18
1 Ḿpʋ́ɣʋ́ Tɑcɑɑ tɔmɑ Alɔŋ sɩ: Ye nyɑnɑ nyɑ́ lʋlʋɣʋ nyǝ́mɑ nɑ nyɑ́ tɛɛtʋnɑɑ Lefii nyǝ́mɑ lɛlɑɑ, ɩ́ wɑkǝlɑ Ɩsɔ cokǝle tɑɑ tǝmlɛ nɑ mǝ kɔtʋɣʋ nyǝntɛ, mǝ nyɔɔŋ tɑɑ kɛ́ pɩɩ tɛ.
2 Wɑɑtʋ wei ɩ́ sʋʋkɩ tǝ tɑɑ kɛ́ tǝmlɛ, ɩlɛnɑ ɩ́ yɑɑ mǝ tɛɛtʋnɑɑ Lefii nyǝ́mɑ nɑ pɑ́ wɛɛ mǝ wɑɑlɩ nyǝ́mɑ, nɑ pɑ́ sǝŋnɑ-mɛ.
3 Pɑɑ lɑ pǝ tǝnɑ mpi n kɑ́ kɛɛsɩ-wɛɣɛ cokǝle pɑɑsǝnɑʋ tɔm tɑɑ tɔ. Amɑ pǝ fɛɩ sɩ pɑ́ tokinɑ Ɩsɔ pʋlʋpʋ yɑɑ kɔtɑɣɑ tǝlɑtɛ. Pǝ́ tɑɑ kɔɔ nɑ mpɛ yɑɑ mǝ tɑɑ nɔɣɔlʋ sɩ.
4 Pɑ tike pɑɑ sǝŋnɑ-mɛɣɛ Ɩsɔ cokǝle tǝmlɛ tɑɑ. Cɑɣɑlʋ nɔɣɔlʋ ɩ kɑɑ kpǝtǝnɑ.
5 Ɩlɛnɑ mɩɩ pɑɑsǝnɑ tǝ nɑ kɔtɑɣɑ tǝlɑtɛ. Ɩlɛ mɑ pɑ́ɑ́nɑ́ kɑɑ tɑsɑ huuu kɛ Ɩsɛɣɛlɩ nyǝ́mɑ tɔɔ.
6 Mɑ lǝsɑ mǝ tɑɑ kɛ́ mǝ tɛɛtʋnɑɑ Lefii nyǝ́mɑ. Ɩlɛnɑ mɑ tɑɣɑnɩ-mɛɣɛ wɛɣɛ hɑʋ sɩ, pɑ́ lɑ tǝmlɛ kɛ Ɩsɔ cokǝle tɑɑ.
7 Amɑ Alɔŋ, nyɑnɑ nyɑ́ lʋlʋɣʋ nyǝ́mɑ mɩɩ lɑ mǝ kɔtʋɣʋ tǝmlɛ kɛ kɑtɛ tɑɑ kɑtɛ tǝcɑɣɑlɛ tɑɑ, kɛ́ pʋʋɣʋ kʋkɑɣɑʋ wɑɑlɩ. Mɑ́ hɑɑkǝnɑ-mɛɣɛ lonte ntɛ́. Ye yʋlʋ kɛ yem kpǝtǝnɑ tǝnɑ, ɩsɩɩ pɑ kʋ-ɩ.
Kɔtǝlɑɑ tǝtɔɣɔlɛ
8 Ḿpʋ́ɣʋ́ Tɑcɑɑ tɔmɑ Alɔŋ sɩ: Nyɑnɑ nyɑ́ lʋlʋɣʋ nyǝ́mɑ ɩ́ tǝnnɑ kɔtɑsɩ nsi Ɩsɛɣɛlɩ nyǝ́mɑ hʋlɑɑ sɩ sɩ kɛ́ mɑ nyǝnsɩ tɔɣɔ tɑm tɔɔ.
9 Kɑtɛ tɑɑ kɑtɛ nyǝm mpi pɑ tɑ nyɑɣɑsɩ kɔkɔ, nɑ pɩɩ pǝsɩ mǝ nyǝm kɛ Ɩsɛɣɛlɩ nyǝ́mɑ kʋcɔɔʋ, nɑ pɑ kʋhɑʋ, nɑ pɑ ɩsɑɣɑtʋ hɩɩsʋɣʋ kɔtɑɣɑ, nɑ pɑ tɑsǝkǝlɛ tɑɣɑnʋɣʋ nyǝŋkɑ tǝnɑ ŋkɑ pɑɑ lɑ-m tɔɣɔlɔ. Wontu kɑtɛ nyǝntʋ ntɩ tǝ pǝsǝɣɩ mǝ nɑ mǝ piyɑ mǝ nyǝm kɛ́.
10 Ɩlɛ mǝ tɑɑ ɑpɑlɑɑ nyǝ́mɑ tike kɑ́ tɔɣɔnɑ kɔtɑɣɑ tɔɣɔnɑɣɑ ŋkɛɣɛ Ɩsɔ lonte tɑɑ.
11-13 Nɑ pǝ́ sɔɔsǝnɑ kʋcɔɔŋ wei Ɩsɛɣɛlɩ nyǝ́mɑ pɑɣɑlɑ-m, nɑ pɑ́ kpɑɑsɩ-m nɑ ɩsɔ nɑ pɑ́ hɑ-m tɔ. Pɑɑ nim kʋpɑm, pɑɑ sʋlʋm kʋpɑm, pɑɑ tɔɣɔnɑɣɑ pee kʋpɑnɑ nnɑ ɑ kɛ́ tɛtʋ kʋlʋlʋm kɑncɑɑlɑɣɑ nyǝm tɔ. Nyɑnɑ nyɑ́ piyɑ piyɑ mǝ nyǝm ntɛ́ tɑm tɔɔ. Nɑ mǝ tɑɑ ɑpɑlɑɑ, nɑ ɑlɑɑ mpɑ pɑ wɛ tǝnɑŋŋ tɔ, pɑ pǝsǝɣɩ nɑ pɑ́ tɔɣɔ.
14 Nɑ pǝ tǝnɑ mpi pǝ kɛ́ mɑ nyǝm tɔ, pǝ tɑɣɑnǝɣɩ mǝ nyǝm kɛ pǝsʋɣʋ tɔtɔɣɔ.
15 Yǝlɑɑ nɑ tɔlɑ kɑncɑɑlɑɣɑ ɑpɑlʋpiyɑ nsi pɑ hɑ-m tɔ sɩ pǝsɑ mɑ nyǝnsɩ kɛ́. Ɩlɛ ɩ́ kɑ́ tɑɣɑnɩ yɑpʋ kɛ yǝlɑɑ nyǝnsɩ nɑ tɔlɑ nnɑ ɑ tɑ mʋnɑ kɔtɑɣɑ tɔ ɑ nyǝnsɩ.
16 Apɑlʋpǝyɑɣɑ ŋkɑ kɑ wɛnɑ ɩsɔtʋ kʋlʋm tɔ, kɑ liɣitee kɑ́ wɛɛ nyǝɣǝtʋ kɑkpɑsɩ kɛ́ nɑ pǝ́ kɛɛsǝnɑ ɩsǝnɑ pɑ mɑɣɑsʋɣʋ Ɩsɔ cokǝle tɑɑ tɔ.
17 Pǝ fɛɩ sɩ, ɩ́ tɑɣɑnɩ yɑpʋ kɛ nɑʋ yɑɑ heu yɑɑ pǝŋ́ kɑncɑɑlɑɣɑ ɑpɑlʋpǝyɑɣɑ. Tɔlɑ ɑnɩ ɑ kɛ́ mɑ nyǝm kɛ́ tǝsiɣisiɣi. Ɩ́ kɑ́ ŋmɩɩsɩ ɑ cɑlǝm kɛ kɔtɑɣɑ tǝlɑtɛ tɔɔ kɛ́. Nɑ ɩ́ wɔ nim cɔlɔ nim cɔlɔɣɔ kɔkɔ. Nɑ mɑ lɑŋlɛ hɛɛnɑ pǝ sɔɔsʋŋ.
18 Ɩlɛnɑ ɑ nɑntʋ pǝsɩ mǝ nyǝntʋ. Teitei ɩsɩɩ pɑ lɑkʋɣʋ ciikuɣu kɔtɑɣɑ, nɑ pɑ́ hʋlǝɣɩ-m lɑŋlɛ nɑ yule ntɔɣɔŋ nyǝntɛ, nɑ hɔɣɔlǝŋ tǝnɑ ɩsɩɩ Ɩsɛɣɛlɩ nyǝ́mɑ lɑkɩ tɔ.
19 Pǝ tǝnɑ mpi Ɩsɛɣɛlɩ nyǝ́mɑ hʋlǝɣɩ-m nɑ hɔɣɔlǝŋ tǝnɑ sɩ kʋcɔɔʋ nɑŋŋ nyǝŋkʋ tɔ. Kʋ pǝsɑ nyɑnɑ nyɑ́ pǝyɑlɑɑ nɑ nyɑ́ pɛɛlɑɑ mǝ nyǝŋkʋ kɛ́. Pǝ kɛ́ tɑm tɔɔ nyǝntʋ kɛ mǝ nɑ mǝ lʋlʋɣʋ nyǝ́mɑ kɛ́, tǝ fɛɩ lɑɣɑsʋɣʋ.
20 Ḿpʋ́ɣʋ́ Tɑcɑɑ tɑsɑ Alɔŋ kɛ heeluɣu tɔtɔ sɩ: N kɑɑ hiki tɛtʋ ɩsɩɩ Ɩsɛɣɛlɩ nyǝ́mɑ lɛlɑɑ. Amɑ mɑɣɑlɛ nyɑ́ tɑɑlɛ nɑ nyɑ́ wɛnɑʋ.
Lefii nyǝ́mɑ nyǝm
21 Hɔɣɔlǝŋ nɑɑnʋwɑ tɑɑ kʋlʋmʋɣʋ ŋku Ɩsɛɣɛlɩ nyǝ́mɑ kɔŋnɑ Tɑcɑɑ tɔɣɔ mɑɑ cɛlɑ Lefii nyǝ́mɑ mpɑ pɑ lɑpɑ Ɩsɔ cokǝle tɑɑ kɛ́ tǝmlɛ tɔ.
22 Sɑmɑɑ kɑɑ kpǝtǝnɑ cokǝle. Pǝ́ tɑɑ kɔɔ nɑ pɑ́ pǝntɩ nɑ pɑ́ sɩ.
23 Lefii nyǝ́mɑ tike kɑ lɑkǝnɑ cokǝle tɑɑ tǝmlɛ. Ye pɑ pǝntɑɑ pǝ́ wɛɛ pɑ nyɔɔŋ tɑɑ. Pɑ kɑɑ wɛɛnɑ tɛtʋ ɩsɩɩ kpekɑ lɛnnɑ. Ɩ́ tɔkɩ kʋsǝsɩɩtʋ tǝnɛɣɛ tɑm tɔɔ.
24 Amɑ mɑɑ cɛlɑ-mɛɣɛ hɑtǝmʋtʋ hɔɣɔlǝŋ nɑɑnʋwɑ tɑɑ kʋlʋmʋɣʋ, ŋku Ɩsɛɣɛlɩ nyǝ́mɑ lɑpɑ-m kɔtɑɣɑ nɑ pɑ́ kpɑɑsɩ-m nɑ ɩsɔ tɔ. Pǝ tɔɔ kɛ́ mɑ heelɑ-mɛ sɩ, ɩ́ kɑɑ hiki tɛtʋ ɩsɩɩ kpekɑ lɛnnɑ.
25 Ḿpʋ́ɣʋ́ Tɑcɑɑ tɔmɑ Moisi sɩ:
26 Tɛlǝsɩ Lefii nyǝ́mɑ sɩ, ye Ɩsɛɣɛlɩ nyǝ́mɑ kɔnɑ-mɛɣɛ pɑ hɑtǝmʋtʋ hɔɣɔlǝŋ nɑɑnʋwɑ tɑɑ kʋlʋmʋɣʋ ŋku mɑ hɑ-wɛ tɔ, ɩlɛ mɩɩ lǝsɩ pǝ tɑɑ kɛ́ hɔɣɔlǝŋ nɑɑnʋwɑ tɑɑ kʋlʋmʋɣʋ tɔtɔ nɑ ɩ́ cɛlɛ-m.
27 Nɑ pǝ́ wɛɛ ɩsɩɩ mǝ tɛɛtʋnɑɑ lǝsʋɣʋ pɑ hɑtǝmʋtʋ nɑ pɑ lɛsɛŋnɑɑ tɔɔ tɔ.
28 Tǝnɑɣɑ mǝ hikiɣinɑ mǝ kʋhɑʋ nɑ ɩ́ kɔnɑ-m nɑ ɩ́ cɛlǝɣɩ Alɔŋ-wɛ.
29 Kʋcɔɔŋ wei ɩ tǝnɑ ɩ́ hikiɣi tɔ, ɩ tɑɑ kɛ́ ɩ́ kɑ́ lǝsɩ tǝpɑntɛ nɑ ɩ́ cɛlɛ-m.
30 Ye ɩ́ tɛmɑ lǝsʋɣʋ kɛ mɑ nyǝm, ɩlɛ ɩ́ sɩɩ mǝ tǝɣɩ kʋkɑɑsǝm. Ɩsɩɩ mǝ tɛɛtʋnɑɑ kɑɑsʋɣʋ pɑ tǝɣɩ hɑtǝmʋtʋ nɑ lɛsɛŋnɑɑ tɔ.
31 Tǝmlɛ nte ɩ lɑkɩ cokǝle tɑɑ tɔ tǝ kʋfɛlʋɣʋ ntɛ́. Ɩlɛ pɑɑ timpiɣi mǝ nɔkɑɑ mǝnɑ mǝ tɛɛsɩ nyǝ́mɑ ɩ́ pǝsǝɣɩ nɑ ɩ́ tɔɣɔ pǝ tɔɣɔnɑɣɑ.
32 Ye ɩ́ tɑ́ lǝsɩ-m tǝpɑntɛ, ɩlɛnɑ pǝ́cɔ́ ɩ́ tɔɣɔ kʋkɑɑsǝm, ɩ́ pilisɑ Ɩsɛɣɛlɩ nyǝ́mɑ kɔtɑɣɑ kɛ́. Mǝ tɔm kɑ́ sɩ nɑ pǝ́ ponɑ-mɛɣɛ sǝm tɑɑ.