6
Mpɑ pɑ hɑ pɑ tǝɣɩ Ɩsɔ tɔ pɑ kiiŋ
1 Ḿpʋ́ɣʋ́ Tɑcɑɑ tɔmɑ Moisi sɩ:
2 Tɛlǝsɩ Ɩsɛɣɛlɩ yǝlɑɑ sɩ, ye ɑpɑlʋ yɑɑ ɑlʋ ɩ́ sɩɩ nɔɣɔ sɩ ɩ hɑɑkɩ ɩ tǝɣɩ Ɩsɔ tǝmlɛ nɑtǝlɩ tǝ tɑɑ,
3 pǝ wɛɛ sɩ ɩ́ kii sʋlʋm. Pɑɑ lɛsɛŋ sʋlʋm toŋ nyǝm. Pǝyele ɩ́ tɑɑ tɩɩ tǝŋ lɛsɛŋ pee lʋm nyǝnɑ yɑɑ kʋwʋlɛɛ.
4 Pǝ tɩɩ fɛɩ sɩ ɩ́ tɩɩ tǝŋ lɛsɛŋ pʋlʋpʋ.
5 Pǝ́cɔ́ hʋnʋɣʋ kɑɑ kpɑ ɩ nyʋɣʋ tɑɑ, yɑɑ ɩ tɑntʋɣʋ tɔɔ. Pǝ tǝnɑ pɩɩ su ḿpʋ́ɣʋ́, hɑlǝnɑ pǝ kʋyɛɛŋ sɩɩ tǝnɑɣɑ.
6 Pǝ fɛɩ sɩ ɩ́ kpǝtǝnɑ sǝtʋ nɔɣɔlʋɣʋ wɑɑtʋ ɩnɩ ɩ tɑɑ.
7 Pɑɑ ɩ cɑɑ, yɑɑ ɩ too, yɑɑ ɩ tɑɑlʋ. Mpi tɔ, ɩ tɛmɑ ɩ tǝɣɩ Tɑcɑɑ tǝmlɛ tɑɑ kɛ́ hɑʋ kɛ́. Nɑ ḿpʋ́ɣʋ́ ɩ nyɔɔsɩ kʋtɑɣɑlɑsɩ hʋlǝɣɩ.
8 Ɩ pǝsɑ Ɩsɔ nyǝŋ kɛ ɩ nɔɣɔ sɩɩʋ wɑɑtʋ tǝnɑɣɑ.
9 Ye sǝm tutɑ nɔɣɔlʋɣʋ ɩ kɔŋkɔŋ tɑɑ, nɑ pǝ́ pilisi ɩ nyɔɔsɩ yeluɣu mpɩ kʋyɛɛŋ nɑɑtosompɔɣɔlɑɣɑ kɛ ɩ cɑkɩ, ɩlɛnɑ ɩ́ looli ɩ nyʋɣʋ.
10 Tɛʋ feŋ ɩlɛnɑ, ɩ́ kɔnɑ kɔtʋlʋ kɛ ɩhokɑsɩ, yɑɑ ɑlukukunɑɑ nɑɑlɛɣɛ Ɩsɔ cokǝle nɔnɔɣɔ.
11 Ɩlɛnɑ kɔtʋlʋ lɑ lɛlʋ kɛ ɩsɑɣɑtʋ hɩɩsʋɣʋ kɔtɑɣɑ, nɑ lɛlʋ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ. Nɑ ɩ́ lɑpɩ-ɩ pǝ kɔtɑɣɑ nɑ pǝ́ hɩɩsɩ ɩ tɔɔ kɛ́ sǝtʋ ɑsilimɑ. Ɩlɛ ɩ ɑsilimɑ tɛmɑɣɑlɛ kʋyɑŋku.
12 Ɩlɛnɑ pʋntʋ tɑsɑ ɩ nɔɣɔ sɩɩʋ, nɑ ɩ́ lɑ pǝnɑɣɑ kʋlʋmɑɣɑ ɩwǝyɑɣɑ kɛ tɑsǝkǝlɛ tɑɣɑnʋɣʋ kɔtɑɣɑ. Pǝ fɛɩ sɩ ɩ́ kɑlǝnɑ kɑncɑɑlɑɣɑ kʋyɛɛŋ kɛ ɩ́lɛ́ ɩ kɑ pilisɑɑ tɔ pǝ tɔɔ.
13 Wei ɩ sɩɩ ḿpʋ́ɣʋ́ nɔɣɔ tɔ, ye kʋyɑŋku ɩ kʋyɛɛŋ tɛmɑ, ɩ puki Ɩsɔ cokǝle nɔnɔɣɔ kɛ́.
14 Nɑ ɩ́ lɑ Tɑcɑɑ kɛ kɔtɑɣɑ kɛ ɩwɑɑʋ kʋlʋmʋɣʋ, nɑ pǝnɑɣɑ kʋlʋmɑɣɑ ɩwɛɛsɩ nsi sɩ tiili tɑ cɑɑmɩ tɔɣɔ nɑɑlɛ. Apɑlʋ nyǝŋkɑ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ, nɑ ɑlʋ nyǝŋkɑ kɛ ɩsɑɣɑtʋ hɩɩsʋɣʋ kɔtɑɣɑ. Nɑ ɩwɑɑʋ ŋku kʋ tiili tɑ cɑɑmɩ tɔɣɔ ciikuɣu nyǝŋkɑ.
15 Nɑ ɩ́ kɔnɑ kʋkʋsʋm fɛɩ kɑkɑlɑsɩ nsi sɩ somtu pɑ nuɣutinɑ nim, nɑ pɑ́ tʋ tɔ. Nɑ nsi sɩ tɔɔ pɑ yɔɣɔlɑ nim tɔɣɔ tɔkʋ. Nɑ tɔɣɔnɑɣɑ kʋhɑʋ nɑ pǝ sʋlʋm mpi pɑɑ liisi tɔ.
16 Ɩlɛnɑ kɔtʋlʋ ponɑ pǝ tǝnɑɣɑ ḿpʋ́ɣʋ́ Tɑcɑɑ, nɑ ɩ́ lɑ́ ɩsɑɣɑtʋ hɩɩsʋɣʋ kɔtɑɣɑ, nɑ ŋkɑ kɔkɔ lusɑ kɑ tǝnɑ tɔ.
17 Nɑ ɩwɑɑʋ kɛ ciikuɣu nyǝŋkɑ, nɑ pǝ kʋkʋsʋm fɛɩ kɑkɑlɑsɩ tɔkʋ. Pǝ wɑɑlɩ kɛ́ tɔɣɔnɑɣɑ kɔtɑɣɑ nɑ sʋlʋm.
18 Ɩlɛnɑ nɔɣɔ sɩɩlʋ looli ɩ nyʋɣʋ kɛ cokǝle nɔnɔɣɔ tǝnɑ, nɑ ɩ́ tʋ́ ɩ nyɔɔsɩ kɛ ciikuɣu kɔtɑɣɑ kɔkɔ tɑɑ.
19 Pǝ wɑɑlɩ ɩlɛnɑ kɔtʋlʋ kpɑɣɑ ɩwɑɑʋ hɑmʋɣʋ ŋku pɑ tǝsɑɑ tɔ. Nɑ kʋkʋsʋm fɛɩ kɑkɑlɑsɩ wɑɑnɩ wɑɑnɩ kɛ tɔm nɑɑlɛ, nɑ ɩ́ tʋ́ nɔɣɔ sɩɩlʋ niŋ tɑɑ kɛ wɑɑtʋ wei ɩ tɛmɑ ɩ nyʋɣʋ looluɣu tɔ.
20 Ɩlɛnɑ kɔtʋlʋ tɑɣɑnɩ-tǝɣɩ Ɩsɔ kɛ́ pɑɣɑlʋɣʋ ɩsɩɩ kɔtǝlɑɑ lɑkɩ tɔ. Nɑ tɔɣɔnɑsɩ nsɩ sɩ pǝsɩ ɩ nyǝnsɩ. Nɑ pǝ́ sɔɔsǝnɑ lɑŋlɛ nɑ yule.
21 Yʋlʋ wei ɩ sɩɩkɩ nɔɣɔ sɩ ɩ hɑɑkɩ ɩ tǝɣɩ Ɩsɔ tɔ pǝ sɔɔsɩ ntɛ́. Ɩ́ nɔkɑɑ ɩ sɔɔsɩ pǝ tɔɔ. Amɑ pǝ wɛɛ kɛ́ sɩ ɩ́ lɑ mpi pǝ tǝnɑ ɩ kɑ sɩɩwɑ tɔ.
Koolee kʋpɑnɑ
22 Ḿpʋ́ɣʋ́ Tɑcɑɑ tɔmɑ Moisi sɩ:
23 Kɛɛsɩ Alɔŋ nɑ ɩ pǝyɑlɑɑ sɩ, koolee nnɑ pɑɑ kooliɣi Ɩsɛɣɛlɩ nyǝ́mɑ tɔɣɔlɛ sɩ:
24 Tɑcɑɑ ɩ́ kooli-mɛɣɛ kʋpɑntʋ nɑ ɩ́ kenti mǝ tɔɔ.
25 Nɑ ɩ́ nyǝnɩ-mɛɣɛ teu nɑ ɩ́ lɑkɩ-mɛɣɛ pɛɛlɛɛ.
26 Nɑ ɩ́ wɛɛ mǝ wɑɑlɩ nɑ pǝ́ cɑɣɑnɑ-mɛ.
27 Ḿpʋ́ɣʋ́ pɑɑ yɑɑkɩ mɑ hǝtɛ kɛ Ɩsɛɣɛlɩ yǝlɑɑ tɔɔ. Ɩlɛnɑ mɑ́ɑ́ kooliɣi-mɛɣɛ kʋpɑntʋ.