143
Tɑcɑɑ tɑɑ yɑɑ-m nɔnɔɣɔ
1 Tɑfiiti yontu nti tə wɛ yonyoolɑɑ
nyʋɣʋ tʋ yontunɑɑ tɑɑ tɔɣɔlɔ.
Tɑcɑɑ nɩɩ mɑ sələmʋɣʋ,
ke ŋkpɑŋŋ nɑ ń nɩɩ mɑ wiinɑʋ.
Mʋ mɑ sələmʋɣʋ kɛ nyɑ́ kʋpɑntʋ nɑ nyɑ́ siɣisuɣu tɔɔ.
2 Tɑɑ yɑɑ nyɑ́ təmlɛ tʋ mɑɣɑ nɔnɔɣɔ.
Mpi tɔ, nɔɣɔlʋ tɑ siɣisi nyɑ́ ɩsɛntɑɑ.
3 Mɑ wɛnɑ kolontu nɑ ɩ́ tʋɣʋ-m wɑhɑlɑ.
Ɩ́ fɛləɣɩ-m ɑtɛɣɛ.
Ɩ cɑɑləɣɩ-m sɩ mɑ́ wɛɛ səkpɛtʋɣʋ tɑɑ,
ɩsɩɩ mpɑ pɑ tɛmɑ səpʋ tɔ.
4 Mɑ ɑpɑlʋtʋ hoowɑ mɑ tɑɑ kɛ́,
nɑ mɑ lɑɑkɑlɩ pəsɩ.
5 Mɑ tɔɔsəɣɩ lɔŋtɑɑ kʋyɛɛŋ tɔɔ kɛ́,
nɑ mɑ́ mɑɣɑsəɣɩ nyɑ́ təmɑ tənɑ tɔm,
nɑ mɑ́ hʋʋkɩ nyɑ́ niŋ təmɑ tɔɔ.
6 Mɑ kpɑɑsəɣɩ niŋ kɛ nyɑ́ ɩsɛntɑɑ kɛ́.
Mɑ wɛ nyɑ́ ɩsɛntɑɑ kɛ́ ɩsɩɩ tɛtʋ nti tə kɑwɑ tɔ.
7 Hɑɩ, Tɑcɑɑ, cɔ-m lɔŋ.
Mɑ tɑlɑ mɑ tənɑɣɑ kɛ́.
Tɑɑ hɑ-m siɣile, tɔfɔ,
mɑ wɛɛkɩ ɩsɩɩ ɑtɛtəlɛ tɑɑ sʋʋlɑɑ.
8 Heeli-m sɩ n wɛ teu kɛ hɑtoo tɑnɑŋ tɛɛ.
Mpi tɔ, mɑ pɛtɑ-ŋ mɑ təɣɩ.
Yele nɑ mɑ́ nyɩ mpɑɑʋ ŋku kʋ tɑɑ mɑɑ tɔ tɔ.
Pə tɑɣɑ pʋlʋ, nyɑ́ tɔɔ kɛ́ mɑ sələməŋ kpɑɑkɩ.
9 Hɑɩ, Tɑcɑɑ, wɑɑsɩ-m mɑ kolontunɑɑ niŋ tɑɑ.
Nyɑ́ cɔlɔɣɔ mɑ pɛɛkəɣɩ kpʋlʋɣʋ tʋɣʋ.
10 Sɛɣɛsɩ-m nyɑ́ luɣu nyəntʋ lɑpʋ.
Mpi tɔ, n kɛ́ mɑ Ɩsɔ kɛ́.
Nyɑ́ Feesuɣu kʋpɑŋkʋ ɩ́ tiiki-m mpɑɑʋ kʋhʋlʋmʋɣʋ tɑɑ.
11 Tɑcɑɑ hɑ-m weesuɣu kɛ nyɑ́ hətɛ tɔɔ.
Ləsɩ-m lɑŋwɑkəllɛ tɑɑ kɛ́ nyɑ́ siɣisuɣu tɔɔ.
12 Wɑkəlɩ mɑ kolontunɑɑ kɛ nyɑ́ kʋpɑntʋ tɔɔ.
Yele nɑ mɑ ŋmɑkəllɑɑ tənɑ le.
Pə tɑɣɑ pʋlʋ, mɑ kɛ́ nyɑ́ təmlɛ tʋ kɛ́.