138
Mɑɑ sɑ-ŋ nɑ mɑ lotu tənɑ
1 Tɑfiiti yontu.
Tɑcɑɑ, mɑ sɛɛ-ŋ nɑ mɑ lotu tənɑ.
Nɩɩ mɑ kʋyɔɣɔtʋtʋ, mɑ yoo-ŋ yontu kɛ
ɩsɔtɑɑ toŋtʋnɑɑ ɩsɛntɑɑ.
2 Mɑ luŋiɣi nyɑ́ təsɛɛlɛ nɑŋŋ nyəntɛ tɑɑ
kɛ́ nyɑ́ kʋpɑntʋ nɑ nyɑ́ tɑmpɑnɑ tɔɔ.
Mpi tɔ, n lɑpɑ nɑ nyɑ́ nɔɔsɩ sɩɩʋ té
nɑ pə́ tɛɛ pə tənɑ.
3 Wɑɑtʋ wei mɑ yɑɑ-ŋ tɔ n cɔ-m,
nɑ ń tʋ-m ɑpɑlʋtʋ nɑ toŋ.
4 Tɑcɑɑ, ɑtɛ ɑwulɑɑ tənɑ kɑ́ sɛɛ-ŋ.
Wɑɑtʋ wei pɑɑ nɩɩ nyɑ́ nɔɣɔ tɑɑ tɔm tɔ.
5 Pɑɑ sɑ nyɑ́ təmɑ nɑ pɑ́ yooki sɩ:
Tɑcɑɑ teeli tɔɔwɑ sɔsɔm.
6 Tɑcɑɑ wɛ ɩsɔtɑɑ kɛ́,
nɑ ɩ́ nɑɑkɩ mpɑ pɑ pɑsəɣɩ pɑ tɩ tɔ.
Nɑ ɩ́ loosiɣi kɑlɑmpɑɑnɩ nyə́mɑ kɛ
pooluŋ nɑ ɩ́ nyəmɑ-wɛ.
7 Ye mɑ wɛ lɑŋwɑkəllɛ tɑɑ,
nyɑ́ hɑɑkənɑ-m weesuɣu.
Pɑɑ mɑ kolontunɑɑ pɑ́ɑ́nɑ́ kɑ́ kpɑ ɩsənɑ,
n kɑ wɑɑsɩ-m kɛ́.
8 Tɑcɑɑ n kɑ́ lɑ-m mpʋ,
nyɑ́ kʋpɑntʋ fɛɩ tənɑɣɑ.
Tɑɑ lɔ mpi n ŋmɑnɑ nyɑ́ niŋ tɔ.