɑpɩ lʋlʋɣʋ nyǝ́mɑ tǝnɑ. Ɩlɛ pǝ lɛɛtɑ Ɩsɔ kʋyɔɣɔtʋtʋ tɛlǝsǝlɑɑ nɑ mɑ tǝmlɛ nyǝ́mɑ mpɑ mpɑ Sesɑpɛɛlɩ kʋwɑ tɔ pɑ sǝm ntɛ́.
8 Mɑɑ kʋ Akɑpɩ tǝyɑɣɑ ɑpɑlɑɑ tǝnɑɣɑ. Pɑɑ piyɑ pɑɑ sɔsɑɑ.
9 Mɑɑ lɑnɑ ɩ yǝlɑɑ kɛ́ ɩsɩɩ mɑ lɑpǝnɑ Nepɑtɩ pǝyɑlʋ Solopʋwɑm nɑ Ahiyɑ pǝyɑlʋ Pɑsɑ pɑ nyǝ́mɑ tɔ.
10 Pǝ kɑɑsɑ Sesɑpɛɛlɩ tɔ, nɔɣɔlʋ kɑɑ pimi-ɩ. Hɑsɩ kɑ́ tɔɣɔnɑ-ɩ Sisilee hɑlǝm tɑɑ.
Ɩsɔ kʋyɔɣɔtʋtʋ tɛlǝsʋlʋ tɛmɑ ḿpʋ́ɣʋ́ yɔɣɔtɑɣɑ, ɩlɛnɑ ɩ́ tʋlɩ nɔnɔɣɔ nɑ ɩ́ se.
11 Ḿpʋ́ɣʋ́ Yehu lɩɩwɑ nɑ ɩ́ mǝlɩ ɩ tɑɑpɑlɑɑ kiŋ, nɑ pɛlɛ pɑ́ pɔɔsɩ-ɩ sɩ: Pʋlʋpʋ lɑpɑɣɑ? Wentiɣi kpɑŋtʋ ɩnɩ ɩ cɑɑkǝnɑ-ŋ ye? Yehu sɩ: Ɔɔ, pǝ tɑɣɑ nɑtǝlɩ se. Anɩ ɩ́ nyǝmɑ́ Ɩsɔ kʋyɔɣɔtʋtʋ tɛlǝsǝlɑɑ mpɛ pɑ tɔɔ.
12 Ɩ tɑɑpɑlɑɑ sɩ: N cɛsǝɣɩ kɛ́. Heeli-tʋɣʋ nti ɩ heelɑ-ŋ tɔ. Yehu sɩ: Ɩ heelɑ-m tɔmnɑɑ pɑɣɑlɛ kɛ́. Ɩlɛnɑ ɩ́ heeli-m mɑ mɑɣɑmɑɣɑ mɑ nyǝntʋ sɩ, Tɑcɑɑ tɔmɑ sɩ ɩ kpɑ-m Ɩsɛɣɛlɩ wulɑʋ.
13 Tǝnɑɣɑlɛ pɑ tǝnɑ pɑ wɔɣɔsɑ pɑ kpɑɩnɑɑ, nɑ pɑ́ pɔ-wɛɣɛ kumte tɔɔ nɑ Yehu cɑɣɑ, nɑ pɑ́ hʋlɩ ɑkɑntǝlɛ nɑ pɑ tǝnɑ pɑ́ wiliti nɑ pɑ́ tɔ sɩ: Yehu, mǝ nɑ tɛtʋ.
Yehu kʋɣʋ kɛ Solɑm nɑ Ahɑsiyɑ
14-15 Wɑɑtʋ nɔɣɔlʋ Ɩsɛɣɛlɩ yoolɑɑ tǝnɑ kɑ tɑŋɑ Lɑmɔtɩ ɩcɑtɛ kɛ Silii wulɑʋ Hɑsɑyɛlɩ tɔɔ. Hɑlɩ pǝ́ kʋ́ Solɑm nɑ ɩ́ polo Sisilee nɑ pɑ́ fɛkɩ-ɩ.
Yosɑfɑtɩ pǝyɑlʋ kɛlɛ Yehu, pǝyele Nɛmsi sɑɑlɩ kɛlɛ. Pɑ tɛmɑ Yehu kɛ kɑwulɑɣɑ kpɑʋ, ɩlɛnɑ ɩ́ kʋlɩ Solɑm tɔɔ. Nɑ ɩ́ tɔ́ ɩ tɑɑpɑlɑɑ sɩ: Ye ɩ́ wɛ mɑ tɔɔ, ɩlɛ ɩ́ tɑɑ yele nɑ nɔɣɔlʋ fiti nɑ ɩ́ polo Sisilee, nɑ ɩ́ heeli nti tǝ lɑpɑ cǝnɛ tɔ.
16 Ɩ tɛmɑ mpʋ, ɩlɛnɑ ɩ́ kpɑ ɩ kɛɛkɛ tɔɔ nɑ ɩ́ tɛɛ Sisilee. Tǝnɑɣɑ Solɑm hǝntɑɑ, nɑ Yutɑ wulɑʋ Ahɑsiyɑ polo-ɩ wiiluɣu.
17 Ḿpʋ́ɣʋ́ Sisilee kutuluɣu sɔsɔɔʋ nyʋɣʋ tɑɑ tɑŋlʋ loosɑ Yehu nɑ nɑpǝlǝɣɩ ɩ wɑɑlɩ. Ɩlɛnɑ ɩ́ tili nɑ pɑ́ heeli wulɑʋ sɩ: Mɑ loosɑ nɑpǝlɩ nɑ pɑ́ kɔŋ. Ntɛnɑ wulɑʋ sɩ: Tili kpɑɣɑnʋ cɑɣɑlʋ nɑ ɩ́ sǝŋ-wɛ nɑ ɩ́ pɔɔsɩ-wɛ sɩ: Alɑɑfǝyɑ kɛlɛ?
18 Ntɛnɑ kpɑɣɑnʋ cɑɣɑlʋ nɑ́ɑ́ tɛɛ nɑ ɩ́ pɔɔsɩ-ɩ sɩ: Wulɑʋ sɩ mɑ́ pɔɔsɩ-mɛ sɩ ɑlɑɑfǝyɑ kɛlɛ? Ntɛnɑ Yehu pɔɔsɩ-ɩ sɩ: Nyɑ́ tɔm suweɣe pǝ tɑɑ? Tʋ tɑ wɑɑlɩ.
Mpʋɣʋlɛ kutuluɣu sɔsɔɔʋ tɑŋlʋ sɩ: Tillu sulɑ-wɛ nɑ ɩ́ sɑɑlɩ tǝnɑ.
19 Ɩlɛnɑ Solɑm tili kpɑɣɑnʋ nɑɑlɛ nyǝŋ nɑ ɩ́ suli-wɛ, nɑ ɩ́ pɔɔsɩ-wɛ tɔtɔ sɩ wulɑʋ sɩ: Alɑɑfǝyɑ kɛlɛ? Ntɛnɑ Yehu pɔɔsɩ-ɩ sɩ: Nyɑ́ tɔm suweɣe pǝ tɑɑ? Tʋ tɑ wɑɑlɩ.
20 Ɩlɛnɑ tɑŋlʋ sɩ: Tillu nɑɑlɛ nyǝŋ sulɑ-wɛ, nɑ ɩ́ sɑɑlɩ tǝnɑ. Pǝyele pɑ nɔɣɔ tɔɔ tʋ cɑɣɑ ɩ kɛɛkɛ kɛ́ ɩsɩɩ kpɑŋtʋ, pǝ kɑɑ lɑŋ Yehu.
21 Tǝnɑɣɑlɛ wulɑʋ yelɑɑ nɑ pɑ́ kpɛɛlɩ ɩ kɛɛkɛ nɑ ɩ́ kpɑ. Nɑ Yutɑ wulɑʋ Ahɑsiyɑ nɑɑ kpɑ ɩ nyǝŋ tɔɔ tɔtɔ. Ɩlɛnɑ pɑ́ suli Yehu kɛ Nɑpɔtɩ hɑlǝm kiŋ kɛ Sisilee.
Yutɑ wulɑʋ Solɑm sǝm
22 Mpʋɣʋlɛ wulɑʋ pɔɔsɑ Yehu sɩ: Alɑɑfǝyɑ wɛɛ? Ntɛnɑ Yehu sɩ: Anɩ n nyǝmɑ́ teu sɩ nyɑ́ too Sesɑpɛɛlɩ wɛɛ nɑ ɩ́ tɔŋɑ tɩɩŋ lɑɑʋ nɑ topotopo tǝmɑ. Ɩlɛnɑ ń pɔɔsǝɣɩ-m sɩ: Alɑɑfǝyɑ wɛɛ?
23 Tǝnɑɣɑ Solɑm pǝsɑɑ nɑ ɩ́ seeki nɑ ɩ́ kiisiɣi sɩ: Ahɑsiyɑ se yoo, ɩ lɩɩkɩ mɑ wɑɑlɩ kɛ́.
24 Ḿpʋ́ɣʋ́ Yehu yelɑ nyǝmlɛ kɛ kpɑkpɑɑ, nɑ ɩ́ yɑɣɑ-tɛɣɛ Solɑm ɑsǝŋkpekiŋ hɛkʋ tɑɑ, nɑ ɩ́ tʋlɩ ɩ fulɑɣɑ. Ɩlɛnɑ ɩ́ hoti ɩ kɛɛkɛ tɑɑ tǝkpilim.
25 Ntɛnɑ Yehu yɔɣɔtɩ ɩ sǝnlʋ Pitikɑɑ sɩ: Kpɑɣɑ-ɩ nɑ ń pɛtɩ Nɑpɔtɩ hɑlǝm tɑɑ. Tɔɔsɩ nti Tɑcɑɑ kɑ heelɑ ɩ cɑɑ Akɑpɩ kɛ kʋyɑŋku tɑ nɑɑlɛ tǝ cɑɣɑ kpɑɣɑnǝŋ nɑ tǝ sɩɩkɩ-ɩ tɔ
26 sɩ: Tete mɑ nɑwɑ ɩsǝnɑ n kʋwɑ Nɑpɔtɩ nɑ ɩ pǝyɑlɑɑ tɔ. Ɩlɛ mɑ tuuki sɩ, ɩsɩɩ mɑ hɔmɑ Solɑm ŋkpɑŋʋɣʋ kɛ tɑɑlɛ ntɛ́ tǝ tɑɑ. Ɩlɛnɑ Yehu tɑsɑ sɩ: Pǝ tɔɔ tɔ, kpɑɣɑ-ɩ nɑ ń pɛtɩ tɑɑlɛ ntɛ́ tǝ tɑɑ kɛ́ teitei ɩsɩɩ Tɑcɑɑ kɑ heeluɣu-ɩ tɔ.
Yutɑ wulɑʋ Ahɑsiyɑ sǝm
(Kʋtɔɔsʋtʋ II 22:7-9)
27 Wɑɑtʋ wei Yutɑ wulɑʋ Ahɑsiyɑ nɑwɑ Solɑm sǝm, ɩlɛnɑ ɩ́ seeki nɑ ɩ́ mǝlǝɣǝnɑ Pɛtɩ-Kɑɑ hɔɣɔlʋɣʋ tɔɔ. Nɑ Yehu nɑ́ɑ́ tʋ́ ɩ wɑɑlɩ, nɑ ɩ́ tɔ́ ɩ tɑɑpɑlɑɑ sɩ: Ɩ́ kʋ́ ɩ́lɛ́ tɔtɔ. Ḿpʋ́ɣʋ́ pɑ yɑɣɑ-ɩ nyǝmɑ́, nɑ ɩ́ wɛ kɛɛkɛ tɑɑ, nɑ ɩ́ kpɑɑkɩ Kuuli kɛ Ipǝleyɑm cɔlɔ. Pɑɑ nɑ mpʋ, nɑ Ahɑsiyɑ se nɑ ɩ́ tɑlɑ Mekito nɑ ɩ́ sɩ́ tǝnɑ.
28 Ɩlɛnɑ ɩ tǝmlɛ nyǝ́mɑ tʋ-ɩ kɛɛkɛ tɑɑ, nɑ pɑ́ ponɑ-ɩ Yosɑlɛm. Nɑ pɑ́ pimi-ɩ pɑ tǝyɑɣɑ pǝlɑɑʋ tɑɑ kɛ́ Tɑfiiti tɛ.
29 Akɑpɩ pǝyɑlʋ Solɑm kɑwulɑɣɑ pǝnɑɣɑ nɑɑnʋwɑ nɑ kʋlʋm nyǝŋkɑ tɑɑ kɛ́ Ahɑsiyɑ kɑ pǝsɑ Yutɑ wulɑʋ.
Sesɑpɛɛlɩ sǝm
30-31 Ḿpʋ́ɣʋ́ Sesɑpɛɛlɩ nɩɩwɑ tǝ tǝnɑ nti tǝ lɑpɑ tɔ. Ɩlɛnɑ ɩ́ lʋʋ ɩ nyɔɔsɩ, nɑ ɩ́ tʋ́ kɑcɔkɑ wontu, nɑ cǝlɑʋnɑɑ. Yehu tɑlɑɑ nɑ ɩ́ sʋʋkɩ ɩcɑtɛ tɑɑ nɑ ɑlʋ ɩnɩ ɩ nɑ-ɩ, ɩlɛnɑ ɩ́ mɑ́ kɑpukɑ sɩ: Wulɑʋ kʋlʋ Simili nyɑ́. Alɑɑfǝyɑ wɛɛ?
32 Yehu kʋsɑ ɩsɛ, ɩlɛnɑ ɩ mɑ kɑpukɑ sɩ: Awe wɛnnɑ mɑ tɔɔ?
Ḿpʋ́ɣʋ́ kɑwulɑɣɑ tǝyɑɣɑ tɑɑ ɑpɑlɑɑ nɑɑni nyǝ́mɑ nɑpǝlǝɣɩ nɑɑlɛ, nɑ tooso nyǝnnɑ pǝtote.
33 Ntɛnɑ Yehu tɔ-wɛ sɩ: Ɩ́ lɔɣɔ ɑlʋ ɩnɩ nɑ pǝtote.
Ɩlɛnɑ ɑpɑlɑɑ mpɛ pɑ́ tusi Sesɑpɛɛlɩ, nɑ ɩ́ hoti nɑ Yehu tǝŋ ɩ tɔɔ nɑ kɛɛkɛ. Nɑ cɑlǝm yɑ koloŋɑ nɑ kpɑɣɑnǝŋ tɔɔ.
34 Ḿpʋ́ɣʋ́ Yehu sʋʋ kɑwulɑɣɑ tǝyɑɣɑ tɑɑ, nɑ ɩ́ tɔɣɔ nɑ ɩ́ nyɔɔ, nɑ ɩ́ tɔ ɩ tɑɑpɑlɑɑ sɩ: Ɩ́ pi ɑlʋ mpusi tʋ ɩnɩ. Mpi tɔ, ɩ kɑ kɛ́ wulɑʋ pɛɛlɔ.
35 Pɑ lɩɩwɑ Sesɑpɛɛlɩ pim, ɩlɛnɑ pɑ́ mɑɣɑnɑ nyʋmpɔɣɔlɑɣɑ nɑ ntɑntɑkǝŋ nɑ nɔntɑɑlǝŋ tike.
36 Pɑ mǝlɑɑ nɑ pɑ heeli-tǝɣɩ Yehu, ɩlɛnɑ ɩ́ tɔ́ sɩ: Ḿpʋ́ɣʋ́ Tɑcɑɑ kɑ heelɑ Tisipe Ɩsɔ kʋyɔɣɔtʋtʋ tɛlǝsʋlʋ Ilii nɑ ɩ yɔɣɔtɩ sɩ: Hɑsɩ kɑ́ tɑɣɑmɩ Sesɑpɛɛlɩ kɛ Sisilee hɑlǝm tɑɑ.
37 Nɑ pɑ lɔ ɩ timpi wɛ kɑɑsɑɑ tɔɣɔ hɑlǝm tɑɑ, ɩsɩɩ pɑ hutuɣu hute tɔ. Nɔɣɔlʋ kɑɑ nyǝmɩ-ɩ.