16
Kolee nyǝ́mɑ kʋlʋɣʋ kɛ Moisi tɔɔ
1-2 Ḿpʋ́ɣʋ́ Lefii kpekǝle tʋ Kehɑtɩ lʋlʋɣʋ tʋ Ɩsɑɑ pǝyɑlʋ Kolee tʋsɑ Lupɛŋ nyǝ́mɑ tooso. Ɩliyɑpɩ pǝyɑlɑɑ Tɑtɑŋ, nɑ Apilɑm, nɑ Pelee pǝyɑlʋ Oŋ nɑ pǝ́ sɔɔsǝnɑ Ɩsɛɣɛlɩ nyǝ́mɑ kʋpɑɣɑlɑɑ mpɑ pɑ hǝlɑ yɑɑwɑ nɑ pɑ́ kotiɣi kotuŋ tɔɣɔ ŋmʋnʋɣʋ nɑ nɩɩlɛ nɑ nɑɑnʋwɑ (250) nɑ pɑ́ kʋlɩ Moisi tɔɔ.
3 Ɩlɛnɑ pɑ kotinɑ Moisi nɑ Alɔŋ nɑ pɑ koo-wɛ sɩ: Wooo, mǝ nyǝntʋ nɑ́ wɔpɑ. Sɑmɑɑ tǝnɑ kɛ́ Tɑcɑɑ nyǝ́mɑ kɛ́, nɑ ɩ́ wɛ pɑ wɑɑlɩ. Ɩlɛ pepe tɔɔ kɛ́ mǝ hɔŋ mǝ tɩ sɩ ɩ́ tɛɛ lɛlɑɑ?
4 Moisi nɩɩ mpʋ, ɩlɛnɑ ɩ́ hoti ɩ ɩsɛntɔɔ.
5 Nɑ ɩ́ tɔ́ Kolee nɑ ɩ wɑɑlɩ nyǝ́mɑ sɩ: Cele tɑnɑŋ Tɑcɑɑ kɑ́ hʋ́lɩ́ mpɑ pɑ kɛ́ ɩ nyǝ́mɑ tɔ. Nɑ ɩ́ yele nɑ ɩ kʋlǝsɑɑ kpǝtǝnɑ-ɩ.
6 Mpʋ tɔ, Kolee, nyɑnɑ nyɑ́ wɑɑlɩ nyǝ́mɑ ɩ́ kpɑɣɑ cofolonɑɑ.
7 Ɩ́ tʋ́ pɑ tɑɑ kɛ́ mɑmɑlɑ nɑ ɩ́ wɔ Tɑcɑɑ kɛ tulɑɑlʋ. Ɩlɛ tɩɩ nɑ́ wei ɩ́ kɑ́ lǝsɩ sɩ ɩ kɛ́ ɩ nyǝŋ tɔ. Amɑ Lefii piyɑ mɛ mǝ nyǝntʋ wɔpǝnɑ.
8 Ḿpʋ́ɣʋ́ Moisi heelɑ Kolee tɔtɔ sɩ: Lefii nyǝ́mɑ mɛ ɩ́ nɩɩ yoo.
9 Ɩsǝnɑ Tɑcɑɑ lǝsɑ-mɛɣɛ Ɩsɛɣɛlɩ nyǝ́mɑ tɑɑ sɩ, ɩ́ kpǝtǝnɑ-ɩ, nɑ ɩ́ pɑɑsǝnɑ ɩ tǝcɑɣɑlɛ nɑŋŋ nyǝntɛ, nɑ ɩ́ sɛɛkǝnɑ-wɛɣɛ Ɩsɔ tɔ, pǝ tɑ tɔɔ mɛ?
10 Kolee, Tɑcɑɑ tʋnɑ nyɑnɑ nyɑ́ tɛɛtʋnɑɑ kɛ tǝmlɛ. Ɩlɛnɑ mɩɩ pɛɛkǝɣɩ sɩ pɑ́ sɔɔsɩ-mɛɣɛ kɔtǝlɑɑ nyǝnɑ.
11 Ɩlɛ Tɑcɑɑ tɔɔ kɛ́ ɩ́ kʋlǝɣɩ, pǝ tɑɣɑ Alɔŋ. Ɩ́lɛ́ ɩ tɑ kɛ pʋlʋ.
12 Ḿpʋ́ɣʋ́ Moisi tilɑɑ sɩ pɑ́ yɑɑ Tɑtɑŋ nɑ Apilɑm. Ɩlɛnɑ pɑ́ kisi pote nɑ pɑ́ tɔ sɩ:
13 N lǝsɑ-tʋɣʋ tɛtʋ nti tǝ tɑɑ kʋpɑntʋ nɑ tɔɣɔnɑɣɑ tɔlɑ yem tǝhɔ tɔ, nɑ ń kɔnɑ-tʋɣʋ wʋlɑɣɑ tɛtʋ tɑɑ. Pɑɑ nɑ mpʋ, pǝ tɑ tɔɔ-ŋ nɑ ń cɑɑ sɩ tǝ́ nyǝnǝɣɩ-ŋ tɑ́ wulɑʋ.
14 Anɩ kʋpɑntʋ nɑ tɔɣɔnɑɣɑ tɑ tɔlɩ cǝnɛ. Pǝ́cɔ́ n tɑ tɑlɑ-tʋɣʋ pɑɑ wei nɑ ɩ tɛtʋ, nɑ lɛsɛŋ tɑwɑ. Tɑɑ nyǝnɩ-tʋɣʋ yʋlʋmɑɑ, tɩɩ puki.
15 Ḿpʋ́ɣʋ́ pɑ́ɑ́nɑ́ huu Moisi tɑɑ, nɑ pɑ tɔm ntɩ. Ɩlɛnɑ ɩ́ heeli Tɑcɑɑ sɩ: Tɑɑ tɑsɑ pɑ kɔtɑsɩ kɛ mʋɣʋ. Mɑ tɑ ŋmɑkǝlǝtɑ pɑ tɑɑ nɔɣɔlʋ. Pǝyele mɑ tɑ mʋtɑ pɑ tɑɑ nɔɣɔlʋ kpɑŋɑɣɑ.
Kolee nɑ ɩ wɑɑlɩ nyǝ́mɑ pɑ sɑlǝkɑ
16 Ḿpʋ́ɣʋ́ Moisi tɔmɑ Kolee sɩ: Cele tɑnɑŋ, nyɑnɑ nyɑ́ wɑɑlɩ nyǝ́mɑ ɩ kɔɔ Tɑcɑɑ ɩsɛntɑɑ, nɑ Alɔŋ tɔtɔ.
17 Ɩlɛnɑ ɩ́ nɑ pɑ ŋmʋnʋɣʋ nɑ nɩɩlɛ nɑ nɑɑnʋwɑ (250) pɑ́ kpɑɣɑ cofolonɑɑ, nɑ pɑ́ wɔ Tɑcɑɑ kɛ tulɑɑlʋ.
18 Kolee nɑ ɩ nyǝ́mɑ pɑ́ tɛŋ mpʋ, ɩlɛnɑ pɑ́ tuusi nɑ pɑ́ sǝŋ Ɩsɔ cokǝle nɔnɔɣɔ. Nɑ Moisi nɑ Alɔŋ pɛlɛ pɑ́ polo tɔtɔ.
19 Ntɛnɑ Kolee sɔɔsɩ Ɩsɛɣɛlɩ sɑmɑɑ tǝnɑɣɑ ɩ tɔɔ kɛ́ Ɩsɔ cokǝle nɔnɔɣɔ.
Ḿpʋ́ɣʋ́ Tɑcɑɑ teeli nɑ́ pɑ tɔɔ.
20 Ɩlɛnɑ Ɩsɔ tɔ́ Moisi nɑ Alɔŋ sɩ:
21 Ɩ́ hɑtǝlǝnɑ-wɛ, mɑ cɑɑ-wɛɣɛ kpiisuɣu kɛ tɔm kʋlʋm tɔɔ kɛ́.
22 Tǝnɑɣɑlɛ Moisi nɑ Alɔŋ pɑ hotɑ pɑ nɔɔsɩ tɔɔ kɛ́ kpɑkpɑɑ. Nɑ pɑ́ mɑ́ kɑpukɑ sɩ: Hɑɩ, yǝlɑɑ tǝnɑ ŋmɑlʋ Ɩsɔ. Kʋlʋm wɑkǝlɑɑ, ɩlɛnɑ ń mʋɣɩ sɑmɑɑ tǝnɑ nɑ pɑ́ɑ́nɑ́ nɑ?
23 Ntɛnɑ Tɑcɑɑ cɔ Moisi sɩ:
24 Heeli sɑmɑɑ nɑ pɑ́ hɑtǝlǝnɑ Kolee nɑ Tɑtɑŋ nɑ Apilɑm pɑ tǝcɑɣɑlɛ.
25 Ḿpʋ́ɣʋ́ Moisi polɑ Tɑtɑŋ nɑ Apilɑm pɑ cɔlɔ. Nɑ Ɩsɛɣɛlɩ nyʋɣʋ nyǝ́mɑ kɛ ɩ wɑɑlɩ.
26 Nɑ ɩ́ heeli sɑmɑɑ sɩ: Ɩ́ hɑtǝlǝnɑ ɑsɑɣɑɑ mpɛ pɑ cokɑ. Ye wei ɩ́ tokinɑ pɑ pʋlʋpʋ pɑ ɩsɑɣɑtʋ kɑ́ kʋ-ɩ.
27 Ntɛnɑ sɑmɑɑ hɑtǝlǝnɑ Kolee pɑ cokɑ. Wɑɑtʋ ɩnɩ Tɑtɑŋ nɑ Apilɑm pɑ ɑlɑɑ, nɑ pɑ lʋlʋɣʋ nyǝ́mɑ lɛlɑɑ pɑɑ tɛmɑ lɩɩʋ, nɑ pɑ́ sǝŋ pɑ nɔnɔɔsɩ.
28 Mpʋɣʋlɛ Moisi tɔmɑ sɩ: Ɩ́ kɑ́ cɛkǝnɑ teu sɩ mɑɑ lɑkɩ pʋlʋ nɑ mɑ mɑɣɑmɑɣɑ mɑ toŋ. Amɑ Tɑcɑɑ tilinɑ-m.
29 Ye yǝlɑɑ pɑnɛ pɑ sǝpɑ pɑ mɑɣɑmɑɣɑ pɑ sǝm, ɩlɛ pǝ tɑɣɑ Tɑcɑɑ tilinɑ-m.
30 Amɑ ye ɩ lɑpɑ piti tǝmlɛ nɑ tɛtʋ hɑɑ nɔɣɔ, nɑ tǝ́ li pɑ́ nɑ pɑ nyǝm tǝnɑ, nɑ pɑ́ tii ɑtɛtǝlɛ tɑɑ nɑ pɑ ɩsɛ, ɩlɛ pǝlɛɣɛlɛ ɩ́ kɑ́ tʋnɑ sɩ pɑ woŋɑ Ɩsɔ.
31 Moisi nɔɣɔ tɑ tɩɩ tiitɑ ɑtɛɣɛ, nɑ tɛtʋ fɑɣɑ yem kɛ pɑ nɔɔhɛɛ tɛɛ.
32 Nɑ tǝ́ li pɑ́ nɑ pɑ ɑlɑɑ, nɑ pɑ piyɑ. Nɑ Kolee wɑɑlɩ nyǝ́mɑ nɑ pɑ nyǝm tǝnɑ.
33 Nɑ pɑ́ tii ɑtɛtǝlɛ tɑɑ. Ɩsɛɣɛlɩ nyǝ́mɑ tɑ tɑsɑ-wɛɣɛ nɑʋ.
34 Lɛlɑɑ mpɑ pɑ kpǝtǝnɑ-wɛ tɔ, pɑ nɩɩ pɑ kɑkiisɑsɩ ɩlɛnɑ pɑ se. Mpi tɔ, pɑ nyɑŋɑɣɑ sɩ tɛtʋ ɩ́ tɑɑ kɔɔ nɑ tǝ́ li mpɛ tɔtɔ.
35 Ḿpʋ́ɣʋ́ Ɩsɔ tisɑ kɔkɔ nɑ kɑ́ nyɑɣɑ yǝlɑɑ ŋmʋnʋɣʋ nɑ nɩɩlɛ nɑ nɑɑnʋwɑ (250) wei ɩ lɑkɑɣɑ tulɑɑlʋ kɔtɑɣɑ tɔ.