16
Wei pə yɑpɑ səm nɔɣɔ tɑɑ tɔ ɩ lɑŋhʋlʋmlɛ
1 Tɑfiiti yontu.
Hɑɩ, Ɩsɔ, kenti mɑ tɔɔ,
nyɑ́ kiŋ kɛ mɑ cɑɑ mɑ cɔɔsɩ.
2 Mɑ heelɑ Tɑcɑɑ sɩ: Nyɑɣɑlɛ mɑ cɑɑ,
nyɑ́ kiŋ tike kɛ mɑ nɩɩkɩ leleŋ.
3 Ɩsɔ yəlɑɑ mpɑ pɑ wɛ tɛtʋ tɑɑ tɔɣɔ mɑ cɑɑkɩ teu.
4 Yəlɑɑ lʋləsəɣɩ tɩɩŋ kɛ́ nɑ pɑ́ təŋəɣɩ kpɑɩ nyəŋ.
Mɑ kɑɑ lɑɑ tɩɩŋ yɑɑ mɑ́ tɩɩ yɑɑ ɩ həlɑ nɑ mɑ nɔɣɔ.
5 Tɑcɑɑ, nyɑɣɑlɛ mɑ pɑɑ tete,
n hɑɑkɩ-m mpi mɑ nyɩɩləɣɩ tɔ.
N tɔkɑ mpi pɩɩ mɑɣɑnɑ-m cele tɔɣɔ nyɑ́ niŋ tɑɑ.
6 Mɑ pɑɑ tete kʋpɑmpɑntɛ nte mɑ hikɑɑ tɔɣɔlɛ,
mɑ lɑŋlɛ hɛɛnɑ nyɑ́ kʋhɑhɑm mpɩ.
7 Mɑ sɛɛ mɑ lɑɣɑtʋ tɑsʋlʋ Tɑcɑɑ.
Pɑɑ ɑhoo tɑɑ pə sɛɣɛsəɣɩ-m mɑ tɑɑ kɛ́.
8 Mɑ nɑɑkɩ Tɑcɑɑ kɛ tɑm kɛ́.
Mɑɑ cɛŋləɣɩ, mpi tɔ, n wɛ mɑ kɔŋkɔŋ tɑɑ.
9 Pə tɔɔ kɛ́ mɑ hɛɛsɑɑ mɑɑ nyɑŋnɑ pʋlʋpʋ,
nɑ mɑ lɑŋlɛ hʋlʋmɑɑ nɑ mɑ́ yɔɔləɣɩ.
10 Mpi tɔ, n kɑɑ pɛtɩ-m ɑtɛtəlɛ tɑɑ.
Yɑɑ ń yele sɩ nyɑ́ kʋsɔɔlʋ mɑ́,
mɑ́ tɩɩ sɔŋ pəcɔ mɑɣɑmɑɣɑ.
11 Nyɑ́ hʋləɣənɑ-m weesuɣu mpɑɑʋ
nyɑ́ kiŋ kɛ lɑŋhʋlʋmlɛ sɔsɔɔlɛ wɛɛ.
Nɑ ń hɑɑkɩ leleŋ tɑm nyəŋ.