4
Kehɑtɩ lʋlʋŋ nyǝ́mɑ tǝmɑ
1 Ḿpʋ́ɣʋ́ Tɑcɑɑ tɔmɑ Moisi nɑ Alɔŋ sɩ:
2-3 Ɩ́ ŋmɑɑ Lefii kpekǝle tʋ Kehɑtɩ lʋlʋɣʋ nyǝ́mɑ mpɑ pɑ pɩɩsɩ tɑlɑ hiu nɑ nɑɑnʋwɑ, nɑ pǝ́ polo nɩɩlɛ nɑ nɑɑnʋwɑ tɔ pɑ hǝlɑ. Pɑ́ kpɑ mpɑ pɑ pǝsǝɣɩ nɑ pɑ́ lɑ tǝmlɛ kɛ Ɩsɔ cokǝle tɑɑ tɔ.
4 Nɑ pɑ́ pɑɑsǝɣǝnɑ kɑtɛ tɑɑ kɑtɛ wontu.
5 Ye pɑ cɑɑ tǝsikile kɛ lɑɣɑsʋɣʋ, ɩlɛ Alɔŋ nɑ ɩ pǝyɑlɑɑ pɑ kɔɔ nɑ pɑ́ tisi pʋʋɣʋ kʋkɑɣɑʋ nɑ pɑ́ tɑkɩ Ɩsɔ ɑtɑkɑɑ tɔɔ.
6 Ɩlɛnɑ pɑ́ tǝnɩ pǝ tɔɔ kɛ́ tɔnʋɣʋ tɛɛlǝŋ nyǝŋkʋ nɑkʋlɩ. Nɑ pɑ́ wɑɑsɩ-ɩ heeŋ hʋntʋ pʋʋɣʋ ŋku pɑ lii ɑkpɑɑyɑlɑ tɔ, nɑ pɑ́ sʋsɩ ɩ kpɑtǝŋ kʋtɔkǝŋ.
7 Nɑ pɑ́ tɑkɩ heeŋ hʋntʋ pʋʋɣʋ ŋku pɑ lii ɑkpɑɑyɑlɑ tɔɣɔ Ɩsɔ potopotonɑɑ tɑɑpǝlɩ tɔɔ. Nɑ pɑ́ sɩɩ nyǝnɑsɩ, nɑ kɔpʋnɑɑ, nɑ poosiyɑnɑɑ, nɑ fusi nsi pɑ liisiɣinɑ sʋlʋm tɔ. Nɑ pɑ́ sɩɩ tɔtɔɣɔ potopotonɑɑ mpɑ pɑ hɑɑkɩ Ɩsɔ kɛ́ tɑm tɔɔ tɔ.
8 Ɩlɛnɑ pɑ́ wɑɑsɩ-ɩ heeŋ hʋntʋ pʋʋɣʋ ŋku pɑ lii ɑkpɑɑyɑlɑ tɔ nɑ pɑ́ tǝnɩ pǝ tɔɔ kɛ́ tɔnʋɣʋ tɛɛlǝŋ nyǝŋkʋ nɑkʋlɩ. Ɩlɛnɑ pɑ́ lɛɛ tɑɑpǝlɩ kɛ kpɑtǝŋ wei pɑ kpɑkǝɣǝnɑ-ɩ tɔ.
9 Nɑ pɑ́ wɑɑsɩ pʋʋɣʋ pooku kɛ fǝtǝlɑnɑɑ tǝsɩɩlɛ nɑ tǝ fǝtǝlɑnɑɑ. Nɑ wontu tǝnɑ tɔɔ, ɩsɩɩ kpǝtǝlɑsɩ nɑ tɔlʋmɑ nyǝnɑsɩ nɑ nim fusi.
10 Ɩlɛnɑ pɑ́ tʋ́ pǝ tǝnɑɣɑ tɔnʋɣʋ tɛɛlǝŋ nyǝŋkʋ nɑkʋlɩ kʋ tɑɑ, nɑ pɑ́ sɩɩ kpɑtǝlɛ nte pɑ kpɑkǝɣǝnɑ wontu tɔ tǝ tɔɔ.
11 Nɑ pɑ́ tɑkɩ ɑkpɑɑyɑlɑ pʋʋɣʋ kɛ wʋlɑ kɔtɑɣɑ tǝlɑtɛ tɔɔ. Nɑ pɑ́ wɑɑsɩ-tɛɣɛ tɔnʋɣʋ tɛɛlǝŋ nyǝŋkʋ, nɑ pɑ́ sʋsɩ kpɑtǝŋ wei pɑ kpɑkǝɣǝnɑ-tɛ tɔ.
12 Ɩlɛnɑ pɑ koti ɩsɔ sɛɛʋ wontu tǝnɑ, nti pɑ lɑkǝnɑ cokǝle tɑɑ tɔɣɔ ɑkpɑɑyɑlɑ pʋʋɣʋ tɑɑ. Nɑ pɑ́ wɑɑsɩ tɔnʋɣʋ tɛɛlǝŋ nyǝŋkʋ nɑ pɑ́ tǝnɩ kpɑtǝlɛ nte pɑ kpɑkǝɣǝnɑ-tɩ tɔ tǝ tɔɔ.
13 Nɑ pɑ́ hɑsɑ kɔtɑɣɑ tǝlɑtɛ tɔɔ tɔlʋmɑ, nɑ pɑ́ pɔ pʋʋɣʋ kʋsɛɛmʋɣʋ.
14 Nɑ pɑ́ tǝnɩ pǝ tɔɔ kɛ́ wontunɑɑ mpɑ pɑ lɑkǝnɑ kɔtɑɣɑ tǝlɑtɛ tɔ. Ɩsɩɩ cofolonɑɑ kelɑ lɔɣɔlɑsɩ, nɑ sɔsɔɔnsɩ nsi pɑ kuukinɑ tɔlʋmɑ tɔ. Nɑ poosiyɑnɑɑ nɑ wontu kʋlɑpǝnɑtʋ tǝnɑ. Nɑ pɑ́ tɑkɩ tɔnʋɣʋ tɛɛlǝŋ nyǝŋkʋ kɛ pǝ tɔɔ. Ɩlɛnɑ pɑ́ sʋsɩ kpɑtǝŋ wei pɑ kpɑkǝɣǝnɑ-tɛ tɔ.
15 Ye pǝ tɑlɑ tɛɛʋ, pǝ wɛɛ sɩ Alɔŋ nɑ ɩ pǝyɑlɑɑ pɑ́ tɛ pǝ tǝnɑɣɑ tɑkʋɣʋ. Ɩlɛnɑ Kehɑtɩ nyǝ́mɑ kɔɔ nɑ pɑ́ kpɑɣɑ. Mpi tɔ, pǝ fɛɩ sɩ pɑ́ tokinɑ Ɩsɔ wontuɣu nɑkʋlɩ nɑ pǝ́ kɔɔ nɑ pɑ́ sɩ. Pɛlɛ pɑ tǝmlɛ ntɛ́ cokǝle wontu kpɑɣɑʋ.
16 Kɔtʋlʋ Alɔŋ pǝyɑlʋ Ɩlɑsɑɑ tǝmlɛ ntɛ́ fǝtǝlɑ sɔsɔ nim nɑ tulɑɑlʋ wɔpʋ. Nɑ pɑɑ ɩfemle nte tǝ tɔɣɔnɑɣɑ kʋhɑʋ nɑ kɔtɑɣɑ nim, nɑ Ɩsɔ cokǝle tɑɑ wontu tǝnɑ pɑɑsǝnɑʋ.
17 Ḿpʋ́ɣʋ́ Tɑcɑɑ tɑsɑ Moisi nɑ Alɔŋ kɛ heeluɣu sɩ:
18-19 Ɩ́ feŋ Kehɑtɩ nyǝ́mɑ kɛ teu, kɛ wɑɑtʋ wei pɑ pɑɑsǝɣǝnɑ Ɩsɔ wontu tɔ. Pǝ tɑɑ kɔɔ nɑ pǝ́ kpiisi-wɛɣɛ Lefii nyǝ́mɑ hɛkʋ. Mpi tɔ, pǝ wɛɛ sɩ Alɔŋ nɑ ɩ pǝyɑlɑɑ pɑ́ sʋʋnɑ-wɛɣɛ cokǝle tɑɑ, nɑ pɑ́ hʋlǝɣɩ pɑɑ wei kɛ wontu nti ɩ kɑ́ kpɑɣɑ tɔ.
20 Ye pɑ sʋʋwɑ, nɑ pɑ́ loosi loosuɣu mɑɣɑmɑɣɑ kɛ Ɩsɔ wontu, nɑ pɑ́ tɑ hɔkǝtɑ-tɩ pɑɑ sɩ.
Kɛɛsɔŋ lʋlʋŋ nyǝ́mɑ tǝmɑ
21 Ḿpʋ́ɣʋ́ Tɑcɑɑ heelɑ Moisi sɩ:
22 Kɑlɑ Kɛɛsɔŋ lʋlʋɣʋ nyǝ́mɑ nɑ pɑ tɛɛsɩ yǝlɑɑ.
23 Ɩlɛnɑ ń ŋmɑɑ ɑpɑlɑɑ mpɑ pɑ pɩɩsɩ tɑlɑ hiu nɑ nɑɑnʋwɑ nɑ pǝ́ polo nɩɩlɛ nɑ nɑɑnʋwɑ nɑ pɑ́ pǝsǝɣɩ nɑ pɑ́ lɑ Ɩsɔ cokǝle tɑɑ kɛ tǝmlɛ tɔ pɑ hǝlɑ.
24 Tǝmɑ wenɑ pɑɑ tʋ-wɛ nɑ pɑ́ lɑkɩ tɔɣɔlɛ,
25 pɔɔŋ wei pɑ tɑkǝɣɩ Ɩsɔ cokǝle tɔɔ tɔ. Nɑ ɩwɑɑŋ tɔnǝŋ, nɑ tɔnʋɣʋ tɛɛlǝŋ nyǝŋkʋ ŋku kʋ wɑɑsɑ pǝ tǝnɑ pǝ tɔɔ tɔ. Nɑ cokǝle nɔnɔɣɔ pʋʋɣʋ.
26 Nɑ kɑlɑɑ pʋʋɣʋ nɑ ɩ nɔnɔɣɔ nyǝŋkʋ nɑ pǝ ŋmɩɩsɩ, nɑ pɑ́ lɑkɩ pǝ tɑɑ wontu tǝnɑ tǝmlɛ.
27 Alɔŋ nɑ ɩ pǝyɑlɑɑ pɑ hʋlǝɣǝnɑ Kɛɛsɔŋ nyǝ́mɑ kɛ pɑ kʋlɑpǝm nɑ pɑ kʋkpɑɣɑm tǝnɑ nɑ pɑ pɑɑsǝɣǝnɑ-wɩ.
28 Kɛɛsɔŋ nyǝ́mɑ tǝmɑ ntɛ́ Ɩsɔ cokǝle tɑɑ. Kɔtʋlʋ Alɔŋ pǝyɑlʋ Ɩtɑmɑɑ kɑ feŋiɣinɑ pɑ tǝmlɛ tɔɔ.
Melɑli lʋlʋŋ nyǝ́mɑ tǝmɑ
29 Ḿpʋ́ɣʋ́ Tɑcɑɑ tɑsɑ Moisi kɛ heeluɣu sɩ: Kɑlɑ tɔtɔɣɔ Melɑli lʋlʋɣʋ nyǝ́mɑ nɑ pɑ tɛɛsɩ nyǝ́mɑ kɛ
30 pǝ kpɑɣɑʋ ɑpɑlɑɑ mpɑ pɑ pɩɩsɩ tɑlɑ hiu nɑ nɑɑnʋwɑ nɑ pǝ́ polo nɩɩlɛ nɑ nɑɑnʋwɑ tɔ pɑ hǝlɑ nɑ ń kpɑ mpɑ pɑ pǝsǝɣɩ nɑ pɑ́ lɑ tǝmlɛ kɛ Ɩsɔ cokǝle tɑɑ tɔ.
31 Pɑ tǝmɑ kʋlɑpɛɛ ntɛ́ cokǝle kpɑtǝŋ kʋwɑlǝŋ, nɑ kʋkɑɣɑŋ, nɑ tesikɑsɩ, nɑ sɩ tɑpǝŋ tɛɛ nyǝɣǝtʋ kʋtemtu,
32 nɑ kɑlɑɑ tesikɑsɩ nɑ sɩ tɑpǝŋ tɛɛ nyǝɣǝtʋ kʋtemtu, nɑ kɑŋkɑnɑsɩ, nɑ pǝ ŋmɩɩsɩ nɑ pǝ wontunɑɑ tǝnɑ. Kɔtǝlɑɑ kɑ́ ŋmɑɑnɑ wontuɣu ŋku pɑɑ wei ɩ kɑ sǝɣǝlɩ tɔɣɔ tɑkǝlɑɣɑ tɑɑ.
33 Tǝmɑ wenɑ pǝ tʋ Melɑli lʋlʋɣʋ nyǝ́mɑ kɛ Ɩsɔ cokǝle tɑɑ tɔɣɔlɛ, nɑ kɔtʋlʋ Alɔŋ pǝyɑlʋ Ɩtɑmɑɑ nɑ́ɑ́ feŋiɣi pɑ tɔɔ.
Lefii kpekǝle tǝmlɑtɑɑ kʋkɑlʋɣʋ
34-49 Ḿpʋ́ɣʋ́ Moisi nɑ Alɔŋ nɑ Ɩsɛɣɛlɩ kpekǝle nyʋɣʋ nyǝ́mɑ kɑlɑ Lefii kpekǝle nyǝ́mɑ Kehɑtɩ, nɑ Kɛɛsɔŋ, nɑ Melɑli, pɑ lʋlʋŋ, nɑ pɑ tɛɛsɩ ɑpɑlɑɑ mpɑ pɑ tɑlɑ pɩɩsɩ hiu nɑ nɑɑnʋwɑ, nɑ pǝ́ polo nɩɩlɛ nɑ nɑɑnʋwɑ tɔ pɑ hǝlɑ. Nɑ pɑ́ tʋ pɑɑ wei kɛ tǝmlɛ kɛ Ɩsɔ cokǝle tɑɑ. Ḿpʋ́ɣʋ́ Moisi kɑlɑ-wɛ ɩsɩɩ Tɑcɑɑ tʋɣɩ-ɩ tɔ. Ɩlɛnɑ Kehɑtɩ nyǝ́mɑ kpɛntɩ iyisi nɑɑlɛ nɑ nɑsǝtoso nɑ nɩɩnʋwɑ nɑ nɩɩlɛ nɑ nɑɑnʋwɑ (2750). Kɛɛsɔŋ nyǝ́mɑ kɛ iyisi nɑɑlɛ nɑ nɑsǝtoso nɑ hiu nɑ nɑɑnʋwɑ (2630). Melɑli nyǝ́mɑ kɛ iyisi tooso nɑ ŋmʋnʋɣʋ (3200). Ɩlɛnɑ pɑ tǝnɑ pɑ kpɛntɩ iyisi pǝlefɛɩ nɑɑnʋwɑ nɑ nɑsǝlɛ nɑ nɩɩnʋwɑ nɑ nɩɩnɑɑsɑ (8580). Ḿpʋ́ɣʋ́ pɑ hʋlɑ pɑɑ Lefii tʋ wei kɛ́ ɩ tǝmɑ kʋlɑpɛɛ, nɑ ɩ kʋsǝɣǝlǝm kɛ teitei, ɩsɩɩ nti Tɑcɑɑ kɑ tʋ Moisi tɔ.