149
Yəlɑɑ kʋpɑmɑ teeli
1 Ɩ́ sɑ Tɑcɑɑ.
Ɩ́ yoo Tɑcɑɑ kɛ yontu kʋfɑtʋ,
ɩ́ yoo ɩ sɑmtʋ kɛ yəlɑɑ kʋpɑmɑ kpekəle tɑɑ.
2 Ɩsɛɣɛlɩ nyə́mɑ ɩ́ yɔɔlənɑ wei ɩ ŋmɑ-mɛ tɔ.
Siyɔŋ nyə́mɑ ɩ́ wɛɛ ɑŋmɑɑlɑ tɑɑ kɛ mə wulɑʋ tɔɔ.
3 Ɩ́ sɑ Ɩsɔ hətɛ nɑ pɑɑlɛ,
ɩ́ sɑ-tɛ nɑ ɑkilimɑ nɑ cəmʋɣʋ.
4 Mpi tɔ, Tɑcɑɑ lɑŋlɛ hɛɛnɑ ɩ yəlɑɑ mɛɣɛ,
nɑ ɩ yɑkɩ mpɑ pɑ pɑsəɣɩ pɑ tɩ tɔ, nɑ pɑ nyɔɔŋ kʋləɣɩ.
5 Yəlɑɑ kʋpɑmɑ ɩ́ wɛɛ ɑcimɑ tɑɑ nɑ pɑ́ tʋ Ɩsɔ kɛ teeli.
Ɩ́ wilitinɑ lɑŋhʋlʋmlɛ kɛ mə kʋhəntəŋ tɔɔ kɛ́ ɑhoo.
6 Ɩsɔ sɑmtʋ ɩ́ wɛɛ mə nɔɔsɩ tɑɑ,
nɑ lɑɣɑtɛ nte tə wɛ lɔŋ kɛ tɑɑ nɑ wɑɑlɩ tɔɣɔ mə niŋ tɑɑ.
7 Nɑ ɩ́ lɛɛtɩ piitimnɑɑ lɛlɑɑ,
nɑ ɩ́ tʋ yəlɑɑ lɛlɑɑ kɛ wɑhɑlɑ.
8 Nɑ ɩ́ hɔkɔ mə ɑwulɑɑ kɛ ɑlukpɑlɑ,
nɑ pɛlɛ pɑ wɑɑlɩ nyə́mɑ kɛ nyəɣətʋ.
9 Nɑ ɩ́ hʋʋnɑ-wɛɣɛ Ɩsɔ hʋʋlɛ ɩsɩɩ pɑ ŋmɑɑʋ tɔ,
pə kɛ́ yəlɑɑ kʋpɑmɑ tənɑ teeli kɛ́.
Ɩ́ sɑ Tɑcɑɑ.