31
Nɑɑni tʋɣʋ kɛ Tɑcɑɑ
1 Tɑfiiti yontu nti tə wɛ yonyoolɑɑ
nyʋɣʋ tʋ yontunɑɑ tɑɑ tɔɣɔlɔ.
2 Tɑcɑɑ nyɑɣɑ mɑ tʋɣɩ kpʋlʋɣʋ,
tɑɑ yele-m nɑ fɛɛlɛ tɔɣɔ-m.
Wɑɑsɩ-m nyɑ́ tɑmpɑnɑ təŋʋɣʋ tɔɔ.
3 Ke ŋkpɑŋʋɣʋ nɑ ń wɑɑsɩ-m lɔŋ.
Pəsɩ mɑ kʋkentuɣu toŋ nyəŋkʋ nɑ mɑ́ nɑ́ nyʋɣʋ.
4 Mpi tɔ, nyɑ́ kentiɣinɑ-m
nɑ ń wɛ ɩsɩɩ mɑ koluŋɑ ɩcɑtɛ.
N kɑ́ tiiki-m nɑ ń pɑɑsənɑ-m nyɑ́ hətɛ tɔɔ.
5 Fiti-m puluɣu ŋku pɑ nyəpɑ-m tɔ kʋ tɑɑ.
Mpi tɔ, nyɑɣɑlɛ mɑ kentilu.
6 Nyɑ́ niŋ tɑɑ kɛ́ mɑ pɛtəɣɩ mɑ tɩ təkpɑtɑɑ.
Nyɑɣɑlɛ Ɩsɔ Tɑcɑɑ tɑmpɑnɑ tʋ,
n kɑ́ wɑɑsɩ-m.
7 Mɑ tɑɑ kpɑɑkənɑ mpɑ pɑ mɑtənɑ tɩɩŋ kpɑɩ nyəŋ ɩnɩ tɔɣɔ.
Amɑ nyɑɣɑ mɑ pɛtɑ mɑ tɩ.
8 Nyɑ́ kʋpɑntʋ tɔɔ kɛ́ mɑ wɛ lɑŋhʋlʋmlɛ nɑ ɑŋmɑɑlɑ pə tɑɑ.
Mpi tɔ, n nɑwɑ mɑ wɑhɑlɑ nɑ ń nyɩ mɑ nəɣəsɛɛ tɔɔ.
9 N kɑɑ pɛtɩ-m kolontu niŋ tɑɑ.
N kɑ́ cɛ-m kɛ́ nɑ ń yele nɑ mɑ́ səŋ mɑ nɔɔhɛɛ tɔɔ.
10 Wulɑ nɩɩ mɑ ɩsɛ nɑ mɑ́ tɑlɑ mɑ tənɑɣɑ.
Hɑɩ, Tɑcɑɑ, nyənɩ mɑ pətɔɔtəlɛ,
mɑ wɛ lɑŋwɑkəllɛ tɑɑ kɛ́.
11 Nəɣəsɛɛ tɔkɑ mɑ weesuɣu nɑ mɑ pɩɩsɩ kɛ́.
Mɑ ɩsɑɣɑtʋ tɛŋnɑ mɑ tomɑ nɑ pə cɑɑməɣɩ-m.
12 Mɑ kolontunɑɑ nɑ pə́ kpɛŋnɑ
mɑ ɑsəmɑɑ pəsɑ-m woŋɑ pʋlʋpʋɣʋ.
Nɑ mɑ tɔm wɛ mɑ tɑɑpɑlɑɑ kɛ sɔɣɔntʋ.
Nɑ pɑ́ nɑ-m ɑwɑlɩ pɑ seeki-m.
13 Mɑ pəsɑ kɛ́ ɩsɩɩ nyənɑɣɑ kʋyɔkɑɣɑ.
Nɑ pɑ́ sɔɔ mɑ tɔɔ ɩsɩɩ sətʋ.
14 Mɑ nɩɩwɑ nti yəlɑɑ yɔɣɔtəɣɩ mɑ tɔɔ tɔ.
Sɔɣɔntʋ tɑmɑ-m kotɑɣɑ kɛ́.
Pɑ cɑkɩ mɑ tɔɔ sɩ pɑ́ ləsɩ mɑ weesuɣu.
15 Amɑ Tɑcɑɑ, nyɑɣɑ mɑ pɛtɑ mɑ tɩ.
Nyɑɣɑlɛ mɑ Ɩsɔ.
16 Nyɑ́ niŋ tɑɑ kɛ́ mpi mɑɑ tɛɛsənɑ tɔ pə wɛɛ.
Fiti-m mɑ kolontunɑɑ nɑ mɑ kʋnyɔntʋlɑɑ.
17 Nyɑ́ ɩsɛntɑɑ ɩ́ hɛtənɑ nyɑ́ təmlɛ tʋ mɑɣɑ teu
nɑ ń yɑ-m nyɑ́ kʋpɑntʋ tɔɔ.
18 Tɑcɑɑ tɑɑ tʋ-m fɛɛlɛ kɛ wɑɑtʋ wei mɑ yɑɑkɩ-ŋ tɔ.
Amɑ mɑ kolontunɑɑ kɑ tɔɣɔnɑ-tɛ.
Pə wɛɛ sɩ pə́ tisi-wɛɣɛ ɑtɛtəlɛ tɑɑ
nɑ pə́ nyɑlɑ pɑ nɔɔsɩ.
19 Yele nɑ footilɑɑ pɔpɔtʋnɑɑ
mpɛ pɑ́ pəsɩ kɑmumusi.
Mpi tɔ, tɑmpɑnɑ təŋlɑɑ kɛ
pɑ holiɣinɑ nɑ kɑlɑmpɑɑnɩ.
20 Pɔpɔtʋ fɛɩ leleŋ,
kʋpɑntʋ sɔsɔɔntʋ kɛ n sɩɩ mpɑ pɑ nyɑŋnɑ-ŋ tɔ.
Yəlɑɑ tənɑ nɑɑkɩ sɩ,
mpɑ pɑ tʋɣʋ-ŋ kpʋlʋɣʋ tɔɣɔ n hɑɑkɩ-tɩ.
21 Pɑ cɔɔsəɣɩ nyɑ́ kiŋ kɛ mpʋ
ɩlɛnɑ ń kenti pɑ tɔɔ sɩ,
kolontunɑɑ ɩ́ tɑɑ tʋ-wɛɣɛ kʋnyɔŋ.
22 Tɑcɑɑ mɑ sɛɛ-ŋ.
Pɩɩ tɑmɑ-m kɛ́ ɩsɩɩ ɩcɑtɛ.
Ɩlɛnɑ ń hʋlɩ-m nyɑ́ kʋpɑntʋ
nɑ ń lɑ-m piti təmlɛ.
23 Mɑ lɑŋlɛ kɑ wɑkəlɑɑ kɛ́,
hɑlɩ mɑ mɑɣɑsɑɣɑ sɩ pə ləsɑ-m nyɑ́ kiŋ.
Ɩlɛnɑ ń nɩɩ mɑ wiinɑʋ.
24 Tɑcɑɑ yəlɑɑ mɛ ɩ́ sɔɔlɩ Tɑcɑɑ.
Mpi tɔ, Tɑcɑɑ feŋiɣi mpɑ pɑ tɔkəɣɩ ɩ tɔm kɛ teu tɔɣɔ.
Ɩlɛnɑ ɩ́ lɛɛtəɣɩ kɑlɑmpɑɑnɩ nyə́mɑ nɑ pɑ́ɑ́nɑ́.
25 Mə tənɑ mpɑ mɛ ɩ́ tʋɣɩ Tɑcɑɑ kɛ nɑɑni tɔ,
ɩ́ tɔɣɔ ɑpɑlʋtʋ nɑ ɩ́ nyɔɔ toŋ.