132
Tɑfiiti ɩcɑtɛ Siyɔŋ tɑɑ timpi Tɑcɑɑ wɛɛ tɔ
1 Yosɑlɛm kpɑʋ yontu.
Tɑcɑɑ, tɔɔsɩ Tɑfiiti nɑ ɩ wɑhɑlɑnɑɑ tənɑ tɔɔ.
2 Tɑfiiti ɩnɩ ɩ yɔɣɔtənɑ nɑ ɩ́ tuunɑ Tɑcɑɑ,
nɑ ɩ́ sɩɩ Yɑkɔpʋ Ɩsɔ toŋ tʋ ɩnəɣɩ nɔɣɔ sɩ:
3 Mɑ kɑɑ sʋʋ mɑ tɛ nɑ
mɑ́ həntɩ mɑ kʋhəntʋɣʋ tɔɔ.
4 Mɑ kɑɑ yele nɑ tom kɑɑ-m,
yɑɑ mɑ ɩsəhutu yoosinɑ təmɑ.
5 Hɑlənɑ mɑ́ hiki Tɑcɑɑ kɛ lonte
nɑ Yɑkɔpʋ Ɩsɔ toŋ tʋ ɩnəɣɩ təcɑɣɑlɛ.
6 Tə nɩɩwɑ pɑ yɔɣɔtɑ Ɩsɔ ɑtɑkɑɑ tɔm kɛ Ɩfəlɑtɑ tɛtʋ tɑɑ.
Tə mɑɣɑnɑ-ɩ Yɑɑɑ tɛtʋ hɔɣɔlʋɣʋ tɑɑ.
7 Tə́ polo Tɑcɑɑ təcɑɣɑlɛ.
Tə́ luŋ ɩ nɔɔhɛɛ təsɩɩlɛ.
8 Tɑcɑɑ kʋlɩ nɑ ń kɔɔ nyɑ́ təhɛɛsəlɛ.
Nyɑnɑ nyɑ́ teeli ɑtɑkɑɑ.
9 Nyɑ́ kɔtəlɑɑ ɩ́ suu nyʋɣʋ yɑpʋ ɩsɩɩ wontu
nɑ nyɑ́ tɑmpɑnɑ təŋlɑɑ wilitinɑ lɑŋhʋlʋmlɛ.
10 Nyɑ́ təmlɛ tʋ Tɑfiiti tɔɔ,
tɑɑ lɔ wei n ləsɑɑ tɔ.
11 Tɑcɑɑ tɛmɑ Tɑfiiti kɛ heeluɣu nɑ tuunɑʋ.
Ɩ kɑɑ məlɩ wɑɑlɩ.
Ɩ tɔmɑ sɩ: Nyɑ́ tɑpʋɣʋ tɛɛ pəyɑɣɑ kɛ
mɑɑ sɩɩ nyɑ́ kɑwulɑɣɑ kumte tɔɔ.
12 Sɩ ye nyɑ́ pəyɑlɑɑ tɔkɑ mɑ nɔɣɔ pɛɛlʋɣʋ
nɑ kʋsəsɩɩtʋ nti mɑ sɛɣɛsəɣɩ-wɛ tɔ,
pɑ pəyɑlɑɑ kɑ́ lɛɛtəɣənɑ pɑ kɑwulɑɣɑ
kumte tɔɔ kɛ́ tɑm tɔɔ.
13 Tɑcɑɑ sɔɔlənɑ nɑ ɩ́ ləsɩ Siyɔŋ
sɩ ɩ lɑkɩ ɩ təcɑɣɑlɛ.
14 Nɑ ɩ́ tɔ sɩ: Mɑ təhɛɛsəlɛ ntɛ́ tɑm tɔɔ.
Mɑɑ cɑɣɑ tə tɑɑ. Mpi tɔ, mɑ sɔɔlɑ-tɛɣɛ.
15 Mɑɑ lɑ kʋpɑntʋ kɛ Siyɔŋ nɑ mɑ́ cɛlɛ-ɩ
mpi pɩɩ hɑ-ɩ weesuɣu tɔ.
Nɑ mɑ́ hɑ ɩ kʋnyɔntʋnɑɑ kɛ tɔɣɔnɑɣɑ ŋkɑ pɑɑ nyɩɩlɩ tɔ.
16 Mɑɑ kooli kʋpɑntʋ kɛ mɑ kɔtəlɑɑ.
Nɑ mɑ tɑmpɑnɑ təŋlɑɑ nɑ́ɑ́ wilitinɑ lɑŋhʋlʋmlɛ.
17 Mɑɑ lɑ nɑ Tɑfiiti lʋlʋɣʋ tɑɑ tʋ lɑ wulɑʋ sɔsɔ.
Mɑ tɛmɑ tɑɣɑnʋɣʋ kɛ fətəlɑ kɛ wulɑʋ wei mɑ ləsɑɑ tɔ.
18 Mɑɑ suu wʋlɑʋ kolontunɑɑ kɛ fɛɛlɛ.
Amɑ wʋlɑʋ ntenuɣu kɑ́ mʋɣɩ kɔkɔ.