147
Ɩsɔ pəsʋɣʋ tɔm
1 Ɩ́ sɑ Tɑcɑɑ.
Mpi tɔ, pə wɛ teu kɛ́ sɩ tə́ sɑ tɑ́ Ɩsɔ.
Nyɑ́ sɑmtʋ wɛ leleŋ kɛ́ nɑ tə́ lɑkɩ kʋpɑntʋ.
2 Tɑcɑɑ tɑɣɑnəɣɩ Yosɑlɛm kɛ ŋmɑʋ.
N kpeɣeliɣi Ɩsɛɣɛlɩ nyə́mɑ mpɑ pɑɑ kuuwɑ tɔ.
3 Nyɑ hɛɛsəɣənɑ lɑŋwɑkəllɛ nyə́mɑ lɑŋɑ,
nɑ ń hɔkəɣɩ pɑ hiŋnɑɑ.
4 Nyɑ́ kɑləɣənɑ ɩsɔtʋlʋŋɑsɩ nyʋɣʋ,
nɑ ń hɑ pɑɑ ŋkɑɣɑ kɑ hətɛ.
5 Tɑ Ɩsɔ n kɛ́ sɔsɔ kɛ́, nyɑ́ tomɑ fɛɩ tənɑɣɑ,
pə́cɔ nyɑ́ nyəm fɛɩ kɛɛsʋɣʋ.
6 Tɑcɑɑ n kʋsəɣɩ mpɑ pɑ pɑsəɣɩ pɑ tɩ tɔɣɔ.
Amɑ n tisiɣi ɑsɑɣɑɑ kɛ ɑtɛ.
7 Ɩ́ sɛɛ Tɑcɑɑ kɛ nyɑ́ nɑ təmlɛ nɑ Yontu.
Ɩ́ sɑ tɑ Ɩsɔ nɑ cəmʋɣʋ.
8 N wɑɑsəɣɩ ɩsɔŋmʋntʋ kɛ ɩsɔtɔnʋɣʋ tɔɔ.
N tɑɣɑnəɣɩ tɛʋ sɩ kʋ nɩɩ tɛtʋ tɔɔ.
Nɑ ń lɑkɩ nɑ nyɩɩtʋ nyɔɔkɩ pɔɔŋ tɔɔ.
9 N hɑɑkɩ hʋntʋ wontu kɛ tə tɔɣɔnɑɣɑ,
nɑ ń cɑləɣɩ kɑtəkɑtəŋ piyɑ kɛ sɑɑ wei sɩ wiiki tɔ.
10 Tɑcɑɑ nn yɔɔləɣənɑ kpɑɣɑnəŋ kpelekpekɑ nyəŋ,
pə́cɔ yoolu tomɑ tɑ kɛ-ŋ pʋlʋ.
11 Amɑ mpɑ Tɑcɑɑ cɑɑkɩ tɔɣɔlɛ mpɑ pɑ nyɑŋnɑ-ŋ
nɑ pɑ́ tɛɛləɣɩ nyɑ́ kʋpɑntʋ tɔ.
12 Yosɑlɛm nyə́mɑ mɛ ɩ́ sɑ Tɑcɑɑ.
Siyɔŋ nyə́mɑ ɩ́ sɑ mə Ɩsɔ.
13 Mpi tɔ, Ɩsɔ nyɔɔsəɣənɑ mə kɑmpʋnɑɑ kʋkɑləsəŋ
nɑ ɩ́ kooliɣi-mɛɣɛ kʋpɑntʋ kɛ mə ɩcɑtɛ tɑɑ.
14 Ɩsɔ hɑɑnɑ mə tɛtʋ kɛ hɛɛsʋɣʋ,
nɑ ɩ́ hɑɑkɩ-mɛɣɛ tɔɣɔnɑɣɑ kʋpɑŋkɑ.
15 Ɩsɔ yɔɣɔtəɣənɑ nti ɩ cɑɑkɩ tɔɣɔ tɛtʋ tɔɔ,
nɑ ɩ tɔm tɔŋ lɔŋlɔŋ.
16 Ɩsɔ yeki nɑ tɛʋ tɔmpɛɛ kpɑɑkpɑɑcɑʋ hotiɣi, nɑ ɑ́
hʋlʋmɑɑ ɩsɩɩ heeŋ hʋntʋ, nɑ tɛʋ lʋm kiiki ɑtɛ nɑ pə́
hʋlʋmɑɑ ɩsɩɩ tɔlʋmɑ.
17 Nɑ Ɩsɔ pɛtəɣɩ tɛʋ tɔmpɩɩŋ kɛ ɑtɛ nɑ ɑ wɑtʋ kpɑ.
Nɔɣɔlʋ ɩɩ pəsəɣɩ nɑ ɩ səŋ ɑ nikɑɣɑ tɑɑ.
18 Ɩsɔ yɔɣɔtəɣɩ ɩlɛnɑ tɔmpɩɩŋ ɩnɩ ɩ́ hoo.
Ɩ lɑkɩ nɑ heelim mɑ, ɩlɛnɑ lʋm kpe.
19 Ɩsɔ heelɑ ɩ yəlɑɑ kɛ ɩ tɔm.
Ɩ sɩɩ ɩ kiiŋ nɑ kʋsəsɩɩtʋ kɛ Ɩsɛɣɛlɩ nyə́mɑ.
20 Ɩsɔ tɑ́ lɑ ḿpʋɣʋ piitim nɑpəlɩ.
Pə́cɔ piitim nɑpəlɩ pə tɑ nyɩ Ɩsɔ kʋtʋtʋtʋ.
Ɩ́ sɑ Tɑcɑɑ.