104
Nmɑlʋ Ɩsɔ nyɑnɑ təmlɛ
1 Mɑ sɑŋ Tɑcɑɑ kɛ́.
Mɑ Ɩsɔ nyɑ́ sɔsɔɔntʋ fɛɩ tənɑɣɑ.
N suu teu sɔsɔɔm kɛ́.
2 N suu nyɑɑləm kɛ́ ɩsɩɩ kpɑɩ,
nɑ ń lɔ ɩsɔtɔnʋɣʋ ɩsɩɩ cokəle.
3 Hɑtoo ɩsɔtɑɑ nyʋɣʋ tɑɑ kɛ́ n ŋmɑ nyɑ́ təcɑɣɑlɛ.
Ɩsɔŋmʋntʋ ntɛ́ nyɑ́ yoou kɛɛkɛ nɑ heelim tɛɛkənɑ-ŋ.
4 Heelim ntɛ́ nyɑ́ tillɑɑ
nɑ nyɑ́ təmlɛ tʋ ntɛ́ kɔkɔ.
5 N sɩ́ɩ́ tɛtʋ kɛ tə kite tɔɔ kɛ́ teu kɛ́.
Pʋlʋpʋ kɑɑ ciɣiti-təɣɩ pɑɑ pə́cɔ.
6 N wɑɑsɑ teŋku kɛ́ tə tɔɔ ɩsɩɩ kpɑɩ
nɑ lʋm nɑ́ɑ́ kpɑ pulɑsɩ.
7 Amɑ n nyɑɑsɑ-wɩ nɑ pə́ se,
pə nɩ́ɩ́ nyɑ́ tɛʋ holɑ nɑ pə́ tʋ cɑsəlɛ.
8 Ɩlɛnɑ pulɑsɩ nyɩɩ nɑ tɛtɛkɑ nɑ́ɑ́ lum
lonɑ wenɑ n kɑ sɩɩwɑ tɔ ɑ tɑɑ.
9 N pɩ́ɩ́ lʋm kɛ tənɑɣɑ sɩ pə́ tɑɑ ŋmɑɑ kɑ tɔɔ
nɑ pə́ kɔɔ pə tɑsɑ tɛtʋ wɑɑsʋɣʋ.
10 Nyɑ́ təŋsənɑ lʋm sɛɛlɑɑ kɛ lɔɔŋ
nɑ pə́ kpeŋ pulɑsɩ hɛkəŋ.
11 Tənɑɣɑ tɑɑlɛ wontu tənɑ nyɔɔkɩ
nɑ tɑɑlɛ kpɑŋɑsɩ nɑ́ɑ́ kʋɣɩ sɩ lʋkɔtʋ.
12 Ɩlɛnɑ sumɑsɩ sʋʋkɩ lɔɔŋ ɩnɩ ɩ kʋtemiŋ tɩɩŋ tɔɔ
nɑ sɩ wiiki piliŋɑsɩ tɔɔ.
13 Hɑtoo nyɑ́ ɩsɔtɑɑ tənɑɣɑ n yeki nɑ tɛʋ nɩɩkɩ pɔɔŋ tɔɔ,
nɑ tɛtʋ nɑ́ɑ́ hɑkɩ nyɑ́ təmɑ kʋlʋlʋm.
14 N yeki nɑ nyɩɩtʋ nyɔɔkɩ sɩ pə́ wɑɑsɩ tɔlɑ
nɑ tɩɩŋ nɑ́ɑ́ nyɔɔkɩ sɩ pə wɑɑsɩ yʋlʋ.
N lɑpɑ ḿpʋɣʋ sɩ tɛtʋ ɩ́ lʋlɩ
mpi pə hɑɑkɩ yʋlʋ kɛ weesuɣu tɔ.
15 N lɑpɑ sʋlʋm sɩ pə́ hɛɛsɩ yʋlʋ lɑŋlɛ.
Nɑ ń lɑ nim sɩ pə tɑɣɑnəɣɩ ɩsɛntɑɑ.
Ɩlɛnɑ mʋtʋ nɑ́ɑ́ hɑ yʋlʋ kɛ ɑlɑɑfəyɑ.
16 Tɑcɑɑ nyɑ́ tuunɑ Lipɑŋ tɩɩŋ sɔsɔɔŋ.
Ɩ hikiɣi lʋm mpi ɩ cɑɑkɩ tɔ.
17 Tɩɩŋ ɩnɩ ɩ tɔɔ kɛ́ sumɑsɩ səkpesi tʋɣɩ sɩ tɑnɑ
nɑ sumɑsɩ sɔsɔɔnsɩ nɑ́ɑ́ cɑkɩ ɩ tɔɔ.
18 Tɑɑlɛ pəntʋlʋŋ təcɑɣɑlɛ ntɛ́ pɔɔŋ sɔsɔɔŋ tɔɔ
nɑ pʋɣʋ nɑmisi nɑ́ɑ́ cɑkɩ kʋkpɑməŋ tɛɛ.
19 N lɑpɑ ɩsɔtʋ kɛ sɩ ɩ́ fɑɣɑ kʋyɛɛŋ,
ilim nyəmɑ́ pə tʋɣʋ wɑɑtʋ.
20 N kɔŋnɑ səkpɛtʋɣʋ ɩlɛnɑ pə́ yu,
nɑ hɔtʋɣʋ tɑɑ wontu sʋʋ tə təmɑ tɑɑ.
21 Tɔɣɔlɑsɩ kʋfɑsɩ nyɩɩsəɣɩ sɩ tɔɣɔnɑɣɑ wɑɑlɩ
nɑ sɩ́ sələməɣɩ Ɩsɔ nyɑɣɑ sɩ kʋtɔɣɔʋ.
22 Wɑɑtʋ wei ilim lɩɩkɩ ɩlɛnɑ
sɩ́ məlɩ nɑ sɩ́ həntɩ sɩ pɔɔŋ tɑɑ.
23 Ɩlɛnɑ yʋlʋ nɑ́ɑ́ lɩɩ nɑ ɩ́ tɛɛ ɩ təmlɛ
nɑ ɩ́ lɑ-tɛɣɛ mpʋ hɑlənɑ tɑɑnɑɣɑ.
24 Hɑɩ, Tɑcɑɑ, nyɑ́ kʋlɑpəlɛ tɔɔwɑ pɑɣɑlɛ kɛ́,
nɑ ləmɑɣɑsɛɛ kɛ n lɑpənɑ pə tənɑ.
Nyɑ́ kʋpɑmpɑm sunɑ tɛtʋ tɑɑ.
25 Teŋku kɔlɔ təlelele, ɩ fɛɩ tənɑɣɑ,
nɑ ɩ tɑɑ wontu sɔsɔɔntʋ nɑ səkpetu cɔɔkɩ,
tə fɛɩ kɑlʋɣʋ.
26 Ɩ tɑɑ tɔtɔɣɔ kpɩɩləŋ sɔsɔɔŋ nɑ́ kpɑɑkɩ nɑ ɩ́ tiiki,
nɑ tʋm sɔsɔ Lefiyɑtɑŋ wei n lɑpɑ sɩ n liɣiliɣinɑ teŋku holɑ tɑɑ tɔ.
27 Nyɑɣɑ wontu ntɩ tə tənɑ tə tɛɛləɣɩ
sɩ ń cɑləɣɩ-təɣɩ tə tɔɣɔʋ wɑɑtʋ.
28 Ń hɑ-tɩ ɩlɛ tə mʋ.
Ń kulɑ nyɑ́ niŋ ɩlɛ kʋpɑntʋ tɔɔlənɑ-tɩ.
29 Ń hɑ-təɣɩ siɣile ɩlɛ tə sʋʋ seluɣu.
Ye n ləsɑ tə feesiŋ ɩlɛ tə hɛɛ nɑ tə́ pəsɩ ɑtɛ mʋsʋɣʋ.
30 Ń mələnɑ tə feesiŋ ɩlɛ tə tɑɣɑnɩ kʋlʋɣʋ
nɑ tə tənɑ tə́ pəsɩ kʋfɑm kɛ tɛtʋ tɔɔ.
31 Tɑcɑɑ nyɑ́ teu ɩ́ wɛɛ tɑm tɔɔ,
nɑ ń yɔɔlənɑ nyɑ́ kʋlɑpəm.
32 Ń nyənɑ tɛtʋ tə seliɣi kɛ́,
nɑ ye n tokinɑ pɔɔŋ ɩlɛ nyɔɔsɩ nyɑlɑ ɩ tɔɔ.
33 Tɑcɑɑ nyɑɣɑ mɑ yoo yontu hɑlənɑ mɑ səm
mɑ Ɩsɔ kɛ́ mɑ sɑŋ hɑlənɑ mɑ tənɑɣɑ sɩɩʋ.
34 Mɑ yontu ɩ́ lɑ-ŋ teu Tɑcɑɑ,
nyɑɣɑ mɑ yɔɔləɣənɑ.
35 Pəntəlɑɑ ɩ́ sɑɑlɩ yem kɛ tɛtʋ tɔɔ,
ɑsɑɣɑɑ ɩ́ tɑɑ tɑsɑ wɛɛʋ.
Tɑcɑɑ, mɑ sɑŋɩ-ŋ kɛ́.
Ɩ́ sɑ Tɑcɑɑ.